སྙན་ཚོམས་གྲགས་ཅན་<<མེ་ཏོག་ཕྲེང་རྒྱུད>>ཀྱི་ཆེ་བ་བརྗོད་པ།

ཟླ་བ་གཞོན་ནུ།

<<མེ་ཏོག་ཕྲེང་རྒྱུད>>ནི་སྙན་དངགས་མཁན་པོ་ཇོ་བོ་ཉི་དབང་མགོན་པོའི<<སྙིམ་པའི་གླུ>>ཡི་རྗེས་ཀྱི་དབྱིན་ཡིག་ཏུ་སྐུ་དངོས་ཀྱིས་བསྒྱུར་བའི་སྙན་ཚོམས་གཉིས་པ་དེ་ཡིན་ལ། འདི་ལ་བསྡོམས་པས་སྙན་ངག་ཚན་པ༨༥ཡོད་ཅིང་། ད་ནས་བརྩིས་པའི་ཏག་ཏག་མི་ལོ་བརྒྱ་ཕྲག་གཅིག་གི་སྔོན་ཏེ། སྤྱི་ལོ༡༩༡༣ལོར་དབྱིན་ཇིའི་རྒྱལ་ས་ལོན་ཌོན་དུ་ཐོག་མར་དཔར། སྙན་ཚོམས་འདི་ཕལ་ཆེ་བ་སྙན་དངགས་མཁན་ཉིད་ཀྱིས་སྔོན་གླེང་དུ་གསུངས་པ་བཞིན“བརྩེ་བ་དང་འཚོ་བའི་སྐོར་གྱི་དུངས་བརྗོད་སྙན་ངག་འབའ་ཞིག་ཡིན”ལ།  བངྒ་ལའི་སྐད་དུ་བརྩམས་པའི་སྙན་ངག་དག་ལས་བདམས་བསྒྱུར་བྱས་པ་རྐྱང་ངོ་།།

སྙན་ཚོམས་འདིར་གཏམ་རྒྱུད་ཀྱི་བྱུང་རིམ་གྱི་ཆ་དང་།  ཟློས་གར་གྱི་གཏམ་གླེང་གི་སྒྱུ་རྩལ། ལྷུག་རྩོམ་དང་སྙན་ངག་གི་རོ་ཉམས་སོགས་ཡིད་བརྙན་ཕུན་སུམ་ཚོགས་པའི་སྒྱུ་རྩལ་རྩོམ་རིག་གི་ཁྱད་རྟགས་སྣ་མང་འབུར་དུ་ཐོན་པས་རྒྱལ་ཁབ་གང་མང་གི་སྐད་རིགས་འདྲ་མིན་དུ་བྲེལ་གྱིས་བསྒྱུར་བར་གྱུར་ཞིང་།  སྙན་དངགས་རིང་མོ་འདི་སྒྱུ་རྩལ་རྩོམ་རིག་གི་གོ་གནས་ཀྱི་ཆ་ནས་ཧ་ལམ<<སྙིམ་པའི་གླུ>>དང་མཉམ་པའི་ཚད་དུ་འཇོག

སྙན་དངགས་མཁན་རང་ཉིད་བརྩེ་དུང་དང་འཚོ་བའི་ཕྱིར་དུ་མཛེས་སྡུག་གི་མེ་ཏོག་འདེབས་པའི་ལྡུམ་ར་བ་ཞིག་བྱེད་དགོངས་ཤིང་།  དེ་ནི་སྙན་ཚོམས་འདིའི་ཚན་པ་དང་བོར་གསལ་ཏེ།        

     བདག་གིས་ཕྲན་གྱི་ལས་ཀ་གཞན་དག་སྤང་བར་འགྱུར་ཞིང/ངས་རང་གི་རལ་གྲི་དང་མདུང་རིང་ས་ལ་གཡུག་པར་འགྱུར/བདག་རྒྱང་རིང་གི་ཕོ་བྲང་ལ་བསྐྱལ་བར་མ་གནང་དང/ང་རང་ལ་རྒྱལ་ཁ་གསར་བ་དག་ལྷུར་ལེན་རྒྱུར་བདམས་པར་མ་མཛད་ཅིག/དེ་ལས/ང་རང་ཁྱེད་ཀྱི་མེ་ཏོག་ལྡུམ་རའི་ལྡུམ་ར་བ་བྱེད་དུ་གཞུག་པར་མཛོད།

        … …

ཅེས་པ་ལྟར་སྙན་ངག་འདི་དག་ཀློག་པའི་ཚེ།  བདག་ཅག་གི་བསམ་པའི་རྩིག་ལྡེབས་སུ་སྙན་དངགས་མཁན་ནི་ལས་ལ་བརྩོན་པའི་ལྡུམ་ར་བ་ཞིག་དང་འདྲ་བར། ཚེགས་ཡང་གི་ཕྱག་ཟུང་ལ་བརྟེན་ནས་མཛེས་ཤིང་སྡུག་པའི་བརྩེ་དུང་གི་མེ་ཏོག་རེ་རེར་བརྩེ་བ་ཟབ་མོས་ཆབ་ཆུ་གཏོར་གྱིན་པ་ལྷན་ནེ་ལྷང་ངེ་ལྷམ་མེར་འཆར་འོང་བ་གདོན་མི་ཟ་བའོ།།

ཁོང་གིས་སྙན་ཞིང་འཇེབས་ལ་གཏན་ཚིགས་ཀྱིས་ཕྱུག་པའི་སྙན་ཚིག་འདི་དག་སྤྱད་ནས་དྭངས་གཙང་ལྷད་མེད་ཀྱི་བརྩེ་དུང་ལ་བསྟོད་གླུ་བླངས་ཡོད་པར་མ་ཟད།  རང་ཉིད་ཀྱི་མི་ཚེའི་ཕུགས་བསམ་ཡང་ལྷུག་པར་བརྗོད་པར་བྱས་འདུག  

སྙན་ཚོམས་འདི་དག་གི་ཁྲོད་དུ་ན་ཆུང་ཕོ་མོ་དག་གི་བརྩེ་བའི་ཁྲོད་ཀྱི་འཚེར་སྣང་དང་།  དྲན་གདུང་གི་སྡུག་བསྔལ།  རེ་སྒུག་གི་སེམས་ངལ།  དུས་ཆད་ལ་སྙེག་པའི་སྐབས་ཀྱི་འདར་གསིག   ད་དུང་གཉེན་སྒྲིག་གི་སྤྲོ་སྣང་དང་།  མ་ཤི་གསོན་བྲལ་གྱི་སྡུག་བསྔལ་སོགས་བརྗོད་གཞིར་བྱས་ཏེ་ངེད་ཅག་གསང་བ་ལྐོག་གྱུར་གྱི་བརྩེ་དུང་གི་འཇིག་རྟེན་ཞིག་ཏུ་འདྲེན་པར་བྱེད་ཅིང་།  དེའི་ཁྲོད་ཀྱི་སྡུག་བསྔལ་དང་དགའ་སྤྲོ། དུངས་སྣང་དང་འཚེར་སྣང་སོགས་ཀྱང་ཇི་དགར་ཉམས་སུ་མྱོང་དུ་འཇུག་པར་བྱེད་ལ།  དེ་དང་སྦྲགས་ཏེ་སྙན་དངགས་མཁན་ཁོང་གི་ཕུགས་བསམ་གྱི་འཚོ་བའི་རེ་སྨོན་དང་འཚོལ་སྙེག་ཀྱང་མངོན་པར་མཚོན་པར་བྱས་འདུག

ཇོ་བོ་ཉི་དབང་མགོན་པོ་མཆོག་ནི་བརྩོན་པས་མི་ཚེའི་ལམ་བུ་རྩལ་གྱིས་སྙེག་པའི་རླབས་ཆེན་གྱི་སྙན་དངགས་མཁན་ཞིག་སྟེ།  <<མེ་ཏོག་ཕྲེད་རྒྱུད>>དུ།  

སྙན་དངགས་མཁན་གྱིས་བརྗོད་དོན་ཟབ་ཅིང་བསླབ་བྱའི་རང་བཞིན་ལྡན་པའི་གཏམ་རྒྱུད་རང་བཞིན་གྱི་སྙན་ངག་དང་ཚིག་ཉུང་ལ་དོན་འདུས་པའི་གཏན་ཚིགས་རང་བཞིན་གྱི་སྙན་ངག་བརྒྱུད་ནས།  རང་ཉིད་ཀྱིས་སྤྱི་ཚོགས་དང་མི་ཚེ་ལ་གཏད་པའི་རྣམ་འགྱུར་གསལ་བར་བྱས་ཤིང་།  སྒྱུ་རྩལ་གྱི་སྒོ་ནས་སྐྱེ་བོ་རྣམས་ཅི་ཞིག་གི་སླད་དུ་འཚོ་དགོས་མིན་དང་ཇི་ལྟར་འཚོ་དགོས་མིན་སོགས་གལ་གནད་ཆེ་བའི་གནད་དོན་གང་མང་གསེད་བཀྲོལ་བྱས་འདུག  དེ་ཡང་ཚན་པ་སོ་བདུན་པར་སྙན་དངགས་མཁན་གྱིས་རང་གི་བཞེད་དགོངས་དེ“ལྷ་མོ”ཡི་གཟུགས་སུ་བཀོད་དེ།  སྒྱུ་རྩལ་གྱི་སྒོ་ནས་ལན་བཏབ་ཡོད་པ་སྟེ།         

       “ལྷ་མོ་ལགས/ཁྱེད་ཀྱིས་ཁྱེད་ཀྱི་མེ་ཏོག་གསར་བའི་སྐེ་རྒྱན་དེ་བདག་གི་སྐེ་ལ་བསྐོན་པར་འགྱུར་རམ།”/“འོན་ཏེ། ཁྱེད་ཀྱིས་ངེས་པར་རྟོགས་དགོས་པ་ཞིག་ནི/བདག་གིས་བསླེས་པའི་མེ་ཏོག་གི་སྐེ་རྒྱན་དེ་མི་གང་མང་ཞིག་གི་སླད་དུ་ལགས/བདག་གི་སྐེ་རྒྱན་ནི་ཟུར་མིག་སྐད་ཅིག་སྐད་ཅིག་ལ་འཕེན་མཁན་དེའི་ཆེད་དུ་དང/གསར་རྙེད་མ་བྱུང་བའི་ས་ཆ་དང་དེ་བཞིན་དུ་སྙན་དངགས་པ་རྣམས་ཀྱི་གླུ་ལ་གནས་མཁན་དེའི་ཆེད་དུའོ།།”

        … …

སྙན་ཚིག་འདིའི་ཁྲོད་ཀྱི“ལྷ་མོ”ནི་འཚོ་བར་བསུང་ངད་བསྣམས་འོང་མཁན་གྱི་སྙན་དངགས་མཁན་ཁོང་ཡིན་པ་ནི་ཧ་ཅང་གསལ་ལ།  རླབས་ཆེན་གྱི་སྙན་དངགས་མཁན་ཁོང་གིས་སྙན་ངག་གིས་མཛེས་པ་བཞེངས་སྐྲུན་དང་།  མཛེས་ཤིང་སྡུག་ལ་ཡིད་དབང་ཅིག་ཅར་འཕྲོག་པའི་སྒྱུ་རྩལ་གྱི་སྣང་བརྙན་གསར་བཞེངས། ད་དུང་ཡིད་ཀྱི་མིག་དབང་འཕྲོག་པའི་རྟོག་ལྗོངས་ཞིབ་འབྲི་བྱས་ཤིང་། མི་རྣམས་ཀྱིས་ནམ་ཡང་རེ་ཞིང་སྙེག་པའི་སྙན་ངག་གི་ཡིད་བརྙན་བཀོད་པ་སོགས་རླབས་ཆེན་གྱི་སྙན་ངག་པའི་ཁྱད་རྟགས་འབུར་དུ་ཐོན་པར་བྱས་འདུག

ཁོང་གིས་བརྩམས་པའི་སྙན་ཚོམས་འདི་ནི་མཛེས་མས་བརྒྱུས་པའི་མེ་ཏོག་གི་ཕྲེང་བ་ལྟར།  ཁ་དོག་སྣ་ལྔས་སྡུག་གུར་བརྒྱན་ཞིང་དྲི་བསུང་ཕྱོགས་བཅུར་འཐུལ་བ་ཞིག་ཏུ་འདུག་པ་ལྷོད་ཀྱིས་བཀླགས་པས་རྟོགས་ནུས།  “ལྷ་མོ”འདིའི་སྐད་ཆ་ལས་སྙན་དངགས་མཁན་ཁོང་གིས་འཚོ་བར་བཅངས་པའི་རེ་བ་ཟབ་མོ་མཚོན་པ་རྟོགས་ཐུབ་ཅིང་།  སྙན་ངག་ཚན་པ་འདིའི་མཇུག་ཏུ་དེ་ལས་ཁ་གསལ་བར།            བདག་གི་སེམས་པས་སེམས་པ་འདི་མི་གཅིག་འབའ་ཞིག་ལ་སྤྲོད་དུ་མི་གནང་བས/དེ་དུ་མ་ཞིག་ལ་སྤྲད་པར་བགྱིས་སོ།། 

