ཟློས་གར་གྱི་བསྟན་བཅོས་ཡང་དག་ལམ་དུ་བཀྲི་བའི་
རོལ་རྩེད་ཅེས་བྱ་བ་བཞུགས་སོ།།
རྩོམ་པ་པོ།
གུང་ཐང་བསྟན་པའི་སྒྲོན་མེ།
ཐོག་མར་དགེ་བ་ཀླད་ཀྱི་དོན།
༄༅།། ཟློས་གར་གྱི་བསྟན་བཅོས་ཡང་དག་ལམ་དུ་བཀྲི་བའི་རོལ་རྩེད་ཅེས་བྱ་བ་བཞུགས་སོ།།
༈ ཚིག་དོན་སྤོབས་པ་ངེས་པའི་ཚིག། སོ་སོ་རིག་པས་འགྲོ་དོན་མཛད།། ཐུབ་པའི་དབང་བོ་ལ་བཏུད་ནས།། རྗེས་མཐུན་རྒྱུ་ལ་འཇུག་པར་འོས།།
བར་དུ་དགེ་བ་གཞུང་གི་དོན།
༈༼དེ་ཡང་རྒྱ་གར་གྱི་སློབ་དཔོན་པྲཛྙཱ། བོད་ཀྱི་བཙུན་པ་ཤེས་རབ། སོག་པོའི་བཙུན་པ་བི་ལིག རྒྱའི་བཙུན་པ་ཚཻ་དཔཱེ་རྣམས་ལྷན་ཅིག་ཏུ་ཚོགས་སོ།།༽ ༼དེ་ནས། ༽
ཚཻ་དཔེ་ན་རེ། རྒྱ་གར་ཆོས་ཀྱི་འབྱུང་ཁུངས་ཡིན། དེང་སང་ཆོས་དར་ས་བོད་དང་སོག་པོ་གཉིས་བཟང་བས། རྒྱ་གར་བླ་མས་འདི་གཉིས་ལ་ཆོས་ཀྱི་དྲི་བ་གནང་སྟེ་ཐུགས་ལ་གང་འབབ་བལྟ་དགོས།
པྲཛྙཱ་ན་རེ། དམ་པའི་ཆོས་ནི་ཐོག་མཐའ་བར་གསུམ་དུ་དགེ་བ་ཞིག་ཡིན་པས། འཇུག་ཚུལ་ཡང་དེ་དང་མཐུན་པ་ཞིག་དགོས།
ཤེས་རབ་ན་རེ། དམ་པའི་ཆོས་ནི་ཐོག་མཐའ་བར་གསུམ་དུ་དགེ་བ་ཞིག་ཡིན་པས་འཇུག་ཚུལ་ཡང་དེ་དང་མཐུན་པ་ཞིག་དགོས་གསུངས་པ་ཤིན་ཏུ་ཐུགས་བདེན།
བི་ལིག་ན་རེ། དམ་པའི་ཆོས་ནི་ཐོག་མཐའ་བར་གསུམ་དུ་དགེ་བ་ཞིག་ཡིན་པས། འཇུག་ཚུལ་ཡང་དེ་དང་མཐུན་པ་ཞིག་དགོས་པ་ངས་ཀྱང་གོ་ལགས།
ཚཻ་དཔཱེ་ན་རེ། བཟང་བཟང་། ཆོས་ཀྱི་མགོ་ནས་ཁྱེད་རྣམས་ཐུགས་མཐུན་བྱུང་བ་རྟེན་འབྲེལ་བཟང་། ཡིན་ཀྱང་ད་དུང་དྲི་བ་ཞིབ་མོ་མང་བོ་གནང་སྟེ་སངས་རྒྱས་ཀྱི་བསྟན་པའི་དག་ཐེར་བྱེད་དགོས།
པྲཛྙཱ་ན་རེ། བོད་དང་སོག་པོའི་བཙུན་གཉིས་ལེགས་པར་ཉོན། ངའི་དྲི་བ་འདི་ལ་ལན་ལེགས་པར་འདེབས་དགོས། ཐོག་མར་ཆོས་ཀྱི་རྩ་བ་གང་ཡིན།
ཤེས་རབ་ན་རེ། ཆོས་ཀྱི་རྩ་བ་སེམས་ཡིན། ཆོས་ཡང་དག་པར་སྡུད་པའི་མདོ་ལས། བྱང་ཆུབ་ནི་ཆོས་ལ་རག་ལས། ཆོས་ནི་སེམས་ལ་རག་ལས་ཞེས་གསུངས་པ་ལྟར་ཡིན།
བི་ལིག་ན་རེ། སེམས་ལ་ཆོས་ཀྱི་རྩ་བར་འགྲོ་མི་འགྲོ་སྣ་ཚོགས་ཡོད་པས། ཁྱོད་ཀྱི་དེ་བཤད་པ་ཞིབ་ཆ་མ་ཐོན་པར་འདུག དཀོན་མཆོག་ཏ་ལ་ལ་ལས། དད་པ་སྔོན་འགྲོ་མ་ལྟར་སྐྱེད་པ་སྟེ།། ཞེས་སོགས་དང་། འདུན་པའི་རྩ་ལ་རབ་ཏུ་གནས།། ཞེས་གསུངས་པ་ལྟར་ཆོས་ཀྱི་རྩ་བ་དད་པ་ཡིན།
ཤེས་རབ་ན་རེ། ཁྱོད་ཀྱིས་ཞིབ་ཆ་ཐོན་པ་བྱས་ཏེ། ནས་ལའང་ས་བོན་རུང་མི་རུང་སྣ་ཚོགས་ཡོད་པས་ནས་མྱུག་གི་ས་བོན་ལ་ནས་མི་འཇོག་པར། ནས་ལས་གཞན་ཞིག་འཇོག་རྒྱུ་ཡིན་ནམ །
བི་ལིག་ན་རེ། ནས་ཀྱི་ས་བོན་ནས་ལས་གཞན་ཞིག་འཇོག་རྒྱུ་མེད་ཀྱང་། ནས་ཡིན་ཚད་ས་བོན་དུ་འཇོག་མི་དགོས་མོད།
ཚེེ་དཔཱེ་ན་རེ། ནས་རུལ་བ་དང་ཚིག་པས་ས་བོན་མི་རུང་བ་ངས་ཀྱང་ཤེས། ཡིན་ནའང་ནས་སྐྱེ་བ་ལ། ནས་འདེབས་དགོས། གྲོ། སྲན་མ། ཁྲེ། སོ་བ་སོགས་འབྲུ་གང་འདེབས་འདོད་ནའང་ས་བོན་ལ་འབྲུ་རང་རང་འདེབས་དགོས།
ཤེས་རབ་ན་རེ། ངས་ཀྱང་སེམས་ཡིན་ཚད་ཆོས་ཀྱི་རྩ་བར་བཞག་པ་མིན། འགྲོ་བ་བཞིའི་ཆོས་ལས་མི་འདའ་བའི་སེམས་ཤིག་འཇོག་རྒྱུ་ཡིན། ཁྱོད་ཀྱིས་ཟེར་བའི་དད་པ་ཅན་གྱི་མཚམས་ཀྱང་དེ་འདྲ་ཞིག་དགོས་པར་རིན་ཆེན་ཕྲེང་བ་ལས་གསུངས་ཡོད།
པྲཛྙཱ་ན་རེ། ཁྱེད་གཉིས་ཚིག་གི་ཟེར་ལུགས་མ་འདྲ་བ་ཙམ་མ་གཏོགས་དོན་ལ་མཐུན་པར་སྣང་། ངའི་ཡིད་ལའང་འཐད་པ་བྱུང་།
བི་ལིག་ན་རེ། འགྲོ་བ་བཞིའི་ཆོས་ལས་མི་འདའ་ཚུལ་སོགས་དྲི་རྒྱུ་འདུག་སྟེ། དོན་གྱི་རྩ་བ་བློ་རྩེ་མཐུན་ཡོད་ན་དེས་ཆོག ཚིག་གི་སྤྲོས་པའི་མཐའ་མི་ཆོད།
ཚེེ་དཔཱེ་ན་རེ། ཆོས་ཀྱི་རྩ་བ་གང་ཡིན་ལ། ཁྱོད་བླ་མ་དང་བཙུན་པ་རྣམས་མི་མཐུན་པ་མེད་པ་དེ་ཤིན་ཏུ་ལེགས། ད་དུང་ཡང་ཆོས་འདི་རྒྱ་ཆེ་གཏིང་ཟབ་པས་འཕྲོས་པ་དོན་ཅན་མང་དུ་གནང་དགོས།
པྲཛྙཱ་ན་རེ། ཆོས་ཀྱི་འཇུག་སྒོ་གང་ཡིན།
ཤེས་རབ་ན་རེ། ཆོས་ཀྱི་འཇུག་སྒོ་སྐྱབས་འགྲོ་ཡིན་ཏེ། ཕྱི་ནང་གི་ཁྱད་པར་ཡང་སྐྱབས་འགྲོའི་སྟེང་ནས་འཇོག་པ་མཉམ་མེད་ཇོ་བོ་ཆེན་པོའི་དགོངས་པ་ཡིན།
