-->

Feb 22, 2012

སྙིམ་པའི་གླུ།





སྙིམ་པའི་གླུ།
(গীতান্জলি)
(गीताञ्जलि)
(Gitanjali)


ཋཱ་ཀུར།



བདག་ནི་ཁྱོད་ཀྱིས་ལྷག་མེད་བྱས།།

འདི་ཀོ་ཁྱོད་ཀྱི་མཛད་པ་ཉིད།།

སྣོད་ནི་སྟོང་བར་བྱས་ནས་སླར།།

ཚེ་སྲོག་གསར་བས་དགང་བར་བགྱིད།།


འཕྲེད་གླིང་ཆུང་ཆུང་བཟུང་ནས་ནི།།

རི་དང་གཙང་བོའི་རགས་ལ་འཁོར།།

སྙན་འཇེབས་རྟག་བརྟན་རོལ་དབྱངས་ནི།།

དབུགས་ཀྱི་ཟོལ་གྱིས་སྦུ་གུར་འདྲེན།།


ཁྱོད་ཀྱི་འཆི་མེད་རེག་པ་ནི།།

ཐོབ་ནས་བདག་ནི་མཚམས་ལས་འགོངས།།

སྒྲས་ནི་ཕུལ་བྱུང་དགའ་བ་དེ།

མྱངས་ནས་ཕྱི་ལ་ལུད་པ་མཐོང་།།


སྦྱིན་པ་རྟག་ཏུ་གནང་མོད་ཀྱང་།།

སྣོད་ནི་ད་དུང་སྟོང་བར་གདའ།།

ཉིན་མཚན་ཀུན་ཏུ་ཁྱོད་སྤྲོད་ཀྱང་།།

བདག་ལ་ཐོབ་པ་ཁྱོར་བ་གང་།།


སྦྱིན་པ་ཉིན་མཚན་ཀུན་སྦྱིན་ཡང་།།

བདག་ལ་ཁྱོར་བ་གང་ཙམ་རེག།

དུས་ནི་ཀུན་ཏུ་སྦྱིན་བྱེད་ཀྱང་།།

སྣོད་ལ་ད་དུང་སྟོང་ཆ་བདོག།


ཁྱོད་ཀྱིས་གླུ་ལེན་བསྐུལ་ཙ་ན།།

བདག་ཡིད་སྙེམས་པས་ཁེངས་པར་གྱུར།།

མིག་ཟུང་ཟམ་མེ་ཟིམ་མེའི་ངང་།།

ཁྱོད་ཞལ་འཛུམ་མེད་ལྟ་བའི་ཚེ།།

སྐྱུར་དང་སྡུག་ཏུ་འཁྱིལ་བའི་སེམས།།

བདུད་རྩིའི་རང་བཞིན་གླུ་རུ་བཞུས།།

བདག་གི་སྒྲུབ་དང་མཆོད་དོ་ཅོག།

བྱ་བཞིན་སྤུ་ལངས་འཕུར་མཆོངས་བྱེད།།

བདག་གླུ་གསན་ནས་ཚིམས་པ་ཤེས།།

བདག་གཞས་སྙན་པར་ཚོར་བ་རིག།

གླུ་ལེན་སྟོབས་དག་ཉིད་ཀྱིས་ནི།།

ཁྱོད་དྲུང་བརྙེས་པའང་བདག་གིས་རྟོགས།།

སེམས་ནས་ཇི་སྲིད་འགྲོ་མི་ཤེས།།

ཞབས་དག་གླུ་ཡི་སྟོབས་ཀྱིས་རེག།

བརྒྱལ་འགྱུར་དབྱངས་ཀྱིས་བདག་བཟི་སྟེ།།

རང་གི་རྗེ་ལ་གྲོགས་ཞེས་བོས།།


གསལ་བཤད།

མུར་ལཱི་དྡྷར། ཤྲཱི་བཱསྟབ་ཤེ་ཁ་རའི་ཧིན་འགྱུར་གཞིར་བཞག་སྟེ་བསྒྱུར་བའོ།།

སྙིམ་པའི་གླུ་ཞེས་པ་འདི་བདག་ཉིད་ཀྱིས་བསམ་གཞིགས་དང་རྟོགས་ཞིབ་རྒྱུན་རིང་བྱས་མཐར་བསྒྱུར་ཏེ་བཏགས་ཤིང་། ཟམ་གདོང་བླ་མ་དང་གར་ཤ་དངོས་གྲུབ་གཉིས་ཀའི་ཐུགས་་ཀྱི་དགུ་ཡུལ་ལའང་མ་ཚུད་པའི་བརྡ་ཆད་དག་མོ་འགྱུར་ཇི་བཞིན་པ་ཞིག་ཏུ་བདག་འདོད་ཡོད།

