-->
Showing posts with label སྒྱུ་རྩལ།. Show all posts
Showing posts with label སྒྱུ་རྩལ།. Show all posts

Jun 18, 2021

གྱང་ངོས་ཀྱི་ཁྲ་ཐིག

 


གྱང་ངོས་ཀྱི་ཁྲ་ཐིག

 

The Mark on the Wall

Virginia Woolf(1882-1941)

 


བིར་རྗེ་ནེ་ཡ་བོལ་ཧྥུས་བརྩམས།

སྐྱབས་ཆེན་བདེ་གྲོལ་གྱིས་བསྒྱུར།



ད་ལོའི་ཟླ་དང་བོའི་ཟླ་དཀྱིལ་ཡས་མས་སུ། ངས་གྱང་ངོས་སུ་ཁྲ་ཐིག་ཅིག་ཡོད་པ་ཐོག་མར་མཐོང་། དོན་དམ་ཉི་མ་དེ་གང་ཡིན་པ་ཤེས་དགོས་ཚེ། ངས་སྐབས་དེར་མཐོང་བ་ནི་ཅི་ཞིག་ཡིན་པ་དྲན་དགོས། ཕྱིར་འདང་བརྒྱབ་ན་ངའི་སེམས་ལ་རྩིག་ཐབ་ཀྱི་མེ་ཤར་ཡོང་། མེའི་གཟུགས་བརྙན་བདག་གི་ཀློག་བཞིན་པའི་དེབ་ཀྱི་ཤོག་ངོས་སུ་འཕྲོས་པ་དང་། རྩིག་ཐབ་སྟེང་གི་ཤེལ་གྱི་ཕོར་པའི་ནང་དུ་མེ་ཏོག་ལུག་མིག་རྐང་གསུམ་གཟེར་ཡོད། རེད་དེ། དེ་ནི་དགུན་དུས་ཀྱི་ཉི་མ་ཞིག་ཡིན་ལ། བདག་གིས་ཇ་བཏུངས་མ་ཐག་པའི་དུས་ཡིན། ངས་དེ་དྲན་དོན་ཅི་ཡིན་ཞེ་ན་སྐབས་དེར་ངས་ཏག་ཏག་ཐ་མག་འཐེན་བཞིན་ཡར་བལྟས་པས་གྱང་ངོས་ན་ཁྲ་ཐིག་ཅིག་ཡོད་པ་མཐོང་བས་སོ།།

 

ཐ་མག་གི་དུ་ཞགས་གྱ་གྱུར་རྒྱུ་བ་བརྒྱུད་དེ། ངའི་མིག་ཟུང་ཡུད་ཙམ་རིང་འབར་བཞིན་པའི་བུད་ཤིང་ལ་གཏད། ཡུན་རིང་མ་བྱུང་བའི་འཕྲུལ་སྣང་ཉིད་སླར་མངོན་པ་སྟེ། གོས་དམར་གྱོན་པའི་རྟ་དམག་གྲངས་ཀྱིས་མི་ཟིན་པ་ཞིག་ཆུའི་འཕྲུལ་འཁོར་དང་འདྲ་བར་རྟ་ལ་ལྕག་གིས་སྐུལ་བཞིན་བྲག་ལྡེབས་ཀྱི་གཞོགས་ཤིག་ཏུ་འགོ་བ་དང་། དམར་ལམ་ལམ་གྱི་དར་ཆ་ཉིད་མཁར་རྫོང་གི་ལྕོག་ཁང་དུ་རླུང་གིས་ལྷབ་ལྷུབ་གཡོ་བར་བྱེད། ཡིན་ཡང་གྱང་ངོས་ཀྱི་ཁྲ་ཐིག་དེས་ང་རང་འཕྲུལ་སྣང་ལ་ཡན་པ་ལས་ཕྱིར་ཐོན་པར་བྱས་ཤིང་། སེམས་ནི་དར་ཅིག་ལྷོད་ལ་བབས་པར་གྱུར། དེའང་འཕྲུལ་སྣང་དེ་ནི་རྙིང་པ་ཞིག་ཡིན་ལ་རང་བཞིན་དུ་བྱུང་བ་ཞིག་ཡིན་པས་བྱིས་དུས་ནས་ཡོད་པ་ཞིག་ཡིན་ཡང་སྲིད། མདོག་ནག་ཅིང་དབྱིབས་སྒོར་ལ་ཆུང་བའི་ཁྲ་ཐིག་དེ་ཏག་ཏག་རྩིག་ཐབ་ཀླད་ཀྱི་ཨིན་ཁྲེ་དྲུག་བདུན་མཚམས་ཀྱི་གྱང་ངོས་དཀར་པོ་དེར་ཡོད་དོ།།

 

རང་རེའི་སེམས་ནི་གསར་བྱུང་གི་ཆོས་གང་ཞིག་དང་ལྷན་ཅིག་རབ་ཏུ་གཡོ་བར་འགྱུར་ཏེ། དཔེར་ན་གྲོག་མའི་ཚོགས་ཀྱིས་སྤྲོ་བ་ཆེན་པོས་རྩྭ་རྐང་གཅིག་ཡར་འདེགས་པ་དང་། ཡང་དེ་ཉིད་སྐད་ཅིག་རིང་འདོར་བ་བཞིན་ནོ།། …… གལ་སྲིད་ཁྲ་ཐིག་དེ་ནི་གཟེར་མ་ཞིག་གི་ཤུལ་ཡིན་སྲིད་ན། དེར་འདྲ་པར་ཞིག་བཀལ་བ་མིན་པར་བྲིས་རིས་ཆུང་ཆུང་ཞིག་བཀལ་བ་ཡིན་སྲིད། བྲིས་རིས་དེའང་ལྕམ་མོ་ཞིག་གི་བྲིས་རིས་ཡིན་ལ། ལྕམ་མོ་དེ་ནི་ལྕང་ལོར་ཚོས་སྐྱ་དང་གདོང་ལ་སྐེག་ཚོན་བྱུགས་ཤིང་། མཆུ་ཡི་བིམ་སྒྲོས་ནི་ཁཱར་ནེ་ཞིན་བཞིན་དམར་མདངས་བཀྲ་བ་ཞིག་ཡིན་ངེས། རེད་དེ། བྲིས་རིས་དེ་ནི་བསླད་མ་ཞིག་ཡིན་པ་དང་ཁང་པ་དེའི་བདག་པོ་སྔོན་མ་དེས་ཀྱང་རི་མོའི་རིགས་དེ་འདྲ་བ་དག་བདམས་པར་ངེས། ཁོང་ཚོ་ནི་ཁང་པ་རྙིང་པའི་ནང་ལ་རི་མོའི་རིགས་རྙིང་པ་འཕྲོད་པར་འདོད་པའི་སྐྱེ་བོའི་རིགས་ཡ་མཚན་པ་འགའ་ཡིན་ངེས། ངས་རྟག་པར་ཁོང་ཚོ་སེམས་ལ་དྲན་ནའང་། ཁོང་ཚོ་ནི་ཡུལ་ཁྱད་མཚར་བ་དག་ཏུ་ཡོད་པས་ཁོ་ཚོ་དང་འཕྲད་པའི་སྐལ་བ་མེད་ལ། ཕྱིས་འབྱུང་ཁོང་ཚོ་དོན་ཅི་ཞིག་ལ་འཕྲད་པའང་ཤེས་ཐབས་བྲལ། ཁྱིམ་ཚང་དེའི་ཁྱིམ་བདག་གིས་བཤད་ན། ཁོང་ཚོ་ནི་ཁྱིམ་ཆས་ཀྱི་རིགས་བརྗེ་འདོད་དེ་ཁང་པ་འདི་ནས་གནས་སྤར་བ་ཡིན་ཟེར། ཡང་ཁོས་ཁོ་རང་གི་བསམ་ཚུལ་ལྟར་ན་སྒྱུ་རྩལ་བརྩམས་ཆོས་ཀྱི་ལྟག་རྒྱབ་ན་སྒྱུ་རྩལ་མཁན་པོའི་བསམ་བློ་ཡང་ཡོད་པ་རེད་ཅེས་ཤོད་ཀྱིན་པའི་སྒང་ལ་ངེད་གཉིས་སོ་སོར་གྱེས་དགོས་བྱུང་། ཚུལ་དེ་ནི་ངེད་ཅག་མེ་འཁོར་དུ་ཡོད་དུས། ལམ་ཁའི་གཞིས་བྲང་ཞིག་གི་མེ་ཏོག་ལྡུམ་རའི་ནང་ན་བགྲེས་མོ་ཞིག་གིས་ཇ་ལྡུག་བཞིན་པ་དང་། གཞོན་ནུ་ཞིག་གིས་ལག་ནང་དུ་ཡོད་པའི་དྲ་སྤོར་རྡེག་རྩིས་བྱེད་པ་མཐོང་ཞིང་། སྐད་ཅིག་ཉིད་ལ་དེ་དག་མེ་འཁོར་གྱི་རྗེས་སུ་བསྐྱུར་བ་དང་གཉིས་སུ་མ་མཆིས།

 

དེ་ལྟ་ནའང་། ངས་ཁྲ་ཐིག་དེ་ཡང་སྙིང་ཅི་ཞིག་ཡིན་པ་ཁ་ཚོན་གཅོད་མི་ཐུབ། དྲང་མོར་བཤད་ན་ངས་དེ་ཉིད་གཟེར་མ་ཞིག་ལས་བྱུང་བར་རློམ་ཐབས་བྲལ། དེ་ནི་སྤྱིར་བཏང་གི་གཟེར་ཤུལ་ཞིག་ལས་སྒོར་ཞིང་ཆེ་བ་ཞིག་རེད། གལ་སྲིད་ངས་ཡར་ལངས་ཏེ་བལྟས་ནའང་དེ་ཉིད་ཅི་ཞིག་ཡིན་པ་ཕལ་ཆེར་ཤེས་མི་སྲིད། དེའང་དོན་གང་ཞིག་བྱུང་བའི་རྗེས་སུ། དེ་ཇི་ལྟར་བྱུང་བ་སུས་ཀྱང་ཤེས་ཐབས་བྲལ་བ་བཞིན་ནོ།། ཀྱེ་མ། མི་ཚེ་ནི་ཇི་འདྲའི་ལྐོག་ཏུ་གྱུར་བ་ཞིག་དང་སེམས་ནི་ཅི་འདྲའི་ངེས་གཏན་མེད་པ་ཞིག འགྲོ་བ་མིའི་རིགས་ནི་ཇི་འདྲའི་རྨོངས་ཤིང་འཐོམས་པ་ཞིག་རེད་ཨང་། ངེད་ཅག་གིས་རང་ལ་དབང་བའི་ཆོས་གང་ལའང་ཁ་ལོ་སྒྱུར་ཐབས་བྲལ་བ་དང་། མིའི་རིགས་ཀྱི་ཤེས་རིག་མཐའ་དག་གི་མདུན་དུ་སོ་སོའི་མི་ཚེ་ནི་ངེས་པ་མེད་པ་ཞིག་ཡིན་པ་བསྟན་ཆེད། ངས་འདིར་དེ་སྔོན་བོར་བརླག་ཐེབས་པའི་ཅ་ལག་འགའ་ཞིག་དཔེར་བཞག་པས་ཆོག་གོ། དེའང་ཐོག་མར་ནང་དུ་ངའི་དཔེ་ཆ་འཚེམ་བྱེད་དག་བླུགས་པའི་ལྕགས་སྒམ་སྔོ་སྐྱ་དག་བཤད་འོས་ཏེ། དེ་ཚོ་ནི་དངོས་གནས་ཅི་ཡིན་འདི་ཡིན་མེད་པར་བོར་སོང་། དེ་དག་བྱི་ལས་འཆོས་པ་དང་ཙི་གུས་མུར་བ་ཡིན་སྲིད་དམ། དེའི་རྗེས་སུ་ད་དུང་བྱེའུ་གཟེབ་འགའ་དང་། ཤམ་ལྭའི་མཐའ་ཤན། ལྕགས་ཀྱི་ཤུད་ལྷམ། རྒྱལ་མོ་ཨཱན་རིང་གི་སོལ་སླེའུ། རྡེའུ་རྩེད་སྟེགས་བུ། ལག་སྦྲེང་སོགས་ཐམས་ཅད་མི་སྣང་བར་གྱུར་ཅིང་། རིན་པོ་ཆེའི་རྒྱན་ཆ་འགའ་ཡང་དེ་བཞིན་ནོ།། འོ་མདོག་གི་གཏེར་རྡོ་དང་མརྒད་ཀྱང་བོར་སོང་། དེ་དག་ནི་ཉུང་མའི་རྩད་པའི་གམ་ན་ཡོད། དེ་དག་ཐམས་ཅད་ནི་འབད་པ་དང་སེར་སྣའི་ངང་དུ་བསགས་པ་ཤ་སྟག་ཡིན། ཡིན་ཡང་སྐབས་འདི་ལ་ངའི་ལུས་ན་གྱོན་གོས་འགའ་ཞིག་ཡོད་པ་དང་ཉེ་འཁོར་ན་ཁྱིམ་ཆས་སྤུས་ལེགས་འགའ་ཡང་ཡོད་པས་དེ་ནི་དངོས་གནས་ཧ་ལས་དགོས་པའི་དོན་ཞིག་རེད་ཅེས་བཤད་ཆོག གལ་སྲིད་ངེས་པར་མི་ཚེ་ཉིད་དཔེ་རུ་འགོད་དགོས་བྱུང་ན། དེ་ནི་མི་ཞིག་ཆུ་ཚོད་རེར་ཨིན་ལེ་ལྔ་བཅུའི་མགྱོགས་ཚད་ཀྱིས་ཕུག་དོང་ནང་དུ་འཕངས་ཤིང་། དེ་ཉིད་དོང་སྒོ་ནས་ཐོན་དུས་ལུས་པོ་གཅེར་བུར་གྱུར་ཏེ་ཐ་ན་སྐྲ་འཛེར་ཞིག་ཀྱང་ལྷག་མེད་པ་དང་། དེའི་འཕྲོར་སླར་ཡང་ཡེ་ཤུའི་ལྷ་ཆེན་གྱི་རྐང་འདབས་སུ་འཕངས་ཏེ་མེ་ཏོག་ཆུ་ལྷ་བཞད་སའི་ནེའུ་གསེང་དུ་ལུས་ཀྱི་མགོ་རྔ་ལྡོག་སྟེ་སར་ལྷུང་བ་ཉིད་དོ།། ཡང་ཚུལ་དེ་ནི་ཤོག་བུ་སྨུག་པོས་བཏུམས་པའི་དོས་པོ་དག་སྦྲག་ཁང་གི་སྦུག་ལམ་དུ་གཡུགས་པ་དང་འདྲ་ལ། རླུང་གིས་སྐྱོད་པའི་སྐྲ་ལོ་ནི་རྟ་རྒྱུགས་ར་བའི་རྟ་ཡི་མཇུག་མ་དང་ཤིན་ཏུ་མཚུངས་སོ།། དཔེ་འདི་དག་གིས་འཚོ་བ་ཉིད་མི་རྟག་པའི་རང་བཞིན་དུ་གནས་པ་དང་། མཚམས་མེད་པར་སྟོང་ཟད་དུ་འགྲོ་ཞིང་ཡང་ཡང་བསྐྱབ་དགོས་པའི་ངེས་པ་མེད་ཅིང་ཡིད་རྟོན་བྲལ་བ་མཚོན་ནུས་སོ།།