བི་ལིག་ན་རེ། ཆོས་སམ་བསྟན་པ་སྤྱིའི་འཇུག་སྒོ་སྐྱབས་འགྲོ། ཐེག་ཆེན་གྱི་འཇུག་སྒོ་སེམས་བསྐྱེད། སྔགས་ཀྱི་འཇུག་སྒོ་དབང་ཡིན་པར་ཡོངས་སུ་གྲགས་མོད། འདི་ལའང་དཔྱད་རྒྱུ་ཞིག་ཡོད་དེ། སྐྱབས་འགྲོ་ལས་ལོགས་སུ་གྱུར་བའི་བསྟན་པ་ཞིག་མེད་ན་འདི་དེའི་སྒོར་འཇོག་ལུགས་མེད། སྐྱབས་འགྲོ་ལས་ལོགས་སུ་གྱུར་བ་ཞིག་ཡིན་ན་དེ་ནང་བའི་ཆོས་མ་ཡིན་པའི་སྐྱོན་དུ་མི་འགྱུར་རམ།
ཚེེ་དཔཱེ་ན་རེ། སོག་པོའི་བཙུན་པས་ཟེར་བ་འདི་བདེན་པ་འདྲ་མོ་ཞིག་འདུག མཁར་གྱི་སྒོ་དང་མཁར་གཉི་ག་མི་གཅིག་པ་བཞིན་ཆོས་ཀྱི་སྒོ་དང་ཆོས་གཉི་ག་སོ་སོར་ཡོད་དགོས་རྒྱུ་ཨེ་ཡིན།
ཤེས་རབ་ན་རེ། དེ་ཁྱེད་གཉིས་ཀས་མ་གོ་བར་སྣང་། སྒོའང་ཕོ་བྲང་གི་ཁོངས་སུ་འདུ་དགོས་པ་མ་གཏོགས། དེ་ཕོ་བྲང་ལས་ལོགས་སུ་ཡོད། ཕོ་བྲང་གི་རྩིག་པའང་ཕོ་བྲང་ལས་ལོགས་སུ་ཡོད། ཀ་བ་གདུང་མ་སོགས་ཀྱང་ཕོ་བྲང་ལས་ལོགས་སུ་ཡོད་ན་དེ་ཚོ་བསལ་ཤུལ་ནས་ཕོ་བྲང་ཞིག་སྟོན་རྒྱུ་ཡོད་དགོས་ཀྱང་དེ་སྟོན་རྒྱུ་མི་རྙེད། དེ་ཐམས་ཅད་ཚོགས་ཙམ་ལ་ཕོ་བྲང་ཞེས་ཕར་བཏགས་པ་ཙམ་ཞིག་ཡིན། དེ་བཞིན་དུ་སྐྱབས་འགྲོའང་བསྟན་པ་ལ་སློབ་པའི་ཐོག་མ་ནས་འཇུག་པ་ཡིན་པས་ན་སྒོ་དང་། ཞུགས་ནས་ཉམས་སུ་ལེན་རྒྱུའི་གཙོ་བ་ཡིན་པས་ན་གཞུང་ཤིང་སོགས་སུ་བཏགས་པ་མ་གཏོགས། བསྟན་པ་ལས་ལོགས་སུ་གྱུར་བའི་དེའི་འཇུག་སྒོ་ཞིག་འཇོག་མི་དགོས།
པྲཛྙཱ་ན་རེ། དེ་ཤིན་ཏུ་ལེགས། སེམས་བསྐྱེད་ཐེག་ཆེན་གྱི་འཇུག་སྒོར་བཤད་ཀྱང་། ཐེག་ཆེན་གྱི་ལམ་ཐམས་ཅད་སེམས་བསྐྱེད་ཀྱི་ཡན་ལག་ཏུ་འདུ་དགོས། གསང་སྔགས་ཀྱི་འཇུག་སྒོ་དབང་ཞེས་བཤད་པའང་དང་བོར་འཇུག་པའི་ཚེ་སྔོན་འགྲོར་བྱས་པ་གཅིག་པུ་མ་ཡིན་པར། སྨིན་བྱེད་ཀྱི་རྒྱུ། གྲོལ་བྱེད་ཀྱི་ལམ། གྲོལ་བ་འབྲས་བུ་སྟེ་སྔགས་ཀྱི་ལམ་འབྲས་ཐམས་ཅད་དབང་གི་ཁོངས་སུ་འདུས་པ་ཡིན།
བི་ལིག་ན་རེ། བསྟན་པའི་འཇུག་སྒོ་སྐྱབས་འགྲོ་ཡིན་པ་ཁྱོད་བདེན་པའི་དབུང་དུ་བྱས་ཀྱང་དེ་ཙམ་གྱིས་གོ་མི་ཆོད། སྐྱབས་སུ་འགྲོ་བའི་རྒྱུད། སྐྱབས་སུ་སོང་བའི་ཚད། སྐྱབས་འགྲོའི་ངོ་བོ། དེའང་ཐུན་མོང་བའི་དབང་དུ་བྱས་ན་ཡོན་ཏན་ཤེས་པ། ཁྱད་པར་ཤེས་པ། ཁས་ལེན་པ། གཞན་དུ་མི་སྨྲ་བ་བཞི་དང་། ཐུན་མོང་མ་ཡིན་པ་ཀུན་ཏུ་འགྲོ་བའི་ཁྱད་པར། ཁས་ལེན་པའི་ཁྱད་པར། རྟོགས་པའི་ཁྱད་པར། ཟིན་གནོན་གྱི་ཁྱད་པར་བཞི། སྐྱབས་སུ་སོང་བའི་ཕན་ཡོན་སོགས་ལེགས་པར་བཤད་དགོས།
ཤེས་རབ་ན་རེ། ཁྱོད་ཀྱིས་སྐྱབས་སུ་འགྲོ་བའི་རྒྱུ། སྐྱབས་སུ་སོང་བའི་ཚད། སྐྱབས་འགྲོའི་ངོ་བོ་དེའང་ཐུན་མོང་བའི་དབང་དུ་བྱས་ན་ཡོན་ཏན་ཤེས་པ། ཁྱད་པར་ཤེས་པ། ཁས་ལེན་པ་བཞིན་དུ་མི་སྨྲ་བ་བཞི་དང་། ཐུན་མོང་མ་ཡིན་པ་ཀུན་ཏུ་འགྲོ་བའི་ཁྱད་པར། ཁས་ལེན་པའི་ཁྱད་པར། རྟོགས་པའི་ཁྱད་པར། ཟིལ་གནོན་གྱི་ཁྱད་པར་བཞི། སྐྱབས་སུ་སོང་བའི་ཕན་ཡོན་སོགས་གང་ཡིན་ཞེས་དྲིས་པ་དེ་རྒྱ་ཆེ་མདོག་ཁ་པོ་འདུག ཡིན་ཀྱང་དྲི་རྒྱུའི་གཙོ་བོ་ལུས་སྣང་། རང་ཅག་ཐམས་ཅད་སྐྱབས་འགྲོའི་སྡོམ་པ་ཡང་ཡང་ཁས་བླངས་ཡོད་པ་ཤ་སྟག་ཡིན་པས། ངེས་པར་རྩད་གཅོད་རྒྱུ་ཡིན་ན་ཁ་ནང་དུ་བསྐོར་ཏེ་སྐྱབས་འགྲོའི་བསླབ་བྱ་གཙོ་བོར་འདྲི་དགོས། སྐྱབས་འགྲོའི་ཁོངས་འདིར་གསུང་རབ་ཐམས་ཅད་འདུ་བས། སླར་འཕྲོས་པ་རིམ་པ་བཞིན་བྱས་ཆོག
པྲཛྙཱ་ན་རེ། ཆོས་ཀྱི་གནས་ལུགས་གང་ཡིན་རིགས་པ་ཕྲ་མོས་དཔྱོད་ལ་ལན་ཐོབས།
བི་ལིག་ན་རེ། ཆོས་ཀྱི་གནས་ལུགས་ནི་ཟབ་མོ་སྟོང་བ་ཉིད་ཡིན། དེ་ལས་གཞན་དུ་འདའ་ས་མེད་པས་ཆོས་ཀྱི་ཕྱག་རྒྱ་ཟེར་བ་ཡིན་ལགས།
ཤེས་རབ་ན་རེ། གནས་ལུགས་སྟོང་བ་ཉིད་ཅེས་ཐེག་ཆེན་གྱི་གྲུབ་མཐའ་སྨྲ་བ་ཐམས་ཅད་ཟེར་ཡང་སྟོང་ཉིད་ཀྱི་འཇོག་མཚམས་མི་འདྲ། ཁྱོད་ཀྱིས་ཅི་འདྲ་ཞིག་ལ་བསམས་ནས་སྨྲས་པ་ཡིན།