འདི་ལས་སྙན་དངགས་མཁན་ཁོང་གི་སེམས་རྒྱ་ནམ་མཁའ་ལྟར་ཕ་མཐའ་བྲལ་བ་མཚོན་ཞིང་།  ཁོང་འཚོ་གཞེས་གནང་བ་ནི་རང་ཉིད་ཁོ་ན་དང་མི་ཁ་ཤས་འབའ་ཞིག་གི་ཆེད་དུ་མ་ཡིན་པར།  ཁོང་གི་སེམས་པ་ནི་རྒྱ་གར་མི་དམངས་དང་ཡང་ན་འཛམ་གླིང་གི་མི་དམངས་ལ་ལེགས་སྐྱེས་སུ་ཕུལ་བ་མཚོན་ལ།  འདི་ལྟ་བུའི་མི་ཚེའི་དམིགས་ཡུལ་ནི་ཤིན་ཏུ་ལེགས་ལ།  དྲང་བདེན་དང་།  ཧ་ཅང་དཀོན་པ་ནི་སྨོས་མ་དགོས་སོ།།

སྙན་དངགས་མཁན་ཁོང་མཛེས་སྡུག་དང་མ་བཅོས་པའི་རང་བྱུང་ཁམས་ལ་དགའ་བ་ཚད་མེད་ཅིག་ཡོད་པ་ནི་ཁོང་གི་སྙན་ངག་མང་དག་ཅིག་ལས་མཐོང་ཐུབ་པ་དང་།  ལྷག་པར་དུ་སྙན་ཚོམས་འདིའི་ཚན་པ་དོན་གསུམ་པར་སྙན་དངགས་མཁན་གྱིས་བརྩེ་བ་ཟབ་མོས་འདི་ལྟར་འབྲི་བཞེངས་མཛད་ཡོད་པ་སྟེ།

        འཛད་མཐའ་མེད་པའི་ལོངས་སྤྱོད་ནི་ཁྱེད་ལ་བདག་པ་མ་ལགས/བདག་གི་མུན་འཐིབས་པའི་མ་ཡུམ་ས་གཞི་བཟོད་སེམས་ཅན་ལགས/ཁྱེད་ཀྱིས་རང་ཉིད་ཀྱི་བྱིས་པ་རྣམས་ཀྱི་གྲོད་ཁོག་དགང་ཆེད་སྐུ་ངལ་བསྐྱོན་ནའང/བཟའ་ཆས་ནི་ཧ་ཅང་རྙེད་དཀའ་བར་གྱུར/ཁྱེད་ཀྱིས་བདག་ཅག་ལ་གནང་བའི་དགྱེས་པའི་ལེགས་སྐྱེས་ནི་ནམ་ཡང་ཡོངས་སུ་རྫོགས་པ་ཞིག་མ་ལགས་སོ/ཁྱེད་ཀྱིས་ཁྱེད་ཀྱི་བྱིས་པ་ཚོར་བཟོས་པའི་རྩེད་ཆས་ཚང་མ་ཆག་ཆོག་ཆོག་ཅིག་ཏུ་གདའ/ཁྱེད་ཀྱིས་རྣམ་པ་ཐམས་ཅད་དང་རེ་བ་མཐའ་དག་གི་ལྟོགས་པ་སེལ་བར་བྱེད་མི་ནུས་ནའང/ཅི་འདི་ཙམ་གྱིས་བདག་གིས་ཁྱེད་རང་བསྐྱུར་བར་བྱ་འོས་སམ?

        ན་ཟུག་གི་གྲིབ་མ་དང་བཅས་པའི་ཁྱེད་ཀྱི་འཛུམ་མདངས་ནི་ངའི་མིག་ཟུང་ལ་ཞིམ་མངར་ལྡན་ཞིང/ཚིམས་པའི་མཐའ་མི་རིག་པའི་ཁྱེད་ཀྱི་བརྩེ་བ་ནི་བདག་གི་སེམས་པར་ཧ་ཅང་སྙིང་ཉེ་བྱུང/ཁྱེད་ཀྱིས་ནུ་ཞོ་བླུད་དེ་བདག་ཅག་ལ་ཚེ་སྲོག་བསྟབས་ནའང/བདག་ཅག་ལ་འཆི་མེད་ཀྱི་གོ་འཕང་ཐོབ་ཏུ་འཇུག་མ་ཐུབ་པས་ཁྱེད་རང་ནམ་ཡང་གཉིད་མེད་དུ་བཞུགས་པའོ/ལོ་གང་མང་ཞིག་གི་རིང་ལ་ཁྱེད་ཀྱིས་ཁ་དོག་དང་གླུ་གཞས་ཀྱིས་ལས་ནའང/དེའི་ཡིད་སྐྱོ་བའི་བསམ་འཆར་ཁོ་ན་ཙམ་མ་གཏོགས/ཁྱེད་ཀྱི་དག་ཞིང་ད་དུང་བཞེངས་ཐུབ་པར་མ་གྱུར།

        … …

ཞེས་པ་ལྟར་ས་གཞི་དང་རང་བྱུང་ཁམས་ལ་བཅངས་པའི་བརྩེ་བ་ཟབ་མོ་མངོན་པར་མཚོན་ཞིང་།   བདག་ལེགས་པ་འབའ་ཞིག་དོན་དུ་གཉེར་བ་མ་ཡིན་པར།   ཇི་སྐད་དུ།

       ཁྱེད་ཀྱིས་རྣམ་པ་ཐམས་ཅད་དང་རེ་བ་མཐའ་དག་གི་ལྟོགས་པ་སེལ་བར་བྱེད་མི་ནུས་ནའང/ཅི་འདི་ཙམ་གྱིས་བདག་གིས་ཁྱེད་རང་བསྐྱུར་བར་བྱ་འོས་སམ?

ཞེས་པ་ལྟར་རང་གི་རེ་བ་མཐའ་དག་རྫོགས་པར་བྱེད་མི་ནུས་པ་ཙམ་དང“མ་ཡུམ”ལགས་དབུལ་ཞིང་ཕོངས་པའི་རྒྱུ་མཚན་ཙམ་གྱིས།  ས་གཞི་དང་རང་བྱུང་ཁམས་ཡལ་བར་འདོར་བར་མི་བྱེད་པའི་རླབས་ཆེན་གྱི་དགོངས་པ་མཚོན་པར་བདག་འདོད་དོ།།  

སྙན་དངགས་མཁན་གྱི་ངོར།  ས་གཞི་མ་ཡུམ་གྱི“ན་ཟུག་གི་གྲིབ་མ་དང་བཅས་པའི་འཛུམ་མདངས”ནི་ཧ་ཅང“ཞིམ་མངར་ལྡན”ལ།   ས་གཞི་མ་ཡུམ་གྱི“ཚིམས་པའི་མཐའ་མི་རིག་པའི་བརྩེ་བ”ནི“ཧ་ཅང་སྙིང་ཉེ”བའོ།།  ད་དུང་རང་ཉིད་ཀྱི་བརྩེ་བ་ས་གཞི་ལ་སྦྱར་ཏེ།  “རྩོལ་བ་ལ་བརྟེན་ནས་ཁྱེད་ལ་མཆོད་པ་བྱེད་པར་འགྱུར”ཞེས་པས་ཉི་དབང་མགོན་པོ་མཆོག་ས་གཞི་དང་རང་བྱུང་ཁམས་ལ་དགའ་ཞེན་ཚད་མེད་ཡོད་པར་མ་ཟད།  རང་ཉིད་ཀྱི་ཡོད་ཚད་ས་གཞི་དང་རང་བྱུང་ཁམས་ལ་འབུལ་འདོད་པའི་དགོངས་པ་མཚོན་ཞིང་།  འདི་ལྟ་བུའི་མི་ཚེའི་རེ་སྨོན་ནི་ཇི་འདྲའི་རླབས་ཆེ་ཞིང་རིན་ཐང་ལྡན་པ་ལ་ཨང་། དེ་ཡང་། རྒྱུ་ནོར་ལོངས་སྤྱོད་ལ་རྔམ་པའི་སྐྱེ་བོ་གང་མང་ཞིག་གིས་རྒྱུ་ནོར་ཡོད་པས་ཐམས་ཅད་ཡོད་པ་དང་ཐམས་ཅད་བདག་ཏུ་བཟུང་ནུས་པའི་འདོད་ཚུལ་ལ་སྙན་དངགས་མཁན་རང་ཉིད་ཀྱི་རིན་ཐང་གི་དགོངས་ཚུལ་གསུངས་པ་སྟེ།

      རྒྱུ་ཅན་ཁྱོད/ཁྱོད་ཀྱི་རྒྱུ་ནོར་ལ་ཉི་མའི་དགྱེས་པའི་གསེར་འོད་དང་བསམ་གཞིགས་ལ་ཐིམ་པའི་ཟླ་བའི་འོད་འཇམ་གྱི་བབ་ཆགས་ཀྱི་མཛེས་སྡུག་ཁྲོད་དུ་སྐལ་བ་ཅི་ཡང་མེད་ལ/ཐམས་ཅད་དུ་ཁྱབ་པའི་ནམ་མཁའི་གཟི་བྱིན་གྱིས་དེ་བྱིན་གྱིས་བརླབས་པར་མ་གྱུར་རོ/དེ་ནས་ནམ་ཞིག་འཆི་བ་ཐོན་ཙ་ན/དེ་ཉིད་སྐྱ་བོར་འགྱུར་ཞིང་སྐམ་རིད་དུ་འགྱུར་ལ/ས་འདོལ་དུ་བྲུལ་བར་འགྱུར་རོ།།

དེ་ཡང་།  སྙན་དངགས་མཁན་གྱིས་འཇིག་རྟེན་འདིར།  ཇི་ལྟར་འཚོ་བ་རོལ་དགོས་མིན་ལ་སྙན་ཚོམས་འདིའི་ཚན་པ་དང་བོར་ཁོང་གིས“སྲི་ཞུ་བ”ཡི་རྣམ་པར་བརྟེན་ནས་རང་ཉིད་ཀྱི་དགོངས་དོན་གསལ་བོར་བརྗོད་པར་བྱས་འདུག  སྲི་ཞུ་བ་ཁོང་ལ་མི་རྣམས་ཀྱིས་ཡིད་སྨོན་སྐྱེ་སའི་ཕྱག་ལས་ཏེ།  རྒྱལ་བོའི་ཕོ་བྲང་དུ་ལྷོད་ཀྱི་ལེར་གོ་ས་བཟུང་ཆོག་པར་མ་ཟད།  དམག་དཔུང་ཁྲིད་ཅིང་གཡུལ་ལ་བསྐྱོད་ནས་དཔའ་རྟགས་བཞག་སྟེ་མིང་གྲགས་ཀྱང་བླང་རུང་ནའང་།  ཁོང་གིས་མིང་གྲགས་དང་ཁེ་ཕན་ཁོ་ན་དོན་དུ་མི་གཉེར་ཞིང་། དབང་ཆ་དང་གོ་ས་དམིགས་ཡུལ་དུ་མི་འཛིན་པར། དེ་ལས་ལྡོག་སྟེ་རྒྱལ་མོ་ལ། “ང་རང་ཁྱེད་ཀྱི་མེ་ཏོག་ལྡུམ་རའི་ལྡུམ་ར་བ་བྱེད་དུ་གཞུག་པར་འཚལ”ཞེས་ཞུ་བ་ཕུལ་བ་དང་།  སྲི་ཞུ་བས་ལས་ཀ་གཞན་དག་ནི་སྤང་བར་བྱས།  རང་གི་རལ་གྲི་དང་མདུང་རིང་ནི་ཡང་ས་ལ་གཡུགས་ཏེ་ལས་ལ་བརྩོན་ཞིང་རྩི་ཤིང་དང་མེ་ཏོག་ལ་ཆབ་ཆུ་གཏོར་བའི་ལྡུམ་ར་བ་ཕལ་བ་ཞིག་བྱེད་འདོད་ཅིང་།   གླ་རྔན་མི་བསམས་པར།  རང་ཉིད་ཀྱི་དྲང་བདེན་དང་ལྷད་མེད་ཀྱི་ངལ་རྩོལ་ལ་བརྟེན་ནས་ལྡུམ་རའི་ཁྲོད་ཀྱི་མེ་ཏོག་གི་ཚོམས་ནམ་ཡང་སོས་པར་ཉར་བ་དང་། ལྡུམ་རའི་བདག་པོའི་ཡིད་སེམས་སྤྲོ་བས་བརྟས་པར་བྱས་ཏེ།  མཛེས་སྡུག་གི་འཇིག་རྟེན་ཞིག་ཏུ་འཚོ་བ་སྐྱེལ་དུ་འཇུག་པའི་དགོངས་པ་བླ་ན་མ་མཆིས་པ་མངོན་པར་མཚོན་ནོ།།