Feb 10, 2012

ཀླུ་ཀུན་ཏུ་དགའ་བ་ཞེས་བྱ་བའི་ཟློས་གར། ༣

ཞུ་སྒྲིག་པ། ཟླ་བ་གཞོན་ནུ།

འབངས་མོས། རྗེའི་སྲས་མོ། དེ་ལྟར་མ་སེམས་ཤིག གང་གིས་ཁྱོད་མཐོང་བ་དེས་གཞན་དུ་ཡང་བརྗོད་དོ་ཞེས་བྱ་བ་ལ་བདག་ཡིད་མི་ཆེས་སོ།། དེས་ན་གཏམ་གྱི་མཐར་ཐུག་པ་རེ་ཞིག་བརྟག་པར་བྱའོ།།

འདྲེན་པས། གྲོགས་པོ། རྡོ་བའི་གཞི་འདི་ལ་དེ་ཉིད་བྲིས་ཏེ། རི་མོར་གྱུར་པ་དེ་དང་བདག་ཉིད་རྩེ་ཞིང་འདུག་པར་བྱའོ་སྙམ་མོ།། དེས་ན་རིའི་ངོས་འདི་ཉིད་ནས། ལྡོང་རོས་ཀྱི་དུམ་བུ་དག་ལོངས་ལ་ཤོག་ཅིག

བིདཱུཀས། གྲོགས་པོ། ཁོད་གང་གསུངས་པའོ།།༼དེ་ལྟར་བྱས་ནས༽ ཡོངས་སུ་བསྐོར་ཅིང་འཁྱེར་ཡོང་ནས༽ཀྱེ། ཁྱོད་ཀྱིས་ཁ་དོག་གཅིག་ལོངས་ཞེས་གསུངས་ནའང་། བདག་གིས་ནི་རི་འདི་ལས་རྙེད་སླ་བའི་ཚོན་ཁ་དོག་ལྔ་ཡང་བླངས་ཏེ་མཆིས་སོ།། དེས་ན་ལེགས་པར་བྲིས་ཤིག་༼ཅེས་གཏད་དོ།།༽

འདྲེན་པས། གྲོགས་པོ། ལེགས་པར་བྱས་སོ།། ༼བླངས་ནས་མངོན་པར་བྲིས་ཏེ་སྤུ་ལོང་དང་ལྡན་པར༽གྲོགས་པོ། ལྟོས་ཤིག ལྟོས་ཤིག

མ་ཉམས་བིམ་པ་ལྟར་མཛེས་མཆུ།། མིག་གི་དགའ་སྟོན་དགའ་མ་ཡི།།

བཞིན་རས་རི་བོང་ཅན་གྱི་བཞིན།། དང་བོ་མཐོང་འདིས་སེམས་དགའ་བྱེད།། ༼ཅེས་བྲིས་སོ།།༽

བིདཱུཀས། ༼ཡ་མཚན་དང་བཅས་པར༽འདི་ནི་ཡ་མཚན་ཆེ་སྟེ། ཀྱེ་གྲོགས་པོ། མངོན་སུམ་དུ་གྱུར་པ་མ་ཡིན་ཡང་། དེ་ལྟར་མངོན་པར་འབྲི་བ་ནི་ཡ་མཚན་ཆེའོ།།

འདྲེན་པས། ༼འཛུམ་པ་དང་བཅས་པར༽

དགའ་མ་འདི་ཡང་ཀུན་རྟོག་ལ།། གནས་པ་དག་ནི་ཉེ་བ་ཉིད།།

དེ་བལྟས་བལྟས་ཤིང་འབྲི་བ་གང་།། འདི་ལ་ཡ་མཚན་ཅི་ཞིག་ཡོད།།

འདྲེན་མས། ༼ཤུགས་རིང་ཕྱུང་ཞིང་མཆི་མ་དང་བཅས་པར༽གྲུང་མོ། ངེས་པར་གཏམ་གྱི་མཇུག་ཏུ་གྱུར་ཏོ།། དེས་ན་ཚུར་ཤེག རེ་ཞིག་ཇོ་བོ་བཤེས་གཉེན་གྱི་དབྱིག་ཀྱང་བལྟ་བར་བྱའོ།།

འབངས་མོས། ༼ཡིད་འབྱུང་བ་དང་བཅས་ཤིང་རང་གིས་རྟོགས་པར༽འདིའི་གཏམ་ནི་སྲོག་ལ་ཡང་ལྟོས་པ་མེད་པ་བཞིན་ནོ།། ༼གསལ་བར༽རྗེའི་སྲས་མོ། དེར་མེ་ཏོག་སར་བ་ཅན་སོང་བ་མ་ཡིན་ནམ། དེས་ན་བཤེས་གཉེན་