པྲཛྙཱ་ན་རེ། སྟོང་ཉིད་ལེགས་པར་གོ་བ་ལ་དགག་བྱ་ངོས་ཟིན་དགོས། དེ་ཤེས་ན་དེ་བཀག་པའི་སྟོང་བ་ཤེས་སླ། ཁྱེད་གཉིས་དགག་བྱ་ཇི་ལྟ་བུ་འགོག་དགོས་པར་འདོད་པ་ཡིན།
བི་ལིག་ན་རེ། དགག་བྱ་ཕྱི་དོན་བཀག་པའོ།། སྟོང་ཉིད་སེམས་ཙམ་པས་འདོད་པ་ལྟ་བུས་གོ་མི་ཆོད། དབུ་མ་བའི་ལུགས་འདིར་དགག་བྱ་བདེན་གྲུབ་འགོག་དགོས། མདོར་བསྡུས་ན་ཆོས་གང་ལའང་རྣམ་རྟོག་གིས་ཕར་བཏགས་པ་ཙམ་ཞིག་མིན་པ་ཁོང་རང་གི་ངོས་ནས་གྲུབ་རྒྱུ་མེད་པ་ཡིན།
ཤེས་རབ་ན་རེ། ཐག་རིང་ནས་མི་ཞིག་དང་ཐོ་ཡོར་ཞིག་གཤིགས་ཡོད་པ་ལ་མི་གཉིས་འདུག་བསམ་པའི་ཚེ། ཐོ་ཡོར་གྱི་ངོས་ནས་མི་མ་གྲུབ་པས་རྣམ་རྟོག་གི་ཕར་བཏགས་པ་ཙམ་ཡིན་མོད། མི་དེའི་ངོས་ནས་ཀྱང་མིར་གྲུབ་པ་མེད་པས་ཕར་བཏགས་ཙམ་ཡིན་ནམ།
བི་ལིག་ན་རེ། ཐག་རིང་ནས་མི་ཞིག་དང་ཐོ་ཡོར་ཞིག་གཤིབས་ཡོད་པ་ལ་མི་གཉིས་འདུག་བསམ་པའི་ཚེ། ཐོ་ཡོར་གྱི་ངོས་ནས་མི་མ་གྲུབ་པས་རྣམ་རྟོག་གིས་ཕར་བཏགས་པ་ཙམ་ཡིན་མོད། མི་དེའི་ངོས་ནས་ཀྱང་མི་གྲུབ་པ་མེད་པས་ཕར་བཏགས་ཙམ་ཡིན། དེ་གཉིས་རང་ངོས་ནས་མིར་གྲུབ་མ་གྲུབ་ཀྱི་ཁྱད་བྱུང་ན་དངོས་སྨྲ་བ་དང་ཁྱད་ཅི་ཡོད།
པྲཛྙཱ་ན་རེ། དེ་གཉིས་དོན་དམ་པར་རང་རང་གི་ངོ་བོས་གྲུབ་མ་གྲུབ་ཀྱི་ཁྱད་པར་མེད་ཀྱང་། ཐ་སྙད་དུ་མིར་གྲུབ་མ་གྲུབ་མིའི་བྱ་བ་བྱེད་ནུས་མི་ནུས་ཀྱི་ཁྱད་ཡོད་པས་ཐ་སྙད་ཀྱི་འཇོག་མཚམས་འདི་ནས་གོ་དཀའ། དེ་གཉིས་ཀ་ཡིད་ངོར་འགལ་མེད་གྲོགས་སུ་སོང་བ་ཞིག་བྱུང་ན་རྒྱལ་བའི་དགོངས་པ་མཐར་ཐུག་རྙེད་པ་ཡིན་པས་ངོ་མཚར་ཆེ།
ཚེེ་དཔཱེ་ན་རེ། དེ་གོ་བ་དཀའ་མོ་འདུག ཡིན་ཀྱང་ཚིག་ཙམ་རྣ་བས་ཐོས་ནའང་གསེར་དངུལ་སྲང་ཁྲི་ཚོ་རྙེད་པ་ལས་དོན་ཆེན་པོ་ཡོད་པས་བཀའ་དྲིན་ཆེ།
ཤེས་རབ་ན་རེ། འདི་གོ་དཀའ་བས་མིང་སྣ་ཚོགས་བཏགས་ཀྱང་དོན་ཐོག་ཏུ་འབབ་དཀའ། མཁས་གྲུབ་ཐམས་ཅད་མཁྱེན་པའི་ཞལ་ནས། ཇི་སྲིད་མིག་ལྡན་སྐྱེ་བོས་མ་དཔྱད་པ།། དེ་སྲིད་དམུས་ལོང་བརྒྱ་ཡིས་རབ་དཔྱད་ཀྱང་།། གླང་ཆེན་གཟུགས་ལ་ལོག་པའི་ཐ་སྙད་བརྒྱ།། ཀུན་ནས་འདོགས་པའི་མུ་ཅོར་འཕེལ་བ་ཙམ།། ཞེས་གསུངས་ལ། དེ་ཉིད་ཀྱིས་སྟོང་ཐུན་སྐལ་བཟང་མིག་འབྱེད་ནའང་དེ་འདྲ་ཞིག་གསུངས་ཡོད། ལྕང་སྐྱ་ཐམས་ཅད་མཁྱེན་པས། ཨ་མ་ཐལ་དཀར་གྱི་གླང་ཆེན་གཟུགས།། གསུངས་པའང་འདི་ཚོ་དང་སྒོ་བསྟུན་ནས་གསུངས་པ་རེད། སྤྱན་སྔ་བློ་གྲོས་རྒྱལ་མཚན་གྱིས་ཀྱང་། དམུས་ལོང་གླང་ཆེན་ཞིབ་ཕྱགས་བཞིན།། ཞེས་སོགས་རྩ་འགྲེལ་ཐམས་ཅད་ན་དཔེ་འདི་ཡང་ཡང་གསུང་འདུག
བི་ལིག་ན་རེ། དཔེ་འདིའི་ཁུངས་རྒྱས་པ་ཐེག་བསྡུས་ན་ཡོད། འདི་གླང་བོ་ཆེ་ཤེད་ཆེ་བ་དཔེར་བྱས་པ་ལ་འབྲེལ་བ་ཅི་ཡང་མེད། གཟུགས་ཆེ་སོང་བ་མིག་ཅན་གྱིས་བལྟས་ཙམ་ནས་མགོ་མཇུག་ཚང་མ་མཐོང་ཐུབ་ཀྱང་། དམུས་ལོང་གིས་ལག་མྱོང་བྱས་ན་ཚོད་མི་ཟིན་པས་མིང་སྣ་ཚོགས་འདོགས་པ་རེད། ཤིང་རྟ་ཆེན་པོ་ཚོས་དཔེ་སྦྱོར་ཚུལ་འདི་ཙམ་གོ་བའང་གཞུང་ཆེན་མོ་རྣམས་ཀྱི་རྒྱུས་ཡོད་དགོས། སྔོན་བོད་བསྟན་པའི་འབྱུང་ཁུངས་ཟེར་ཡང་། དེང་སང་གཞུང་ལུགས་ཐམས་ཅད་ལ་རྒྱུས་ཡོད་པ། དབང་ལུང་མན་ངག་གི་རྒྱུན་ཡོད་པ་ང་ཚོ་སོག་པོ་བཟང་བར་འདུག
པྲཛྙཱ་ན་རེ། བསྟན་པའི་འབྱུང་ཁུངས་དང་ཡུལ་དབུས་ཟེར་བ་དེ་ངེད་རྒྱ་གར་འཕགས་པའི་ཡུལ་ཡིན། ཁྱེད་ཚོ་ལ་མཐའ་འཁོབ་ཟེར་བ་ཡིན་ཡང་། ད་སུ་ལ་མཐའ་འཁོབ་ཟེར་དགོས་མི་ཤེས་པར་འདུག ཡུལ་དབུས་དང་མཐའ་འཁོབ་ཀྱང་རང་བཞིན་གྱིས་གྲུབ་པ་མེད་པར་བསྟན་པ་འཕེལ་འགྲིབ་ལ་ལྟོས་ཏེ་ཕར་བཏགས་པ་ཙམ་ཡིན།
ཤེས་རབ་ན་རེ། དོན་དམ་རྟོགས་པ་ལ་སྔོན་དུ་ཀུན་རྫོབ་པའི་རྣམ་གཞག་གཏན་ལ་ཕབ་སྟེ་ཐ་སྙད་ཚད་གྲུབ་ལ་མཁས་དགོས། རེ་ཞིག་ཀུན་རྫོབ་ཀྱི་རྣམ་གཞག་ཅིག་ཁྱོད་ལ་དྲི་དགོས། བདེན་པ་བཞི་ལ་གང་འདྲེན།
བི་ལིག་ན་རེ། བདེན་པ་བཞི་ནི། སྡུག་བསྔལ་བདེན་པ། ཀུན་འབྱུང་བདེན་པ། འགོག་བདེན། ལམ་བདེན་དང་བཞི་ཡིན།
ཤེས་རབ་ན་རེ། ཕུང་བོ་ལྔ་གང་འདྲེན།