སྙན་ངག་ཁྲོད་ཀྱི“སྲི་ཞུ་བ”ནི་དོན་དུ་སྙན་དངགས་མཁན་ཁོང་གི་སྤྲུལ་བ་སྟེ། ཟེར་འོད་ཆེམ་ཆེམ་འཕྲོ་བའི་སྒྱུ་རྩལ་གྱི་རྣམ་པར་བརྟེན་ནས་རང་ཉིད་ཀྱི་རླབས་ཆེ་བའི་མི་ཚེའི་དགོངས་གཞི་མཚོན་པར་བྱས་ཤིང་།  སྤྱིར་བཏང་གི་ངལ་རྩོལ་བ་ཞིག་བྱས་ཏེ། མི་ཚེ་དང་བརྩེ་དུང་གི་སླད་དུ་མཛེས་སྡུག་གི་མེ་ཏོག་གསར་བ་བཏབ་ནས་མིའི་རིགས་མཛེས་ཤིང་སྡུག་པའི་འཇིག་རྟེན་ཞིག་ཏུ་འཚོ་བ་རོལ་དུ་འཇུག་པའི་རེ་སྨོན་མཚོན་པའོ།།

ཇོ་བོ་ཉི་དབང་མགོན་པོ་མཆོག་ཅིའི་ཕྱིར་མི་ཚེའི་འཚོལ་སྙེག་གི་བཤུལ་ལམ་རིང་མོའི་སྟེང་དུ་མགོ་ནས་མཇུག་བར་དུ་བརྩོན་འགྲུས་དང་བརྟན་བརླིང་།  ཡར་སྐུལ་གྱི་བསམ་པས་ཁེངས་ཡོད་པ་ཡིན་ནམ་ཞེ་ན།  དེ་ནི་དངོས་གནས་ང་ཚོས་ཞིབ་མོར་གླེང་རི་བའི་གནད་དོན་ཞིག་གོ། དེའི་རྒྱུ་མཚན་ང་ཚོས་སྙན་ཚོམས་འདིའི་ཚན་པ་གཉིས་པར་གཟིགས་པས་རྟོགས་ཐུབ་སྟེ། སྙན་ངག་ཚན་པ་འདིར་སྙན་དངགས་མཁན་གྱིས་ཁྱད་དུ་འཕགས་པའི་སྒོ་ནས་རང་ཉིད་དབུ་སྐྲ་དཀར་བོར་གྱུར་བའི་རྒད་པོ་ཞིག་གི་སྣང་བརྙན་དུ་བཞེངས་སྐྲུན་བྱས་ཤིང་།  དེ་མཐོང་བའི་མི་ཞིག་ན་རེ།

     “ཨཱ། སྙན་ངག་པ།  མཚན་གྱི་དུས་ཟིན་ལ་ཉེ་ཞིང་། ཁྱེད་ཀྱི་དབུ་སྐྲ་སྐྱ་བོར་ལོག་ཅིང་མཆིས/ཁྱེད་ཀྱིས་ཁེར་རྐྱང་གི་མནོ་བསམ་ལས་ཚེ་ཕྱི་མའི་གནས་ཚུལ་དེ་ཐོས་སམ?”

སྤྱིར་བཏང་གི་མི་ཞིག་གི་དབང་དུ་བྱས་ན།  འཇིག་རྟེན་འདིའི་མི་རྣམས་ན་རྒས་ཤིང་ལོ་ལོན་པར་གྱུར་ན། ད་ནི་ལས་དབང་ལ་སྐྱབས་སུ་སོང་ནས་དུས་རྒྱུན་འཆི་བ་དང་སྐྱེ་བ་རྗེས་མ་དྲན་ཏེ་ལོ་ཟླ་རེ་དོགས་ཀྱིས་སྐྱེལ་དགོས་པའི་ཚོད་ཡིན་ནའང་། ཧ་ཅང་ཡ་མཚན་པ་ཞིག་ལ་རྒད་པོ་འདིས་སྐད་ཆ་དེར་གསན་རྗེས་ད་དུང་ཐུགས་མི་ཕམ་པར།  ཁོང་ནི་རྒས་པར་གྱུར་ནའང་། འཇིག་རྟེན་འདིར་འཚོ་བའི་དུས། རང་ཉིད་འབའ་ཞིག་དོན་དུ་མི་གཉེར་བར། གཞན་དོན་སེམས་དགོས་པའི་རླབས་ཆེན་གྱི་བསམ་བློ་འཁྲུངས་ཡོད་མཁན་ཞིག་སྟེ།  ཁོང་རྒ་བའི་སྡུག་བསྔལ་གྱིས་མནར་ནའང་།  ཁོང་གིས་སྔར་བཞིན་དུ།

    “ལྷན་འཛོམས་མ་བྱུང་ཞིང་ན་གཞོན་པའི་སེམས་པ་དེ་དག་མཉམ་དུ་འཛོམས་མིན་དང/སྐོམ་པ་ཆེན་པོའི་མིག་ཟུང་ཆ་གཉིས་ཀྱིས་ཁོང་ཚོའི་ལྷིང་འཇགས་དཀྲོགས་པ་དང/ཁོང་ཚོའི་ཚབ་ཏུ་སྐད་ཆ་བཤད་སླད་རོལ་དབྱངས་ལ་རེ་འབོད་ཞུ་མིན་ལ་ཅེར་ཞིང་མཆིའོ།།”

རྒྱུ་མཚན་འདི་ཉིད་ལ་བརྟེན་ནས།  ཁོང་གིས་འདི་སྙམ་དུ་བསམས་ཏེ།

“གལ་ཏེ་ང་རང་ཚེ་སྲོག་གི་འཇུག་ངོགས་སུ་བསྡད་དེ/འཆི་བ་དང་ཚེ་ཕྱི་མར་སེམས་ལས་བྱས་ན/སུ་ཞིག་ནི་གནས་དེ་རུ་ཁོང་ཚོའི་བརྩེ་དུང་གི་གླུ་གཞས་འཐག་མཁན་ཡིན?”

        … …

ཞེས་རྒད་པོ་ཁོང་མི་ཚེའི་ལ་མགོར་བསླེབས་ཟིན་རུང་གཞན་དོན་འབའ་ཞིག་བསམས་པའི་དགོངས་གཞི་རིན་ཐང་བྲལ་ཞིང་བླ་ན་མ་མཆིས་པ་དེ་མཚོན་ཞིང་། དེ་ཙམ་དུ་མ་ཟད།  མི་ཚེའི་བཤུལ་ལམ་ནི་ཀྱག་ཀྱོག་ཆེ་ལ།

        “ཟླ་འོད་ཟད་པོའི་ཀློང་གི་ཁང་སྟོང་དེའི་ཁྱམས་ར་ལས་ཅེ་སྤྱང་གི་ཚོགས་སྡེབ་ཀྱིས་ངུ་སྔངས་བྱེད་ཅིང་མཆི”ལ།   ད་དུང་མུན་ནག་གི་སྤྱི་ཚོགས་ཁྲོད་དུ།  ཡུལ་གྱུར་བ།

       “ཁྱིམ་དང་བྲལ་ནས་གནས་འདི་རུ་མཚན་མོར་བལྟ་བ་དང/མུན་ནག་གི་ཤབ་ཤུབ་ལ་མགོ་སྒུར་ཏེ་ཉན་དུ་འོང་བ་ལ/གལ་ཏེ/ངས་སྒོ་རྣམས་བརྒྱབ་ནས་རང་ཉིད་མི་རྟག་པའི་འཆིང་ཐག་ལས་གྲོལ་རྩིས་བྱེད་པ་འོས་ན/སུ་ཞིག་ནི་གནས་དེ་རུ་ཁོང་གི་རྣ་བར་ཚེ་སྲོག་གི་གསང་བ་ལྐོག་ལབ་བྱེད་མཁན་ཡིན?

        … …

སྙན་དངགས་མཁན་གྱིས་རྒན་པོའི་རྣམ་པ་སྤྱད་ནས་རང་ཉིད་ཀྱི་མི་ཚེའི་ལྟ་ཚུལ་མཚོན་པར་བྱས་ཤིང་།  རྒན་པོའི་སྐད་ཆ་དང་བསམ་པའི་འཁྱེར་སོ་བརྒྱུད་ནས་ཁོང་གིས་མི་རྣམས་ལ་མི་ཚེའི་འཚོལ་སྙེག་ཁྲོད་ཀྱི་གསང་བ་བརྟོལ་བར་བྱས་པ་སྟེ།  མ་གཞི་མི་ཚེའི་དམིགས་ཡུལ་དང་མི་ཚེའི་རྣམ་འགྱུར་ནི་གཅིག་གྱུར་ཡིན་པ་དང་།  བརྩོན་སེམས་དང་ཡར་སེམས་ཀྱི་རྣམ་འགྱུར་ནི་རླབས་ཆེ་བའི་མི་ཚེའི་དམིགས་ཡུལ་ལ་བརྟེན་ནས་འོངས་པ་དང་།  རླབས་ཆེན་གྱི་འཚོ་བའི་དམིགས་ཡུལ་གྱིས་མི་རྣམས་ལ་བརྩོན་འགྲུས་དང་བརྟན་བརླིང་།  སྤྲོ་སྣང་གི་སྒོ་ནས་མི་ཚེ་ལ་གདོང་གཏོད་དུ་འཇུག་པས།  མི་ཚེའི་དམིགས་ཡུལ་དང་།  མི་ཚེའི་རྣམ་འགྱུར་རམ་ལྟ་སྟངས་ནི་གཅིག་ཕན་གཅིག་གྲོགས་སུ་སོང་བ་ཞིག་དགོས་པ་དང་། ཕན་ཚུན་མེད་དུ་མི་རུང་བ་ཡིན་པ་ནི་སྙན་ཚིག་འདི་ལས་གསལ་བོར་བསྟན་པར་བྱས་འདུག་སྙམ།  

ད་དུང་སྙན་དངགས་མཁན་ཇོ་བོ་ཉི་དབང་མགོན་པོའི་སྙུག་རྩེ་ལས། ཕྱུགས་ཆུང་བུ་མོའི་སེམས་ཀྱི་འགལ་འདུ་དང་རྙོག་དྲ་ཡང་གསལ་བོར་མཚོན་པར་བྱས་པ་སྟེ།   དེ་ཡང་སྙན་ངག་ཚན་པ་སོ་དྲུག་པར།

        ཁོས་ག་ལེ་ག་ལེར“བདག་གི་དགའ་མ།  ཁྱོད་ཀྱིས་མིག་ཟུང་འདེགས་པར་ཞུ”ཟེར/ངས་ངར་སྐད་དང་བཅས་ཏེ་ཁོ་ལ་གཤེ་ནས“ཕར་སོང”ཞེས་བཤད་མོད་ཀྱི/ཁོ་འགུལ་བར་མ་གྱུར་རོ།།

        ཁོ་ངའི་མདུན་དུ་ལངས་ཏེ་ངའི་ལག་ཟུང་འཇུས་པར་གྱུར/ངས“ང་ཐོངས”ཞེས་བཤད་མོད་ཀྱི/ཁོས་བཏང་བར་མ་གྱུར་རོ།།

        … …

        ཁོས་ངའི་སྐྲ་གསེང་ལ་མེ་ཏོག་ཅིག་བཙུགས་པར་གྱུར/ངས“དེས་ཀྱང་རྔོ་མི་ཐོགས”ཞེས་སྨྲས་མོད་ཀྱི/ཁོ་མ་འགུལ་བར་ལངས་ནས་བསྡད་པར་གྱུར།

       ཁོས་བདག་གི་སྐེ་ནས་མེ་ཏོག་གི་སྐེ་རྒྱན་དེ་བླངས་ནས་ཕྱིན་པར་གྱུར/ང་བཤུམས་ཏེ་རང་གིས་རང་ལ“ཁོ་ཇི་ག་ཕྱིར་མི་འོང་བ་ཡིན་ནམ”ཞེས་དྲིས།

ཉི་དབང་མགོན་པོའི་སྙུག་ཁ་རུ།  བརྩེ་དུང་ལ་ཞིམ་མངར་ལྡན་ཞིང་།  དགའ་སྤྲོས་བརྟས།

        ངེད་ཅག་གི་སེམས་པའི་ཟིན་ཐོ་ལག་པ་ཕྱག་ཟུང་ལ་དེ་བཞིན་འཐམས་ཏེ་དབུ་བཙུགས་ཤིང་/འདྲེན་བྱེད་སྤྱན་ཟུང་ལ་དེ་ལྟར་འཁྲེང་སྟེ་མགོ་ཚུགས/དེ་ནི་ཟླ་གསུམ་པའི་ཟླ་ངོགས་ཀྱི་མཚན་མོ་ཞིག་སྟེ/མེ་ཏོག་ཧིན་ནཱའི་ཞིམ་མངར་གྱི་དྲི་བསུང་མཁའ་དབུགས་ཁྲོད་འཐུལ་བར་གྱུར་ཞིང/བདག་གི་འཕྲེད་གླིང་ས་ཐོག་ཏུ་སྣང་མེད་ངང་འགྲིལ་འདུག་ལ/ཁྱེད་ཀྱི་མེ་ཏོག་གི་ཕྲེང་བ་ད་རུང་བརྒྱུས་ནས་ཚར་མེད/ང་དང་ཁྱོད་ཀྱི་བརྩེ་བ་འདི་གླུ་དབྱངས་ཤིག་དང་འདྲ་བར་དེ་འདྲའི་ལྷད་མེད་ཅིག      