 

དེས་ན་སྐྱེ་བ་ཕྱི་མ་ནི་ཅི་ལྟ་བུ་ཞིག་ཡིན་ནམ། ཕོན་ཆེ་བའི་གཞུང་རྟ་ཉིད་གེ་སར་གྱིས་ལྕི་བར་བྱས་ཏེ་མར་དུད་པ་དང་། ཕོར་པའི་ཁ་དང་འདྲ་བའི་མེ་ཏོག་ནི་མགོ་བོ་གུག་སྟེ་རྒྱ་སྨུག་གི་བཀྲག་མདངས་འགྱེད་པར་བྱེད། སྐྱེ་བོ་གང་ཞིག་ཅིའི་ཕྱིར་མགོན་མེད་སྐྱབས་མེད་དང་སྨྲ་བ་མེད་པའི་ངང་དུ་གནས་འདིར་ཚེ་འཕོས་པ་ལས་གཞན་དུ་མ་འཕོས་པ་དང་། ཕྱི་རོལ་གྱི་གཟུགས་གང་ཞིག་ལ་དམིགས་པའང་གཏད་མི་ཐུབ་པར་རྩྭ་གསེབ་བམ་གྱད་མིའི་རྐང་མཛུབ་ཀྱི་བར་ནས་ལུས་སོང་ངམ། ཡང་གང་ཞིག་ནི་ལྗོན་པ་ཡིན་པ་དང་། སྐྱེས་པ་དང་སྐྱེས་དམན་ཟེར་བ་དེ་ཅི་ཞིག་ཡིན་པ། ཡང་ན་ཆོས་དེ་དག་དོན་དམ་དུ་ཡོད་དམ་མེད་ཅེ་ན་བགྲང་བྱ་ལྔ་བཅུ་འདས་རྗེས་སུ་དེ་ལ་དྲིས་ལན་ཡོད་མི་སྲིད་དོ།། ཡལ་ག་སྦོམ་པོ་འགའ་འཕྲེད་དུ་ཉལ་སྐབས་སུ་འོད་དང་གྲིབ་མ་འཐབ་པ་ལས་གཞན་ཅི་ཡང་ལྷག་མི་འདུག་སྟེ། གཅིག་བྱས་ན་ཅུང་མཐོ་བའི་གནས་སུ་རྒྱ་སེ་མེ་ཏོག་གི་ཆ་ཤས་གློ་མདོག་དང་སྔོན་པོར་སྣང་བ་རེ་ཡོད་ཅིང་དེ་དག་ནི་དུས་ཀྱི་འགྲོས་དང་ལྷན་ཅིག་ཇེ་གསལ་ནས་ཇེ་གསལ་དུ་འགྲོ། མཐར་ཅི་ཞིག་ལ་འགྱུར་བ་ངས་ཀྱང་མི་ཤེས།

 

ཡིན་ཡང་གྱང་ངོས་ཀྱི་ཁྲ་ཐིག་དེ་ནི་བུ་ག་ཕྲ་མོ་ཞིག་ཀྱང་མ་ཡིན་པར་དངོས་པོ་ནག་པོ་དབྱིབས་སྒོར་མོ་ཅན་ཞིག་གིས་བཟོས་པ་ཡིན་སྲིད། དཔེར་ན་དབྱར་དུས་ཀྱིས་བཞག་པའི་རྒྱ་སེ་མེ་ཏོག་གི་ལོ་མ་ཆུང་ངུ་ཞིག་ལྟ་བུའོ།། དེའང་ང་ནི་ཧ་ཅང་གཟབ་གཟབ་བྱེད་པའི་ཁྱིམ་བདག་མ་ཞིག་མ་ཡིན་པ་རྩིག་ཐབ་སྟེང་གི་ས་རྡུལ་ལ་བལྟས་པས་ཤེས་སོ།། གོ་ཐོས་སུ་ཐྲི་རོ་དབྱི་མཁར་ནི་འདི་ལྟ་བུའི་ས་རྡུལ་གྱིས་ཐེངས་གསུམ་ལ་མར་མནན་པར་གྲགས། ཡིན་ནའང་རྫ་མ་སོགས་སྣོད་ཆས་གང་རུང་གི་ཆག་རོ་ལ་ས་རྡུལ་དེ་དག་གིས་ཅི་ཡང་མི་ནུས་ཏེ། འདི་ནི་སུས་ཀྱང་རློམ་རུང་བ་ཡིན།

 

སྒོ་ཁའི་ཤིང་གི་ཡལ་གས་སྒེའུ་ཁུང་གི་ཤེལ་ལ་དལ་གྱིས་རྡེག་ཅིང་། ངས་ནི་ཅ་ཅོ་མེད་ཅིང་། ཁོག་རྒྱ་ཡངས་ལ། ལྷིང་ཞིང་འཇགས་པའི་ངང་དུ་བསམ་གཞིག་གཏོང་འདོད་པས་དེ་ལ་བར་ཆད་ཕྲན་ཙམ་མེད་པ་དང་རྐུབ་སྟེགས་ལས་ཀྱང་ཡར་ལངས་མི་དགོས་པ་དང་། རྒོལ་བ་དང་རྐྱེན་ངན་གང་ཡང་མེད་པའི་ངང་ལས་སླ་མོས་དོན་འདི་བརྒྱུད་ནས་དོན་གཞན་དག་དྲན་རྒྱུ་བྱུང་ན་བསམ། ཕྱི་ཚུལ་གྱི་དོན་འགའ་ཞིག་དང་རིང་དུ་གྱེས་ཏེ་གཏིང་ཟབ་ས་ནས་ཟབ་སར་འབྱིང་ན་བསམ། འགྱུར་བ་མེད་པར་བརྟན་པོར་བསྡད་ན་ངས་སེམས་ནང་ནས་འཁྱུག་ཙམ་གྱིས་འགྲོ་བའི་དོན་དེ་འཛིན་ཐུབ། རེད་དེ། དེ་ནི་ཤིག་སི་ཕེར་རམ་ཡང་ན་གཞན་ཞིག་ཡིན་ཡང་ཆོག སྐྱེ་བོ་གང་དེ་རྐུབ་སྟེགས་ལག་འཇུ་ཅན་དུ་བརྟན་པོར་བསྡད་ཡོད་ལ། ཁོས་ཐབ་ནང་གི་མེ་ལ་བལྟས་འདུག དྲག་ཆར་དང་འདྲ་བའི་འཆར་སྒོ་ཞིག་ལྷ་ཡུལ་བརྒྱུད་ནས་ཁོའི་སེམས་ནང་ལ་བྱུང་། མི་རྣམས་ཆེས་ཆེར་ཕྱེ་བའི་རྒྱ་སྒོའི་ཕྱིར་འགྲེང་ཞིང་ཁོ་ཚོས་ཕྱིར་ནང་ལ་ལྟ་བ་དང་། ཁོས་ལག་པ་དཔྲལ་བར་བཞག་འདུག རྣམ་པ་འདི་འདྲ་བ་ནི་དབྱར་གྱི་ས་སྲོད་ཅིག་ལ་བྱུང་བར་བལྟ་ཆོག འོན་ཏེ་རྟོག་བཟོ་བྱས་པའི་འདས་དོན་དེ་ནི་ཇི་འདྲའི་སྙིང་པོས་སྟོང་བ་ཞིག་རེད་ཨང་། ང་ནི་དེ་ལ་ཅུང་ཙམ་ཡང་ཡིད་ཕྱོགས་པར་མ་གྱུར་ཏོ།། ངས་ང་རང་ལ་མི་ཚོར་སྤྲོ་བ་སྐྱེད་བྱེད་ཀྱི་བསམ་ཚུལ་ཞིག་བྱུང་ན་སྙམ་ཞིང་། བསམ་ཚུལ་དེ་ནི་ང་རང་ལ་བརྒྱུད་པའི་ངང་དུ་དཔལ་དང་གཟི་བརྗིད་སྟེར་བྱེད་ཅིག་ཡིན་ན་སྙམ། བསམ་ཚུལ་དེ་འདྲ་བྱུང་ན་དངོས་གནས་ཡིད་དུ་འོང་བ་ཞིག་རེད་དོ།། བསམ་ཚུལ་དེ་ནི་དུས་རྟག་པར་རང་ཉིད་ནི་གཞན་གྱི་ངོ་བསྟོད་ལ་སུན་པར་འདོད་པའི་སྐྱེས་བུ་ཞི་ཞིང་དུལ་བ་དེ་དག་གི་སེམས་ལའང་འཆར་ངེས་པ་དང་། དེ་ནི་སྦ་གསང་ཅི་ཡང་མེད་པར་རང་གིས་རང་ལ་བསྔགས་པ་དང་གཏན་ནས་མི་འདྲ། དེ་བས་དེ་ཉིད་ངོ་མཚར་རྨད་དུ་བྱུང་བ་ཞིག་ཏུ་ངེས། བསམ་ཚུལ་དེ་ནི་གཤམ་དུ་གསལ་བ་བཞིན་ནོ།།

 