བི་ལིག་ན་རེ། གཟུགས་ཀྱི་ཕུང་བོ། ཚོར་བའི་ཕུང་བོ། འདུ་ཤེས་ཀྱི་ཕུང་བོ། འདུ་བྱེད་ཀྱི་ཕུང་བོ། རྣམ་པར་ཤེས་པའི་ཕུང་བོ་དང་ལྔ་ཡིན།
ཤེས་རབ་ན་རེ། རྟེན་འབྲེལ་ཡན་ཡག་བཅུ་གཉིས་ལ་གང་འདྲེན།
བི་ལིག་ན་རེ། ཡན་ལག་དང་བོ་མ་རིག་པ། གཉིས་པ་འདུ་བྱེད། གསུམ་པ་རྣམ་ཤེས། བཞི་བ་མིང་གཟུགས། ལྔ་བ་སྐྱེ་མཆེད། དྲུག་པ་རེག་པ། བདུན་པ་ཚོར་བ། བརྒྱད་པ་སྲེད་པ། དགུ་བ་ལེན་པ། བཅུ་བ་སྲིད་པ། བཅུ་གཅིག་པ་སྐྱེ་བ། བཅུ་གཉིས་པ་རྒ་ཤིའི་རྟེན་འབྲེལ་རྣམས་ཡིན།
ཤེས་རབ་ན་རེ། ཁམས་བཅོ་བརྒྱད་ལ་གང་འདྲེན།
བི་ལིག་ན་རེ། གཟུགས་སྒྲ་དྲི་རོ་རེག་བྱ་ཆོས་ཏེ་ཡུལ་གྱི་ཁམས་དྲུག མིག་རྣ་སྣ་ལྕེ་ལུས་ཡིད་དེ་དབང་བོའི་ཁམས་དྲུག མིག་གི་རྣམ་ཤེས་ནས་ཡིད་ཀྱི་རྣམ་ཤེས་ཀྱི་བར་རྣམ་ཤེས་ཀྱི་ཁམས་དྲུག་སྟེ་བཅོ་བརྒྱད་ཡོད། འདི་གྲངས་འདྲེན་ཙམ་ཡིན། དེ་དག་སོ་སོའི་ངོ་བོ། བྱེད་ལས། མཚན་ཉིད། དབྱེ་བ། བསྡུ་བ། གྲངས་ངེས། གོ་རིམ་སོགས་དཔྱིས་ཕྱིན་པར་ཤེས་པ་ལ། མངོན་པ་ཀུན་བཏུས་ལྟར་གཏན་ལ་འབེབས་དགོས།
ཚེེ་དཔཱེ་ན་རེ། རི་མཐོན་པོའི་རྩེར་འགྲོ་བ་ལའང་རྩ་བ་ནས་ཡར་ག་ལེ་ག་ལེར་འགྲོ་དགོས། ཁང་སྟེང་དུ་འགྲོ་བ་ལའང་སྐས་ཚིགས་འོག་མ་ནས་རིམ་གྱིས་འགྲོ་དགོས་པ་བཞིན་ཆོས་ཀྱང་གོ་དགའ་བ་རྣམས་ཤེས་པ་ལ་གང་སླ་བ་དེ་སྔོན་དུ་བསླབས་ནས་རིམ་པ་བཞིན་བྱེད་དགོས་་པ་དེ་ངའི་བློ་ལའང་ཤིན་ཏུ་འབབ་པ་བྱུང་།
པྲཛྙཱ་ན་རེ། ཆོས་ཀྱི་སྙིང་བོ་གང་ཡིན།
ཤེས་རབ་ན་རེ། ཆོས་ཀྱི་སྙིང་བོ་སྟོང་ཉིད་སྙིང་རྗེའི་སྙིང་བོ་ཅན་ཡིན་ལགས།
བི་ལིག་ན་རེ། ཆོས་སྐད་ཐུན་མོང་བ་ཙམ་ལ་དེ་བྱས་ཆོག་ཀྱང་། ཟབ་གནད་མཐར་ཐུག་གི་དབང་དུ་བྱས་ན་དེས་གོ་མི་ཆོད། བདེ་སྟོང་དབྱེར་མེད་ཀྱི་ཡེ་ཤེས་ལ་བྱེད་དགོས།
ཤེས་རབ་ན་རེ། ཁྱོད་ཀྱི་གཏམ་དེ་ངའི་ཕ་མི་མིན་སོག་པོ་ཡིན་ཞེས་པ་ལྟར་འབྲེལ་མེད་ཀྱི་ཅལ་ཅོལ་དུ་སྣང་། སྟོང་ཉིད་སྙིང་རྗེའི་སྙིང་བོ་ཅན་ཞེས་པ་སངས་རྒྱས་ཀྱི་གོ་འཕང་སྒྲུབ་པའི་རྒྱུ་ཐབས་ཤེས་ཡ་མ་བྲལ་བ་དེའི་མིང་རེད། བདེ་སྟོང་དབྱེར་མེད་ཀྱི་ཡེ་ཤེས་ཀྱང་དེའི་ཁོངས་སུ་འདུ་བ་མ་གཏོགས་དེ་ལས་གཞན་དུ་གོ་ན་སངས་རྒྱས་ཀྱི་རྒྱུར་མི་འགྲོ་བའི་སྐྱོན་ཡོད། ལར་ཁྱེད་རྣམས་ཆོས་ལ་དོན་གཉེར་ཆེ་བ་རྗེས་སུ་ཡི་རང་ལགས་ཀྱང་། དང་བོ་ནས་ཟབ་མོ་ཟབ་མོ་དང་། གང་མཐོ་གང་མྱུར་གྱི་མན་ངག་ཁོ་ན་ཞིག་དགོས་པ་འདིས་ཁ་གང་ལ་འཁོར་འགྲོ་མི་ཤེས་པར་འདུག ད་ལྟ་རྙིང་ཆོས་ཕལ་ཆེར་ཡང་སོག་ཡུལ་དུ་བསླེབས་འདུག་མོད། རྒྱལ་དབང་ལྔ་བ་ཆེན་པོས་ཀྱང་བོད་ཀྱི་སྲིད་སྐྱོང་གི་དོན་དུ་གཏེར་ཁ་བརྒྱ་ལྷག་གི་ཆོས་གསན་ནས་རྙིང་ཆོས་ས་སྤེལ་རྡོ་སྤེལ་གནང་འདུག་ནའང་། སོག་པོའི་ཕྱོགས་སུ་རྙིང་མ་བཀྲ་མི་ཤིས་གསུངས་ནས་བཀག་ཆ་ཁོ་ན་མཛད་པ་རྣམ་ཐར་དང་ཁོང་གིས་གསུངས་པའི་བསླབ་བྱ་རྣམས་སུ་བལྟས་བས་གསལ། དེའི་རྒྱུ་མཚན་ཡང་སྔོན་སོག་པོའི་དམག་ཡང་ཡང་སོང་སྟེ་རྙིང་མ་ལ་གནོད་འཚེ་བྱས་པས། རྙིང་མའི་བླ་མ་ཆོས་སྐྱོང་ཐམས་ཅད་ཁོན་ཞུགས་ཏེ་ཧ་ཅང་དམ་སེལ་ཆེ་བ་དེའི་སྟོབས་ཀྱིས་ཡིན་པར་འདུག
བི་ལིག་ན་རེ། ཟབ་མོ་དབུ་མའི་ལྟ་བ་སོགས་བྱང་ཆུབ་སྒྲུབ་པའི་ལམ་གྱི་གནད་མཐར་ཐུག་དང་། སངས་རྒྱས་ཀྱི་བསྟན་པའི་འགངས་ཆེ་བ་རྣམས་འཇམ་མགོན་ཙོང་ཁ་བའི་བཞེད་སྲོལ་རི་བོ་དགེ་ལྡན་པའི་ལུགས་འདི་བཞིན་བྱེད་དགོས་མོད། གནས་སྐབས་ཀྱི་འགལ་རྐྱེན་སེལ་བ་དང་། ཟས་ནོར་ལོངས་སྤྱོད་སྤེལ་བ། དབང་སྡུད་གཏོང་བ། མ་མཐའ་ཐུན་རེ་རེ་གཡུག་རྒྱུ་ལའང་རྙིང་མ་འདི་ཉེ་བར་མཁོ་ཞིང་རྟགས་ཐོན་སླ་བ་ཞིག་འདུག་པས་དེ་འདྲའི་དོན་དུ་ཅུང་ཟད་རེ་ཉམས་སུ་བླངས་ཀྱང་འགལ་བ་ཅི་ཡོད།
ཤེས་རབ་ན་རེ། དེ་འདྲ་ཟེར་བ་དེ་ཆོས་ལུགས་གཉི་ག་ལ་བློ་མ་ཁེལ་བའི་སྐྱོན་ཡིན། སྔོན་ཡང་གཅིག་གིས་ཕུགས་དཀོན་མཆོག་ལ་རེ། འཕྲལ་པེ་དཀར་ལ་རེ་ཞེས་ཕྱོགས་གཉིས་ཀ་གནོན་རྒྱུའི་ཁུལ་བྱས་ཀྱང་བློ་རྩེ་གཅིག་དྲིལ་གྱིས་སུ་ལའང་གཏོད་མ་ཐུབ་པས་སྲུང་བ་བྱས་ཚད་གནད་དུ་མ་སོང་བ་དང་འདྲ།