… …

        ངེད་གཉིས་ཀྱིས་སྐབས་ནམ་ཞིག་ལའང/སེམས་གཏམ་བཞག་ནས་མཐའ་མེད་ཀྱི་ལྷིང་འཇགས་སུ་འཁྱམས་པར་མ་གྱུར/ངེད་གཉིས་ཀྱིས་དུས་ནམ་ཞིག་ལའང/རེ་བ་ལས་འགོངས་ཤིང་རྙེད་དཀོན་པའི་དངོས་པོ་གང་ཞིག་འཐོབ་ཆེད་དུ་ལག་ཟུང་སྟོང་བའི་དབྱིངས་སུ་བརྐྱངས་པར་མ་གྱུར/ཅི་ཞིག་ངེད་གཉིས་ཀྱིས་སྤྲད་པ་དང་གང་ཞིག་ངེད་གཉིས་ལ་འཐོབ་པ་དེ་འབའ་ཞིག་གིས་རུང་བར་ཡོད/ངེད་གཉིས་ཀྱིས་དགའ་སྤྲོ་རྡུལ་དུ་གཅིར་ནས་དེ་ལས་སྡུག་བསྔལ་གྱི་ཆང་རག་མ་བཙགས/ང་དང་ཁྱོད་ཀྱི་བརྩེ་བ་འདི་གླུ་དབྱངས་ཤིག་དང་འདྲ་བར་དེ་དྲའི་ལྷད་མེད་ཅིག

སྙན་དངགས་མཁན་ཁོང་གི་སྒྱུ་རྩལ་མཚོན་ཐབས་ནི་ཧ་ཅང་ཡིད་དབང་འཕྲོག་པ་ཞིག་སྟེ། ཟུར་དང་ཕྲ་མོ་བརྗོད་པ་སོགས་ལ་བརྟེན་ནས་གནས་ལུགས་ཤིག་དང་གནས་སྟངས་ཤིག་བསྡུས་པའི་ཚུལ་གྱིས་འགྲེལ་བརྗོད་དང་བཞེངས་སྐྲུན་བྱེད་ཅིང་།  ཉམས་ཀྱིས་གཏམས་ཤིང་ཡིད་སེམས་དབང་མེད་དུ་འདྲེན་པར་བྱེད་པ་སྟེ།   དཔེར་ན་ཚན་པ་ང་བཞི་བར།

        མཚན་གྱི་དུས་འདི་འདྲ་འཕྱི་བོ་ཞིག་ལ་ཁྲོམ་རའི་སྒོ་ཡང་བརྒྱབ་ཟིན་པས/ཁྱེད་ཀྱིས་སློ་མ་བཟུང་སྟེ་གང་ཞིག་ལ་བྲེལ་འཚུབ་ཀྱིས་བཞུད་ཅིང་མཆི?/ཁོང་ཚོ་ཚང་མ་ཁུར་བོ་དང་ལྷན་དུ་ཁྱིམ་ལ་ལོག་པར་གྱུར་ལ/ཟླ་བས་སྡེ་བའི་སྡོང་མགོ་ནས་ལྐོག་ལྟ་བྱེད་ཅིང་མཆི/གྲུ་གཟིངས་འབོད་ཀྱིན་པའི་བྲག་ཆ་ནི་ཆུ་མོ་ནག་པོ་དེ་བརྒྱུད་ནས་རྒྱང་རིང་གི/རི་སྐྱེས་ངང་བ་གཉིད་སའི་འདམ་རྫབ་ཡོད་སའི་བར་དུ་འཁྱིལ་ཞིང་གདའ/ཁྲོམ་རའི་སྒོ་ཡང་བརྒྱབ་ཡོད་པས་ཁྱེད་ཀྱིས་སློ་མ་བཟུང་སྟེ/གང་ཞིག་ལ་བྲེལ་འཚུབ་ཀྱིས་བཞུད་ཅིང་མཆི?

        … …

འདི་ནས་ན་ཆུང་མ་ཞིག་གིས་ཁྲོམ་རའི་སྒོ་བརྒྱབ་ཟིན་ནའང་ཕ་མ་དང་གྲོགས་པོ་གྲོགས་མོ་རྣམས་ཀྱིས་མི་རྟོགས་ཕྱིར་ཁྲོམ་ལ་ཚལ་ལམ་ཅི་ཞིག་ཉོ་རུ་འགྲོ་བའི་ཟོལ་གྱིས་རང་གི་སྙིང་སྡུག་གི་ཕྱོགས་སུ་འཚེར་སྣང་དང་ཐེ་ཚོམ་དང་བཅས་ཏེ།  སྐྲག་སྣང་གི་མིག་ཟུང་རིག་རིག་དང་། སུ་ཞིག་ལ་ཐུག་དོགས་དང་གང་ཞིག་དང་འགལ་དོགས་ཀྱིས་བྲེལ་འཚུབ་དང་དངངས་འཚབ་ཀྱིས་བཞུད་ཀྱིན་པའི་སྣང་བརྙན་ཞིག་མིག་ལམ་ལ་འཆར་བར་མི་བྱེད་དམ། འདི་དང་འདི་ལྟ་བུའི་ཡིད་དབང་སིམ་པར་བྱེད་པའི་སྙན་ངག་གི་ཉམས་ཧ་ཅང་ཕུན་སུམ་ཚོགས་པས་ཁྱེད་ཀྱིས་ག་ལེར་ཀློགས་དང་མཁྱེན་པར་འགྱུར་ལ་འདིར་མངས་སུ་དོགས་པས་སྙན་ཚོམས་འདིའི་ཁྱད་ཆོས་བརྗོད་པ་རེ་ཞིག་བསྐྱུངས་པར་བྱས་སོ།།

དེ་ཡང་འདིར་མི་བརྗོད་ཐུ་མེད་དུ་གྱུར་བ་ཞིག་ནི།   སྟེས་དབང་ངམ་རྟེན་འབྲེལ་གང་རུང་ཞིག་གི་དབང་གིས་ངེད་ཅག་ནི་སྙན་དངགས་མཁན་ཇོ་བོ་ཉི་དབང་མགོན་པོའི་སྐལ་བ་ལྡན་ཞིང“ལུང་དུ་བསྟན་པ”ཡི་ཀློག་མཁན་དག་ཡིན་པའང་འདྲ་སྟེ།  དེ་ཡང་སྙན་ཚོམས་འདིའི་ཚན་པ་ཆེས་མཐའ་མ་སྟེ་གྱ་ལྔ་བར།  ཇི་སྐད་དུ།

      ཝེ!  ལོ་ངོ་བརྒྱ་ཕྲག་གཅིག་གི་རྗེས་སུ་བདག་གི་སྙན་དངགས་ཀློག་མཁན་ཁྱོད་སུ་ཡིན? /བདག་གིས་དཔྱིད་ཀའི་ལོངས་སྤྱོད་ལས/ཁྱོད་ལ་མེ་ཏོག་རྐང་གཅིག་ཀྱང་བསྐུར་ཐུབ་པར་མི་འདུག་ལ/གནམ་མཐའི་སྤྲིན་ཚོམས་ལས་གསེར་རིས་རྐྱ་གཅིག་ཀྱང་བསྐུར་ཐུབ་པར་མི་འདུག་ལགས།

       ཁྱོད་ཀྱི་སྒོ་གླེགས་ཕྱེ་ནས་ཕྱི་རོལ་ཏུ་གཟིགས་པར་འཚལ/རང་གི་འབུས་ཀྱིན་པའི་ལྡུམ་ར་ལས་ལོ་ངོ་བརྒྱ་ཕྲག་གཅིག་གི་སྔ་རོལ་ཏུ་ཡལ་ཟིན་པའི/མེ་ཏོག་གི་ཚོམས་ཀྱི་དྲི་ཞིམ་གྱི་དྲན་ཤིང་འཐུ་བར་འཚལ/ཁྱོད་ཀྱིས་རང་ཉིད་ཀྱི་སེམས་པའི་དགའ་སྣང་དང་ལྷན་དུ/བཞུད་ཟིན་པའི་དཔྱིད་དུས་ཀྱི་ཞོགས་པ་ཞིག་ལ་བླངས་པའི་རང་གི་སྤྲོ་སྣང་གི་གྲེ་འགྱུར་དེ/བརྒྱ་ཕྲག་གཅིག་གི་རྗེས་ལ་རྫོགས་ཀྱིན་པའི་དགའ་བའང་ཉམས་སུ་མྱང་བར་ཤོག

ཞེས་པ་ལྟར“ཝེ!  ལོ་ངོ་བརྒྱ་ཕྲག་གཅིག་གི་རྗེས་སུ་བདག་གི་སྙན་ངག་ཀློག་མཁན་ཁྱོད་སུ་ཡིན? ”ཞེས་ངེད་ཅག་ལ་བཀའ་འདྲི་གནང་བའི་ཚུལ་གྱིས“ལུང་དུ་བསྟན”འདུག་ལ།  གོང་དུ་བརྗོད་ཟིན་པ་ལྟར་ད་ནས་བརྩིས་པའི་མི་ལོ་བརྒྱ་ཕྲག་གཅིག་ཏག་ཏག་གི་སྔོན་ཏེ་སྤྱི་ལོ༡༩༡༣ལོར།  སྙན་དེབ་འདི་དབྱིན་ཇིའི་རྒྱལ་ས་ལོན་ཌོན་དུ་ཐོག་མར་དཔར་ཞིང་།   ད་ལོ་སྟེ་སྤྱི་ལོ༢༠༡༣ལོར་བོད་གངས་ཅན་གྱི་སྐད་དུ་བསྒྱུར་ཞིང་དཔར་ནས་ཁྱེད་ཀྱི་ཕྱག་ཏུ་བསྣམས་ཡོད་པས་རྟེན་འབྲེལ་མ་བསྒྲིགས་རང་འགྲིག་ཏུ་སོང་ལ།  རང་ཉིད“ལུང་དུ་བསྟན”ཞིང་རྗེས་སུ་བཟུང་བའི་་ཀློག་མཁན་དུ་སྒོམ་ཞོར་སྙན་དངགས་མཁན་སྐུ་དངོས་ཀྱིས་ཁྱེད་ཀྱི་སྙན་ལམ་དུ་སྙན་ཚིག་རེ་རེ་ཤུབ་བུར་ཟློ་བཞིན་པའི་ཟོལ་གྱིས་རོལ་མྱོང་གནང་བར་ཞུ།

བརྩེ་བའི་ཀློག་པ་པོ་ལགས། ཁྱེད་ཅག་གིས་བྲེལ་འཚུབ་ཀྱི་ཕྱག་ལས་ཁྲོད་ནས་དབུངས་དབྱུང་གི་ཁོམ་སྐབས་རེ་བཙལ་ཏེ་སོས་དལ་ངང་བཞུགས་པའི་དུས། འོ་ཇའམ་འཚིག་ཇ་གང་རུང་ཞིག་མཆོད་ཞོར་དུ་སྙན་ཚོམས་འདི་དག་གི་བྲོ་བ་སྣ་འཛོམས་དེ་དག་ཤོག་ལྡེབས་གཅིག་རེའམ་གཉིས་རེ་བུལ་གྱིས་སློག་པར་བྱས་ནས་རིམ་གྱིས་མྱོངས་དང་། འདི་དག་གིས་ཁྱེད་ཀྱི་ཡིད་སེམས་བཟི་བར་བྱེད་ཅིང་། དག་ཞིང་ལྟ་བུའི་སྒྱུ་རྩལ་གྱི་ཞིང་ཁམས་ཤིག་ཏུ་དྲངས་པར་བྱས་ཏེ། ཡིད་སེམས་ནི་སིམ་པ་དང་གདུང་བ། བར་མ་གསུམ་གྱིས་ཁྱབ་པར་འགྱུར་ཞིང་འཆར་ཡན་གྱི་འགྱུ་བག་རྒོད་པོས་ཁྱེད་ཉིད་ལ་ཨི་ཙི་ལུ་གུ་སྒོག་པ་ལྟ་བུ་དང་།  ན་ཆུང་གི་བརྩེ་ཞེན་དྲག་པོས་ཁྱེད་ཉིད་ལ་སེན་འཐོག་བྱེད་པ་ལྟ་བུ།  མཚན་ཉིད་པའི་གཏན་ཚིགས་སྲ་མོས་ཁྱེད་ཉིད་ལ་ཤ་གཅུ་ཐེངས་རེ་རྒྱག་པ་ལྟར་བྱེད་སྲིད་པས། དེ་དག་རང་ཉིད་ཀྱི་ཁེ་དང་ཐོབ་ཏུ་བསྒོམས་ནས་ཇི་དགར་ལོངས་སུ་སྤྱོད་པར་མཛོད་ཅིག