ང་ཁང་པའི་ནང་དུ་འཛུལ་དུས། ཁོ་ཚོས་རྩི་ཤིང་རིག་པའི་སྐོར་ནས་ཁ་བརྡ་བྱེད་ཀྱིན་འདུག ངས་དེ་སྔ་ཁེན་སི་ཝེའི(Kingsway)ཁང་རྙིང་ཞིག་གི་རྩིག་གདན་ལས་མེ་ཏོག་ཅིག་མཐོང་མྱོང་བ་དང་། དེ་ནི་ཕལ་ཆེར་མི་རྣམས་ཀྱིས་ཆར་ལེ་སེའི(Charles)མཚན་ཅན་དང་པོའི་སྐབས་སུ་སོན་བཏབ་པ་ཞིག་ཡིན་ངེས་ཞེས་སྨྲས། མི་རྣམས་ཀྱིས་ཆར་ལེ་སེའི་མཚན་ཅན་དང་པོའི་སྐབས་སུ་མེ་ཏོག་ཅི་ཞིག་གདབ་སྲིད་དམ” ངས་དེ་ལྟར་དྲིས་པ་ཡིན། (འོན་ཏེ་ཕྱིར་ལན་ཅི་ཞིག་བཏབ་པ་ངའི་དྲན་པའི་ཡུལ་དུ་མི་འདུག) ངས་ཅུང་ཙམ་དྲན་པ་ནི། དེ་ནི་ཟེའུ་འབྲུ་མཆིན་མདོག་ཅན་གྱི་མེ་ཏོག་རིང་པོ་ཞིག་ཡིན་པ་དེ་རེད། དེ་བས་ངས་ཡུན་རིང་བར་དེ་ལྟར་དྲན་པ་ཡིན། ངས་དུས་རྒྱུན་རྟོག་བཏགས་ཀྱི་ཀློང་ནས་རང་ཉིད་ལ་མཆོར་སྒེག་སྤྲས་ཤིང་། གཞན་གྱིས་མི་ཚོར་བ་བྱས་ཏེ་སྣང་བ་སྐྱིད་པོ་བྱ་བ་ལས། ཀུན་གྱི་མདུན་ནས་རང་ཉིད་མཆོག་ཏུ་གྱུར་པར་བསྒོམས་མེད། གལ་སྲིད་ངས་དངོས་སུ་མཆོར་ཉམས་སྤྲས་དགོས་ཚེ། ངས་ཁ་རོག་གེར་དཔེ་དེབ་ཅིག་ལག་ཏུ་ཐོགས་ནས་འཚབ་བཞིན་པའི་ངང་ཚུལ་དེ་སྦ་སྲིད་པ་དང་། དེ་ལྟར་བྱས་ཚེ་ད་གཟོད་ངའི་སེམས་བདེ་ལ་འབབ་སྲིད། བཤད་ན་ཅུང་ཁྱད་མཚར་བ་ཞིག་ནི། མི་རྣམས་རྒྱུ་མཚན་མེད་པར་གཞན་མཆོག་ཏུ་བཀུར་བའམ་རྒྱུ་རྐྱེན་གཞན་གྱིས་རྨོངས་པར་བྱེད་པ། ཡང་ན་རང་ཉིད་ཅི་ཡིན་འདི་ཡིན་མེད་པར་གྱུར་ཏེ་གཞན་གྱིས་ཡིད་ཆེས་བརླག་པར་དོགས་ནས་རང་གི་སྣང་བརྙན་སྲུང་བར་དགའ། ཡིན་ཡང་། ཞིབ་ཏུ་བསམས་ན་དེ་ནི་ཧ་ཅང་ཁྱད་མཚར་བ་ཞིག་རེད་དམ་ཞེ་ན། དེ་གནད་ཀྱི་དོན་པོ་རང་རེད། གལ་སྲིད་མེ་ལོང་ཐམས་ཅད་ཧྲུག་ཆག་ཏུ་གྱུར་ཚེ། སྣང་བརྙན་ནི་ཡལ་བར་འགྱུར་བ་དང་། མེ་ལོང་ནས་མངོན་པའི་ཡིད་འོང་གི་གཟུགས་བརྙན་ཡང་ཉེ་འཁོར་དུ་ལྗང་ཤིག་གེར་ཡོད་པའི་ལྗོན་པའི་ཚོགས་དང་ལྷན་ཅིག་མི་སྣང་བར་འགྱུར་སྲིད། མི་དེའི་ཤུན་སྐོགས་ཀྱང་སྐྱེ་བོ་གཞན་ཁོ་ནའི་མཐོང་སྣང་དུ་འཆར་བར་འགྱུར། དེ་འདྲའི་འཇིག་རྟེན་ནི་དབུགས་ཀྱི་རྒྱུ་བ་འགག་པར་བྱེད་ཅིང་། གཏིང་མི་ཟབ་པ་དང་། སྙིང་པོས་དབེན་པ། ཡ་མ་གཟུགས་སུ་གྱུར་པ་ཞིག་རེད་ཨང་། འཇིག་རྟེན་དེ་ནི་འཚོ་ཞིང་གཞེས་རུང་གི་གནས་ཤིག་མ་ཡིན་ཏེ། གནས་དེ་ནས་སྤྱི་སྤྱོད་མོ་ཊའམ་ས་འོག་མེ་འཁོར་དུ་སྡོད་པའི་སྐབས་ཁོ་ནར། སྐྱེ་བོ་ཕན་ཚུན་གྱི་མིག་གི་ཤེལ་སྒོ་མེ་ལོང་དང་འདྲ་བ་དེ་ནས་རང་ཉིད་ཀྱི་སྣང་བརྙན་གསལ་ལ་མི་གསལ་བ་དེ་མཐོང་བར་འགྱུར། མ་འོངས་པའི་དུས་ཀྱི་སྒྲུང་མཁན་ཚོས་སྣང་བརྙན་དེ་ཤིན་ཏུ་གལ་འགངས་ཆེ་བ་ཞིག་ཡིན་པ་རིམ་གྱིས་རྟོགས་པར་འགྱུར་ཞིང་། དེ་གར་སྣང་བརྙན་གཅིག་ཙམ་མ་ཡིན་པར་གྲངས་མེད་པ་ཞིག་ཡོད། འདི་ནི་ཁོ་ཚོས་བརྟགས་ཤིང་དཔྱད་པའི་ཟབ་ཚད་དེ་ཡིན་པ་དང་། སྙེག་པར་བྱ་བའི་འཁྲུལ་སྣང་དེ་ཡིན་སྲིད། ཡང་ན་གྷི་རིག་པ་དང་ཤིག་སི་ཕེར་གྱིས་བྱས་པ་ཇི་བཞིན་རྫོགས་རྒྱུ་མེད་པའི་སྒྲུང་ནང་གི་མངོན་སུམ་གྱི་བརྗོད་པ་དག་མར་གཡུགས་ཏེ་ཤེས་བྱ་གང་ཞིག་སོ་སོའི་མོས་པ་བཞིན་ལེན་འོས་སམ། གཅིག་བྱས་ན་དེ་ལྟར་སྤྱི་མཚན་ཅན་གྱི་དོན་དུ་བསྒྱུར་ན་རིན་ཐང་ཅི་ཡང་མེད་དེ། ཚིག་དེ་དམག་དཔུང་གི་འབོད་སྒྲ་བཞིན་ཚད་ལྡན་དུ་བཟོས་ཡོད་པ་དེ་ཤེས་པས་ཆོག་གོ། ཚིག་དེས་མི་རྣམས་ལ་གསར་འགྱུར་གྱི་དབུ་རྩོམ་དྲན་དུ་འཇུག་ཅིང་ནང་སྲིད་བློན་ཆེན་དྲན་དུ་འཇུག་ལ་དེ་དང་དེ་འདྲ་ཐམས་ཅད་དྲན་དུ་འཇུག ཆུང་བྱིས་པའི་དུས་ནས་ལེགས་པར་བསམས་ཤིང་ཚད་དང་ལྡན་པ་དང་བདེན་པར་བཟུང་བའི་དོན་དེ་དག་ལས་སུ་ཡང་བརྒལ་བར་མི་ནུས་ཏེ་གལ་སྲིད་བརྒལ་གྱུར་ན་དམྱལ་བར་ལྟུང་ངེས་སོ།། ཡང་སྤྱི་མཚན་ཅན་གྱི་དོན་ཞེས་པས་ལོན་ཊོན་གྱི་རེས་གཟའ་ཉི་མ་དྲན་དུ་འཇུག དེ་ནི་རེས་གཟའ་ཉི་མའི་གུང་ཡོལ་དུས་ཀྱི་འཆམ་འཆམ། རེས་གཟའ་ཉི་མའི་གུང་ཚིགས། ཤི་བོ་ཚོའི་སྐོར་དང་། གྱོན་གོས་ཀྱི་སྐོར། གོམས་སྲོལ་གྱི་སྐོར་གླེང་བའི་གཏམ་སོགས་ཏེ། སུ་ལའང་མོས་པ་མེད་ནའང་ཐམས་ཅད་ཁང་པའི་ནང་མཉམ་དུ་འཛོམས་ནས་སྐབས་ཤིག་ལ་སྡོད་པ་བཞིན་ནོ།། དེ་གར་ཐམས་ཅད་སྲོལ་ལུགས་ལས་འདའ་མི་རུང་སྟེ། དམིགས་བསལ་གྱི་དུས་སྐབས་དེར་སྒྲོག་ཁེབས་ནི་ཅིས་ཀྱང་ཐིག་ལེ་གྲུ་བཞི་སེར་པོ་ཅན་གྱི་ཐགས་རིས་ཡིན་དགོས། དཔེར་ན། ཁྱོད་ཀྱིས་རེས་འགར་འདྲ་པར་ནས་མཐོང་སྲིད་པའི་གོང་མའི་ཕོ་བྲང་གི་ཁྱམས་རར་ཡོད་པའི་ཀམ་པ་ལི་བཞིན་ནོ།། གལ་སྲིད་སྒྲོག་ཁེབས་ནི་རིགས་དེ་འདྲ་བ་མ་ཡིན་ཚེ་དེ་ལ་སྒྲོག་ཁེབས་སུ་ཇི་ལྟར་འབོད། ནམ་ཞིག་གི་ཚེ་ན། གཟའ་ཉི་མའི་གུང་ཚིགས་དང་། གཟའ་ཉི་མའི་འཆམ་འཆམ། གྲོང་གསེབ་ཀྱི་དུས་ཚོད། སྒྲོག་ཁེབས་སོགས་བདེན་པར་སྣང་བ་མཐའ་དག་དོན་དངོས་སུ་བདེན་པ་མིན་པར་མ་ཟད། དེ་དག་ནི་སྒྱུ་མའི་སྣང་བརྙན་ཕྱེད་ཙམ་གྱིས་གྲུབ་པ་ཤེས་ཤིང་། དེ་ལྟར་སྣང་མཁན་ལའང་ཁྲིམས་མེད་ལུགས་མེད་ཀྱི་རང་དབང་གི་ཚོར་ཤེས་ཙམ་ཡོད་པ་མ་གཏོགས་ཁྲིམས་ཆད་གཞན་གང་ཡང་མི་ཕོག་པ་ཡིན་ན་དེ་ནི་ཅི་འདྲའི་ཧ་ལས་དགོས་པ་ཞིག་དང་ཅི་འདྲའི་ཡ་མཚན་པ་ཞིག་རེད་ཨང་། ངས་འདང་མི་ཕོག་པ་ཞིག་ནི། དོན་དངོས་སུ་གང་ཞིག་གིས་བདེན་པར་གྲུབ་པའི་ཆོས་དེ་དག་གི་ཚབ་བྱས་པ་དེ་རེད། གལ་སྲིད་ཁྱོད་རང་བུད་མེད་ཡིན་ན། དེ་ནི་སྐྱེས་པ་ཡིན་ངེས་རེད། སྐྱེས་པ་ཚོའི་འདོད་ཚུལ་གྱིས་ངེད་ཅག་གི་འཚོ་བར་ཁ་ལོ་བསྒྱུར་ཡོད་ཅིང་། དེས་ཚད་ཐིག་དེ་དག་གཏན་ལ་ཕབ་པ་དང་། ཝེ་ཐྲི་ཁེར་གྱི་སྐྱེས་བུ་མཆོག་དམན་གྱི་རིམ་བསྟར་རེའུ་མིག་[1]བཟོས་པ་རེད། ངས་བརྟགས་པ་ལྟར་ན། དེ་ཉིད་དམག་འཁྲུག་གི་རྗེས་ཀྱི་སྐྱེས་ཕོ་མོ་མང་པོའི་སེམས་ཀྱི་སྒྱུ་མའི་སྣང་བརྙན་ཕྱེད་ཙམ་དུ་གྱུར་འདུག་པར་མ་ཟད། ངེད་ཅག་གིས་དེ་ཉིད་དུས་ཚོད་ཐུང་ངུའི་ནང་འཕྱ་སྨོད་ཀྱི་ཡུལ་དུ་བསྒོམས་ཏེ་སྣང་བརྙན་གྱི་སྙིགས་ཟོམ་དུ་འཕེན་བྱའི་ཤིང་དམར་གྱི་ཕོར་སྒྲོམ་[2]དང་། ལཱན་སེར་[3]གྱི་བརྐོས་རིས། ལྷ་དང་བདུད། དམྱལ་ཁམས་སོགས་སུ་འགྱུར་ངེས། གལ་སྲིད་རང་དབང་ཟེར་བ་དེ་ཡོད་ན། དེས་ངེད་ཅག་ལ་བཞག་པ་ནི་ཡིད་མྱོས་པར་བྱེད་པའི་ཁྲིམས་མེད་ལུགས་མེད་ཀྱི་རང་དབང་གི་ཚོར་བ་འབའ་ཞིག་རེད།

 

འོད་སྣང་གང་རུང་གི་འོག་ནས་གྱང་ངོས་ཀྱི་ཁྲ་ཐིག་དེ་གྱང་ངོས་ནས་ཚུར་འབུར་བ་དང་འདྲ། དེ་ཉིད་རྦད་དེ་དབྱིབས་སྒོར་སྒོར་ཞིག་ཏུའང་མ་ངེས། ངས་ཁ་ཚོན་གཅོད་མི་ཐུབ་ཀྱང་ཕལ་ཆེར་དེ་ཡིས་གྲིབ་མ་རབ་རིབ་ཅིག་འགྱེད་པ་འདྲ་ལ། གལ་སྲིད་ངས་མཛུབ་མོས་གྱང་ངོས་དེད་དེ་དེར་རེག་ཚེ་ཚེག་གཅིག་གི་སྟེང་ནས་བང་སོའི་དེའུ་ཞིག་ལ་རེག་ཐུབ་པའི་ཚོར་བ་འབྱུང་། བང་སོའི་དེའུ་དེ་ལྟ་བུ་ནི་ལྷོ་ཕྱོགས་དྷོན་ཟིའི་[4]ཡུལ་གྱི་རི་མ་ཐང་གི་བང་སོའི་དེའུ་དག་དང་འདྲ་བར་ངོས་འཇམ་པ་ཤ་སྟག་རེད། ཁོ་ཚོས་བཤད་ན་དེ་གར་ཡོད་པ་ནི་དུར་ས་མིན་ན་དམག་སྒར་ཡིན་ཟེར། དེ་གཉིས་ལས་ང་ནི་དུར་ས་ཡིན་ན་དགའ། ཨིན་ཇི་བ་མང་ཤོས་དང་འདྲ་བར། ང་ནི་སྐྱོ་ཤས་ཆེ་བ་ལ་ཞེན་ཏེ། འཆམ་འཆམ་ལ་ཕྱིན་རྗེས་སུ་རྐང་ཞབས་ཀྱི་སྤང་གི་འོག་ན་རུས་པ་དཀར་པོ་སྦས་ཡོད་པ་དྲན་སྲིད། …… དེའི་སྐོར་དེབ་ཅིག་གི་ནང་ངེས་པར་བྲིས་ཡོད་པར་ངེས་ལ། གནའ་རྫས་ཉར་ཚགས་མཁན་ཞིག་གིས་ཀེང་རུས་དེ་དག་ཡར་བཏོན་ཏེ་དེ་དག་ལ་མིང་བཏགས་ཡོད་ངེས། …… གནའ་རྫས་ཉར་ཚགས་མཁན་དེ་མི་ཅི་འདྲ་ཡིན་པ་བསམས་ནས་ང་ལ་མཚར་སྣང་ཞིག་བྱུང་། དེ་ནི་ཕལ་ཆེར་ལས་འཁྱུར་ངལ་གསོ་བྱས་པའི་དམག་སྤྱི་དེ་རིགས་ཡིན་སྲིད་ལ། ཁོས་བཟོ་པ་རྒས་འཁོགས་འགའ་རོགས་སུ་ཁྲིད་དེ་འདི་གའི་ཐོག་ཤོད་ལ་འཛེགས་རྗེས་འདམ་གོང་དང་རྡོ་ལ་ཞིབ་བཤེར་བྱེད་པ་དང་། ཁྱིམ་མཚེས་ཀྱི་ཆོས་དཔོན་དབར་ཕན་ཚུན་འཕྲིན་པ་གཏོང་རེས་བྱེད་ངེས། འཕྲིན་ཡིག་གང་ཞིག་ཞོགས་ཟས་ཀྱི་དུས་སུ་ཁ་ཕྱེ་དུས། ཁོང་ཚོས་རང་ཉིད་ནི་ཧ་ཅང་གནད་ཡོད་དུ་ཚོར་སྲིད། མདའ་རྩེ་མི་འདྲ་བ་ཕན་ཚུན་བསྡུར་ཕྱིར་ཁོང་ཚོས་དུས་རྒྱུན་གྲོང་དང་གྲོང་རྡལ་གྱི་བར་དུ་འགྲུལ་སྐྱོད་བྱ་དགོས་ཤིང་དེ་ནི་ཁོང་ཚོ་དང་ཁོང་ཚོའི་ཆུང་མ་དག་ལ་མཚོན་ན་དགའ་བ་འཕེལ་བའི་ལས་ཤིག་རེད། ཁོང་ཚོས་ཆུང་མས་པ་ལམ་[5]གྱི་ལྡེ་གུ་བཟོ་འདོད་པའམ། ཡང་ན་དཔེ་ཁང་གི་ནང་ལ་གད་བདར་བྱ་རྩིས་ཡོད་ངེས། གནས་དེ་ནི་དུར་སའམ་དམག་སྒར་གང་ཡིན་གྱི་དོན་ཆེན་པོ་དེའི་སྐོར་ནས་ཁོང་ཚོས་ཁ་གཡོར་ས་སྣ་ཚོགས་བཙལ་ནས་ལས་དེ་རེ་ཞིག་བཏང་སྙོམས་སུ་བཞག་ཆོག འོན་ཏེ་དམག་སྤྱི་ཁོང་གིས་ནི་སྤྲོ་བ་ཆེན་པོས་ཕྱོགས་དེ་གཉིས་ས་ནས་ཡིད་རྟོན་འཕེར་བའི་བདེན་དཔང་བཙལ་ཐུབ་པར་སྙམ་འདུག ཡིན་ཡང་མཐར་ཁོང་གི་ཐུགས་ནི་དམག་སྒར་ལ་ཕྱོགས་འདུག དེར་རྒོལ་ལན་བྱུང་རྗེས། ཁོས་དྲིལ་སྒྲོག་དེབ་ཅིག་བྲིས་ཏེ་ཡུལ་དེའི་གྲོང་ཁུལ་གྱི་དུས་ཚིགས་འདུ་ཚོགས་[6]སུ་ཀློག་པའི་འཆར་གཞི་བཀོད། སྟབས་མ་ལེགས་པ་ཞིག་ལ་སྐབས་དེར་ཁོང་གྲིབ་ནད་ཀྱིས་མནར་ཏེ་མལ་སར་ལྷུང་ཞིང་། རིག་པ་གསལ་དུས་ཀྱི་དུས་མཐའ་མ་དེར་སེམས་སུ་དྲན་པ་ནི་ཆུང་མ་དང་བུ་ཕྲུག་མ་ཡིན་པར། དམག་སྒར་དང་མདའ་རྩེ་རང་རེད། མདའ་རྩེ་དེ་ནི་ཡུལ་དེའི་དངོས་མང་བཤམས་སྟོན་ཁང་དུ་འགྲེམས་སྒྲོམ་དུ་བཤམས་ཡོད་ལ། དེ་ཉིད་རྒྱ་ནག་གི་བུད་མེད་གཤེད་མ་ཞིག་གི་རྐང་པ་དང་། ཨེ་ལེ་སེ་བྷེ་ཟེའི་དུས་སྐབས་ཀྱི་ལྕགས་གཟེར་སྤར་མ་གང་། ཐུ་དྷིར་རྒྱལ་རབས་[7]དུས་ཀྱི་ས་ཡིས་བཟོས་པའི་གང་ཟ་ཞིག རོ་མན་སྐབས་ཀྱི་རྫ་ཆས་ཤིག དེ་སྔོན་ནེལ་སོན་[8]གྱིས་ཆང་འཐུང་བྱེད་དུ་སྤྱད་པའི་ཆང་ཕོར་ཞིག་བཅས་དང་མཉམ་པོར་བཤམས་ཡོད། ཡིན་ཡང་དེས་རྒྱུ་མཚན་ཅི་ཞིག་སྒྲུབ་ཀྱིན་པ་བདག་གིས་ཤེས་མ་སོང་།