ཚེེ་དཔཱེ་ན་རེ། དེ་བདེན་པར་འདུག བྱ་བ་གང་བྱེད་ཀྱང་སེམས་ལ་འཛིན་རྒྱུ་གཅིག་ཡོད་པ་དགོས། གཞན་དུ་འགྲོ་ནའང་རྟ་གཅིག་ཞོན་པ་མ་གཏོགས་གཉིས་ཞོན་རྒྱུ་ཡིན་བྱས་ན་བར་དུ་ལྷུང་ཡོང་། བཟོ་བྱེད་ནའང་ཁབ་རྩེ་གཅིག་གིས་བཟོ་བ་མ་གཏོགས་རྩེ་གཉིས་ཀྱིས་བཟོ་ལུགས་མེད། བྱ་བ་ཐམས་ཅད་དེ་འདྲ་ཡིན་དུས་ཆོས་ཀྱང་དེ་དང་འདྲ་ཡོད།
ཤེས་རབ་ན་རེ། མངོན་ཤེས་རྫུ་འཕྲུལ་ཕྲན་ཚེགས་དང་ཉམས་སྣང་བན་བུན་འབྱུང་སླ་བས། དེ་འདྲ་ལ་མགོ་འཁོར་ནས་བསྟན་པའི་གནད་མ་ནོར་བ་བསྐྱུར་ཏེ་སོང་ན་ཕན་ཆུང་ལ་གནོད་པ་ཤིན་ཏུ་ཆེན་པོ་འབྱུང་སྟེ། སྡོམ་གསུམ་རབ་དབྱེ་ལས། ལ་ལ་ལུས་དང་སེམས་ལ་ནི།། ཏིང་འཛིན་ཅུང་ཟད་བསྐྱེད་ནས་ཀྱང་།། དེ་ལ་ཡིད་ཆེས་སྐྱེས་པ་དང་། ལོག་པའི་ཆོས་རྣམས་བསྟན་ནས་སླུ།། ལ་ལ་མངོན་པར་ཤེས་པ་དང་།། རྫུ་འཕྲུལ་ཅུང་ཟད་བསྟན་ནས་ཀྱང་།། བླུན་པོ་ཡིད་ཆེས་བསྐྱེད་ནས་ནི།། ཕྱི་ནས་ཆོས་ལོག་སྟོན་པར་བྱེད།། ཆོས་གཞན་ལེགས་པར་སྟོན་ན་ཡང་།། ཆོས་ཀྱི་གནས་རྣམས་བཅོས་པ་ནི།། ཤིན་ཏུ་འཇིགས་པ་ཆེན་པོར་འགྲོ།། དེ་འདྲ་བ་ལས་སྐྱོན་བྱུང་མང་།། དཔེར་ན་ཁ་ཟས་བཟང་བོ་ལ།། སྦྱར་བའི་དུག་གིས་ཕལ་ཆེར་གསོད།། དུག་རྐྱང་ཡིན་པར་ཤེས་ན་ནི།། འགའ་ཡང་གསད་པར་ནུས་མ་ཡིན།། དེ་བཞིན་ཆོས་བཟང་འགའ་ཞིག་ལ།། ཆོས་ལོག་བསླད་པས་ཕ་རོལ་སླུ།། ཞེས་གསུངས། གཏན་གྱི་མདུན་མའི་རྩ་བ་ཡིན་པས་ཁེ་ཉེན་ལ་རྟོག་དཔྱོད་ཞིབ་མོ་བྱེད་དགོས་སོ།།
བི་ལིག་ན་རེ། སྡོམ་གསུམ་རབ་དབྱེའི་ལུང་ཁྱོད་ཀྱིས་འདྲེན་མི་དགོས། ཁྱོད་ཀྱིས་དྲངས་པ་དེ་ལས་ཀྱང་གསལ་བོ་དཔེ་དང་བཅས་ནས་གསུངས་ཡོད་པ་ངེད་ཀྱིས་མཐོང་སྟེ། དེ་ཉིད་ལས། མདོར་ན་སངས་རྒྱས་གསུང་རབ་དང་། ཕལ་ཆེར་མཐུན་པར་སྟོན་བྱེད་ཅིང་།། གནད་རྣམས་ལོག་པར་སྟོན་པའི་ཆོས།། ལེགས་ལེགས་འདྲ་བར་སྟོན་ན་ཡང་།། བདུད་ཀྱི་བྱིན་རླབས་ཡིན་ནོ་ཞེས།། མདོ་རྒྱུད་ཀུན་ལས་གསལ་བར་གསུངས་།། འདི་དག་ཇི་ལྟར་བྱུང་བའི་ཚུལ།། མདོ་ཙམ་པ་ཡིས་བཤད་ཀྱིས་ཉོན།། རིན་ཆེན་བཟང་བོ་བཞུགས་པའི་ཚེ།། སངས་རྒྱས་སྐར་རྒྱལ་ཞེས་བྱ་བ།། དཔྲལ་བ་ན་ནི་འོད་འབྱིན་ཞིང་།། བར་སྣང་ལ་ནི་སྐྱིལ་ཀྲུང་འཆའ།། རེ་འགའ་འཇག་མའི་ཁྲི་ལ་སྡོད།། སྟོང་བ་ཉིད་ཀྱི་ཆོས་རྣམས་སྟོན།། བྱམས་དང་སྙིང་རྗེ་ཆེ་བར་སྣང་།། དེ་ཡི་ཆོས་ཀྱིས་གཞན་དག་ལ།། ཏིང་ངེ་འཛིན་ཡང་སྐྱེ་བར་བྱེད།། དེ་ལ་འཇིག་རྟེན་ཐམས་ཅད་མོས།། ཤཱཀྱ་རྒྱལ་བོའི་བསྟན་པ་དང་།། འདྲ་མིན་ཅུང་ཟད་བཅོས་པར་འཆད།། དེ་ཡི་བསྟན་པ་ཤིན་ཏུ་འཕེལ།། དེ་ཚེ་རིན་ཆེན་བཟང་བོ་ཡིས།། སྒྲུབ་པ་ཟླ་བ་དྲུག་མཛད་ནས།། ཏིང་འཛིན་བརྟན་པས་དེ་དྲུང་བྱོན།། སངས་རྒྱས་སྐར་རྒྱལ་བར་སྣང་ལ།། སྐྱིལ་ཀྲུང་བཅས་ནས་ཆོས་འཆད་ཚེ།། རིན་ཆེན་བཟང་བོས་གཟིགས་ཙམ་གྱིས།། ས་ལ་ལྷུང་ནས་བརྒྱལ་ཞེས་གྲགས།། གལ་ཏེ་རིན་བཟང་ཞེས་བྱ་བ།། སྐྱེས་མཆོག་དེ་ཚེ་མི་བཞུགས་ན།། སངས་རྒྱས་སྐར་རྒྱལ་ཞེས་བྱ་བའི།། ཆོས་ལོག་བསྟན་པ་འབྱུང་ཞེས་གསུངས།། ནག་པོའི་ཕྱོགས་ལ་དགའ་བ་ཡི།། སྐར་རྒྱལ་ཞེས་བྱའི་ཀླུ་ཆེན་ཞིག། སྐྱེས་ངན་ཞིག་ལ་ཞུགས་ནས་ནི།། སངས་རྒྱས་གཟུགས་སུ་བརྫུས་ཞེས་གསུངས།། འདི་འདྲའི་རིགས་ཀྱི་བདུད་རིགས་འགའ།། མིའམ་འཕགས་པའི་གཟུགས་བཟུང་ནས།། ལོག་པའི་བསྟན་པ་སྤེལ་བའི་ཕྱིར།། ཆོས་དང་བསྲེས་ནས་གནད་རྣམས་སུ།། ལོག་ཆོས་བསྲེས་ནས་འཆད་པ་སྲིད།། ཅེས་གསུངས་ཡོད་ཅིང་དེ་ལྟར་དུ་ངེད་རང་གིས་ཀྱང་ཁས་ལེན་པས། མདོ་སྔགས་གང་གི་ཡིན་ཀྱང་བསྟན་པའི་གནད་རྣམས་རྗེ་བླ་མའི་ལུགས་འདི་ལས་གཞན་ཞིག་བཙལ་དགོས་དོན་ཡང་མེད་ལ། བསྲེས་ཀྱང་མི་ཆོག འཕྲལ་གྱི་རྐྱེན་སེལ་ཙམ་དུ་རྨ་ཕབ་མནམ་གྱི་ཆོལ་མང་བསྟེན་ཆོག་དུས། རྙིང་མའི་ཆོས་ཀྱང་དེ་ཡང་མཐུ་ཞིག་མིན་འགྲོ།
པྲཛྙཱ་ན་རེ། ཆོས་ཀྱི་འབྲས་བུ་གང་ཡིན།