གྱི་དབྱིག་འདི་ཉིད་དུ་འོང་བ་ཡང་སྲིད་དོ།།

༼དེ་ནས་བཤེས་གཉེན་གྱི་དབྱིག་ཞུགས་པར་གྱུར་ཏོ།།༽

བཤེས་གཉེན་གྱི་དབྱིག་གིས། ཡབ་ཀྱིས་བདག་ལ་བཀའ་བསྩལ་པ། བུ་བཤེས་གཉེན་གྱི་དབྱིག གཞོན་ནུ་སྤྲིན་གྱི་གཞོན་པ་བདག་གིས་ཡོངས་སུ་བརྟག་པ་བྱས་ཏེ་འདི་ཉིད་ན་ཉེ་བར་གནས་སོ།། འདི་ནི་བདག་ཅག་གི་མག་པར་འོས་པ་ཡིན་པས། དེ་ལ་བུ་མོ་མ་ལ་ཡ་ཅན་མ་སྦྱིན་པར་གྱིས་ཤིག བདག་ནི་བྱམས་པའི་དབང་དུ་གྱུར་བས་གཞན་པའི་གནས་སྐབས་འགའ་ཞིག་ཀྱང་སེམས་པར་བྱེད་དེ། གང་གི་ཕྱིར།

གང་ཞིག་རིག་འཛིན་རྒྱལ་རིགས་ཐིག་ལེ་ཤེས་རབ་དམ་པའི་འདོད་པ་དག་དང་ལྡན།།

གཟུགས་ནི་ཟླ་ཡོད་མ་ཡིན་ཕ་རོལ་གནོན་པའི་ནོར་ལྡན་མཁས་ཤིང་དུལ་ལ་གཞོན།།

གང་ཡང་སྙིང་རྗེས་སེམས་ཅན་དོན་ལ་མངོན་སྦྱོར་སྲོག་ཀྱང་ཀུན་ཏུ་གཏོང་བ་དེས།།

དེ་ལ་མཚུངས་མེད་སྲིང་མོ་སྦྱིན་ལ་དགའ་བ་དང་ནི་ཆགས་བྲལ་དང་ཡང་ལྡན།།

ཇིལྟར་སྤྲིན་གྱི ་གཞོན་པ་འདིགོོརཱིའི་བསྟིགནས་དང་ཉེ་བ་ཙན་དན་འཁྲི་ཤིང་གི་ཁང་བ་འདི་ཉིད་ན་གནས་སོ་ཞེས་བྱ་བ་ཡང་བདག་གིས་ཐོས་སོ།། དེས་ན་ཙན་དན་འཁྲི་ཤིང་གི་ཁང་བ་འདི་ཉིད་དུ་འགྲོ་བར་བྱའོ།།

༼བལྟས་ནས་ཞུགས་ཏེ་གར་བྱེད་དོ།།༽

བིདཱུཀས། ༼རིངས་པ་དང་བཅས་པར་མཐོང་ནས༽ ཀྱེ་གྲོགས་པོ། ཆུ་ཤིང་གི་འདབ་མ་འདིས་རི་མོར་གྱུར་བ་འདི་སྒྲིབས་ཤིག གྲུབ་པའི་རྒྱལ་ཚབ་བཤེས་གཉེན་གྱི་དབྱིག་འདི་འདིར་ངེས་པར་འོངས་ཏེ། གལ་ཏེ་ན་

མཐོང་བར་འགྱུར་རོ།།

འདྲེན་པས། ༼དེ་ལྟར་བྱེད་དོ༽

བཤེས་གཉེན་གྱི་དབྱིག་གིས། ༼ཉེ་བར་བཏུད་ནས༽ གཞོན་ནུ། བཤེས་གཉེན་གྱི་དབྱིག་ཕྱག་བགྱིད་དོ།།

འདྲེན་པས། བཤེས་གཉེན་གྱི་དབྱིག་ལེགས་པར་འོངས་སམ། འདིར་འདུག་ཅིག

འབངས་མོས། རྗེའི་སྲས་མོ། ཇོ་བོ་བཤེས་གཉེན་གྱི་དབྱིག་ནི་བྱོན་པ་ཉིད་དོ།།

འདྲེན་མས། བུ་མོ། བལྟ་བར་བྱའོ།།

འདྲེན་པས། བཤེས་གཉེན་གྱི་དབྱིག གྲུབ་པའི་རྒྱལ་བོ་ཀུན་གྱི་དབྱིག་དགེའམ།

བཤེས་གཉེན་གྱི་དབྱིག་གིས། དགེའོ།། ཡབ་ཀྱི་གསུང་ཉིད་ཀྱིས་བདག་ནི་ཁྱོད་ཀྱི་མངོན་དུ་འོངས་སོ།།

འདྲེན་པས། གྲུབ་པའི་རྒྱལ་བོ་ལགས་བདག་ལ་ཅི་ཞིག་གསུང་།

འདྲེན་མས། རེ་ཞིག་ཡབ་ཀྱིས་ཅི་ཞིག་གསུངས་པ་དག་མཉན་པར་བྱའོ།།

བཤེས་གཉེན་གྱི་དབྱིག་གིས། ༼དགའ་བ་དང་བཅས་པར༽ ཡབ་ནི་འདི་སྐད་གསུང་སྟེ། བདག་གི་བུ་མོ་ཡ་ལ་ཡ་ཅན་ཞེས་བྱ་བ་གྲུབ་པའི་རྒྱལ་རིགས་ཐམས་ཅད་ཀྱི་སྲོག་ལྟ་བུ་དེ་བདག་གིས་ཁྱོད་ལ་སྦྱིན་གྱིས་བླངས་པར་མཛོད་ཅིག་ཅེས་སོ།།