 

མིན་ཏེ། ག་ལ་ཡིན། དེས་རྒྱུ་མཚན་གང་ཡང་ར་སྤྲད་མེད་ལ་ཅི་ཡང་ཤེས་མེད། ཏག་ཏག་དུས་འདི་ལ་ང་རང་ཡར་ལངས་ཏེ་གྱང་ངོས་ཀྱི་ཁྲ་ཐིག་དེ་ནི་ཅི་ཞིག་ཡིན་པ་གསལ་པོར་བཤད་ན། ཇི་ལྟར་བཤད་ན་ལེགས་སམ། དེ་ནི་བགྲང་བྱ་ཉིས་བརྒྱ་ལྷག་གི་སྔོན་ལ་བརྡབས་པའི་གཟེར་མ་རྙིང་པ་ཧ་ཅང་ཆེ་བ་ཞིག་གི་གཟེར་མགོ་རང་རེད། ད་ལྟའི་བར་དུ། རབས་རེ་རེའི་བྲན་མོ་དག་གིས་སུན་པ་མེད་པར་ཡང་ནས་ཡང་དུ་ཕྱིས་པས་དེའི་སྟེང་གི་སྣུམ་རྩི་ལྷུང་སྟེ་གཟེར་མགོ་ལྷང་ངེར་བུད་པ་རེད། ནང་དུ་ཐབ་མེ་ལྷབ་ལྷུབ་ཏུ་འབར་ཞིང་གྱང་ངོས་དཀར་པོ་ཡིན་པའི་ཁང་པ་ཞིག་ནས་དེང་རབས་ཀྱི་འཚོ་བའི་རྣམ་པ་ཐོག་མར་མཐོང་བ་དེས་ང་ལ་ཅི་ཞིག་ཕན་ནམ། རྒྱུད་ཀྱི་ཤེས་བྱ་འཕེལ་ལམ། ཡང་ན་མུ་མཐུད་དུ་ཚོད་བགམ་བྱ་དགོས་སམ། དེ་བས་ང་རང་ཡར་ལངས་སམ་ཙོག་པུར་སྡོད་པ་གང་ཡིན་ཡང་བསམ་གཞིག་གི་རྒྱུན་ནི་སྐྱོང་ཐུབ་བོ།། དེས་ན་ཅི་ཞིག་ནི་ཤེས་བྱ་ཡིན་ནམ། མཁས་པར་རློམ་པ་དག་ནི་གཟུངས་སྔགས་མཁན་དང་སྦས་པའི་བརྟུལ་ཞུགས་འཆང་མཁན་དག་གི་རྗེས་རབས་པ་སྟེ། ཁོ་ཚོའི་མི་རབས་སྔོན་མ་དག་གིས་བྲག་ཕུག་དང་ནགས་ཀླུང་ནས་བསྡད་དེ་སྔོ་སྨན་བཟོ་བ་དང་། ཙི་ཙི་ལ་དྲི་བ་འདོན་པ། གནམ་གྱི་སྐར་མའི་རྒྱུ་བར་རྟོག་པ་ལས་གཞན་ཅི་ཞིག་ནུས། ངེད་ཅག་གི་སེམས་ཀྱི་རྨོངས་དད་ཇེ་ཆུང་ལ་སོང་བ་དང་ཁོང་ཚོར་སྔོན་ཆད་བཞིན་བཀུར་འདོད་མེད་པར་གྱུར་ཏེ་ངེད་ཅག་གི་སེམས་ནི་མཛེས་པ་དང་བདེ་ཐང་ལ་ཕྱོགས་པར་གྱུར། …… རེད་དེ། སུས་ཀྱང་ཡི་གར་འོངས་པའི་འཇིག་རྟེན་ཞིག་རྟོག་བཟོ་བྱ་ཆོག དེ་ནི་འཇམ་ཐིང་ངེར་གནས་ཤིང་རྒྱ་ཆེ་བ་དང་། ཤིན་ཏུ་དམར་བ་དང་སྔོ་བའི་མེ་ཏོག་དག་ཐང་དུ་ཅི་དགར་བཞད་པ་ཞིག་ཡིན། གནས་དེར་སློབ་དཔོན་ཆེན་མོ་མེད་ལ་ཆེད་མཁས་པའང་མེད། ཉེན་རྟོག་དང་འདྲ་བའི་ཕྱག་མཛོད་ཀྱང་མེད། གནས་དེར་མི་རྣམས་ཀྱི་བསམ་པ་ནི་ཉ་མོའི་རྫིའུས་ཆུ་གཤགས་ཏེ་ཡིད་དུ་འོང་བའི་ཆུ་རིས་བཀྲ་བར་བྱེད་ཅིང་། ཆུ་པདྨའི་རྩ་བ་ལ་དལ་གྱིས་རེག་པར་བྱེད་པ་དང་། ཡང་ན་བྱེའུ་མཁའ་ལ་ཐོགས་མེད་དུ་རྒྱུ་ཞིང་མཚོ་ནང་གི་བྱ་སྒོང་དཀར་པོ་ཡོད་སར་ལྡིང་སྐོར་རྒྱག་པ་ཇི་བཞིན་ཅི་དགར་ཡན་པོར་གཏང་ཆོག …… གལ་སྲིདཝེ་ཐྲི་ཁེར་གྱི་ལོ་རིམ་མེ་ལོངམེད་པ་དང་། སྐྱེས་བུ་མཆོག་དམན་གྱི་རིམ་བསྟར་རེའུ་མིག་མེད་ཚེ། འཇིག་རྟེན་གྱི་ལྟེ་བར་གཞིས་བཅས་ཏེ། མཚོ་ཆུ་སྐྱ་བོ་བརྒྱུད་ནས་སྐད་ཅིག་གཅིག་ལ་འོད་ཀྱི་གོང་བུ་དང་དེ་དག་གི་ལྡོག་གཟུགས་ལ་བལྟས་ཚེ་གནས་དེ་ནི་ཇི་འདྲའི་ཞི་འཇགས་ལྡན་པ་ཞིག་རེད་ཨང་།

 

ངས་མྱུར་བར་ཡར་མཆོངས་ཏེ་གྱང་ངོས་ཀྱི་ཁྲ་ཐིག་དེ་ནི་གཟེར་མ་ཞིག་གམ། རྒྱ་སེའི་ལོ་མ་ཞིག་གམ། ཤིང་གི་གས་ཁ་ཞིག་སོགས་དོན་དམ་ཅི་ཞིག་ཡིན་པར་གསལ་པོར་བལྟ་དགོས།

 

དེ་ནི་རང་བྱུང་ལྷན་སྐྱེས་ཀྱི་བུ་མོས་རང་ཉིད་བསྲུང་བའི་ཆེད་དུ་རྩེད་མོ་རྙིང་པ་དེ་རྩེ་བ་མ་ཡིན་ནམ། བསམ་གཞིག་གི་རྒྱུན་རིང་མོ་དེ་ལས་མོས་ལུས་སྟོབས་དང་སེམས་ཤུགས་ཉམས་པའི་ཉེན་ཁ་ཡོད་པར་མ་ཟད། མངོན་སུམ་དང་གདོང་ཐུག་ཤོར་བའང་ཚོར་འདུག རྒྱུ་མཚན་ནི་སུ་ཞིག་གིས་ཝེ་ཐྲི་ཁེར་གྱི་སྐྱེས་བུ་མཆོག་དམན་གྱི་རིམ་བསྟར་རེའུ་མིག་ལ་འཛུབ་མོ་རི་སྟོན་གྱིས་མང་པོ་ཞིག་བཤད་ཐུབ་བམ། མངའ་ཁུལ་མཁན་ཆེན་ཁན་ཐྲེ་བྷེ་རེ་ཡི་གཞུག་ན་ཁྲིམས་དཔོན་གོང་མ་ཡོད་ལ། ཁྲིམས་དཔོན་གོང་མའི་གཞུག་ན་ཡང་མངའ་ཁུལ་མཁན་ཆེན་ཡོར་ཁི་ཡོད། སྐྱེ་བོ་སུ་ཡིན་ཡང་སྐྱེ་བོ་གཞན་ཞིག་གི་གཞུག་ན་ཡོད་ལ། དེ་ནི་ཝེ་ཐྲི་ཁེར་གྱི་མཚན་ཉིད་རིག་པ་རེད། སུ་ཞིག་སུ་ཡི་གཞུག་ན་ཡོད་པ་ཤེས་རྒྱུ་ནི་གནད་ཀྱི་དོན་པོ་རང་རེད། ཝེ་ཐྲི་ཁེར་གྱིས་དེ་གསལ་པོར་ཤེས་ཡོད་ལ་དེ་བཞིན་ལེགས་པར་སྲུང་ངོ་།། རང་བྱུང་ལྷན་སྐྱེས་ཀྱི་བུ་མོས་ཀྱང་དེ་འདྲ་ཡིན་པས་སེམས་ལ་སྐུལ་མ་ཐེབས་པར་གྱིས་ཤིག་ཅེས་གདམས་པར་བྱེད། གལ་ཏེ་དེ་ཡིས་སྐུལ་མ་མི་ཐེབས་པར་ཅིས་ཀྱང་གནས་སྐབས་དེའི་ལྷིང་འཇགས་དཀྲོག་པར་བྱ་ན། གྱང་ངོས་ཀྱི་ཁྲ་ཐིག་དེ་དྲན་པར་བྱའོ།།

 

ང་རང་རང་བྱུང་ལྷན་སྐྱེས་རྩེད་མོ་ལ་འདྲིས་ཆ་ཆེན་པོ་ཡོད་དེ། དེ་ནི་སྦྱོར་བ་དངོས་ལ་བསྐུལ་ནས། མི་རྣམས་ཡིད་མྱོས་པར་བྱེད་པའམ་སེམས་སྐྱོ་བར་བྱེད་པའི་སེམས་ཀྱི་འཆར་སྣང་དག་གི་མཇུག་སྡུད་པ་དེའོ།། དེ་བས་ངས་ནི་ངེད་ཅག་གིས་རྟག་པར་སྦྱོར་བ་དངོས་ལ་འཇུག་མཁན་དག་གིས་ལས་གང་བསྒྲུབས་ཀྱང་མནོ་བསམ་བཏང་མི་འདུག་ཅེས་ཁོང་ཚོ་ཅུང་དམན་སར་འགོད་ཀྱིན་འདུག་སྙམ་བྱུང་། དེས་ན་ངེད་ཅག་གིས་གྱང་ངོས་ཀྱི་ཁྲ་ཐིག་དེ་ལ་ལན་ཅིག་བལྟས་ནས་ཡིད་བདེ་བར་མི་བྱེད་པའི་བསམ་གཞིག་གི་རྒྱུན་བཅད་ན་མི་འགྲིག་པ་གང་ཡང་མེད་དོ།།

 