དེབ་འདིའི་ཁ་བྱང་སྤྱིར་དབྱིན་སྐད་ཐད་སྒྱུར་གྱི་དབང་དུ་བྱས་ན<<ལྡུམ་ར་བ>>ཞེས་འདོགས་རིགས་མོད།  སྙན་དངགས་མཁན་གྱིས་དབྱིན་སྐད་དུ་བསྒྱུར་བའི་ཚེ་དབྱིན་ཇིའི་ཀློག་པ་པོ་བློ་ཡུལ་དུ་འཇོག་དགོས་ཤིང་དེ་དག་ལ་རུང་བསྟུན་བྱེད་དགོས་པས་ལྡུམ་ར་བར་བསྒྱུར་བར་མངོན་ཞིང་།              <<སྙིམ་པའི་གླུ>>ཡོངས་སུ་རྫོགས་པ་བངྒ་ལའི་སྐད་ནས་ཧིན་སྐད་དུ་སྒྱུར་མཁན་མུ་ར་ལཱི་དྷ་ར། ཤྲཱི་བསྟཱབ་ཤེ་ཁར (मुरली धर शेखर)ལགས་ལ་ཇོ་བོ་ཉི་དབང་མགོན་པོ་ཉིད་ནས་བངྒ་ལའི་སྐད་དང་ཧིན་སྐད་ནི་གཤིས་ཀ་ཧ་ཅང་ཐག་ཉེ་བས།  ཧིན་སྐད་དུ་ཡང་བངྒ་ལི་སྐད་ལྟར་དུ། མཱ་ལཱི(माली)སྟེ་ལྡུམ་ར་བར་མ་ཡིན་པར། མཱ་ལ་ཀཱ་ར་(মালাকার)(मालाकार)སྟེ་མེ་ཏོག་ཕྲེང་རྒྱུད་རང་དུ་བསྒྱུར་ན་ལེགས་ཚུལ་གསུངས་པ་ལྟར། འདིར་བོད་འགྱུར་དུ་ཡང་སྙན་དངགས་མཁན་ཁོང་གི་ཞེ་འདོད་དེ་གཞིར་བཞག་ནས<<མེ་ཏོག་ཕྲེང་རྒྱུད>>ཅེས་བཏགས་པའོ།།

ཉི་ཟེར་སྒྱུ་འཕྲུལ་གྱི་སྣང་བ།། 

ཟླ་བ་གཞོན་ནུ་ལ་དབོག་ནས།། 

མུན་སྟུག་མུན་ནག་འདིའི་ཀློང་གི། 

ཀུ་མུད་འཛུམ་འཛུམ་ཞིག་བྱུང་ན།།

བོད་ཀྱི་རྩོམ་རིག་དབྱར་གྱི་ཆུ་བོ་ལྟར་རྒྱས་པར་གྱུར་ཅིག

སྤྱི་ལོ༢༠༡༣ལོའི་ཟླ༨པའི་ཚེས༢༢ཉིན་གྱི་མཚན་མོར་ཟླ་བ་གཞོན་ནུས་འཕགས་ཡུལ་བྱང་ཕྱོགས་དྷརྨཤཱལཱ་རུ་བྲེལ་སྟབས་ཀྱིས་སྦྱར་བ་དགེའོ།།

སྤྲིན་གྱི་ཕོ་ཉ་ནང་གི་ཐ་སྙད་ཁག་ཅིག

ཟླ་བ་གཞོན་ནུ།


<ཀནྡ་ལཱི་ཡི་མེ་ཏོག   迦昙波花    कन्दली
རཱ་མའི་རི་བོ།    罗摩山   रामगिरि
མཚོ་མཱ་ན་ས། (བོད་འགྱུར་དུ་མཚོ་གཅིག་པུ་ཡོད།)    玛那莎湖་  मानसो   Himalayan lake
བྱང་ཕྱོགས་ལྕང་ལོ་ཅན(ཨ་ལ་ཀཱ།)   阿罗迦城    अलका    Alaka
རི་བོ་གངས་ཅན།    冈底斯   कैलासा    Kailasa
རི་བོ་གྲོག་མཁར་རྩེ།   蚁垤峰    वल्मीकाग्रा    ant-hill
མཱ་ལ་མཐོ་སྒང་།(འདི་བོད་འགྱུར་ལ་ཐོན་མེད།)    玛罗高原   माल     Mala
ཨ་མྲ་བརྩེགས་པའི་རི།    芒果山    अम्रकूट     Mango Peak
རི་བོ་འབིགས་བྱེད།    文底耶山    विन्ध्य    Vindhya
དྲང་སྲོང་བུ་མོའི་ཆུ།    列瓦河     रेवा     Reva river
བི་དི་ཤའམ་མཚོན་ཆ་རྒྱལ་པོའི་ཁབ།    京城毗地沙    विदिशा
གྲོང་ཁྱེར་ཨུ་ཛྫ་ཡི་ནི།     大城优禅尼     उज्जययिनि     Ujjain
ཆུ་བོ་ནིར་བིན་དྷྱཱ།     尼文底耶河     निर्विन्ध्या
སིན་དྷུའི་ཆུ།    信度河    सिन्धु     Sindhu
ཡུལ་ཨ་ཝནྟཱི།    अवन्ती    阿槃提   Avanti
དེ་བའི་རི།     提婆山    देवगिरि     Holy Peak
གྲོང་ཁྱེར་ད་ཤ།    陀莎补罗城    दशपुर    Dashpoor
ཚངས་པ་འཇུག་པའི་ལྗོངས།    梵住地方    ब्रह्मावर्तं
ཀུ་རུ་བ་ཡི་ཞིང་།    俱卢古战场    कुरुक्षेत्रं    kuruxetra
སཱ་ར་སྭ་ཏའི་ཆུ།     莎罗室伐底河   सारस्वति    river Sarasvati
ས་ཀ་ལ་ཡི་གྲོང་།    循山峰    कनखलं    Kankhal
ཛ་ཧུའི་བུ་མོ། (ཛ་ཧྣའི་བུ་མོ།)     查赫奴之女    जह्नोः कन्या    Ganges
ཆུ་བོ་ཡ་མུ་ན།    雅母那河   यमुना     Jumna
ངང་པའི་སྒོ་ཅན།    山口天鹅门   हंसद्वारं    Swan-gate
ར་གྷུའི་བདག་པོ།      罗摩    रघुपति    Rama
ཀ་ཀུ་བྷ་ཡི་དྲི་ལྡན་རི་བོ།     有山花香气的山    कुभसुरभौ पर्वते
གྲོང་ཁྱེར་ཏམ་ཤ།     陀沙罗那    दशार्णाः     Dasharna land
ནཱི་ཙ།        低峰     नीचै    Nichais' mountain
ཀ་དམ་པ།       迦昙波花    कदम्ब     madder-bushe
མི་འམ་ཅི་མོ།       紧那罗女    किन्नरी     Kinnor
ཀྲོོ་ཉྩའི་རི།        क्रोञ्चरन्ध्र     krocarandhra
མནྡཱ་ར།       曼陀罗树     मन्दारवृक्षः    coral-tree
མ་ར་ཀ་ཏའི་རྡོ།     青玉    मरकतशिला    emerald

རོགས་པ་ཞིག་གིས་ཡང་ཡང་བསྐུལ་བ་བརྟེན་ནས་ལག་པ་འགུལ་ཙམ་བྱས་པ་ཡིན།
ཞིབ་ཚགས་པར་རྗེས་ལ་དེབ་ཏུ་དགོད་ངེས་ཡིན།