འབངས་མོས། ༼བགད་ནས༽ རྗེའི་སྲས་མོ། ད་ནི་ཁྲོ་བར་མ་མཛད་ཅིག

འདྲེན་མས། བུ་མོ། ཚིམ་པར་མ་བྱེད་ཅིག (དགོད་པར་མ་བྱེད། འདི་དག་གི་སྙིང་གཞན་ལ་ཆགས་པ་ཉིད་ཁྱོད་བརྗེད་དམ་ཅི།)[1]

འདྲེན་པས། སྐྱེ་བོས་དབེན་པར་གྲོག་པོ་?དོག་པ་ཏག་ཏུ་ལྷུང་བར་གྱུར་ན། བདག་གིས་ཅི་ཞིག་སྨྲ་བར་བྱ། (གྲོགས་པོ། ང་རང་བྱ་བའི་སྐོབས་སུ་ཚུད་སོང་།[2])

བིདཱུཥཀས། ཀྱེ ཁྱོད་ཀྱིས་སེམས་དེ་མ་གཏོགས་པ་གཞན་པ་དག་ལ་མངོན་པར་དགའ་བར་མི་འགྱུར་བ་བདག་གིས་ཤེས་སོ།། དེ་ལ་ན་ཡང་འདི་(བཤེས་གཉེན་གྱི་དབྱིག)ལ་གང་ཅུང་ཟད་སྨྲོས་ལ་གཏང་བར་མཛོད་ཅིག

འདྲེན་མས། ༼ཁྲོ་བ་དང་བཅས་པར་༽ཀྱེ། འབངས་དག དེ་སུས་མི་ཤེས།

འདྲེན་པས། ཁྱེད་ལྟ་བུ་དང་ལྷན་ཅིག་འབྲེལ་བ་བསྔགས་པར་འོས་པ་འདི་འདྲ་བ་དག་སུ་ཞིག་མི་འདོད། འོན་ཀྱང་གཞན་དུ་ཞུགས་པའི་སེམས་དག་གཞན་དུ་རབ་ཏུ་འཇུག་པར་མི་ནུས་སོ།། དེའི་ཕྱིར་བདག་ནི་འདི་ལེན་པར་སྤྲོ་བ་མེད་དོ།།

འདྲེན་མས། ༼རྨོངས་པའི་(བརྒྱལ་བར་གྱུར་བའི[3])གར་དག་བྱེད་དོ༽

འབངས་མོས། རྗེའི་སྲས་མོ་དག རབ་ཏུ་སྟོན་ཅིག (དབུགས་ཕྱུངས། དབུགས་ཕྱུངས[4]) རབ་ཏུ་སྟོན་ཅིག

བིདཱུཥཀས། ཨེ། འདི་ནི་ངེས་པར་གཞན་གྱི་དབང་དུ་གྱུར་་ཞིག་སྟེ། བརྗོད་པ་འདི་དག་གིས་ཅི་ཞིག་བྱ། སོང་སྟེ་བླ་མའི་སྐྱེ་བོ་དེ་ཉིད་ལ་དོན་དུ་གཉེར་བར་བྱའོ།།

བཤེས་གཉེན་གྱི་དབྱིག་གིས། ༼བདག་ཉིད་ཀྱིས་རྟོགས་པར༽འདིས་ལེགས་པར་བརྗོད་དེ། འདི་ནི་

བླ་མ་དག་གི་གསུང་ལས་འདའ་བ་མ་ཡིན་ནོ།། འདིའི་བླ་མ་དག་ཀྱང་གཽ་རཱིའི་བསྟི་གནས་དང་ཉེ་བ་འདིཉིད་ན་རབ་ཏུགནས་སོ །། དེས་ན་རེ་ཞིག་སོང་སྟེ། འདིའི་ཕ་མ་དག་མ་ལ་ཡ་ཅན་མ་ལེན་དུགཞུག་པར་བྱའོ།།

འདྲེན་མས། ༼དབུགས་ཕྱིན་པར་གྱུར་ཏོ།།༽

བཤེས་གཉེན་གྱི་དབྱིག་གིས། ༼གསལ་བར༽ འདི་སྐད་སྨྲ་བ་བྱེད་པའི་བདག་ཉིད། བདག་ཅག་རྣམས་འགོག་པར་བྱེད་ཅིང་གཞོན་ནུ་ཉིད་ཀྱིས་ཤིན་ཏུ་མང་བར་མཁྱེན་ནོ།།