རེད་དེ། ངས་མིག་གཉིས་ཀྱིས་དེ་ལ་གསལ་པོར་ཅེར་བསྡད་ཚེ། མཐའ་ཡས་རྒྱ་མཚོའི་ཆེན་མོའི་ནང་ནས་ཤིང་ལེབ་ཅིག་ལ་འཇུས་པའི་ཚོར་བ་བྱུང་། དེ་ནི་ཡིད་སྤྲོ་བར་བྱེད་པའི་མངོན་སུམ་གྱི་སྣང་བ་གསལ་ལྷང་ངེ་བ་ཞིག་སྟེ། དེས་མངའ་ཁུལ་མཁན་ཆེན་དང་ཁྲིམས་དཔོན་གོང་མ་ཉིད་གྲིབ་མ་རབ་རིབ་ཀྱི་གཟུགས་སུ་བསྒྱུར་ཏེ་མི་སྣང་བར་བྱེད། དེར་གསལ་བ་ནི་ཚད་མར་གྲུབ་ཅིང་དངོས་སུ་ཡོད་པ་ཞིག་གོ། རྒྱུ་མཚན་དེའི་ཕྱིར་ངེད་ཅག་ནམ་གུང་རྨི་ལམ་ངན་པ་ལས་སད་ཚེ། ཧར་ཧར་པོར་གློག་སྒོ་འབྱེད་པ་དང་། དེ་ནས་དལ་ཅག་གེར་གན་རྐྱལ་དུ་བསྡད་དེ། གོས་སྒྲོམ་གྱི་ཕྱོགས་སུ་ཅེར་བ་དང་། སྲ་མོར་གྲུབ་པ་དག་གི་ཕྱོགས་སུ་ཅེར་བ། དངོས་སུ་ཡོད་པའི་ཕྱོགས་སུ་ཅེར་བ། གང་ཟག་གིས་སྟོང་པའི་ཕྱི་རོལ་ཡུལ་ཏེ་ངེད་ཅག་ལས་འདས་པའི་ཆོས་གཞན་པ་བདེན་གྲུབ་ཏུ་ཡོད་པ་དེར་ཅེར་བ་རེད། དེ་ནི་མི་རྣམས་ཀྱིས་གསལ་པོར་ཤེས་འདོད་པ་དེའང་རེད། …… དཔེར་ན། ཤིང་ཆ་ནི་ཡིད་ལ་དྲན་ཚེ་དགའ་བ་སྐྱེད་བྱེད་ཀྱི་དངོས་པོ་ཞིག་ཡིན་པ་ལྟ་བུའོ།། དེ་ནི་ལྗོན་པ་ལས་བྱུང་བ་དང་། ལྗོན་པ་ནི་ཆེ་ཆེར་སྐྱེ་བར་འགྱུར། འོན་ཀྱང་ངེད་ཅག་གིས་དེ་དག་ཇི་ལྟར་སྐྱེ་བ་མི་ཤེས། དེ་ཉིད་སྤང་ལྗོངས་དང་། ནགས་ཚལ། ཆུ་བོའི་འགྲམ་བཅས་སུ་ལོ་རེ་ནས་ལོ་རེ་བཞིན་སྐྱེ་ནའང་དེས་ངེད་ཅག་ལ་མཉམ་འཇོག་ཙམ་ཡང་མི་བྱེད། རེད་དེ། དེ་དག་ཐམས་ཅད་ནི་ངེད་ཅག་གི་དྲན་སྣང་དང་ཤིན་ཏུ་མཐུན་ནོ།། ཚ་གདུག་ཆེ་བའི་ཕྱི་དྲོར། ལྗོན་པའི་གྲིབ་བསིལ་འོག་ནས་བ་མོས་མཇུག་མ་གཡུག་གཡུག་བྱེད། ལྗོན་པའི་བཀྲག་མདངས་ཀྱིས་ཆུ་བོར་ཚོན་ལྗང་ཁུ་བྱུགས་པས། ཆུ་བྱ་ནག་པོ་ཆུ་ནང་དུ་འཛུལ་ཏེ་ཡར་འཕགས་པའི་ཚེ་ན་དེ་ཡི་གཤོག་སྒྲོ་ལྗང་ཁུར་སྣང་། ང་ནི་ཉ་མོ་རྣམས་ཆུ་རྒྱུན་ལ་ཁ་གཏད་དེ་རླུང་ཁའི་དར་ཆ་བཞིན་དྲང་མོར་སྐྱོད་པ་ཉིད་སེམས་ལ་སྒོམ་པར་དགའ་བར་མ་ཟད། ཆུ་སྦུར་དག་གིས་དལ་མོར་གྲོག་ཤུར་དུ་འདམ་པ་ཕོན་པོར་རྩིག་པ་ཉིད་སེམས་ལ་སྒོམ་པར་ཡང་ཤིན་ཏུ་དགའ། དེ་བཞིན་ང་རང་ལྗོན་པ་དངོས་ཉིད་སེམས་ལ་སྒོམ་པར་ཡང་མོས་ཏེ། ཐོག་མར་སྲ་ཞིང་དམ་པའི་ཤིང་གི་ཚོར་བ་འབྱུང་བ་དང་། དེ་ནས་རླུང་འཚུབ་ཀྱིས་བརྡར་ཅིང་གཤག་པར་བྱེད་ལ། མཐར་བྲོ་བ་ཕུན་སུམ་ཚོགས་པའི་ཤིང་གི་ཚི་བཅུད་དལ་གྱིས་མར་བཞུར་བར་འགྱུར། དེ་མིན་ད་དུང་ངས་འདི་ལྟར་དྲན་ཏེ། གྲང་རེག་ཆེ་བའི་དགུན་དུས་ཀྱི་མཚན་མོར། ལྗོན་པ་དེ་མུ་མེད་པའི་ཐང་སྟོང་དུ་ལོ་མ་ཡོངས་རྫོགས་ཕྱོགས་གཅིག་ཏུ་དྲིལ་ཅིང་། ཟླ་བའི་ལྕགས་མདེའུ་རྣོན་པོ་དག་གི་མདུན་ནས་ཉམ་ཆུང་བའི་ཆ་མ་ལུས་སྦེད་བཞིན་འགྲེང་ཡོད་པ་དང་། དེ་ནི་མཚན་ལམ་རིང་མོའི་ནང་གྲུ་ཡི་དར་ཤིང་རྗེན་པ་ས་སྟེང་དུ་བཙུགས་པ་ཞིག་དལ་མེད་ཕར་གཡོ་ཚུར་གཡོ་བྱེད་པ་དང་ཀུན་ནས་མཚུངས་སོ།། ཟླ་དྲུག་པའི་ནང་གི་བྱེའུ་སྐད་ནི་ཤིན་ཏུ་གསལ་ཞིང་ཅུང་ཁྱད་མཚར་དུ་སྣང་ངེས་ལ། ཤིང་ཤུན་གྱི་གཉེར་མའི་ནང་ཕར་འགྲོ་ཚུར་འགྲོ་བྱེད་པའམ་ལོ་མ་ལྗང་ཁུའི་ནང་ཉི་མར་ལྡེ་ལ། རྡོ་རྗེ་ཕ་ལམ་གཏུབ་མ་འདྲ་བའི་མིག་དམར་པོ་མདུན་དུ་གཏད་པའི་འབུ་སྲིན་དག་གི་རྐང་པ་ནི་ཅི་འདྲའི་འཁྱག་གིན་ཡོད་ཨང་། …… བུ་ཡུག་རྒོད་པོས་ལྗོན་པའི་ཚི་སྣ་དག་དུམ་བུ་དུམ་བུར་བཀས་ཤིང་། མཇུག་མཐའི་རླུང་འཚུབ་ངར་མས་དེ་ཉིད་རྩད་ནས་བསྒྱེལ་ཏེ། རྩེ་མོའི་ཡལ་ག་རྣམས་སླར་ཡང་ས་ཡི་ཁོངས་སུ་ཐིམ། འོན་ཏེ། དེའི་ཚེ་སྲོག་ནི་དེ་དང་ལྷན་ཅིག་འཇིག་མི་འདུག དཀའ་བ་ཁུར་ཅིང་གཡེང་བ་མེད་པའི་ཚེ་སྲོག་ས་ཡ་དུ་མ་ལྗོན་པར་བརྟེན་ཏེ་མལ་ཁང་། གྲུ་གཟིངས། ལམ་འགྲམ། སྐྱེས་ཕོ་མོ་དག་གི་ཕྱི་དྲོའི་ཇ་བཏུངས་རྗེས་ཐ་མག་འཐེན་སའི་ཁྱམས་ར་སོགས་འཇིག་རྟེན་གྱི་གྲུ་ག་ཐམས་ཅད་དུ་ཁྱབ་འདུག མདོར་ན་སོས་དལ་བག་ཡངས་ཀྱི་འཆར་སྒོ་མ་ལུས་པ་ལྗོན་པ་ལས་བྱུང་བ་རེད་ཨང་། ངས་དེ་དག་རེ་རེ་བཀར་ནས་ཞིབ་ཏུ་དྲན་འདོད་ཀྱང་། དོན་གཞན་པ་ཞིག་ཡིད་ལ་གློ་བུར་དྲན་བྱུང་། …… ངས་ཅི་ཞིག་དྲན་པ་རེད་དམ། ངས་འདི་ལྟར་དྲན་དོན་ཅི་ཡིན་ནམ། དེ་ནི་ལྗོན་པ་ཞིག་རེད་དམ་ཆུ་བོ་ཞིག་རེད། ཡང་ནཝེ་ཐྲི་ཁེར་གྱི་ལོ་རིམ་མེ་ལོངརེད། དེ་མིན་ན་ཐང་གཤོང་དུ་སྐྱེས་པའི་ཀུ་མུད་ཅིག་རེད་དམ། གང་ལྟར་ངས་ཅི་ཡང་དྲན་གྱིན་མི་འདུག ཆོས་ཐམས་ཅད་འགུལ་ཞིང་འགྱེལ་བ་དང་། ཟགས་ཤིང་ཡལ་འགྲོ་བཞིན་འདུག…… ཐམས་ཅད་ཀུན་ནས་ཉོག་ཉོག་པོར་འགྱུར་བའི་སྐབས་སུ། མི་ཞིག་ང་སར་ཕྱོགས་ཏེ་ཡར་ལངས་འདུག་ཅིང་ཁོ་ན་རེ།

ང་ཚགས་ཤོག་ཅིག་ཉོ་རུ་འགྲོ་དགོས

དེ་ནས

དོན་དུ་ཚགས་ཤོག་ཉོ་བ་དེའང་ཡག་པོ་མི་འདུག…… 

དོན་གསར་པ་ཅི་ཡང་བྱུང་མི་འདུག སྡུག་ཤི་རྒྱག་རྒྱུའི་དམག་འཁྲུག་དེ། 

དམྱལ་བར་ལྟུང་ཤོག……དེ་མིན། ངས་ནི་འུ་ཅག་གིས་ན་བུན་བུ་མོ་[9]ཞིག་རྟག་པར་གྱང་ངོས་སུ་འབྱར་དུ་འཇུག་དགོས་དོན་མི་འདུག་སྙམ

ཀྱེ་མ། གྱང་ངོས་ཀྱི་ཁྲ་ཐིག་དེ་ནི། དོན་དུ་ན་བུན་བུ་མོ་ཞིག་ཡིན་འདུག

 


ཡོང་ཁུངས། མི་རྒོད་རྩོམ་རིག་སྤྱི་སྟེགས།

རྩོམ་འདི་ཐོག་མརང་གྲོལ༢༠༢༠ལོའི་དེབ༡བོའི་སྟེང་སྤེལ།



[དཔྱད་མཆན: བདག་གིས་མགོ་ནས་དུམ་མཚམས་གཉིས་མ་ཡིག་དང་བསྡུར་ཏེ་དཔྱད་ཁུལ་བྱས་པར་བདེ་གྲོལ་གྱིས་མ་ཡིག་ལ་ཞེ་དྲག་བསྟུན་མི་འདུག་པའི་ཚོར་བ་བྱུང་། ཁ་བྱང་གཅིག་པུར་གྱང་ངོས་ཀྱི་ཁྲ་ཐིག་ཟེར་དོན་ནག་ཐིག་དེ་མཐའ་མར་འབུ་ཨ་ར་ར་ཞིག་ཡིན་པ་ཤེས་ནས་ཁྲ་ཐིག་ལབ་པ་རེད་དམ། ཡང་ན་རྒྱ་ཡིག་ཏུ་斑點ཞེས་བསྒྱུར་ཡོད་པ་དང་བསྟུན་པ་རེད། ཆི་གུ! ཁོས་དབྱིན་ཡིག་ནས་བསྒྱུར་ཡིན་ཁུལ་བྱས་འདུག་ནའང་། རྒྱ་ཡིག་ལ་བསྟུན་པ་མང་བར་སྣང་། དེ་ལྟ་ནའང་། རྩོམ་ཡིག་སྒྱུ་རྩལ་ལ་མོས་པ་དག་གི་སླད་དུ་འདིར་བཀོད་ཡོད། བདག་གིས་ཀྱང་ལོ་མང་སྔོན་འདིའི་མགོ་ནས་ཏོག་ཙམ་བསྒྱུར་ཡོད་པ་འོག་ཏུ་བཀོད་ཡོད།

 


གྱང་ངོས་ཀྱི་ནག་ཐིག 

བིར་རྗི་ནི་ཡ། བོལ་ཕ།

ཟླ་བ་གཞོན་ནུས་བསྒྱུར།

 

ངས་མགོ་ཡར་དགྱེས་ནས་གྱང་ངོས་ཀྱི་ནག་ཐིག་དེ་ཐོག་མར་མཐོང་དུས་ནི་ཕལ་ཆེར་ད་ལོའི་ཟླ་དང་བོའི་ཟླ་དཀྱིལ་ཡིན་ངེས། ཉིན་མ་དེ་ནམ་ཞིག་ལ་ཡིན་མིན་ཐག་ཆོད་པ་ལ་ངས་ངེས་པར་དུ་དེ་དུས་ཅི་ཅི་མཐོང་མིན་དྲན་དགོས། ད་ནི་ངས་རྩིག་ཐབ་ནང་གི་མེ་དེ་དྲན་བྱུང་། ཟེར་འོད་ཉག་མ་གཅིག་འགུལ་རྒྱུ་མེད་པར་བདག་གི་དཔེ་ཆའི་ཤོག་ངོས་སུ་འཕྲོས་འདུག་ལ། ཐབ་ཀའི་སྟེང་གི་ཤེལ་རྫ་དེའི་ནང་དུ་ལུག་མིག་མེ་ཏོག་གསུམ་གསེབ་ནས་བཞག་འདུག རེད། དེ་ནི་ངེས་པར་དགུན་དུས་ཤིག་ལ་རེད། ང་ཚོས་ཇ་འཐུང་ཚར་མ་ཐག་ཡིན། རྒྱུ་མཚན་ནི་སྐབས་དེར་ངས་ཐ་མག་འཐེན་བཞིན་བསྡད་ཡོད་དུས་ངས་མགོ་ཡར་དགྱེས་ནས་ཐོག་དང་བོར་གྱང་ངོས་ཀྱི་ནག་ཐིག་དེ་མཐོང་བྱུང་། ངས་ཐ་མག་གི་དུ་བའི་ཀློང་ནས་མིག་གིས་ཡར་བལྟས་པ་དང་འབར་གྱིན་པའི་རྡོ་སོལ་ལ་ཡུད་ཙམ་བལྟས་ནས་སྡོད་སྐབས། མཁར་རྫོང་སྟེང་ལྷབ་ལྷུབ་ཏུ་གཡོ་བཞིན་པའི་དར་ཆ་དམར་དམར་ཞིག་གི་འཕྲུལ་སྣང་རྙིང་བ་དེ་བདག་གི་ཀླད་རྒྱར་ཤར་བྱུང་ལ། སྐྱ་མི་གྲལ་ཤར་ཞིག་བྲག་རྡོ་ནག་ནག་ཅིག་གི་ཟུར་ཀ་ནས་འགྲོ་བཞིན་པ་སེམས་ལ་འཁོར་སོང་། ནག་ཐིག་དེས་བདག་གི་འཕྲུལ་སྣང་དེ་ཡལ་བར་བྱས་ནས་བདག་ལ་དབུགས་དབྱུང་ཐེངས་ཤིག་སྤྲད་བྱུང་། རྒྱུ་མཚན་ནི་དེ་ནི་འཕྲུལ་སྣང་རྙིང་བ་ཞིག་རེད། རང་ཤུགས་ཀྱིས་འོང་བའི་འཕྲུལ་སྣང་ཞིག་རེད། ཕལ་ཆེར་བྱིས་དུས་སུ་བྱུང་བ་ཞིག་ཡིན་རྒྱུ་རེད། ནག་ཐིག་དེ་ཀོར་ཞིང་ཆུང་ལ། གྱང་ཀར་དཀར་དེའི་སྟེང་དུ་ནག་གྱི་ལེར། རྩིག་ཐབ་ལས་ཚུན་བདུན་བརྒྱད་ཅིག་གི་གོང་དུ་འདུག


ང་ཚོའི་སེམས་པ་འདི་ཡུལ་ཞིག་ལ་ཞོགས་ནས་འགྲོ་བ་ནི་ཅི་འདྲའི་ལས་སླ་བ་ལ། དཔེར་ན། གྲོག་མ་ཁྱུ་ཞིག་གིས་སྤྲོ་སེམས་འཁོལ་བའི་ངང་སོག་མ་ཞིག་དུས་ཡུན་ཐུང་ཐུང་ཞིག་ལ་བཀྱགས་ནས་དྲུད་དྲུད་རྗེས་གཡུགས་འཇོག་པ་བཞིན། ་་་་་་་་་་


གལ་ཏེ་ནག་ཐིག་དེ་འཛེར་མ་ཞིག་གིས་ཤུལ་བཏོད་པ་ཡིན་ན་ནི། དེ་འདྲ་པར་ཞིག་འགེལ་ཆེད་དུ་གཏན་ནས་མ་ཡིན་པར། དེ་ནི་ངེས་པར་དུ་འདྲ་རིས་ཆུང་ཆུང་ཞིག་འདོགས་པའི་ཆེད་དེ།---དེ་ནི་སྐྲ་སི་ལུའི་སྟེང་དུ་སྐག་རྫས་གཏུལ་ཞིང་། འགྲམ་པར་སྐག་རྡུལ་བསྐུས་ཡོད་པ་དང་། མཆུ་སྒྲོས་རྡོ་སྨྱུག་མེ་ཏོག་དམར་བོ་བཞིན་དུ་ཡོད་པའི་བུད་མེད་ཅིག་གི་འདྲ་རིས་ཆུང་ཆུང་ཞིག་ཡིན་ངེས། རྫུན་མ་ལོས་ཡིན། ཅི་ལ་ཟེར་ན་ང་ཚོའི་སྔོན་ལ་ཁང་བ་འདིར་བསྡད་མྱོང་མཁན་དག་གིས་ཁང་རྙིང་ལ་འདྲ་རྙིང་ཟེར་བ་ལྟར་རི་མོ་དེ་ལྟར་བདམས་ཡོད་ངེས་ཡིན་པའི་ཕྱིར་རོ།།]