ཨ་ཕས་གནང་བའི་སློབ་སྦྱོང་གི་ཐབས་ལམ། ༣

གསུམ། ཕྱོགས་མང་བོར་སྤྲོ་སྣང་བསྐྱེད་དགོས་པ།

  བྱིས་པ་གསོ་སྐྱོང་བྱེད་དུས་སེམས་ལ་ངེས་པར་བཟུང་དགོས་པ་ནི་ཕྱོགས་གཅིག་ཁོ་ན་ནས་བྱིས་པར་ཤེས་བྱ་ག་གེ་མོ་ཞིག་ལ་བློ་རིག་སྒྲིམ་དུ་འཇུག་མི་འོས་ལ། གལ་ཏེ་དུས་ཡུན་རིང་ཙམ་ཕྱིན་ཚེ་རོ་བྲོ་དབེན་པའི་ཆིག་རྐྱང་གི་སློབ་སྦྱོང་འདིར་བྱིས་པ་སུན་སྣང་སྐྱེ་སྲིད། དེས་ན། ཇི་ལྟར་བྱིས་པ་སློབ་སྦྱོང་བྱ་བར་སྤྲོ་སྣང་སྐྱེས་ཤིང་ཁོ་ཚོ་དགའ་སྤྲོའི་ངང་དེ་ལ་འཇུག་འདོད་པ་ཞིག་བྱེད་དགོས་སམ། བདག་གི་ཨ་ཕའི་ཐབས་ལམ་ལྟར་ན་དེ་ནི་ཕྱོགས་གང་ཅིའི་ཐད་ནས་བྱིས་པར་སྤྲོ་སྣང་འདྲ་མིན་བསྐྱེད་དུ་འཇུག་དགོས་ཏེ་སྤྲོ་སྣང་གི་རྨང་གཞིའི་སྟེང་ནས་བྱིས་པ་རྣམས་བདེ་ལེགས་ངང་ཤེས་བྱའི་གནས་ལ་འཇུག་ཐུབ། འདི་ལྟར་བྱས་ཚེ་བྱིས་པའི་ཧུར་བརྩོན་གྱི་རང་བཞིན་དང་རང་འགུལ་གྱི་ངོ་བོ་ཆེས་ཆེར་བསྐྱེད་ཐུབ་པར་མ་ཟད། ཡར་རྒྱས་ཀྱང་བྱ་ལྟར་དགུང་ལ་བསྙེག་ནུས།
   ཨ་ཕས་བདག་ལ་སློབ་གསོ་བྱ་བའི་གོ་རིམ་ཁྲོད་ཤེས་བྱ་ཆེ་ཕྲ་ཀུན་ལ་སྤྲོ་སྣང་ལྡན་པ་ཞིག་བཟོ་བར་ལྷག་ཏུ་དང་དོད་བྱེད། ཁོས་འབད་བརྩོན་ཆེན་པོས་ང་རང་ཕྱོགས་གང་གི་ཐད་ལ་སྤྲོ་སྣང་འཕེལ་བའི་ལམ་སྟོན་མཛད་པས་སྐབས་དེར་སྐྱེལ་བའི་འཚོ་བ་དེ་ཕུན་སུམ་ཚོགས་པ་ཞིག་ཏུ་བཏང། ཨ་ཕའི་བསམ་པར་བྱིས་པའི་སྤྲོ་སྣང་འདི་དག་སྐྱེད་སྲིང་བྱེད་དུས་ཆེས་གལ་ཆེ་བ་ནི་དཔེ་ཆ་ཀློག་འདོན་བྱ་རྒྱུ་དེ་ཡིན། རྒྱུ་མཚན་ནི་དཔེ་ཆ་ཀློག་པ་ནི་སྤྲོ་སྣང་ཀུན་གྱི་འབྱུང་རྩ་རེད། ཡིན་ནའང་ཁོས་དཔེ་ཆ་བདམས་གསེས་ལ་ཤིན་ཏུ་གཙིགས་ཆེན་བྱེད། མི་ཞིག་དཔེ་དེབ་གང་འདྲའི་རིགས་ལ་དུངས་པ་ཡོད་ན་མི་དེས་བཀླགས་པའི་ཐོག་མའི་དཔེ་དེབ་ཀྱི་རིགས་གང་ཡིན་ཐག་ཆོད་ལ། ལྷག་པར་དུ་བྱིས་དུས་སུ་བཀླགས་པའི་དཔེ་དེབ་ཀྱིས་དུས་རྒྱུན་མི་དེའི་མི་ཚེ་ཁ་ལོ་བསྒྱུར་ཐུབ། དེའི་ཕྱིར་ཨ་ཕས་བདག་གིས་བྱིས་དུས་སུ་བཀླགས་པའི་དཔེ་དེབ་ལ་ལྷག་ཏུ་བརྩི་འཇོག་བྱེད།
   ང་ལ་དཔེ་ཀློག་མཛུབ་སྟོན་བྱེད་དུས། ཨ་ཕས་ཐབས་ལམ་ཕྲན་བུ་འགའ་སྤྱད། སྤྱིར་བྱིས་པ་སྒྲུང་ལ་ཉན་རྒྱུར་ཧ་ཅང་དགའ་ཞིང་ལྷག་པར་དུ་ལོ་ན་ཅུང་ཕྲ་བའི་བྱིས་པ་རྣམས་དེ་་བས་ཀྱང་དགའ། སྒྲུང་བཤད་པའི་གལ་ཆེན་རང་བཞིན་དེ་ཤེས་རྗེས་སྒྲུང་གཏམ་བཤད་པ་དེས་བྱིས་པའི་ཤེས་བྱ་ཇེ་ཕྱུག་ཏུ་གཏོང་ཐུབ་པར་མ་ཟད། ད་དུང་བྱིས་པས་དེ་ལས་ཀྱང་མང་བའི་དཔེ་དེབ་ཀློག་འདོན་ཐུབ་པའི་ལམ་སྟོན་གྱི་རྩ་བར་ཡང་འགྱུར་ཐུབ་པ་ཤེས། ཁོས་སྒྲུང་བཤད་དུས་ནམ་ཡང་གསོན་ཉམས་ཀྱིས་ཁེངས་ཤིང་རབ་རྟོག་གི་ཉམས་འགྱུར་དང། གསོན་ཤུགས་རྒྱས་པའི་སྐད་ཆ། ད་དུང་ལག་ཟུང་གི་ཉམས་འགྱུར་བཅས་སྤྱོད་པར་མ་ཟད། ཐ་ན་སྐབས་རེར་ཡར་ལངས་ཏེ་སྒྲུང་གཏམ་ནང་གི་མི་སྣའི་གཟུགས་དབྱིབས་ལ་ལད་ཟློས་བྱེད་བཞིན་སྒྲུང་གི་འཕེལ་རིམ་མུ་མཐུད་དེ་གོང་དུ་སྤེལ། དེ་དུས་ང་རང་ཡང་སྒྲུང་གཏམ་དང་དབྱེར་མེད་དུ་འདྲེས་པས་དུས་རྟག་ཏུ་རང་དབང་མེད་པར་ཁོ་དང་ལྷན་དུ་རྐང་གཡུག་ལག་གཡུག་བྱེད། འོན་ཀྱང་ཁོས་རྟག་ཏུ་ཆེས་སྤྲོ་སྣང་གི་མཚམས་ནས་ལམ་སེང་མཚམས་འཇོག་པར་མ་ཟད། ད་དུང་བདག་ལ་སྒྲུང་འདི་དཔེ་དེབ་དེ་ཡི་སྟེང་ཡོད་ཅེས་བརྗོད་ནས་ང་ལ་ཀློག་འདོན་ཁྲོད་སྤྲོ་སྣང་འཚོལ་བའི་སྐུལ་མ་བྱས།
   ཨ་ཕས་གསོ་སྐྱོང་འོག་ང་རང་ཀློག་འདོན་ལ་སྤྲོ་སྣང་དྲག་པོ་སྐྱེ་བར་མ་ཟད། རོལ་དབྱངས་ལའང་སྤྲོ་སྣང་ཟབ་མོ་ལྡན། རོལ་དབྱངས་ཁྲོད་མཛེས་སྣང་ཉམས་སུ་མྱོང་ཐུབ།
རླབས་ཆེན་གྱི་སྙན་ངག་པ་གིག་ཏིག་གིས་སྔོན་ཆད་ལྷས་འུ་ཅག་ལ་བསྩལ་བའི་མཛེས་པ་ཡི་ཚོར་སྣང་དེ་མི་བརླག་པའི་ཆེད་དུ་རྟག་ཏུ་རོལ་དབྱངས་ལ་ཉན་པ་དང་། སྙན་རྩོམ་གྱེར་འདོན། རི་མོར་གཟིགས་པ་བཅས་ངེས་པར་དུ་བྱ་དགོས། དེ་བས་བྱིས་པ་རོལ་དབྱངས་དང་མཐུད་སྦྲེལ་བྱ་བ་ནི་ཧ་ཅང་གལ་ཆེན་རེད། གནའ་དུས་སུ་མི་ཞིག་གིས་གཞས་གཏོང་བར་མཁས་པའི་མི་དེ་གཞས་གཏོང་མི་ཤེས་མཁན་ལས་ཚེ་ཐག་རིང་ཞེས་བརྗོད་ལ་འདི་ནི་གཞས་མཁན་དེའི་སེམས་ཁམས་ནམ་ཡང་བློ་བདེ་བག་ཕེབས་ཡིན་པའི་རྐྱེན་རེད།
ང་ཚོས་མི་ཡོད་ཚད་རོལ་དབྱངས་མཁན་པོ་རུ་འགྱུར་དུ་འཇུག་མི་ཐུབ་ལ་དེ་ལ་དགོས་པའང་དེ་འདྲ་མ་མཆིས་ཏེ། ཡིན་ནའང་འཇིག་རྟེན་འདིར་རོལ་དབྱངས་ཅུང་ཟད་ཙམ་ཡང་མི་ཤེས་པ་ནི་ཤིན་ཏུ་ལས་ངན་ཞིག་རེད། གལ་ཏེ་རང་ཉིད་ཀྱིས་མི་ཤེས་ཀྱང་ཉུང་མཐར་ཡང་དེ་ཉིད་མྱོང་རྟོགས་བྱེད་ཤེས་དགོས། མི་གླེན་པ་འགའི་བསམ་པར་བྱིས་པ་རོལ་དབྱངས་མཁས་ཅན་དུ་འགྱུར་འདོད་མེད་ན་ཁོ་ལ་རོལ་དབྱངས་བསླབ་པ་ནི་ཆུ་ཚོད་སྟོང་ཟད་དུ་བཏང་བ་རེད་སྙམ། འདོད་ཚུལ་འདི་ནི་ནོར་འཁྲུལ་ཁོ་ན་རེད། སྒྱུ་རྩལ་གྱི་ཆ་ཙམ་ཡང་མེད་པའི་མི་ཚེ་ནི་ཚ་སྡོར་མེད་པའི་ཐུག་པ་དང་གཉིས་སུ་མེད། བྱིས་པའི་མི་ཚེ་གཅིག་པོ་བདེ་སྐྱིད་ཀྱིས་ཁེངས་ཤིང་འཚོ་བའི་ཁ་དོག་རྣམ་པར་བཀྲ་བ་ཞིག་འབྱུང་ཕྱིར་ཕ་མར་བྱིས་པ་ཚོར་རྩོམ་རིག་དང་རོལ་དབྱངས་ཀྱི་སྦྱོང་བརྡར་འཛོམས་པའི་འོས་འགན་ཡོད།
ཨ་ཕས་བསམ་པར་ཚེ་འདིར་རོལ་དབྱངས་ཤེས་པ་ནི་བདེ་སྐྱིད་ཅིག་རེད་སྙམ། ཁོས་ང་རང་ཆུང་ངུའི་དུས་ནས་རོལ་དབྱངས་ལ་དགའ་མོས་བྱེད་པའི་འདུ་ཤེས་ཤིག་བསྐྲུན་ཅི་ཐུབ་བྱས་ཟེར། ང་སྐྱེས་ནས་ཅང་མ་འགོར་བར་ཁོས་༡་༢་༣་༤་༥་༦་༧་བཅས་སྒྲ་གདངས་མི་འདྲ་བ་བདུན་ཐོན་པའི་ཅོང་ཆུང་ཞིག་བརྡུངས་ཏེ་ང་ལ་ཉན་དུ་བཅུག་པར་མ་ཟད། ཨ་མས་བླངས་པའི་གླུ་ངག་ལ་ཉན་དུ་བཅུག
   ཨ་ཕ་དུས་རྒྱུན་བདག་དང་ལྷན་དུ་འདིའི་ཕྱོགས་ཀྱི་རྩེད་མོ་རྩེ། དེ་དག་ལས་རྩེད་ཐབས་གཅིག་ནི་ཁང་བའི་སྦུགས་ལས་དངོས་པོ་སྦས་ཏེ་ང་རང་ལ་འཚོལ་དུ་འཇུག འདི་ནི་བྱིས་པ་རྣམས་རྟག་ཏུ་རྩེ་བའི་རྩེད་མོ་ཞིག་རེད། སྐབས་འདིར་ཁོས་རྣོ་སྦྲེང་དཀྲོལ་བས་རྩེད་མོ་འདི་དགའ་སྤྲོའི་རྣམ་པས་ཁེངས་པ་ཞིག་ཏུ་བསྒྱུར། ཐེངས་ཤིག་ཁོས་དངོས་པོ་ཞིག་སྦས་ཏེ་ང་ལ་འཚོལ་དུ་བཅུག ང་རང་དངོས་པོའི་ཉེ་སར་ཅུང་ཙམ་ཕྱིན་ཚེ་ཁོས་སེམས་ཆུང་བྱོས་སེམས་ཆུང་བྱོས་ཞེས་མ་ལབ་པར། དེ་ལས་ལྡོག་སྟེ་རྣོ་སྦྲེང་གི་སྐད་གདངས་ཇེ་གཉོམ་དུ་བཏང་། གལ་ཏེ་ཐག་རིང་དུ་ཕྱིན་ཚེ་སྒྲ་གདངས་རིམ་གྱིས་བསྐྱེད། གལ་ཏེ་ངས་གཟབ་ནན་ངང་རོལ་དབྱངས་ཀྱི་འདེགས་འཇོག་ལ་མ་ཉན་ཚེ་སྦུགས་སུ་སྦས་པའི་དངོས་པོ་རྙེད་རྒྱུ་ཧ་ཅང་དཀའ་མོ་རེད། ཐབས་ལམ་འདི་ངའི་ཉན་སྟོབས་ལ་སྦྱོང་བརྡར་བྱེད་པར་བྱེད་ནུས་ཆེས་ཆེར་ལྡན།
བྱིས་པ་ཆུང་ངུ་ཚང་མ་དབྱངས་འགྲོས་ལ་དགའ་བས་ཨ་ཕས་འདིའི་ཕྱོགས་ནས་ང་ལ་སྦྱོང་བརྡར་བྱས། ངས་སྐད་ཆ་བཤད་མི་ཤེས་པའི་སྐབས་ནས་བཟུང་ཁོས་ཐལ་ལྕག་བརྡབ་པའི་རྣམ་པས་ལག་ཟུང་བརྡབས་ཏེ་ང་ལ་ལྟ་ཉན་བྱེད་དུ་བཅུག ཅང་མ་འགོར་བར་ཁོས་རྔ་ཆུང་ཞིག་ཉོས་འོང་སྟེ་ང་ལ་ཐལ་ལྕག་ལྟར་རྔ་བོ་རྡུང་དུ་བཅུག དེ་ནས་ཅང་མ་འགོར་བར་ཁོས་ཡང་ཤིང་རྔ་ཞིག་ཉོས་ཏེ་ང་ལ་རྡུང་དུ་བཅུག་པར་མ་ཟད། སྒྲ་སྙན་རྩེད་མོའང་རྩེ་བའི་མགོ་བཙུགས།
  ང་རང་ཆུང་དུས་ནས་རྣོ་སྦྲེང་སོགས་རོལ་ཆས་རྩེད་རྒྱུར་དགའ་བ་དང། ཨ་ཕས་ཁྱད་ཆོས་འདི་དམ་དུ་བཟུང་ནས་བདག་ལ་སྦྱོང་བརྡར་མང་བོ་བྱེད་པའི་སྐུལ་མ་བྱས། ཞོར་དུ་བདག་ལ་ཨ་ཕས་རོགས་རམ་འགའ་གནང་ཚེ་ངས་རང་གིས་དབྱངས་འདྲ་མིན་རྩོམ་བཞིན་ཡོད་ལ་དེ་མིན་རང་ཉིད་ཀྱིས་གསར་སྐྲུན་བྱས་པའི་དབྱངས་རྟ་རྣམས་ཟིན་ཐོའི་སྟེང་བཀོད་ཡོད།
ཨ་ཕས་རོལ་ཆས་སློབ་དུས་རྩལ་ནུས་ཁོ་ནར་དོ་སྣང་བྱེད་པའི་ཐབས་ལ་ངོ་རྒོལ་བྱེད། སྐབས་དེ་དུས་ཀྱི་ངེད་ཚང་གི་ཁྱིམ་མཚེས་ཤིག་གིས་སྔོན་ཆད་ཁོ་ཚང་གི་བྱིས་པར་ཨོག་ལེན་ཆུང་བའི་དགེ་རྒན་ཞིག་གདན་ཞུ་བྱས། ལོ་གཅིག་གི་ནང་དུ་ཁོས་བྱིས་པར་རྩལ་ནུས་སྦྱོང་བརྡར་ཁོ་ན་ཁྲིད་པས་དེས་བྱིས་པར་ཨོག་ལེན་དཀྲོལ་སྟངས་ཤེས་སུ་འཇུག་པ་ཕར་ཞོག དེ་ལས་ལྡོག་སྟེ་རོལ་དབྱངས་ལ་ཞེ་མེར་ལངས་སུ་བཅུག ཡིན་ནའང་བདག་ལ་ཨོག་ལེན་ཆུང་བ་ཁྲིད་མཁན་གྱིས་ཐབས་ལམ་འདི་སྤྱད་མེད་དེ་ངས་ཨོག་ལེན་ཆུང་བ་སྦྱོང་བརྡར་བྱེད་དུས་ཨ་ཕས་རྣོ་སྦྲེང་དཀྲོལ་ཏེ་རམ་དཀྲོལ་བྱས་པས་བདག་གི་དགའ་སྣང་དང། ཨོག་ལེན་སློབ་པའི་རོ་བྲོ་ཆེ་རུ་ཕྱིན། དེ་བས་ངས་རྣོ་སྦྲེང་དཀྲོལ་བ་དང་། ཨོག་ལེན་ཆུང་བ་འཐེན་པའི་གྲུབ་འབྲས་ཀྱང་ཤིན་ཏུ་འབུར་ཐོན་ཡིན།