འདྲེན་མས། ཇི་ལྟར་སྨད་ཅིང་ཞན་པར་སླར་ཡང་བཤེས་གཉེན་གྱི་དབྱིག་སྨྲ་བར་བྱེད།

༼བཤེས་གཉེན་གྱི་དབྱིག་སོང་བར་གྱུར་ཏོ།།༽

འདྲེན་མས། ༼མཆི་མ་དང་བཅས་ཤིང་བདག་ཉིད་ཀྱིས་རྟོགས་པར༽ སྐལ་བ་ངན་པའི་རྙོག་པས་དྲི་མར་བྱས་ཤིང་། ད་དུང་ཡང་། སྡུལ་བསྔལ་བསྟེན་པ་བདག་གི་ལུས་འདིས་ཅི་ཞིག་བྱ། དེས་ན་ཤིང་མྱ་ངན་མེད་འདི་ཉིད་ལ་ཨ་ཏི་མུཀྟའི་འཁྲི་ཤིང་འདི་དག་གིས་བཏགས་ཏེ། བདག་ཉིད་འཆི་བར་འགྱུར་བ་དེ་ལྟར་རེ་ཞིག་བྱའོ།།

༼གསལ་བར་འཛུམ་པས༽ བུ་མོ། རེ་ཞིག་བཤེས་གཉེན་གྱི་དབྱིག་རིང་དུ་སོང་སམ་མ་སོང་རྟོགས་ཤིག དེ་ནས་བདག་ཅག་ཀྱང་འདི་ནས་འགྲོ་བར་བྱའོ།།

འབངས་མོས། ༼བདག་ཉིད་ཀྱིས་རྟོགས་པར༽འདིའི་སེམས་ནི་གཞན་པ་ཞིག་ཡོད་པ་འདྲའོ།། དེ ས་ན་འདི ་ཉིད་ནས་བསྒྲིབས་ཏེ། འདི་ཅི་ཞིག་བྱེད་པ་དག་བལྟ་བར་བྱའོ།། ༼གསལ་བར༽ རྗེའི་སྲས་མོ། གང་གསུང་བ་ཉིད་དོ།།

ཞེས་ཏེ་ཐོན་ནས་གོམ་པ་འགའ་ཞིག་སོང་སྟེ་བསྒྲིབས་ཏེ་གནས་སོ།།༽

འདྲེན་མས། ༼ཕྱོགས་སུ་བལྟས་ནས་གྲུང་མོ་སོང་བ་དང་འཁྲི་ཤིང་གི་ཞགས་པ་དག་བྱས་ནས། མཆི་མ་དང་བཅས་པར༽ བཅོམ་ལྡན་མ་གོོ་རི གལ་ཏེ་ཁྱོད་ཀྱིས་སྐྱེ་བ་འདི་ལ་བཀའ་དྲིན་མཛད་ན་ཡང་། རེ་ཞིག་སྐྱེ་བ་གཞན་ལ་ཇི་ལྟར་འདི་འདྲ་བའི་སྡུག་བསྔལ་དང་ལྡན་པར་མི་འགྱུར་བ་དེ་ལྟར་མཛོད་ཅིག ༼ཅེས་ཏེ་མགྲིན་པ་ལ་ཞགས་པ་བཅུག་གོ།༽

འབངས་མོས། ༼མཐོང་ནས་རིངས་པ་དང་བཅས་པརསོང་སྟེ ཇོ་བོ་ཇོ་བོ། སྐྱོབས་ཤིག སྐྱོབས་ཤིག ངེས་པར་རྗེའི་སྲས་མོ་འདི་ནི་བདག་ཉིད་དཔྱངས་ཏེ་འཆི་བར་བྱེད་དོ།།

འདྲེན་པས། (རིངས་པ་དང་བཅས་པར་སོང་སྟེ)[5] གང་ན། གང་ན།

འབངས་མོས། མྱ་ངན་མེད་པའི་ཤིང་འདི་ལའོ།།

འདྲེན་པས། ༼མཐོང་ནས་དགའ་བ་དང་བཅས་པར༽ ཨ་ཡེ། བདག་ཅག་གི་ཡིད་ལ་རེ་བའི་ས་གཞི་དེ་ནི་འདི་ཡིན་ནོ།། ༼འདྲེན་མའི་ལག་ནས་བཟུང་སྟེ་ཞགས་པ་འགྲོལ་ཞིང༽ མ་བྱེད་མ་བྱེད་མཛེས་མ་ཐུབ་ཆོད་བྱ་བ་འདི།། འཁྲི་ཤིང་ཡལ་འདབ་རྩེ་ཡི་ལག་པ་འདི་དག་ཐོངས།། གང་གི་མེ་ཏོག་དག་ཀྱང་བཏུ་བར་ནུས་མིན་པ།། དེ་ཡིས་ཁྱོད་ནི་འཆི་སླད་ཞགས་པ་ཇི་ལྟར་འཛིན།།