 

མཆན།


[1] འདི་ནིཝེ་ཐྲི་ཁེར་གྱི་ལོ་རིམ་མེ་ལོངལ་གོ་དགོས། དེ་ཉིད་ཨིན་ཇིའི་དཔར་སྐྲུན་པ་རྗོ་སེ་ཧྥོ་ཝེ་ཐྲི་ཁེར (Joseph Whitaker,1820-1895) གྱིས1868ལོར་གསར་དུ་བཏོན་ཅིང་། ཨིན་ཇིའི་ཆེས་ལེགས་པའི་ལོ་རིམ་མེ་ལོང་དང་། ཤེས་བྱ་ཀུན་ཁྱབ་ཀྱི་དེབ་ཆུང་བ་ཞིག་ཏུ་གྲགས། དེའི་ནང་དུ་གནམ་རིག་སྐར་རྩིས་དང་། ས་ཁམས། འཛམ་གླིང་རྒྱས་བཤད་སོགས་མ་འདུས་པ་མེད་ཅིང་དེའི་ས་བཅད་གཅིག་གི་ནང་སྤྱི་པའི་འབྲེལ་འདྲིས་ཁྲོད་ནས་ཟས་ཅོག་གི་བཞུགས་གྲལ་སྒྲིག་སྟངས་དང་། ཆ་ལུགས་སྤྲས་ཚུལ་སོགས་སྐྱེས་བུ་མཆོག་དམན་གྱི་རིམ་པ་གསལ་བར་བྱས་ཡོད།

[2] ཕོར་བ་དང་སྡེར་མ་སོགས་ཟས་ཆས་འཇོག་སའི་ཆ་སྒམ་མམ་ཟོག་སྒྲོམ་ལ་གོ།

[3] དབྱིན་ཇིའི་ཝེ་ཁེ་ཐྲོ་ཡའི་དུས་སྐབས་ཀྱི་བརྐོས་རིས་པ་ཞིག

[4] དབྱིན་ཡུལ་གྱི་དབྱིན་ལན་ལྷོ་ཕྱོགས་དང་ལྷོ་ནུབ་ཕྱོགས་སུ་ཡོད་པའི་སྤང་ནེམ་པོ་ཅན་གྱི་རི་མ་ཐང་ཞིག

[5] དབྱིན་སྐད་དུ Pulmཟེར་ཅིང་། མདོག་དམར་ནག་གམ་སྨུག་པོ་ཅན་གྱི་ཤིང་ཏོག་ཆུང་ངུ་ཞིག

[6] ཡེ་ཤུ་ཆོས་ལུགས་ཀྱི་ཆོས་གྲོགས་རྣམས་དུས་ཚིགས་རེར་ཐེངས་རེ་འདུ་བ་ལ་གོ།

[7] ཧེན་རི་མཚན་ཅན་བདུན་པས་དབྱིན་ལན་དང་། ཝེལ་སི། ཨེར་ལན་བཅས་ལ་ཕྱི་ལོ1485ལོར་དབང་བསྒྱུར་རྗེས་བཙུགས་པའི་རྒྱལ་རབས་ཤིག་སྟེ། དེ་ཉིད་ཕྱི་ལོ1603གྱི་བར་དུ་གནས་པར་གྱུར་ཏོ།།

[8] མཚན་ཡོངས་ལ་ཧུར་རེ་ཞོ་ནེལ་སོན(Horatio Nelson,1758-1805)ཟེར། ཨིན་ཇིའི་མཚོ་དམག་གི་དམག་སྤྱི་དང་དམག་ཇུས་མཁན་གྲགས་ཅན་ཞིག

[9] ཕྱི་སྐོགས་དུང་དཀར་འདྲ་བའི་ནང་གནས་ཤིང་དབྱར་དུས་ན་བུན་ལྡང་སྐབས་ལུས་ཕྱིར་མངོན་པའི་འབུ་ཞིག་སྟེ། ཨིན་སྐད་དུ Snailདང་རྒྱ་སྐད་དུ 蜗牛ཟེར།


May 30, 2021

བུད་མེད་ཀྱིས་བགེགས་བྱས་པའི་ལེའུ་བཞུགས་སོ།།

 


སངས་རྒྱས་སྤྱོད་པ།

स्त्री-निवारण

བུད་མེད་ཀྱིས་བགེགས་བྱས་པའི་ལེའུ་བཞུགས་སོ།།




 

 

དེ་ནས་སྐྱེད་མོས་ཚལ་དེ་ནས། །ཡ་མཚན་གྱིས་ནི་མིག་གཡོ་རྣམས། །

བུད་མེད་རྣམས་ནི་ཁྱོ་ཐོབ་བཞིན། །མི་སྐྱོང་སྲས་ཀྱི་མདུན་དུ་འོངས། །

 

འོངས་ནས་དེ་ལ་དེ་རྣམས་ཀྱིས། །ཡ་མཚན་རབ་རྒྱས་སྤྱན་མ་རྣམས། །

པདྨའི་མཛོད་འདྲའི་ཕྱག་རྣམས་ཀྱིས། །ཕྲིན་ལས་ཡང་དག་སྤྱོད་པ་བྱས། །

 

གཡོ་མེད་དགའ་བ་རྣམ་གསལ་བའི། །སྤྱན་མིག་རྣམས་ཀྱིས་འཐུང་བ་བཞིན། །

ཡིད་དཀྲུགས་འདོད་པས་སེམས་གཡེངས་རྣམས། །དེ་ལ་ཡོངས་སུ་བསྐོར་ནས་གནས། །

 

ལྷན་སྐྱེས་རྒྱན་རྣམས་ཀྱིས་བཞིན་དུ། །མཚན་མ་མཛེས་རྣམས་ཀྱིས་བརྒྱན་པ། །

འདོད་ལྷ་ལུས་དང་ལྡན་ནོ་ཞེས། །དེ་ལ་མི་མོ་དེ་རྣམས་སྙམ། །

 

ཞི་བ་ཉིད་ཕྱིར་བརྟན་ཉིད་ཕྱིར། །ཁ་ཅིག་གསང་བའི་འོད་ཟེར་ཅན། །

ས་ལ་དངོས་སུ་བབས་པ་ཡི། །ཟླ་བ་བཞིན་དུ་རྟོག་པར་གྱུར། །

 

དེ་ཡི་ལུས་ཀྱིས་གཡེངས་དེ་རྣམས། །ངེས་བཟུང་ལུས་ནི་རྣམ་འགྱུར་ཞིང་། །

ཕན་ཚུན་མིག་རྣམས་ཀྱིས་བསྣུན་ནས། །དལ་བུས་དབུགས་ནི་རྣམ་པར་བརྒྱུས། །

 

དེ་ལྟར་མི་མོ་དེ་རྣམས་ཀྱིས། །དེ་ནི་མིག་ཙམ་གྱིས་མཐོང་ཉིད། །

སྨྲ་བ་མེད་ཅིང་དགའ་མེད་པར། །འདི་ཡི་མཐུ་ཡིས་ནོན་པར་གྱུར། །

 

དེ་ལྟར་དེ་རྣམས་རྩོམ་བྲལ་ཞིང་། །སྙིང་རྗེས་རྣམ་པར་འཁྲུགས་མཐོང་ནས། །

བྲམ་ཟེ་མདུན་ན་འདོན་གྱི་སྲས། །བློ་ལྡན་འཆར་ཀས་ཚིག་སྨྲས་སོ། །

 

ཀུན་གྱི་སྒྱུ་རྩལ་ཀུན་ཤེས་ཤིང་། །དགོངས་པ་ལེན་ལ་མཁས་མ་རྣམས། །

གཟུགས་དང་མཛངས་དང་ལྡན་པ་སྟེ། །རང་གི་ཡོན་ཏན་གཙོར་ཕྱིན་ནོ། །

 

ལུས་ངན་གྱི་ཡང་སྐྱེད་ཚལ་དང་། །བྱང་གི་སྒྲ་མི་སྙན་ན་ཡང་། །

ཡོན་ཏན་འདི་རྣམས་ཀྱིས་མཛེས་ཏེ། །ནོར་འཛིན་འདི་ན་སྔོན་ཉིད་དོ། །

 

ཆགས་བྲལ་རྣམས་དང་དྲང་སྲོང་ཡང་། །ཁྱེད་ཅག་རྣམས་ཀྱིས་གཡོ་ནུས་ཤིང་། །

ལྷ་མོ་རྣམས་ཀྱིས་ཤེས་པ་ཡིས། །ལྷ་རྣམས་ལ་ཡང་ལེན་པར་རོ། །

 

དགོངས་པ་ཤེས་དང་རྩེད་འཇོ་དང་། །མཛངས་དང་གཟུགས་ནི་ཕུན་ཚོགས་པས། །

བུད་མེད་རྣམས་ཀྱང་ཆགས་ནུས་ན། །སྐྱེས་པ་རྣམས་ནི་སྨོས་ཅི་དགོས། །

 

རྣམ་པ་དེ་ལྟར་རབ་སྦྱར་བ། །དེ་ཡི་རང་གི་སྤྱོད་ཡུལ་ལས། །

རྣམ་པ་དེ་ལྟར་སྤྱོད་པ་འདི། །ཁྱོད་ཀྱི་དྲང་བོའི་ཚིག་མ་གྱུར། །

 

ཁྱོད་ཀྱི་འདི་ནི་ངོ་ཚ་བས། །མིག་འཁུམས་བག་མ་གསར་བ་ཡི། །

སྤྱོད་པ་དང་མཚུངས་ཡང་ན་ནི། །བ་གླང་སྐྱོང་གི་ཆུང་མའི་འོས། །

 

གང་ཡང་འདི་ནི་དཔའ་བ་སྟེ། །དཔལ་གྱི་མཐུ་ལས་ཆེན་པོ་ཡིན། །

བུད་མེད་ཀྱི་ཡང་གཟི་ཆེ་སྟེ། །དེ་ཕྱིར་འདི་ཡང་ངེས་པར་བྱ། །

 

སྔོན་ཡང་ཀཱ་ཤིའི་མཛེས་མ་ནི། །སྨད་འཚོང་མ་ཡི་དྲང་སྲོང་ཆེ། །

ལྷ་ཡིས་ཐུབ་པར་དཀའ་བ་ཡང་། །དྲང་སྲོང་རྒྱས་པས་རྐང་བས་བརྡུངས། །

 

མཱན་ཐལ་གཽ་ཏམ་དགེ་སློང་ནི། །སྨད་འཚོང་གཙོ་མོ་བྱིན་མ་ཡི། །

དགའ་འདོད་དེ་ཡི་དོན་ཆེད་དུ། །སྔོན་གྱི་ཚེ་ན་རོ་རྣམས་བཏོན། །

 

མུན་རིངས་མིང་ཅན་གཽ་ཏ་མ། །དྲང་སྲོང་ཆེན་པོ་ཚེ་རིངས་པོ། །

ཁ་དོག་དབྱིབས་མཆོག་མ་ཡིན་པའི། །བུད་མེད་ཀྱིས་ནི་ཚིམ་པར་བྱས། །

 

དྲང་སྲོང་རྭ་སྐྱེས་ཐུབ་པ་མཆོག །བུད་མེད་ཡུལ་ལ་མི་མཁས་པ། །

རྣམ་པ་སྣ་ཚོགས་ཐབས་རྣམས་ཀྱིས། །ཞི་མས་དེ་ལྟར་བླངས་ཤིང་ཕམ། །

 

སྣ་ཚོགས་བཤེས་གཉེན་དྲང་སྲོང་ཆེ། །བརྟུལ་ཞུགས་ཆེན་པོ་བརྟན་པ་ཡང་། །

ལྷ་མོ་མར་སྲུང་མས་ཕྲོགས་ཏེ། །ལོ་བཅུ་རྣམས་ལ་ཉི་མར་ཤེས། །

 

དྲང་སྲོང་དེ་རྣམས་དེ་རྣམས་སོགས། །བུད་མེད་ཀྱིས་བསྒྱུར་བླངས་གྱུར་ན། །

རོལ་ཞིང་ལང་ཚོ་སྔ་མ་ཡིས། །མི་བདག་སྲས་པོ་སྨོས་ཅི་དགོས། ། 

 

དེ་ལྟར་གྱུར་ན་ཡིད་ཆེས་ཤིང་། །འདི་ནི་མི་སྐྱོང་རིགས་ཀྱི་དཔལ། །

འདི་ལས་ཕྱིར་ཕྱོགས་མ་ཡིན་པ། །ཇི་ལྟར་དེ་ལྟར་ནན་ཏན་མཛོད། །

 

ལང་ཚོ་ལྡན་མ་འགའ་ཞིག་རྣམས། །མཚུངས་པའི་སྐྱེ་བོ་འཕྲོག་པ་སྟེ། །

མཆོག་དང་མཆོག་མིན་དག་གི་སེམས། །ལེན་པ་གང་དེ་བུད་མེད་རྣམས། །

 

དེ་ལྟར་འཆར་ཀའི་ཚིག་ཐོས་ནས། །བུད་མེད་དེ་རྣམས་ཕུག་པ་བཞིན། །

གཞོན་ནུ་ལེན་པར་རབ་མཚོན་ཏེ། །བདག་ཉིད་ཡང་དག་ཀུན་ནས་འཛེགས། །

 

འཇིགས་ལས་འཇིགས་བཞིན་ཡན་ལག་མ། །དེ་རྣམས་སྨིན་དང་ལྟ་དང་སྒེག །

དགོད་དང་རོལ་དང་འགྲོ་བ་ཡིས། །ཀུན་ནས་བསྐྱོད་པའི་སྤྱོད་པ་བྱས། །

 

རྒྱལ་བོའི་བཀའ་ལུང་སྦྱར་ཕྱིར་དང་། །གཞོན་ནུ་ཉིད་ཀྱང་འཇམ་ཕྱིར་དང་། །

རྒྱགས་པ་ཡིས་ནི་མྱོས་པའི་ཕྱིར། །ཡིད་མི་ཆེས་པ་མྱུར་བར་དོར། །

 

གླང་མོའི་ཚོགས་དང་ཐབས་ཅིག་ཏུ། །གླང་བོ་གངས་ཅན་ནགས་ན་ལྟར། །

དེ་ནས་མི་མོའི་སྐྱེ་བོ་ཡིས། །གཞོན་ནུ་བསྐོར་ཞིང་ནགས་ན་སྤྱད། །

 