བཞི། ཆེས་ཕན་འབྲས་ཅན་གྱི་བློ་འཛིན་བྱེད་ཐབས།

  བདག་གི་མྱོང་བས་བདག་ལ་བཤད་དོན། དོན་དངོས་སུ་ངས་བསམ་པར་སློབ་སྦྱོང་ལ་ནན་ཏན་ཅན་གྱི་མི་རྣམས་ལའང་གཅིག་གྱུར་གྱི་ལྟ་ཚུལ་ཞིག་ཡོད་སྙམ། དེ་ནི་བློ་འཛིན་ཏེ་སློབ་སྦྱོང་གི་ཁྲོད་དུ་གལ་གནད་ཅན་ཞིག་ཡིན་པ་དེ་རེད། དེང་སང་གི་མི་མང་བོ་ཞིག་གིས་བླུན་རྨོངས་ཀྱི་བྱེད་ཐབས་སྤྱོད་བཞིན་བློ་ངོར་བཙན་ཚུགས་ཀྱིས་འཇུག་བཞིན་འདུག དེ་ནི་དེབ་ནང་གི་བརྗོད་བྱའི་སྙིང་བོ་ཨུ་ཚུགས་ཀྱིས་ཀླད་པར་བཅུག་པ་དེ་རེད། དོན་དམ་དུ་བློ་ངོར་ཨུ་ཚུགས་ཀྱིས་འཇུག་པ་དེས་གོ་བ་མཐིལ་ཕྱིན་པ་ཞིག་ལེན་མི་ཐུབ་ལ་ཤེས་བྱ་ཐམས་ཅད་ཡིད་ལའང་འཇུག་དཀའ་བར་མ་ཟད། ཡོན་ཏན་མ་ལུས་ཁོག་ཏུའང་གཏན་ནས་འཇུག་མི་ཐུབ། གལ་ཏེ་བློ་རུ་བཅུག་ནའང་དེ་ནི་ཟིན་ཐོའི་ཚུལ་གྱིས་ཡོན་ཏན་ཐམས་ཅད་ཟིན་བྲིས་སུ་བཀོད་པ་ལས་དེའི་བརྗོད་དོན་རྟོགས་ཐབས་བྲལ། ལོ་རྒྱུས་ཐོག་གྲུབ་འབྲས་གཡུར་དུ་ཟ་བ་བླངས་པའི་མི་སུ་ཡིན་རུང་བཙན་ཚུགས་ཀྱིས་བློར་བཅུག་པར་བརྟེན་ནས་ལམ་ལྷོངས་བྱུང་བ་གཅིག་ཀྱང་མེད། གནས་ལུགས་འདི་ཤེས་ཡོན་ཕྲན་བུ་ལྡན་པའམ་བློ་སེམས་གཅིག་སྒྲིལ་གྱིས་སློབ་སྦྱོང་བྱེད་མཁན་མི་ཚང་མས་རྟོགས་ཐུབ། རླབས་ཆེན་གྱི་མི་སྣ་འདི་དག་གིས་ཀྱང་དོན་གྱིས་ཕྱུག་པའི་ལྟ་ཚུལ་མང་པོ་ཞིག་བཞག་ཡོད་དེ། “ངས་གོ་བ་ལོན་པ་མ་གཏོགས་ཅི་ཡང་དྲན་གྱི་མི་འདུག ཁྱོད་ཀྱིས་ང་ལ་ཅི་ཞིག་བློ་ངོར་ངེས་སུ་བཅུག་ཟེར་བ་ཡིན་”ཞེས་པ་འདི་ནི་པེ་ཊ་གྷི་ལ་སིས་སྨྲས་པའི་སྐད་ཆ་རེད། “དཔེ་ཆ་བཙན་ཚུགས་ཀྱིས་ཀློག་མཁན་ནི་དྲེལ་རྒན་ལྟར་བླུན་ཞིང་རྨོངས་”ཞེས་པ་ཡ་ལི་ཧྲི་ཏོ་ཊིག་གིས་བརྗོད་པ་རེད། “ངས་བསམ་བློས་གདངས་དབྱངས་འདི་དག་བློ་རུ་བཅུག་པ་ཡིན། གལ་ཏེ་ངས་ཀླད་པ་སྤྱད་དེ་བློ་འཛིན་བྱས་ཚེ་ང་རང་རོལ་དབྱངས་ལ་རྒྱུས་མངའ་ཏིལ་ཙམ་ཡང་སྐྱེ་མི་སྲིད།”ཅེས་པ་ནི་སྔོན་པེ་ཊོ་ཧྤུན་གྱིས་གསུངས། ཡང་སྐོར་བསྐྱར་སྐོར་གྱི་བློ་འཛིན་བྱ་ཐབས་ནི་ཨ་ཕས་བདག་ལ་སློབ་གསོ་བྱེད་དུས་སུ་སྤྱོད་པའི་ནུས་ལྡན་གྱི་ཐབས་ལམ་ཞིག་རེད། གོ་བའི་ཁྲོད་ནས་བློ་འཛིན་ཡང་གལ་ཆེ་བ་བཤད་ག་ལ་དགོས། ཨ་ཕས་ང་རང་ལ་དཔེ་དེབ་ནང་གི་ཡིག་རྡོག་རེ་རེ་དང་ཚིག་དོན་རེ་རེ་བཞིན་བློ་འཛིན་བྱེད་དུ་གཏན་ནས་མི་འཇུག་ཅིང་འདི་ནི་བདག་གིས་མཐོང་བའི་བྱིས་པ་མང་བོ་ཞིག་གིས་སློབ་སྦྱོང་བྱེད་སྟངས་རེད། ཨ་ཕས་ནམ་དུས་ཡིན་ཡང་ང་ལ་གང་མགྱོགས་ངང་རགས་ལྟ་བྱེད་དུ་འཇུག་གིན་ཡོད། ཨ་ཕས་བསམ་པར་དཔེ་ཆ་ཀློག་པ་ནི་ཡིག་ངོ་ཆོད་པ་ཁོ་ན་མ་ཡིན་པར་དཔེ་དེབ་ཀྱི་བརྗོད་བྱའང་རྟོགས་འོས། འདི་ནི་རགས་ལྟ་ཀློག་སྟངས་ཀྱི་དགེ་མཚན་རེད།
   ཉིན་ཞིག་ངས་འཇར་མན་གྱི་ཡི་གེར་བཀོད་པའི་གནའ་བོའི་གྷི་རིགས་དཔལ་ཡོན་གྱི་ཉམས་རྒུད་ཅེས་དེབ་ཅིག་གཟབ་ནན་ངང་ཀློག་པའི་སྐབས་སུ་ཨ་ཕས་ཕལ་ཆེར་ངས་ཤོག་ལྷེ་ཡུན་རིང་ཞིག་ལ་མ་བསློག་པ་མཐོང་པས་བདག་གི་གམ་དུ་བཅར་ཏེ་ང་ལ་“ཁ་ཨར། ཁྱོད་ཀྱིས་དཔེ་དེབ་ཅི་ཞིག་ལ་ལྟ་བཞིན་ཡོད་”ཅེས་དྲིས་བྱུང་། “ཨོ། ངས་ལྟ་བཞིན་པ་ནི་གནའ་བོའི་གྷི་རིགས་ཀྱི་དཔལ་ཡོན་གྱི་ཉམས་རྒུད་རེད”ཅེས་བཤད། “འདི་ནི་དཔེ་ཆ་ལེགས་པོ་ཞིག་རེད། དེས་གྷི་རིགས་ཀྱི་ཡི་གེ་སློབ་པར་ཕན་ཐོགས་པར་མ་ཟད། རྒྱུད་ལ་ཤེས་བྱ་ཕུན་སུམ་ཚོགས་པ་འཇུག་ཐུབ།” གྷི་རིགས་སློབ་པར་ཕན་པའི་ཨ་ཕའི་སྐད་ཆ་ཐོས་རྗེས་ “འདི་ནི་གྷི་རིགས་མ་རེད། འཇར་མན་རེད།”ཅེས་ཁོང་ལ་དག་སེལ་བྱས། “ཨོ་་་་་་མ་གཞི་འཇར་མན་རེད་ལ”་ཟེར་བཞིན་ཨེན་ཙམ་ལུས་རྗེས་ཡང་ཁོས་“འོན་ཀྱང་ངའི་བསམ་པར་ཁྱོད་ཀྱི་འཇར་མན་གྱི་ཆུ་ཚད་དེས་དེབ་འདི་ཀློག་ཚེ་ཆེས་སྟབས་བདེ་ཡིན་འོས། འོ་ན་ཅིའི་ཕྱིར་ཁྱོད་ཀྱིས་ཀློག་པ་དེ་འདྲའི་དལ་བ་ཡིན་ནམ།” “ཨ་ཕ། ང་དེ་ལྟར་དལ་བ་ནི་ངས་ནང་དོན་གསལ་བོར་རྟོགས་རྒྱུ་ལས་ཡིག་ངོ་ཨེ་ཆོད་ལ་ལྟ་གིན་མེད་པའི་རྐྱེན་རེད་”ཅེས་འགྲེལ་བཤད་བྱས། “དེས་ན་ངས་ཁྱོད་ལ་ཚོད་རྒྱུགས་ཤིག་ལེན། ཅི་ཞིག་བློ་ངོར་ཆུད་ཡོད་མེད་ལ་བལྟ།” ཟེར་བཞིན་ཨ་ཕས་བདག་ལ་དཔེ་དེབ་ནང་གི་དྲི་བ་འདོན་མགོ་ཚུགས། ཡ་མཚན་པ་ཞིག་ལ་ངས་ད་ལྟ་ནུས་ཤུགས་ཡོད་རྒུ་སྤྱད་དེ་སེམས་སུ་ངེས་ཐབས་བྱས་པའི་དུས་ཚོད་དང། ས་གནས་ཕར་ཞོག ཐ་ན་བརྗོད་བྱ་གཙོ་བོའང་དྲན་ངོགས་ན་རབ་རིབ་ཏུ་སྣང། ངས་ཡ་མཚན་པའི་ངང་ཨ་ཕར་ལྟ་བཞིན་“ད་ལྟ་རང་གཟབ་ནན་ངང་སེམས་ལ་བཟུང་མོད། འདིར་ཅི་ཞིག་བྱུང་བ་ཡིན་ནམ་”ཞེས་བརྗོད། སྐབས་འདིར་ཨ་ཕས་ཡང་བསྐྱར་བདག་ལ་བལྟས་མྱོང་བའི་དཔེ་དེབ་འགའི་ནང་དོན་དྲིས་བྱུང། ངས་བསམ་བཞིན་དུ་བློ་ངོར་མ་བཅུག་པའི་དོན་དག་དེ་དག་ལ་གསལ་གསལ་ཐིང་ཐིང་ངང་ལན་སྤྲོད་ཐུབ་སོང། ཨ་ཕས་ང་རང་ཐེ་ཚོམ་གྱི་རྙི་རུ་ཚུད་པའི་རྣམ་པ་དེ་མཐོང་བས་གད་མོ་ཆེན་པོ་ཞིག་ཤོར་སོང། ངས་“ཁྱོད་ཅི་ཞིག་ལ་དགོད་ཀྱིན་ཡོད་དམ་ཨ་ཕ།” ཞེས་དྲིས། “ང་གླེན་ཕྲུག་ཁྱོད་ལ་གད་མོ་དགོད་བཞིན་ཡོད། ད་ལྟ་རང་བལྟས་པའི་དཔེ་ཆ་གསལ་པོར་ངེས་མི་ཐུབ་པར་དེ་ལས་ལྡོག་སྟེ་སྔོན་ཆད་བཀླགས་པའི་དཔེ་ཆ་སེམས་ལ་ཝ་ལེར་བཟུང་བ་འདི་རྒྱུ་མཚན་ཅི་ཞིག་རེད་”ཅེས་དྲིས་བྱུང། ངས་ཅི་ཡང་མ་ཤེས་པས་མགོ་བོ་འཕྲེད་དུ་གཡུག། “<<གྷི་རིགས་ཀྱི་དཔལ་ཡོན་ཉམས་རྒུད>>་ཅེས་པ་དེ་གཞུང་དཔེ་ཞིག་རེད་སྙམ་ནས་དེ་ཉིད་བློར་བཙན་འཇུག་བྱས་པ་རེད། འདི་ལྟར་བློ་ངོར་འཇུག་ག་ལ་ནུས། དེ་ལས་སྔོན་ཆད་བལྟས་པའི་རྩོམ་རིག་བརྩམས་ཆོས། བསམ་བཞིན་བློ་ངོར་འཇུག་ཐབས་མ་བྱས་རུང་དེ་ལ་སྤྲོ་སྣང་སྐྱེ་བས་ཐེངས་དུ་མར་ཀློག འདི་ལྟར་ཤེས་མེད་ཚོར་མེད་ངང་ཁྱོད་ཀྱིས་བློ་ངོར་བཅུག་ཟིན་པ་རེད།” “དེས་ན་ངས་དཔེ་དེབ་འདི་ཅི་ལྟར་ཀློག་འདོན་བྱ་དགོས་སམ།” “ཁྱོད་ཀྱིས་དེ་ཉིད་རྩོམ་རིག་གི་དཔེ་དེབ་བཞིན་ཀློག་ན་འགྲིག་གི་རེད།” “འདི་ནི་གཞུང་ལུགས་ཀྱི་བརྩམས་ཆོས་ཤིག་རེད། འདི་ལྟ་བུའི་རྣམ་གཡེང་གི་རྣམ་འགྱུར་བཟུང་ན་ག་ལ་འགྲིག”ཅེས་བཤད་པ་ཡིན། ཨ་ཕས་གདོང་གི་འཛུམ་བོར་ཏེ་བདག་ལ་གཟབ་ནན་ངང་“ཁྱོད་ཀྱིས་ས་སྟེང་འདིའི་དཔེ་ཆ་ཡོད་དོ་ཅོག་ལ་ལྟ་སྟངས་གཅིག་འཛིན་དགོས། རིན་ཐང་ལྡན་ལ་དོན་སྙིང་ཅན་ཞིག་ཡིན་པ་ཐམས་ཅད་དཔེ་ཆ་ལེགས་པོ་ཡིན་པས་དེ་ལ་གཟབ་ནན་ཡིན་མ་ཡིན་གྱི་ཁྱད་པར་མེད། བློ་ངོར་བཙན་འཇུག་བྱེད་པ་དེ་ནི་སློབ་སྦྱོང་གི་ཁྲོད་དུ་བེད་སྤྱོད་བྱ་མི་ཐུབ། གལ་ཏེ་ཁྱོད་ཀྱིས་རྩོམ་རིག་བརྩམས་ཆོས་ཀློག་པ་ལྟར་དཔེ་ཆ་འདི་ཀློག་སྟེ་ཡང་དག་པའི་ངང་ངོས་འཛིན་བྱ་ཐུབ་ཚེ་ཁྱོད་ཀྱིས་དེའི་ཡིད་འགུག་གི་ནུས་པ་དེ་རྙེད་ཐུབ་པར་མ་ཟད། དེ་ལྟར་ཐེངས་གཉིས་གསུམ་ཙམ་བཀླགས་པས་དེ་ཉིད་བློ་ལ་བཙན་འཇུག་བྱ་མ་དགོས་པར་ཁྱོད་ཀྱིས་དེའི་གོ་བ་ལོན་ཅིང་ཡིད་ལ་བཟུང་སྟེ་སྤྲོ་སྣང་ཡང་མི་དམན་པ་ཞིག་ཐོབ་ཐུབ་”ཅེས་གསུངས་བྱུང།
   ཨ་ཕའི་གཏམ་ལ་ཉན་རྗེས་ངས་ཨ་ཕས་བསླབ་པའི་བྱེད་ཐབས་བཞིན་གནའ་བོའི་གྷི་རིགས་ཀྱི་དཔལ་ཡོན་ཉམས་རྒུད་ཅེས་པ་དེ་ཀློག་པ་ཡིན། ཐོག་མར་བདག་གིས་དཔེ་ཆ་ཧྲིལ་པོའི་བརྗོད་བྱ་དང་བྱུང་ཚུལ་བློ་རུ་བཅུག་ཅིང་གོ་དཀའ་བའི་ཚན་པ་དང་ཚིག་དུམ་ལ་འཕྲད་དུས་གནས་སྐབས་སུ་བསྐྱུར་ཏེ་ཞིབ་ཕྲའི་ཞིབ་འཇུག་བྱེད་ཀྱི་མེད། ཕྱིས་སུ་ཐེངས་གཉིས་པ་དང་གསུམ་པར་ལྟ་དུས་ངས་གོ་མེད་ཚོར་མེད་ངང་རང་ཉིད་ཀྱིས་དེ་དག་ཐམས་ཅད་ཡིད་ལ་བཅུག་པ་ཤེས་སོང།