ཤེས་རབ་ན་རེ། ཆོས་ཉམས་སུ་བླངས་པའི་འབྲས་བུ་མཐར་ཐུག་སངས་རྒྱས་ཀྱི་གོ་འཕང་ཡིན་པ་ཡོངས་སུ་གྲགས་པ་ལྟར་ཡིན་པས། བླ་མས་ཀྱང་དྲི་བ་གནང་བ་མིན་པར་འདུག གནས་སྐབས་ཀྱི་དབང་དུ་བཏང་ནས་ཆོས་ཉམས་སུ་བླངས་པའི་ལག་རྗེས་ཞོག་ཚད་གང་ཡིན་གསུངས་པར་འདུག དེ་ངས་ཞིབ་ཏུ་བརྟག་ན་ཚེ་འདི་སྣང་གི་བྱ་བ་སོགས་ཆོས་མིན་ལ་རྒྱབ་ཀྱིས་ཕྱོགས་ནས་བློ་ཁ་ཆོས་ཀྱི་ཕྱོགས་ཁོ་ནར་འཁོར་ཞིང་སྒོ་གསུམ་གྱིས་བྱ་བ་གང་བྱས་ཆོས་ཀྱི་ཕྱོགས་སུ་འགྲོ་བ་ཞིག་བྱུང་ན་ཆོས་ཐོས་བསམ་སྒོམ་གསུམ་བྱས་པའི་ལག་རྗེས་ཞོག་པ་ཡིན་པ་འདྲ་སྙམ།
བི་ལིག་ན་རེ། ཁྱོད་ཀྱི་དེ་ཆོས་བྱས་པ་དང་ཆོས་བྱས་པའི་ལག་རྗེས་གཉིས་པོ་རྒྱུ་འབྲས་གོ་ཟློག་པར་སྣང་། བློ་ཁ་ཆོས་ཕྱོགས་སུ་འཁོར་བ་ཞིག་སྔོན་དུ་མ་བྱུང་བར་ཆོས་བྱེད་པ་ཞིག་གཏན་མི་ཡོང་བས། དེ་ཆོས་བྱེད་པའི་རྒྱུ་ཡིན་པ་མ་གཏོགས་ཆོས་བྱས་པའི་འབྲས་བུར་འགྲོ་ལུགས་མེད། ཆོས་མིན་གྱི་ཕྱོགས་ལ་བློ་ལོག་པ་དང་། ཆོས་ཀྱི་ཕྱོགས་ལ་བློ་འཁོར་བ་གཉིས་ཀྱང་སྲང་མདའི་མགོ་མཇུག་གི་མཐོ་དམན་བཞིན་དུས་མཉམ་དུ་ཡོང་དགོས་པས། དེའང་ཆོས་བྱེད་པ་ལ་སྔོན་དུ་འགྲོ་དགོས་པ་ཞིག་ཡིན་གྱི། ཆོས་བྱས་པའི་འཕྲོར་ཡོང་རྒྱུ་ཞིག་མིན། ཆོས་ཉམས་སུ་བླངས་པའི་ལག་རྗེས་ཞོག་ཚད་ལ་ཐག་མི་ཆོད་རྒྱུ་དེ་ཙམ་ཅི་དགོས། ཐོས་པ་བྱས་པའི་ལག་རྗེས་འཆད་རྩོད་རྩོམ་གསུམ་ལ་ཐོགས་པ་མེད་པ་ཞིག་བྱུང་ན་དེ་ཡིན། སྒོམ་སྒྲུབ་བྱས་པའི་ལག་རྗེས་ཡི་དམ་ལྷའི་ཞལ་གཟིགས་མངོན་ཤེས་དང་རྫུ་འཕྲུལ་ཐོགས་པ་མེད་པས་ལེགས་ཉེས་འབྱུང་འགྱུར་ཐམས་ཅད་ཇི་ལྟ་བ་བཞིན་དུ་ཤེས་ཤིང་། ནད་རིམས་གདོན་བགེགས་ལ་སོགས་པའི་ཉེར་འཚེ་ཐམས་ཅད་བསལ་ནས་རང་གཞན་གྱི་དོན་རླབས་པོ་ཆེ་སྒྲུབ་ནུས་པ་ཞིག་བྱུང་ན་ཆོས་ཀྱི་ལག་རྗེས་ཞོག་པ་ཡིན་པ་མངོན་སུམ་གྱིས་གྲུབ་པས་དེ་ལ་དོགས་པ་བྱེད་ཅི་དགོས།
ཚེེ་དཔཱེ་ན་རེ། ཁྱེད་མཁས་པ་རྣམས་ཀྱིས་བཤད་ན། གཅིག་གིས་བཤད་ཚེ་གཅིག་བདེན།། གཉིས་ཀྱིས་བཤད་ཚེ་གཉིས་བདེན་པ་ལྟ་བུར་འདུག་པས། ད་རེས་ཁོང་རྣམ་གཉིས་ཀྱིས་བཤད་པ་དེ་ཡང་གང་བདེན་རྒྱ་གར་གྱི་བླ་མས་ཐག་གཅོད་དགོས།
པྲཛྙཱ་ན་རེ། འཇིག་རྟེན་གྱི་གྲགས་ཚོད་དང་བསྟུན་ན་སོག་པོའི་བཙུན་པས་ཟེར་བ་དེའང་མི་བདེན་རྒྱུ་མེད་རུང་། བོད་ཀྱི་བཙུན་པ་ཁྱོད་རང་གིས་ཟེར་བ་དེ་ལ་ལུང་རིགས་ཀྱི་ཁུངས་སྟོན་རྒྱུ་ཡོད་ན་སྨྲོས་ཤིག
ཤེས་རབ་ན་རེ། སོག་པོའི་བཙུན་པ་ཁྱོད་ཀྱིས་ཐོས་པའི་འབྲས་བུ་འཆད་རྩོད་རྩོམ་གསུམ་ལ་ཐོགས་པ་མེད་པ་ཟེར་བ་དེའང་གཅིག་ཤེས་གཉིས་ཤེས་ཐམས་ཅད་གཞན་ཞིག་ལ་བཤད་རྒྱུའི་འཕེན་པ་བཏང་སྟེ་ཁ་ཕྱིར་བལྟས་སུ་སོང་པའི་རྟགས་རེད། སངས་རྒྱས་བཅོམ་ལྡན་འདས་ཀྱིས། མང་དུ་ཐོས་པ་ནགས་ཀྱི་ནང་དག་ཏུ།། ལང་ཚོ་ཡོལ་བ་རྣམས་ཀྱིས་གནས་པ་བདེ།། ཞེས་ཐོས་དོན་དབེན་པར་ཉམས་སུ་ལེན་དགོས་པར་གསུངས། སྐྱེས་རབས་ལས་ཀྱང་། ཐོས་པའི་རྗེས་འཇུག་སྒྲུབ་པ་སྙིང་བོར་བྱེད།། ཅེས་ཐོས་པའི་འབྲས་བུ་སྒྲུབ་པ་ལ་བརྩོན་དགོས་པར་གསུངས་པ་རེད། ཡང་ཁྱོད་ཀྱིས་སྒྲུབ་པའི་འབྲས་བུ་མངོན་ཤེས་དང་གྲུབ་རྟགས་སོགས་ལ་གཙོ་བོར་ངོས་བཟུང་བ་དེ། ཆོས་བྱས་ཚད་ཚེ་འདིའི་ལག་ཆར་སོང་བའི་ནང་རྟགས་ཕྱིར་བསྟན་པར་སྣང་། ཐོས་བསམ་སྒོམ་གསུམ་ཇི་ཙམ་བྱས་ཀྱང་བློ་ཕུགས་ཚེ་འདིའི་མདུན་མ་དང་འཁོར་བའི་ཕུན་ཚོགས་ལ་ཤི་སྤར་འཐམས་ནས་བསྡད་ན་བློ་ཁ་ཆོས་ལ་མ་ཕྱོགས་པ་ཡིན་པས་མཚམས་འདི་ཤེས་མཁན་དཀོན་པར་སྣང་། ཁྱོད་རང་གིས་བློ་ཁ་ཆོས་ལ་ཕྱོགས་པ་དེ་ཆོས་བྱེད་པའི་སྔོན་དུ་འགྲོ་དགོས་པའི་སྒྲུབ་བྱེད་གཏོང་གི་འདུག་མོད་ཀྱང་། མི་ཚེ་ཆོས་ལ་བསྐྱལ་བའི་ལག་རྗེས་ཀྱི་ཐད་ཀ་ན་ད་དུང་བློ་ཁ་མ་ཕྱོགས་པའི་ནང་རྟགས་བསྟན་འདུག་པ་རྒྱབ་འགལ་ཆེན་པོ་ཡིན། དེང་དུས་ཀྱི་ཆོས་བྱས་ཟེར་མཁན་ཕལ་མོ་ཆེ་ཁས་ཟེར་ལུགས་དང་ཕུགས་ཀྱི་ཞེ་འདོད་མ་མཚུངས་པ་འདི་འདྲའི་དབང་གིས་འབད་པ་ཆུད་ཟོས་སུ་སོང་བ་མང་བར་སྣང་། ཆོས་ཀྱི་འབྲས་བུ་ངེད་ཀྱིས་བཤད་པ་དེ་བཞིན་ལོས་ཡིན། སངས་རྒྱས་བཅོམ་ལྡན་འདས་ཀྱིས་ཆོས་གསུངས་པའི་དགོས་པ་གནས་སྐབས་ཀྱི་རྐྱེན་སེལ་ཙམ་དང་། མངོན་ཤེས་རྫུ་འཕྲུལ་ཕྲན་ཚེགས་སྒྱུ་མ་མཁན་གྱི་ཟློས་གར་ལྟ་བུ་ཞིག་གི་ཕྱིར་དུ་གསུངས་པ་མིན། འཆིང་གྲོལ་ཐམས་ཅད་ཀྱི་རྩ་བ་རང་གི་སེམས་ལ་ཐུག་པས་བློ་སྣ་འདི་སྒྱུར་ཐབས་འབའ་ཞིག་ལ་གསུངས་པ་རེད། དེའི་གནད་ཀྱིས་འདི་ཅུང་ཟད་ཅིག་ཁ་ཡར་སྐོར་ཐུབ་ན་སངས་རྒྱས་ཀྱི་བཞེད་པ་བསྐངས་པ་དང་ཆོས་ཀྱི་ལག་རྗེས་ཞོག་པར་འགྲོ། མཉམ་མེད་ཇོ་བོ་ཆེན་པོས་ཀྱང་། དངོས་གྲུབ་ཀྱི་མཆོག་ཉོན་མོངས་པ་ཇེ་ཆུང་ལ་སོང་བ་ཡིན། གྲུབ་རྟགས་ཀྱི་མཆོག་འདོད་པ་ཇེ་ཆུང་ལ་སོང་བ་ཡིན་གསུངས་ཤིང་། དགོན་པ་བའི་ཞལ་ནས་ཀྱང་། མན་ངག་གི་མཐིལ་གང་ལ་བྱེད་ཟེར་ན། མངོན་པར་ཤེས་པའམ་ཡི་དམ་གྱི་ལྷ་ཞལ་མཐོང་བ་ལ་བྱེད་ཟེར་མི་ཉན་པས། ལས་འབྲས་ངེས་པ་ཇེ་ཆེར་སོང་ན་དམ་སྡོམ་ཚུལ་བཞིན་དུ་བསྲུང་བ་ལ་བྱེད་དགོས་པར་གསུངས། ཇོ་བོ་བཀའ་གདམས་པ་རྣམས་ཀྱི་གསུང་ཚུལ་འདི་དུས་ཀྱི་སྙིགས་མ་དང་བསྟན་པའི་ཐ་མ་འདི་འདྲ་བའི་སྐབས་སུ་ཕན་ཤིན་ཏུ་ཆེ་བས། རང་ཅག་རྣམས་ཀྱིས་ཀྱང་དེ་འདྲ་རེ་ལ་བློ་རྩེ་གཏད་ན་ཉེན་ཆུང་ལ་མཁོ་ཆེ་བ་ཞིག་ཡོང་།
བི་ལིག་ན་རེ། ཁྱོད་ཀྱི་གོ་ལུགས་དེ་ང་ལའང་མ་ཤར་བ་མིན། སྙིགས་དུས་ཀྱི་སྐྱེ་བོ་ཅོལ་ཆུང་རྣམས་ཀྱི་ལོག་རྟོག་གི་མཐའ་ཁེགས་པའི་ཕྱིར་དོགས་པ་སློང་ཐབས་བྱས་པ་ཡིན། ཁྱོད་ཀྱིས་བཤད་པ་དེ་བཀའ་གདམས་གོང་མ་རྣམས་སུ་མ་ཟད་མདོ་བསྟན་བཅོས་ཐམས་ཅད་ནས་གསུངས་ཤིང་། རྗེ་བླ་མའི་བྱང་ཆུབ་ལམ་གྱི་རིམ་པའི་ནང་དུའང་། བསྒོམ་པ་བའི་དངོས་གྲུབ་ཀྱང་མ་རིག་པ་ལ་སོགས་པའི་ཉོན་མོངས་པ་ཇེ་ཆུང་དུ་སོང་བ་ལ་བྱ་གསུངས་པ་ལྟར་གོ་དགོས་སོ།། ཞེས་ནན་ཏན་དུ་གསུངས་པའི་རྒྱུ་མཚན། ཆོས་ཅི་འདྲ་ཞིག་བྱས་ཀྱང་དེ་དང་རང་གི་སེམས་གཉིས་པོ་སྦྱར་ནས་ཞུ་དག་བཏང་སྟེ་ཉོན་མོངས་པའི་གཉེན་པོར་ཨེ་འགྲོ། ཐར་བ་དང་ཐམས་ཅད་མཁྱེན་པའི་རྒྱུར་ཨེ་འགྲོ་ལྟ་བུ་ཞིག་བྱུང་ན་ཐོས་བསམ་སྒོམ་གསུམ་པོ་གཅིག་གྲོགས་སུ་གཅིག་འགྲོ་བ་ཞིག་བྱུང་ནས་རྒྱལ་བའི་བསྟན་པ་རིན་པོ་ཆེ་རང་གཞན་གྱི་རྒྱུད་ལ་ངེས་པར་སྤེལ་ནུས་པ་ཞིག་ཡོང་བ་ཡིན་པར་འདུག
པྲཛྙཱ་ན་རེ། ཤིན་ཏུ་ལེགས། ཆོས་ཀྱི་གཏམ་བྱས་པ་ཐམས་ཅད་དོན་ཟབ་ལ་གོ་བདེ་བ་སྙིང་བོའི་གནད་མཐུན་པར་བྱུང་བས་འབེལ་གཏམ་རྒྱས་པ་སླར་རིམ་གྱིས་བྱས་ཆོག་ཅིང་། ད་རེས་ཅུང་ཟད་བྱས་པའི་དགེ་བ་འདི་ཡང་ཆུད་མི་ཟ་བར་བྱ་བའི་ཕྱིར་བསྟན་འགྲོའི་དོན་དུ་བསྔོ་བའི་མཚམས་སྦྱོར་གནང་བར་ཞུ།
ཤེས་རབ་ན་རེ། ཆོས་ཀྱི་རྒྱལ་བོ་ཙོང་ཁ་བའི།། ཆོས་ཚུལ་རྣམ་པར་འཕེལ་བ་དང་།། གེགས་ཀྱི་མཚན་མ་ཞི་བ་དང་།། མཐུན་རྐྱེན་མ་ལུས་ཚང་བར་ཤོག། བདག་དང་གཞན་གྱི་དུས་གསུམ་དང་།། འབྲེལ་བའི་ཚོགས་གཉིས་ལ་བརྟེན་ནས།། རྒྱལ་བ་བློ་བཟང་གྲགས་པ་ཡི།། བསྟན་པ་ཡུན་རིང་འབར་གྱུར་ཅིག།
བི་ལིག་ན་རེ། ངེད་རང་གིས་ངེད་རང་གི་སྐད་ཀྱི་བསྔོ་བ་ཞིག་བྱེད་དགོས། ཆོས་ཀྱི་རྒྱལ་བོ་ཙོང་ཁ་བའི།། ཆོས་ཚུལ་རྣམ་པར་འཕེལ་བ་དང་།། གེགས་ཀྱི་མཚན་མ་ཞི་བ་དང་།། མཐུན་རྐྱེན་མ་ལུས་ཚང་བར་ཤོག། བདག་དང་གཞན་གྱི་དུས་གསུམ་དང་།། འབྲེལ་བའི་ཚོགས་གཉིས་ལ་བརྟེན་ནས།། རྒྱལ་བ་བློ་བཟང་གྲགས་པ་ཡི།། བསྟན་པ་ཡུན་རིང་འབར་གྱུར་ཅིག།
ཚེེ་དཔཱེ་ན་རེ། ངེད་རང་གིས་ཀྱང་ངེད་རང་གི་སྐད་ཀྱིས་བསྔོ་བ་ཞིག་བྱེད་དགོས། ཆོས་ཀྱི་རྒྱལ་བོ་ཙོང་ཁ་བའི།། ཆོས་ཚུལ་རྣམ་པར་འཕེལ་བ་དང་།། གེགས་ཀྱི་མཚན་མ་ཞི་བ་དང་།། མཐུན་རྐྱེན་མ་ལུས་ཚང་བར་ཤོག། བདག་དང་གཞན་གྱི་དུས་གསུམ་དང་།། འབྲེལ་བའི་ཚོགས་གཉིས་ལ་བརྟེན་ནས།། རྒྱལ་བ་བློ་བཟང་གྲགས་པ་ཡི།། བསྟན་པ་ཡུན་རིང་འབར་གྱུར་ཅིག།