ཡིད་འོང་ནགས་དེར་གཞོན་ནུ་དེ། །བུད་མེད་རྣམས་ཀྱི་མདུན་འགྲོ་འབར། །

རྣམ་པར་མཛེས་པའི་སྐྱེད་ཚལ་ན། །ལྷ་མོས་བསྐོར་བའི་ཉི་མ་བཞིན། །

 

རྣམ་པར་སྒེག་བཅས་གཞོན་ནུ་མ། །རྒྱགས་པས་མ་སྤངས་དེ་རྣམས་དགའ། །

སྲ་ཞིང་ཟླུམ་རྒྱས་ལྷན་ཅིག་པའི། །ནུ་མ་རྣམས་ཀྱིས་དེ་ལ་རེག །

 

དཔུང་བ་ལས་བྲུལ་འཇམ་རིང་མཉེན། །ལག་པའི་ལྗོན་ཤིང་སྟོབས་མེད་མ། །

ཁ་ཅིག་བདེན་མིན་འཁྲུལ་བ་རུ། །བྱས་ནས་དེ་ལ་སྟོབས་ཀྱིས་འཁྱུད། །

 

ཁ་ཅིག་ཟངས་མཆུ་མ་མཆུ་ཅན། །ཁ་ཅིག་ཆང་གི་དྲི་ངག་གིས། །

གཅིག་པུ་དབེན་པར་སྡོད་ཅིག་ཅེས། །འདི་ཡི་རྣ་བར་ཤབ་ཤུབ་བྱེད། །

 

ཁ་ཅིག་བཀའ་ལུང་སྩོལ་བ་བཞིན། །བྱུག་པ་གཤེར་མས་རབ་སྨྲས་ཏེ། །

འདིར་ནི་གུས་པར་གྱིས་ཤིག་ཅེས། །དགོད་དང་འཁྱུད་དང་འདོད་པས་སོ། །

 

ཁ་ཅིག་གསེར་གྱི་སྐ་རགས་ཀྱི །ཅལ་ཅོལ་རྣམས་ཀྱིས་ཙམ་ཙོམ་དང་། །

ཕྲ་མོའི་དར་གྱི་གོས་གྱོན་ཞིང་། །འདི་ལ་རོ་སྨད་སྟོན་ཅིང་བསྐོར། །

 

ཡང་དང་ཡང་དུ་མྱོས་པའི་སྒྱུས། །གཞན་མ་དར་སྔོན་ཉིལ་བ་སྟེ། །

སྐ་རགས་ཕན་ཚུན་སྡུད་པ་ནི། །མཚན་མོ་གློག་ཕྲེང་བཞིན་དུ་མཛེས། །

 

ཙཱུ་ཏའི་ཡལ་ག་མེ་ཏོག་རྒྱས། །བཟུང་ནས་གཞན་ནི་འཕྱང་གྱུར་ལ། །

གསེར་གྱི་བུམ་པར་མཚུངས་པ་ཡི། །འོ་མ་འཛིན་པ་སྟོན་པར་བྱེད། །

 

ཁ་ཅིག་པདྨའི་ནགས་ཚལ་ནས། །འོངས་ནས་པད་བཅས་པདྨའི་སྤྱན། །

པདྨའི་ཞལ་གྱི་ལོགས་གནས་ཤིང་། །པདྨའི་དཔལ་བཞིན་བསྡད་པར་གྱུར། །

 

རང་གནས་དེ་ལ་བསྐུལ་བ་བཞིན། །བསླུས་པར་གྱུར་ཞེས་མིག་རྣམས་ཀྱིས། །

ཁ་ཅིག་མངོན་པའི་གར་དང་བཅས། །དོན་ལྡན་དངར་བའི་གླུ་ལེན་ནོ། །

 

དགེ་བའི་གདོང་གིས་གཞན་མས་ནི། །སྨིན་པའི་གཞུ་ནི་རྣམ་བཀང་སྟེ། །

བསྐོར་གནས་བརྟན་དང་རོལ་བ་ཡིས། །འདི་ཡི་སྤྱོད་ལ་རྗེས་ཟློས་བྱས། །

 

རྒྱས་ཟླུམ་ནུ་ལྡན་ཁ་ཅིག་ནི། །དགོད་པས་རྣ་ལུང་གཡོས་གྱུརད་ཅིང་། །

ཁྱོད་ནི་ཐོབ་པར་གྱུརད་ཅིག་ཅེས། །མཐོན་པོ་རྣམས་ཀྱིས་བཞད་ཅིང་སྨྲས། །

 

གཞན་ནི་དེ་བཞིན་འགྲོ་འདོད་པ། །མེ་ཏོག་ཕྲེང་བའི་ཚལ་གྱིས་བཅིངས། །

ཁ་ཅིག་ཅོད་བཅས་དངར་མོ་ཡི། །ངག་གི་ཞགས་པ་རྣམས་ཀྱིས་བཟུང་། །

 

སོ་སོར་འབྲལ་བ་དོན་གཉེར་འགའ། །ཙཱུ་ཏའི་སྙེ་མ་བཟུང་ནས་ནི། །

མེ་ཏོག་འདི་ནི་གང་གི་ཞེས། །རྒྱགས་པས་རྣམ་པར་འཁྲུགས་ཤིང་དྲིས། །

 

ཁ་ཅིག་འགྲོས་དང་ཆ་ལུགས་ནི། །སྐྱེས་པ་བཞིན་དུ་བྱས་ནས་ནི། །

ས་འདི་རྒྱལ་བར་གྱུར་ཅིག་ཀྱེ། །བུད་མེད་ལས་རྒྱལ་དེ་ལ་སྨྲས། །

 

དེ་ནས་གཡོ་བའི་མིག་ཅན་འགས། །ཨུཏྤལ་སྔོན་པོ་སྣོམ་བྱེད་ཅིང་། །

ཅུང་ཞིག་རྒྱགས་སྐད་ཚིག་རྣམས་ཀྱིས། །མི་སྐྱོང་བདག་སྐྱེས་ལ་སྨྲས་སོ། །

 

གཟིགས་ཤིག་ཇོ་བོ་ཙཱུ་ཏའི་ཤིང་། །མེ་ཏོག་སྦྲང་རྩིའི་དྲིས་ཁྱབ་ལ། །

ཁུ་བྱུག་འདིར་ནི་སྐད་འདོན་པ། །གསེར་གྱི་གུར་ན་བཀག་པ་འདྲ། །

 

མྱ་ངན་མེད་པའི་ཤིང་འདི་གཟིགས། །འདོད་པ་ཅན་གྱི་མྱ་ངན་འཕེལ། །

བུང་བ་འདིར་ནི་སྒྲ་སྒྲོགས་པ། །མེ་ཡིས་ཚིག་པ་ཡིན་པ་འདྲ། །

 

ཙཱུ་ཏའི་ཤིང་གིས་ཡང་དག་འཁྱུད། །གཟིགས་ཤིག་ཏི་ལ་ཀ་ཡི་ཤིང་། །

བུད་མེད་ལུས་སེར་ཆགས་པ་ཡིས། །སྐྱེས་པ་གོས་དཀར་གོན་པར་འདྲ། །

 

རབ་རྒྱས་ཀུ་ར་བ་ཀར་གཟིགས། །མ་ཟོས་པ་ཡི་སྨུག་རྩིའི་འོད། །

བུད་མེད་རྣམས་ཀྱི་སེན་འོད་ཀྱིས། །སྨ་ཕབ་གྱུར་ཏེ་དུད་པ་འདྲ། །

 

གཞོན་ནུ་མྱ་ངན་མེད་འདི་གཟིགས། །འདབ་མ་རྣམས་ཀྱིས་སྤྲས་པ་གང་། །

ཁོ་མོའི་ལག་པ་མཛེས་པ་ཡིས། །ངོ་ཚར་གྱུར་ཏེ་གནས་པ་འདྲ། །

 

རྫིང་བུ་གཟིགས་ཤིག་འགྲམ་སྐྱེས་པའི། །ལྕང་མ་རྣམས་ཀྱིས་རབ་ཏུ་བསྐོར། །

དཀར་བོའི་དར་གྱི་གོས་གོན་པའི། །རབ་མྱོས་མ་རྣམས་ཉལ་བ་འདྲ། །

 

བུད་མེད་རྣམས་ལ་བདག་ཉིད་ཆེ། །གཟིགས་ཤིག་ངང་བ་ཆུ་འདི་ལ། །

རྒྱབ་ན་བསྒོ་བྱའི་བྲན་བཞིན་དུ། །ངང་མོ་རྗེས་འཇུག་རྗེས་སུ་འགྲོ། །

 

རབ་ཏུ་མྱོས་པའི་ཁུ་བྱུག་ནི། །སྐད་གྲགས་སྒྲ་ནི་གསོན་མཛོད་ཅིག །

ཁུ་བྱུག་གཞན་ནི་དེ་མ་ཐག །ཀུས་འདེབས་བྲག་ཅའི་སྒྲ་བརྙན་འདྲ། །

 

མཁའ་ལ་རྒྱུ་བ་རྣམས་ཀྱི་ཡང་། །རྒྱགས་པ་དཔྱིད་ཀྱིས་ཁྱེར་ཏེ་འོངས། །

བསམ་བྱ་མིན་སེམས་སྐྱེ་བོ་ནི། །ཤེས་རབ་ཅན་དུ་རློམ་པ་མེད། །

 

དེ་ལྟར་དར་ལ་བབ་པ་རྣམས། །ཡིད་དཀྲུགས་འདོད་པས་སེམས་དྲེགས་ཤིང་། །

སྣ་ཚོགས་ཚུལ་ནི་དེ་དང་དེས། །གཞོན་ནུ་ལ་ནི་ཉེ་བར་བརྩམས། །

 

དེ་ལྟར་ཀུན་ནས་གཡེངས་ན་ཡང་། །བརྟན་པས་དབང་བོ་དཀྲིས་པ་དེ། །

འཆི་བར་བྱ་ཞེས་སྐྱོ་བྱས་ཤིང་། ། དགའ་དང་འཇིགས་པ་མེདཔར་འགྱུར། །

 

དེ་རྣམས་ཀྱི་ནི་གནས་སྐབས་དེ། །གཟིགས་ནས་སྐྱེས་མཆོག་དམ་པ་དེས། །

མཉམ་ལ་སྐྱོ་དང་བརྟན་པ་ཡི། །ཐུགས་ཀྱིས་བསམས་པར་གྱུར་བའོ། །

 

ཅི་ཞིག་བུད་མེད་འདི་རྣམས་ནི། །ལང་ཚོ་གཡོ་བར་རྟོགས་པ་མིན། །

གང་ཕྱིར་གཟུགས་ཀྱི་མྱོས་པ་ནི། །གང་ཞིག་རྒ་བས་ཉམས་པར་འགྱུར། །

 

གང་གི་ནང་དུ་བྱིང་བ་རུ། །ངེས་པར་དེ་རྣམས་ཀྱིས་མི་མཐོང་། །

འགྲོ་བ་ནད་ཀྱི་ཆོས་ཅན་ལ། །འཇིགས་པ་སྤངས་ཏེ་དེ་ལྟར་དགའ། །

 

ཐམས་ཅད་འཕྲོག་བྱེད་འཆི་བ་ཡི། །ངེས་པར་མངོན་པར་ཤེས་མིན་ཞིང་། །

དེ་ལྟར་རང་གནས་སྐྱོ་མེད་པར། །རྩེད་མོ་དང་ནི་བཞད་གད་བྱེད། །

 

རྒ་དང་ན་དང་འཆི་བ་ཡང་། །ཤེས་ལྡན་ཡིན་ན་སེམས་ལྡན་སུ། །

རང་གནས་ལངས་དང་འདུག་པ་འམ། །ཉལ་བྱེད་རྒོད་པ་སྨོས་ཅི་དགོས། །

 

ནད་དང་འཆི་བ་ཉིད་དང་ནི། །མཆོག་ཏུ་འཁོགས་གང་དེ་མཐོང་ནས། །

རང་གནས་གྱུར་ཞིང་སྐྱོ་མེད་པ། །ཇི་ལྟར་སེམས་མེད་དེ་ལྟར་དེ། །

 

མེ་ཏོག་རྣམས་དང་འབྲས་བུ་ཡིས། །རྣམ་པར་སྤངས་པར་གྱུར་བའི་ཤིང་། །

འགྱེལ་ལམ་ཡང་ན་བཅད་པ་སྟེ། །ཤིང་གཞན་མྱ་ངན་བྱེད་མ་ཡིན། །

 

དེ་ལྟར་བསམ་གཏན་མཆོག་མཐོང་ནས། །ཡུལ་རྣམས་ལ་ནི་འདོད་པ་ཐལ། །

འཆར་ཀ་ཚུལ་ལུགས་བསྟན་བཅོས་ཤེས། །མཛའ་བ་ཉིད་ཀྱིས་དེ་ལ་སྨྲས། །

 

ཁོ་བོ་མི་སྐྱོང་གིས་བྱིན་ཏེ། །ཁྱོད་ལ་གྲོགས་སུ་ནུས་པ་ལོ། །

གང་ཕྱིར་ཁྱེད་ལ་སྨྲ་འདོད་པ། །རབ་དགའ་ལྡན་པ་དེ་ཕྱིར་རོ། །

 

ཕན་པ་མིན་ལས་རབ་བཟློག་ཅིང་། །ཕན་པ་ལ་ཡང་རྗེས་འཇུག་བགྱིད། །

སྡུག་ཀྱང་ཡོངས་སུ་མི་གཏོང་བ། །གྲོགས་པོའི་མཚན་ཉིད་རྣམ་པ་གསུམ། །

 

བདག་དེ་བྱམས་པར་དམ་བཅས་ནས། །སྐྱེས་བུའི་དོན་ལས་ཕྱིར་ཕྱོགས་པ། །

གལ་ཏེ་ཁྱོད་ལ་བཏང་སྙོམས་བྱེད། །བདག་ལ་མཛའ་བརྩེ་མེད་པར་འགྱུར། །

 

དེ་ཕྱིར་མཛའ་བོར་གྱུར་ནས་སྨྲས། ། གཞོན་ནུའི་ལུས་དང་ལྡན་པ་ནི། །

ཁྱོད་ཀྱིས་འདི་འདྲ་བུད་མེད་ཀྱིས། །ཡུལ་ལ་མཁས་པའི་གཟུགས་བརྙན་མིན། །

 

དེ་ཡི་ངོ་ཚའི་རྒོད་དོན་དང་། །བདག་ཉིད་དགའ་བའི་དོན་ཉིད་དུ། །

བདེན་མིན་གྱིས་ཀྱང་མི་མོ་ཡི། །རྗེས་སུ་འཇུག་པ་རིགས་པ་ཡིན། །

 

ཡང་དག་འདུད་དང་རྗེས་འཇུག་གི། །བུད་མེད་རྣམས་ཀྱིས་སེམས་འཆིང་སྟེ། །

བརྩེ་བའི་ཡོན་ཏན་སྐྱེ་གནས་ཕྱིར། །ཡིད་ལ་འདོད་པ་བུད་མེད་ཡིན། །

 