འདྲེན་མས། ༼འཇིགས་པ་དང་བཅས་པར༽ ཀྱེ་མ། སྨད་དོ།། ཀྱེ་མ། སྨད་དོ།།[6] འདི་སུ་ཞིག

༼ངེས་པར་བརྟགས་ནས་ཁྲོ་བ་དང་བཅས་པར་ལག་པ་འགྲོལ་ཞིང

བདག་ཟློག་པར་བྱེད་པ་ཁྱོད་སུ་ཡིན།[7] ལག་པའི་རྩེ་མོ་དག་ཐོངས་ཤིག ཐོངས་ཤིག འཆི་བ་ཡང་ཁྱོད་ཉིད་ལ་དོན་དུ་གཉེར་བར་བྱེད་དམ་ཅི།

དྲེན་པས། ༼དགའ་བ་དང་བཅས་པར༽བདག་གཏོང་བར་མི་བྱེད་དོ།།[8]

གང་གི་ཁྱོད་མགྲིན་དོ་ཤལ་གྱི། ཁྲི་ཤིང་འོས་ལ་ཞགས་པ་བཅུག།

གནོད་པ་དང་བཅས་བཟུང་བ་ཡི།། ལག་པ་འདི་ནི་ཇི་ལྟར་གཏོང་།།

བིདཱུཀས། ཀྱེ གྲུང་མོ། ཁྱོད་ཀྱི་རྗེའི་སྲས་མོ་འདི་འཆི་བ་ལ་མངོན་པར་ཞེན་པའི་རྒྱུ་དང་ཅི་ཞིག

འབངས་མོས། ཁྱོད་ཀྱིགྲོགས་པོ་འདི་ཉིད་རྒྱུ་ཡིན་ནོ།།

དྲེན་པས། ཇི་ལྟར་ན་ང་ཉིད་འཆི་བའི་རྒྱུ་དག་ཡིན། འདི་ནི་ངེས་པར་མི་ཤེས་སོ།།

བིདཱུཀས། ཀྱེ བུ་མོ། དེ་ཇི་ལྟར།

འབངས་མོས། ཁྲོ་བ་དང་བཅས་པར༽ ཁྱོད་ཀྱི་དགའ་བའི་གྲོགས་པོས། སྙིང་གི་དགའ་གྲོགས་སུ་ཞིག་རྡོ་བའི་གཞི་ལ་བྲིས་པ་དེ་ཉིད་ཀྱི་ཕྱོགས་སུ་ལྷུང་བ་འདིས་བཤེས་གཉེན་གྱི་དབྱིག་གིས་བྱིན་པར་གྱུར་ཀྱང་། བདག་མ་བཞེད་པར་གྱུར་ཏོ་ཞེས་མྱ་ངན་སྐྱེས་ཏེ། འདི་འདི་ལྟ་བུར་གདུང་བར་གྱུར་ཏམ་སྙམ་མོ།།

དྲེན་པས། ༼དགའ་བ་དང་བཅས་པར་བདག་ཉིད་ཀྱིས་རྟོགས་པར༽ ཇི་ལྟར་ཀུན་གྱི་དབྱིག་[9]གི་བུ་མོ་མ་ལ་ཡ་ཅན་མ་དེ་འདི་ཉིད་ཡིན་ནམ། ཡང་ན་ཟླ་བ་ཚེས་པ་རིན་ཆེན་འབྱུང་གནས་ལས་གཞན་གང་ལས་འཁྲུངས་པར་འགྱུར། ཀྱེ་མ།ཡུད་ཙམ་ཞིག་གིས་བདག་མ་བསླུས་སོ།།

བིདཱུཀས། ཀྱེ། བུ་མོ། གལ་ཏེ་དེ་ལྟ་ཡིན་ན་བདག་གི་གྲོགས་པོ་ཉེས་པ་མེད་པ་ཞིག་སྟེ འདི་ཉིད་དེར་བྲིས་པ་ཡིན་ནོ།། ཅི་སྟེ་དེ་ལྟར་ཡིད་མི་ཆེས་ན། བུ་མོ་ཁྱེད་ཉིད་དེར་སོང་ལ་རྡོ་བའི་གཞི་ལ་བལྟ་བར་བྱོས་ཤིག

དྲེན་མས། ༼དགའ་བ་དང་བཅས་ཤིང་ངོ་ཚ་བ་དང་བཅས་པར་འདྲེན་པ་ལ་ལྟཞིང་ལག་པ་འདྲེན་པར་བྱེད་དོ།།༽

དྲེན་པས། ཇི་སྲིད་བདག་གིས་སྙིང་གི་དགའ་མ་རྡོ་བའི་གཞི་ལ་མངོན་པར་བྲིས་པ་མ་མཐོང་བ་དེ་སྲིད་དུ་མི་གཏོང་ངོ་།། ༼ཞེས་ཏེ་ཐམས་ཅད་དེར་སོང་ངོ།།༽

བིདཱུཀས། ༼ཆུ་ཤིང་གི་འདབ་མ་བསལ་ནས༽ ལྟོས་ཤིག ལྟོས་ཤིག འདི་ཉིད་འདིའི་སྙིང་གི་དགའ་མའོ།།