པྲཛྙཱ་ན་རེ། (मयायवतसंभृतेदंशुभेन, शासनश्चसर्वव्रजयहितञ्च। ववीभटराकस्यसुमतिकिर्ति་शीष्टह्रदंदिर्घहसितकर्ययन्तु।।)བདག་གིས་ཇི་སྙེད་བསགས་པའི་དགེ་བ་འདིས།། བསྟན་དང་འགྲོ་བ་ཀུན་ལ་གང་ཕན་དང་།། ཁྱད་པར་རྗེ་བཙུན་བློ་བཟང་གྲགས་པ་ཡི།། བསྟན་པའི་སྙིང་བོ་རིང་དུ་གསལ་བྱེད་ཤོག།
ཐ་མར་དགེ་བ་མཇུག་གི་དོན།
སྐད་རིགས་རྣམ་བཞིའི་རིན་ཆེན་ཁམས་ལས་གྲུབ།། ལུང་རིགས་ཉི་ཟླའི་རྣ་ཆ་ཟུང་གིས་མཛེས།། སྔོན་མེད་ལེགས་པར་བཤད་པའི་ལྷུན་པོ་འདི།། ཐུབ་བསྟན་གླིང་བཞིའི་རྒྱན་དུ་གནས་གྱུར་ཅིག།
དེའང་རིག་གནས་ཆུང་བ་ལྔའི་ཡ་གྱལ་ཟློས་གར་ཞེས་པ་རྒྱ་གར་ན་སྐད་རིགས་བཞིའི་སྒོ་ནས་སོ་སོར་འདོན་པའི་དབང་གིས་ཟློས་གར་ཤེས་ན་སྐད་རིགས་ལ་མི་རྨོངས་ཟེར་བ་ཡིན་ཞིང་། བོད་ལ་སྐད་རིགས་གཅིག་ལས་མེད་པས་ཟློས་གར་མཚན་ཉིད་པ་མི་འོང་བར་གསུངས། འོན་ཀྱང་དེང་དུས་རྒྱ་བོད་ཧོར་གསུམ་ཐམས་ཅད་དུ་བསྟན་པ་དར་ཡོད་པས་དེ་དག་སོ་སོར་སྐད་ཀྱིས་བྱས་ན་སྐད་རིགས་སོ་སོའི་ཕྱོགས་གོ་ཞིང་། འདི་འདྲའི་རྐྱེན་གྱིས་ཆོས་ཀྱི་གནད་འགག་གལ་ཆེ་བ་རྣམས་ལ་བློ་ཁ་ཕྱོགས་མཁན་འབྱུང་སྲིད་དམ་སྙམ་པ་དང་རང་ཉིད་སོ་སོ་ཡང་དག་པར་རིགས་པ་བཞི་འགྲུབ་པའི་རྒྱུ་མཐུན་དུ་བསམས་ཏེ། བཙུན་པ་དཀོན་མཆོག་བསྟན་པའི་སྒྲོན་མེས་རབ་བྱུང་བཅུ་བཞི་བའི་བགྲང་བྱ་བརྒྱད་པ་དངོས་པོ་ཞེས་པ་ཤིང་ཕོ་ཁྱིའི་ལོ་རྒྱལ་གྱི་ཟླ་བའི་ཡར་ཚེས་ལ་སྦྱར་བའི་ཡི་གེ་བ་ནི་སྔགས་རམས་པ་དཀོན་མཆོག་ཀུན་དགས་བགྱིས་པ་འདིས་ཀྱང་བསྟན་པ་དང་འགྲོ་བ་ལ་ཕན་ཐོགས་པར་གྱུར་ཅིག བཀྲ་ཤིས།
ཞུ་སྒྲིག་པའི་ཆེད་ཞུ།
སྤྱིར་ཟློས་གར་འདིའི་སྣོད་སོ་སོ་བོད་པ་ཤེས་རབ་དང་། རྒྱ་ནག་པ་ཚེེ་དཔཱེ། སོག་པོ་བི་ལིག རྒྱ་གར་བ་པྲཛྙཱ་བཅས་མི་རིགས་གང་ཡིན་པ་དེ་དག་སོ་སོའི་སྐད་དུ་བོད་ཡིག་གི་གྲིབ་མས་ལྗགས་རྩོམ་མཛད་ཡོད་ཀྱང་། གཅིག་ནས་དྲ་ངོས་ལ་ཡིག་ཚོགས་མང་བར་དོགས་པ་དང་། གཉིས་ནས་ཀློག་མཁན་སྒྱིད་ལུག་པའི་རྒྱུར་འགྲོ་བར་སྙམ་སྟེ་བོད་ཡིག་འབའ་ཞིག་འདིར་གཏགས་པའོ།།
དེ་ཡང་ཟློས་གར་འདི་ཉིད་ཀྱི་འདུ་བྱེད་མཁན་པོས་ཇི་སྐད་དུ། དེང་དུས་རྒྱ་བོད་ཧོར་གསུམ་ཐམས་ཅད་དུ་བསྟན་པ་དར་ཡོད་པས་དེ་དག་སོ་སོར་སྐད་ཀྱིས་བྱས་ན་སྐད་རིགས་སོ་སོའི་ཕྱོགས་གོ་ཞིང་། འདི་འདྲའི་རྐྱེན་གྱིས་ཆོས་ཀྱི་གནད་འགག་གལ་ཆེ་བ་རྣམས་ལ་བློ་ཁ་ཕྱོགས་མཁན་འབྱུང་སྲིད་དམ་སྙམ་པ་དང་རང་ཉིད་སོ་སོ་ཡང་དག་པར་རིགས་པ་བཞི་འགྲུབ་པའི་རྒྱུ་མཐུན་དུ་བསམས་ཞེས་གསུངས་པ་ལྟར། རིག་པ་གཉེར་བའི་དུས་ཡུན་རིང་མོའི་ཁྲོད་དུ་ཟློས་གར་གྱི་བསྟན་བཅོས་འདི་ཀློག་སྐལ་བྱུང་ཞིང་ཟློས་གར་འདིའི་དམིགས་དགོངས་འདི་ཉིད་འགྲུབ་ན་ཅི་མ་རུང་སྙམ་པའི་དྲན་འདུན་ཏུ་རེ་བ་སེམས་ཀྱི་ཡོལ་གོར་དུས་དང་རྣམ་པ་ཀུན་ཏུ་འཁྱིལ་ནས་ཡོང་བ་དང་། རང་དང་སྐལ་བ་མཉམ་པ་དག་གི་མིག་གི་དགའ་སྟོན་དུ་གྱུར་ཞིང་བློ་སྣ་ཆོས་ལ་ཕྱོགས་མཁན་འབྱུང་ཡང་སྲིད་བསམས་པའི་ཀུན་སློང་དྲག་པོ་དང་། ཟློས་གར་གྱི་བསྟན་བཅོས་ཡང་དག་ལམ་དུ་བཀྲི་བའི་རོལ་རྩེད་འདི་ཉིད་ལ་བརྟེན་ཏེ་སྐྱེ་བོ་གང་མང་ཞིག་ཡང་དག་པའི་ལམ་དུ་འཇུག་པའི་སྨོན་འདུན་དང་བཅས་ཏེ། རབ་བྱུང་བཅུ་བདུན་པའི་བགྲང་བྱ་ཉེར་དྲུག་པ་དགའ་བ་ཞེས་པ་ཆུ་ཕོ་འབྲུག་གི་ལོ་མཆུ་ཟླ་བའི་དཀར་ཕྱོགས་རྫོགས་པ་གསུམ་པ། རི་བོ་དགེ་ལྡན་པའི་བཀྲ་ཤིས་རྟེན་འབྲེལ་གྱི་ཉིན་མོ་ཆོ་འཕྲུལ་སྨོན་ལམ་ཆེན་མོ་དང་སངས་རྒྱས་བསྟན་པ་བཀའ་དྲིན་རབ་ཏུ་ཆེ་བའི་ལོ་ཙཱ་བ་ཆེན་མོ་སྒྲ་སྒྱུར་མར་པའི་དགོངས་རྫོགས་དུས་དྲན་ལ་འཁེལ་བའི་ཉིན་མོར་མཉམ་མེད་ཤཱཀྱའི་རྒྱལ་བོས་བདེན་བཞིའི་ཆོས་ཀྱི་འཁོར་ལོ་བསྐོར་སའི་གནས་ཁྱད་པར་ཅན་དྲང་སྲོང་ལྷུང་བ་རི་དྭགས་ཀྱི་ནགས་ཀྱི་འདབས་སུ་བརྗིད་ཀྱིས་ཆགས་པའི་བྷོ་ཊའི་གཙུག་ལག་ཁང་ཆེན་དུ་ཟླ་བ་གཞོན་ནུར་འབོད་པས་བགྱི་བ་ཡོངས་སུ་རྫོགས་པར་བྱས་པ་ཀུན་ལ་ཀུན་ཏུ་ཕན་ཐོགས་པར་གྱུར་ཅིག།