དེ་ཕྱིར་རྣམ་པར་ཡངས་པའི་སྤྱན། །སྙིང་ལ་གཞན་དུ་ཕྱིར་བལྟས་ཀྱང་། །

འདི་ཡི་ཚུལ་དང་རྗེས་མཐུན་པར། །མཁས་པ་རྣམ་པར་དཔྱད་པར་འོས། །

 

མཁས་པ་སྨན་ཡིན་བུད་མེད་ལ། །མཁས་པ་རབ་མཆོག་རྒྱན་ཡིན་ནོ། །

མཁས་པ་དང་བྲལ་གཟུགས་དག་ནི། །མེ་ཏོག་མེད་པའི་ནགས་དང་འདྲ། །

 

ཡང་ན་མཁས་པའི་རང་བཞིན་གྱི། །བསམ་པ་རང་བཞིན་ཁས་ལེན་མཛོད། །

ཡུལ་རྣམས་ཉེས་པར་དཀའ་ཐོབ་ནས། །ཕྱི་ཤོལ་བྱེད་པ་འོས་མ་ཡིན། ། 

 

སྔོན་ཚེ་ལྷ་ཡི་དབང་བོས་ཀྱང་། །འདོད་པ་མཆོག་ཅེས་ཤེས་བྱས་ནས། །

གཽ་ཏམ་ཐུབ་པའི་དགའ་ལྡན་མ། །བཤོལ་མེད་མ་ལ་འདོད་པ་བྱས། །

 

ཟླ་བའི་ཆུང་མ་སྣར་མ་ནི། །དྲང་སྲོང་རི་བྱིས་དོན་དུ་གཉེར། །

དེ་ནས་དེ་དང་འདྲ་བ་ཡི། །བརྐམ་བྱ་མ་ནི་རྙེད་ཅེས་ཐོས། །

 

ཨུ་ཏ་ཐྱ་ཡི་ཆུང་མ་ནི། །རླུང་གི་བུ་མོ་མཐུན་མ་ལ། །

དཀའ་ཐུབ་ཆེན་པོའི་ཕུར་བུ་ཡིས། །བྷ་ར་དྭཱ་ཛ་བསྐྱེད་པར་གྱུར། །

 

དྲང་སྲོང་ཕུར་བུའི་ཆུང་མ་ནི། །སྦྱིན་སྲེག་མ་ལ་སྦྱིན་སྲེག་མཆོག །

ཟླ་བ་ཡིས་ནི་ལག་པ་ཡི། །ལྷ་ཡི་ལས་བྱེད་བསྐྱེད་པར་གྱུར། །

 

སྔོན་ཚེ་བུ་མོ་ནག་མོ་ནི། །ཆུར་སྐྱེས་མ་ལས་སྐྱེས་མ་ལ། །

རྩིབ་ལོགས་སྐྱེས་ནི་ཆགས་སྐྱེས་ཤིང་། །ཡ་མུ་ན་ཡི་འགྲམ་དུ་ཕྱིན། །

 

གནོད་སྦྱིན་ཕྲེང་མ་རིགས་ངན་མ། །སྨོད་མ་ལ་ནི་དགའ་འདོད་པས། །

གོང་མ་སྲེག་ནི་ཟ་བའི་བུ། །ཐུབ་པ་གནས་མཆོག་གིས་བསྐྱེད་དོ། །

 

འགྲོ་མགྱོགས་རྒྱལ་བོ་དྲང་སྲོང་ཉིད། །ན་ཚོད་རྣམ་པར་སོང་བ་ཡི། །

ལྷ་མོ་སྣ་ཚོགས་མཆོད་མར་བཅས། །སྣ་ཚོགས་ཤིང་རྟའི་ནགས་སུ་སྤྱད། །

 

བུད་མེད་འགྲོགས་པ་ཞི་མིན་དུ། །སྐྱ་བསེང་གིས་ནི་ཤེས་ནས་ཀྱང་། །

དགའ་མའི་གཟུགས་ཡོན་གྱིས་བཀུག་སྟེ། །འདོད་ལས་སྐྱེས་པའི་བདེ་བ་བསྟེན། །

 

སྐྱེད་མཛད་རྒྱལ་བོ་དམར་སེར་ཡང་། །བྲམ་ཟེའི་བུ་མོ་ཕྲོགས་ནས་ནི། ། 

ན་བབས་ཐོབ་པ་ཉིད་ཡིན་ཡང་། །ཡིད་དཀྲུགས་འདོད་པ་མ་བསྟེན་མིན། །

 

དེ་ལ་སོགས་པ་བདག་ཉིད་ཆེས། །ཡུལ་རྣམས་སྨད་པ་ཡིན་ན་ཡང་། །

དགའ་བའི་ཆེད་དུ་ལོངས་སྤྱད་དེ། །ཡོན་ཏན་ལྡན་ལ་སྔོན་ཉིད་དོ། །

 

ཁྱོད་ཀྱང་རིགས་པ་ལས་ཐོབ་ཅིང་། །སྟོབས་ལྡན་གཟུགས་ལྡན་དར་ལ་བབ། །

གང་དུ་སྐྱེ་འགྲོ་འདི་ཆགས་ན། །ཡུལ་རྣམས་ལ་ནི་ཕྱི་བཤོལ་བྱེད། །

 

དེ་ལྟར་འཇམ་ཞིང་ལུང་དང་བཅས། །དེ་ཡིས་ཚིག་ནི་གསན་གྱུར་ནས། །

འབྲུག་གི་སྒྲ་སྐད་དབྱངས་ཀྱིས་ནི། །གཞོན་ནུ་ཡིས་ནི་ལན་སྨྲས་སོ། །

 

ངག་ཚིག་འདི་ནི་འཐད་པ་སྟེ། །ཁྱོད་ཀྱི་མཛའ་བ་གསལ་བྱེད་དོ། ། 

གང་དུ་བདག་ལ་ངན་པར་སེམས། །འདིར་ནི་ཁྱོད་ལ་རྗེས་ཞི་བགྱི། །

 

ཡུལ་རྣམས་ལ་ནི་ཕྱི་བཤོལ་བྱེད། །འཇིག་རྟེན་དེའི་བདག་ཉིད་དུ་ཤེས། །

འགྲོ་བ་མི་རྟག་པར་ཤེས་ནས། །འདིར་ནི་བདག་ཡིད་དགའ་བ་མིན། །

 

རྒ་དང་ན་དང་འཆི་བ་སྟེ། །གལ་ཏེ་འདི་གསུམ་མ་ཡིན་ན། །

ཡིད་དུ་འོང་བའི་ཡུལ་རྣམས་ལ།  །ཁོ་བོ་ཡང་ནི་དགའ་བར་འགྱུར། །

 

གལ་ཏེ་བུད་མེད་རྣམས་ཀྱི་ལུས། །དེ་ཉིད་རྟག་པར་འགྱུར་ན་ནི། །

སྐྱོན་ལྡན་འདོད་པ་རྣམས་ལ་ཡང་། །ཁོ་བོའི་སེམས་ནི་འདོད་ལ་ཕྱོགས། །

 

གང་ཚེ་འདི་དག་རྣམས་ཀྱི་གཟུགས། །རྒས་པས་འཐུང་བ་འབྱུང་འགྱུར་ཞིང་། །

བདག་ཉིད་ཀྱི་ཡང་འདོད་མེད་ན། །རྨོངས་ལས་དེར་ནི་དགའ་བར་འགྱུར། །

 

རྒ་དང་ན་དང་འཆི་བའི་ཆོས། །རྒ་ན་འཆི་བའི་བདག་ཉིད་ཀྱིས། །

སྐྱོ་བ་མེད་པར་རོལ་བ་ནི། །རི་དྭགས་དང་ནི་བྱ་དང་མཚུངས། །

 

བདག་ཉིད་ཆེན་པོ་འདི་རྣམས་ཀྱང་། །འདོད་པའི་བདག་ཉིད་ཅེས་སྨྲས་གང་། །

འདིར་ནི་སྐྱོ་བར་བྱ་བ་སྟེ། །གང་ཕྱིར་དེ་རྣམས་ཀྱི་ཡང་ཟད། །

 

གང་དུ་སྤྱི་ལས་ཟད་པ་དེ། །བདག་ཉིད་ཆེན་པོར་མི་སེམས་ཏེ། །

ཡུལ་རྣམས་ལ་ནི་ཆགས་པ་འམ། །སྦྱོར་མིན་བདག་ཉིད་ལྡན་ཉིད་ཀྱིས། །

 

མཁས་པ་ཡིས་ཀྱང་དཔེ་བརྗོད་ཅིང་། །བདེན་མིན་གྱིས་ཀྱང་བུད་མེད་ཀྱི། །

སྐྱེ་ལ་ཞུགས་ཞེས་སྨྲས་པ་གང་། །བདེན་མིན་བདག་གིས་ཤེས་མ་ཡིན། །

 

གང་དུ་དྲང་མིན་རྗེས་འཇུག་པ། །དེ་ལ་བདག་ནི་སྲེད་པ་མེད། །

བསམ་པ་ཀུན་གྱི་འབྲེལ་བ་དེ། །གལ་ཏེ་མེད་ན་སྨོད་པར་ཤོག །

 

མི་བརྟན་པ་ཡི་དད་པ་དང་། །སྐྱོན་དུ་མཐོང་བའི་ནུས་པ་མེད། །

ཆགས་པ་སྐྱེས་པར་གྱུར་བའི་སེམས། །སླུ་བར་བྱ་བ་ཅི་ཞིག་ཡིན། །

 

བུད་མེད་སྐྱེས་པའི་ཆགས་སྐྱེས་ཤིང་། །བུད་མེད་སྐྱེས་པ་ཕན་ཚུན་དུ། །

གལ་ཏེ་དེ་ལྟར་བསླུ་ན་ནི། །ལྟ་བར་བཟོད་པ་ཉིད་མ་ཡིན། །

 

དེ་ལྟར་གྱུར་ན་སྡུག་བསྔལ་གྱིས། །ཉམ་ཐག་རྒ་འཆིའི་སྐལ་བ་ཅན། །

བདག་ནི་འཕགས་མིན་འདོད་པ་ལ། །སླུ་བར་འོས་པ་མ་ཡིན་ནོ། །

 

ཨེ་མ་ཤིན་ཏུ་བརྟན་ལ་སྟོབས་ལྡན་ཁྱོད་ཀྱི་སེམས། །འདོད་པ་གཡོ་བ་རྣམས་སུ་སྙིང་བོ་མཐོང་གྱུར་ལ། །

འཇིགས་པ་ཤིན་ཏུ་མི་བཟད་བདོག་པའི་འཆི་བའི་ལམ། །སྐྱེ་དགུ་ཞུགས་པ་ལྟ་བཞིན་ཡུལ་ལ་ཁྱོད་ཆགས་སམ། །

 

ཤིན་ཏུ་རྣོ་ཞིང་འཇིགས་པའི་ཡུལ་ལ་ཟོན་མཛད་ཅིང་། །རྒ་དང་རྒུད་པ་ནད་ཀྱི་འཇིགས་པ་རྣམ་སེམས་ཤིང་། །

འགྲོ་བ་རྣམས་ནི་མེ་ཡིས་འཚིག་པ་བཞིན་ཐོས་ནས། །ཞི་བ་འཐོབ་མིན་བརྟན་མིན་དགའ་བ་ག་ལ་ཞིག །

 

ཐེ་ཚོམ་མེད་པར་འཆི་ཞེས་རབ་ཏུ་ཤེས་པ་ཡི། །མི་རྣམས་གང་གི་སྙིང་ལ་ཆགས་པ་རབ་བསྐྱེད་པ། །

དེ་ཡི་སེམས་ནི་ལྕགས་ལས་གྱུར་བར་ཤེས་པ་སྟེ། །འཇིགས་པ་ཆེ་ལ་ཆགས་པ་གང་ཞིག་ངུ་བ་མེད། །

 

དེ་ནས་གཞོན་ནུ་ཡིས་ནི་འདོད་པ་རྣམས་ཀྱི་རྟེན། །འཇོམས་བྱེད་གཏམ་ནི་རྣམ་པར་ངེས་པའི་བདག་ཉིད་མཛད། །

སྐྱེ་བོ་རྣམས་ཀྱི་མིག་གི་འགྲོ་བྱ་གསལ་བྱེད་ཀྱི། །དཀྱིལ་འཁོར་ས་འཛིན་རི་བོ་ལ་ནི་ནུབ་པར་གྱུར། །

 

དེ་ནས་རྒྱན་དང་མེ་ཏོག་ཕྲེང་བ་འབྲས་མེད་འཛིན། །སྒྱུ་རྩལ་ཡོན་ཏན་གྱིས་དང་རབ་དགས་འབྲས་མེད་རྣམས། །

རང་གི་སེམས་ལ་ཡིད་དཀྲུགས་འདོད་པ་རྣམས་སྨད་ནས། །ཡིད་ལ་རེ་ཉམས་བུད་མེད་རྣམས་ནི་གྲོང་དུ་ཐལ། །

 

དེ་ནས་གྲོང་ཁྱེར་སྐྱེད་མོས་ཚལ་སོང་སྐྱེ་བོའི་དཔལ། །ལེགས་པར་བརྟགས་ནས་སྤྱོད་ལ་སོ་སོར་བརྟུལ་ཏེ་ཡང་། །

ཐམས་ཅད་མི་རྟག་པར་གྱུར་རྣམ་པར་སེམས་བཞིན་དུ། །སླར་ཡང་མི་སྐྱོང་བདག་སྐྱེས་གྲོང་དུ་རྣམ་པར་ཞུགས། །

 

དེ་ནས་དེ་ཡི་ཡིད་ནི་ཡུལ་ལ་རྣམ་པར་ཕྱིར་ཕྱོགས་རྒྱལ་བོས་ཐོས་གྱུར་ནས། །

སྙིང་ལ་མདུང་རིང་ཟུག་པའི་གླང་ཆེན་བཞིན་དུ་མཚན་མོ་དེ་ལ་གཉིད་མ་ལོག །

དེ་ནས་སྔགས་མང་རྣམ་པ་སྣ་ཚོགས་ལམ་རྣམས་དག་གིས་ཐང་ཆད་བློན་པོར་བཅས། །

དེས་ནི་འདོད་པ་ལས་གཞན་སྲས་ཀྱི་བློ་ཡི་ངེས་པ་གཟིགས་མ་གྱུར། །

 

སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། བུད་མེད་ཀྱིས་བགེགས་བྱས་པའི་ལེའུ་སྟེ་བཞི་བའོ།།

 

 

ཟླ་བ་གཞོན་ནུས་སློབ་དཔོན་རྟ་དབྱངས་མཛད་པའི་སྙན་ངག་ཆེན་མོ་སངས་རྒྱས་སྤྱོད་པ་ལས་ལེའུ་བཞི་བ་ཁོལ་དུ་ཕྱུང་ཞིང་། ཞུ་དག་དང་ཧོང་ཀོང་བསབས་པ་དང་བཅས་ཏེ་སྤེལ་བ་ཕན་པར་གྱུར་ཅིག