དྲེན་མས། འཛུམ་པ་དང་བཅས[10]ངེས་པར་བརྟགས་ནས༽ གྲུང་མོ། ང་ལྟ་བུ་ཞིག་བྲིས་པ་འདྲའོ།།

འབངས་མོས། བྲིས་པའི་རི་མོ་དང་འདྲེན་མ་ལ[11]ངེས་པར་བརྟགས་ནས༽ རྗེའི་སྲས་མོ། ང་འདྲ་བ་ཞིག་བྲིས་སོ་ཞེས་ཅི་སྟེ་གསུང་། འདི་ཁྱོད་འདྲ་བ་ནི་གང་གིས་ན་ཅི། རེ་ཞིག་རྡོ་བའི་གཞི་འདི་ལ་རྗེའི་སྲས་མོ་ཁྱོད་ཀྱི་གཟུགས་བརྙན་དག་འཕོས་པ་ཡིན་ནམ་འོན་ཏེ་ཁྱོད་བྲིས་པ་ཡིན་ཡང་ཡོངས་སུ་མི་ཤེས་སོ།།

དྲེན་མས། ༼བགད་ནས༽ འདི་ཡི་རི་མོར་གྱུར་་འདི་སྟོན་པར་བྱེད་པ་ནི་བདག་གིས་ངན་པའི་ལུགས་བྱས་སོ།།

བིདཱུཀས། ཀྱེ གོགས་པོ། ད་ནི་ཁྱོད་ཀྱི་དྲི་ཟའི་བག་མ་དག་རྫོགས་པ་གྱུར་ཏོ།། ད་ནི་འདིའི་ལག་པའི་རྩེ་མོ་དག་ཐོངས་ཤིག

དྲེན་པས། ༼དེ་ལྟར་བྱེད་དོ།།༽

འབངས་མོས། ༼དོ་ར་ལས་ཕྱིར་མངོན་པར་ཕྱོགས་ཏེ་བལྟས་ནས༽ ངེས་པར་རིངས་པ་རིངས་པར་འདི་ཉིད་དུ་འོང་བ་འདི་སུ་ཞིག་ཡིན།

༼དེ་ནས་འབངས་མོ་ཞུགས་ཏེ། དགའ་བ་དང་བཅས་པར་ཉེ་བར་བཏུད་ནས༽

འབངས་མོ་གཉིས་པས། རྗེའི་སྲས་མོ་དག གྱེས་པ་འཕེལ་བར་མཛོད་ཅིག མངའ་བདག་གཞོན་ནུ་སྤྲིན་གྱི་བཞོན་པའི་བླ་མ[12]་དག་གིས་གུས་པ་དང་བཅས་པར་དགའ་བའི་གྲོགས་ལ། ཁྱོད་བཞེས་པར་གྱུར་ཏོ།།

བི་དཱུ་ཥ་ཀས། ༼དགའ་བ་དང་བཅས་པར༽དགའ་བའི་གྲོགས་ཀྱི་ཡིད་ལ་རེ་བ་རྫོགས་པར་གྱུར་ཏོ།། ཡང་ན་དེ་མ་ཡིན་ཏེ། མ་ལ་ཡ་ཅན་མ་ཁྱོད་ཉིད་ཀྱིའོ།། ཡང་ན་བྲམ་ཟེ་བདག་ཉིད་ཀྱིའོ།། ༼ཞེས་ཏེ། ཟས་ཀྱི་མངོན་པར་སྦྱོར་བའི་གར་དག་བྱེད་དོ།།༽

འབངས་མོས། རྒྱལ་ཚབ་བཤེས་གཉེན་གྱི་དབྱིག་གིས་བདག་ལ་གསུངས་པ། དེ་རིང་ཉིད་མ་ལ་ཡ་ཅན་མ་ནི་བག་མའོ།། དེས་ན་བཀྲ་ཤིས་ཀྱི་ཁྲུས་ཀྱི་དོན་དུ་མྱུར་བར་བོས་ལ་ཤོག་ཅིག་ཅེས་སོ།། དེའི་ཕྱིར་བྱོན་ཅིག གཤེགས་པར་བགྱིའོ[13]།།

བིདཱུཀས། འབངས་མོའི་བུ་མོ། ངེས་པར་ཁྱོད་འདི་བོས་ཏེ་སོང་ནས་འདི་དག[14]་འདི་ཉིད་དུ་འདུག་པར་བྱའམ་ཅི།

འབངས་མོས། ཨ་ཨི རིངས་པར་མ་བྱེད་ཅིག ཁྱེད་རྣམས་ཀྱི་ཡང་ཁྲུས་ཀྱི་རྫས་དག་འོང་བ་ཉིད་དོ།།

དྲེན་མས། སྒེག་པ་དང་བཅས་པར་འདྲེན་པ་ལྟ་ཞིང་འབངས་མོ་དང་བཅས་ཏེ་སོང་བར་གྱུར་ཏོ།།༽

༼ཕྱི་རོལ་ནས་བསྟོད་པ་མཁན་ཀློག་པར་བྱེད་དོ།།༽

སྟོད་པ་མཁན་གྱིས། ༼ཡོལ་བའི་ནང་ནས་ཀློག་པར་བྱེད་དོ།།༽[15]

བི་ཥ་་ཀའི་ཆར་གྱིས་ལྷུན་པོ་དང་མཚུངས་མཛེས་པ་འཛིན་པ་མ་ལ་ཡ་དག་ལ།།

གསེར་དང་ནོར་བུའི་རྐང་གདུབ་སྒྲ་ལྡན་ཡིད་འོང་སྙན་སྒྲོགས་བུད་མེད་རྣམས་ཀྱི་གླུ་ལྡན་པ།།

ཁྱོད་ཀྱི་བག་མའི་ཁྲུས་ཀྱི་དུས་ནི་གྲུབ་པའི་སླད་དུ་གྲུབ་པའི་འཇིག་རྟེན་ལི་ཁྲི་ཡི།།

རྡུལ་བཀོད་ཉིན་མོ་རབ་ཏུ་རྩོམ་པའི་མཚམས་ཀྱི་ཉི་འོད་དཔལ་དང་ལྡན་རྣམས་སྒྲོགས་པར་བྱེད།།

བིདཱུཥཀས། ༼ཐོས་ནས༽ ཀྱེ། གྲོགས་པོ། ཨེ་མ་འདི་ནི་ཁྱོད་ཀྱི་ཁྲུས་ཀྱིརྫས་དག་འོངས་པ་ཉིད་དོ།།

དྲེན་པས། ༼དགའ་བ་དང་བཅས་པར༽ གྲོགས་པོ། ད་ནི་འདིར་འདུག་ནས་ཅི་ཞིག་བྱ། དེས་ན་ཚུར་ཤེག ཡབ་ལ་ཕྱག་འཚལ་ཏེ་ཁྲུས་ཀྱི་གཞི་ཉིད་དུ་འགྲོ་བར་བྱའོ།།

༼ཕྱི་རོལ་ནས་སར་ཡང་བསྟོད་པ་པོས༽[16]

གཟུགས་དང་རྗེས་ཆགས་རིགས་ན་ཚོད།། མཐུན་པར་ཕན་ཚུན་མཐོང་བྱས་པ།།

བསོད་ནམས་ལྡན་པ་འགའ་ཞིག་ཉིད།། གྲོགས་པར་འགྱུར་བ་ཡིན་ནམ་སྙམ།།

༼ཞེས་ཏེ་སོང་བར་གྱུར་ཏོ།།༽

མཚན་མ་གཉིས་པའོ།།



[1] འདི་བསྟན་འགྱུར་དཔེ་བསྡུར་མར་མི་འདུག

[2] ཞུ་སྒྲིག་པས་བཞག་པའོ།། ལེགས་སྦྱར་དུ་སཾཀཊ(संकट)ཞེས་ཡོད།

[3] ལེགས་སྦྱར་དུ་མཱུཙྪཱཾ(मूच्छां)ཞེས་ཡོད།

[4] ལེགས་སྦྱར་དུ་སམཱཤྭསིཏུ་(समाश्वसितु)ཞེས་ཡོད་པ་ཡིན།

[5] འདི་བོད་འགྱུར་དུ་མི་འདུག ཞུ་སྒྲིག་པས་བསྣན་པ་ཡིན།

[6] འདིར་རྒྱ་གཞུང་དུ་ཀྱེ་གྲུང་མོ་ཞེས་བོས་པ་ཙམ་འདུག

[7] བོད་འགྱུར་དུ་བདག་ཟློག་པར་བྱེད་པའི་ལག་པའི་ཞེས་ཡོད་ཀྱང་འདིར་རྒྱ་དཔེ་དང་བསྟུན་ཏེ་འདི་ལྟར་བསྒྱུར་བ་ཡིན།

[8] ཞུ་སྒྲིག་པས་བཅུག་པའོ།།

[9] འཇིག་རྟེན་གྱི་དབྱིག་གམ་ཐམས་ཅད་དབྱིག

[10] ཞུ་སྒྲིག་པས་བཅུག

[11] ཞུ་སྒྲིག་པས་བཅུག

[12] ཕ་མའི་དོན། གོང་དུའང་སོང་ཟིན།

[13] རྒྱ་དཔེར། དེ་རིང་ནི་མ་ལ་ཡ་ཅན་མའི་གཉེན་སྟོན་ནོ།། དེས་ན་མོ་རིངས་མོར་ཁྲིད་ལ་ཤོག་ཅིག་ཅེས་སོ།། དེས་ན་བདག་ཅག་གཤེགས་པར་བགྱིའོ།།

[14] རྒྱ་དཔེར་གྲོགས་པོ་ཞེས་ཡོད་ལ། འདི་དག་ཅེས་པ་ཁོང་གི་གྲོགས་པོ་སྤྲིན་གྱི་བཞོན་པར་གོ་བ་ཡིན།

[15] རྒྱ་དཔེ་དང་བསྟུན་ཏེ་བཅུག་པའོ།།

[16] འདི་རྒྱ་དཔེར་མི་འདུག