ལྔ། རྩིས་རིག་ཁྲིད་ཐབས།

  རྩིས་རིག་ནི་རང་བྱུང་ཚན་རིག་གི་བྱེ་བྲག་ཅིག་རེད། དེས་བྱིས་པའི་གཏན་ཚིགས་དང་མཐུན་པའི་བསམ་བློ་དང་གཏད་མེད་འཆར་ཡན་གྱི་ནུས་པ་གསོ་སྐྱོང་བྱ་ཐུབ། འོན་ཏེ་དེ་ནི་སྤྲོ་སྣང་བྲལ་ལ་རོ་བྲོ་བོར་བའི་རིག་ཚན་ཞིག་ཀྱང་རེད། དེ་ལ་སྤྲོ་སྣང་མངའ་བའི་མི་ཧ་ཅང་ཉུང་བར་མ་ཟད། ད་དུང་དེ་ལ་སྤྲོ་བ་འཕེལ་རྒྱུ་དཀའ་མོ་རེད། ཡིན་ནའང་དེ་ནི་བྱིས་པ་རྣམས་ཀྱིས་མི་སྦྱང་ཀ་མེད་དུ་གྱུར་བའི་ཤེས་བྱའི་ཚན་ཁག་ཅིག་རེད། པ་ལགས་ཀྱིས་སྔོན་ཐབས་བརྒྱ་ཇུས་སྟོང་གིས་ང་རང་རྩིས་རིག་ལ་སྤྲོ་སྣང་འཕེལ་དུ་བཅུག་ཡོད། ང་རང་གསོ་སྐྱོང་བྱེད་པའི་གོ་རིམ་ཁྲོད། ཨ་ཕས་རིག་ཚན་མཐའ་དག་གི་ཁྲོད་ན་བྱིས་པའི་བློ་འགུག་གི་ནུས་པ་དབེན་པ་རྩིས་རིག་ལས་སྡུག་པ་གཞན་མ་རྙེད། རིག་ཚན་གཞན་དག་སྟེ་སྐྱེ་ཁམས་དང། རི་དྭགས། ས་ཁམས་རིག་པ་བཅས་རྩིས་རིག་དང་བསྡུར་ཚེ་དེ་དག་ཚང་མ་རང་བྱུང་ཁམས་ཆེན་མོར་དངོས་སུ་འབྲེལ་མཐུད་བྱ་ཐུབ་ལ་སྤྲོ་དགའི་རྩེད་འཇོའི་ཁྲོད་ཤེས་བྱ་མང་བོ་སློབ་ཐུབ་པས་བྱིས་པའི་སྤྲོ་སེམས་རང་བཞིན་གྱིས་འཕེལ་ངེས། རྩིས་རིག་ཁོ་ན་ནི་ལྐོག་གྱུར་གྱི་རིག་ཚན་ཞིག་ཡིན་པས་རང་ཉིད་ཀྱི་བསམ་བློ་ནུས་སྟོབས་ཁོ་ནར་བརྟེན་པ་ལས་རྩེད་འཇོར་དགའ་བའི་བྱིས་པས་སྤྲོ་སྣང་བྲལ་བ་ཞིག་ཏུ་ཚོར་འགྲོ།
ཐོག་མ་ནས་ང་རང་རྩིས་རིག་ལ་མི་དགའ་བ་ཨ་ཕའི་ཉིན་ཐོ་ལས་ཤེས་ཐུབ། ཨ་ཕས་སྔ་མོ་ནས་རྩེད་མོའི་ཐབས་ལམ་བརྒྱུད་དེ་གྲངས་ཀ་རྩིས་ཚུལ་དང་དེ་ངོས་འཛིན་ཚུལ་རྣམས་ཚེགས་མེད་ངང་བདག་ལ་བསླབས་པར་མ་ཟད། ད་དུང་ཉོ་ཚོང་གི་རྩེད་མོ་རྩེ་བཞིན་བདག་ལ་སྒོར་མོ་རྩིས་ཚུལ་ལས་སླ་མོའི་ངང་ཁྲིད། དེ་ལྟ་ནའང་ཁོས་ང་ལ་སྒྱུར་ཐབས་མན་ངག་སློབ་དུས་དཀའ་ངལ་ལ་འཕྲད་བྱུང། འདི་ནི་ང་རང་སྐྱེས་པ་ནས་བཟུང་སློབ་སྦྱོང་ལ་ཞེན་ཁ་ལོག་ཐེངས་དང་བོ་རེད། ཕྱིས་སུ་ཁོས་སྒྱུར་ཐབས་མན་ངག་གཞས་ཚིག་ཏུ་བསྒྲིགས་ཏེ་ང་ལ་ལེན་དུ་བཅུག་ཀྱང་ད་དུང་སྤྲོ་བ་འཕེལ་མ་སོང།
   ཐུགས་ཁུར་ཞིག་འདི་ལྟར་ཨ་ཕའི་སྙིང་ཁར་མདའ་བཞིན་ཟུག་པས་ཁོས་ང་ལ་འདིའི་ཐད་ལྷན་སྐྱེས་ཀྱི་མི་འདང་བའི་ཆ་ཞིག་མཆིས་སམ་སྙམ་ཡང་ཁོ་བསམ་བློའི་འཁྱེར་སོ་འདི་ལ་གདེང་མ་ཐོབ། དེར་མཐུད་ནས་ཁོས་ཅི་ཞིག་ལ་ཁ་ཨར་ཤེས་བྱ་གཞན་དག་གི་ཐད་ལ་འདི་ལྟ་བུའི་གྲུབ་འབྲས་ལྡན་ཞིང་འཕེལ་རྒྱས་མྱུར་བ་ཞིག་དང། དེ་ལས་རྩིས་རིག་ལ་འདི་ལྟ་བུའི་སུན་སྣང་སྐྱེས་པ་ཡིན་ནམ། འདི་ཁ་ཨར་གྱིས་སློབ་སྦྱོང་ལ་དགའ་ཕྱོགས་གཙོ་གཉེར་བྱས་པ་ཨེ་ཡིན་ནམ་སྙམ། དེ་ནི་བྱིས་པའི་ཕུགས་བསམ་སྨིན་བྱེད་ཀྱི་ལུད་རྫས་འོས་འཚམ་ཞིག་མིན་པ་མངོན་གསལ་རེད། ཁོའི་ཕུགས་བསམ་ནི་ང་རང་སྒོ་ཀུན་ནས་ཆ་མཉམ་ངང་ཡར་རྒྱས་གཏོང་རྒྱུ་དང། ཤེས་འཇོན་ཅན་ཞིག་ཏུ་གྱུར་པ་དང་མཉམ་དུ་དོན་དམ་གྱི་བདེ་སྐྱིད་ཚོར་ཐུབ་པ་ཞིག་བྱེད་རྒྱུ་དེ་རེད། ཕྱོགས་གཅིག་ཡར་རྒྱས་ཅན་གྱི་མི་དེ་ཁ་ཞེ་གཉིས་མེད་ཀྱི་བདེ་སྐྱིད་ཅིག་ཏུ་གཏན་ནས་ཆགས་མི་སྲིད།
  ང་རང་རྩིས་རིག་ལ་སྤྲོ་སྣང་དབེན་པའི་དུས་སྐབས་དེའི་རིང་ཕ་རྒན་སེམས་ངལ་གྱི་གཡང་ལ་ལྷུང་། དེ་ལྟ་ནའང་ཁོས་ད་དུང་བདག་ལ་སྒྱུར་ཐབས་མན་ངག་བཙན་གྱིས་བློ་འཛིན་བྱེད་དུ་བཅུག་མེད། ཁོས་བཙན་ཚུགས་ལ་ཕན་འབྲས་མེད་པའི་ཡིད་ཆེས་བརྟན་པོ་བྱེད་པར་མ་ཟད། བྱིས་པའི་སེམས་ཁམས་ལའང་མི་ལེགས་པའི་ཤུགས་རྐྱེན་སླ་བའི་ཡིད་ཆེས་བྱེད།
ཐེངས་ཤིག་ཨ་ཕ་དང་སློབ་དཔོན་ཆེན་མོ་ལོ་སུན་པུ་ལོ་མའོ་གཉིས་མ་གྲོས་གཅིག་ཏུ་མཇལ་བས་ཨ་ཕའི་སེམས་ངལ་སེལ་སོང། སློབ་དཔོན་ཆེན་མོ་སོ་སུན་པུ་ལོ་མའོ་ནི་ཆོས་དཔོན་གྱི་གྲོགས་པོ་ཡིན། ཁོ་ནི་རྩིས་རིག་སློབ་དཔོན་ཞིག་སྟེ། ཁོས་རྩིས་རིག་ཁྲིད་ཐབས་ནི་དངོས་ནས་མཆོག་ཏུ་གྱུར་བ་ཞིག་རེད། ཐེངས་ཤིག་ཨ་ཕ་ཆོས་དཔོན་ལ་གཟིགས་སྐོར་དུ་འགྲོ་དུས་ཁོ་རང་ཁྱིམ་དེའི་སློབ་དཔོན་ཆེན་མོ་དང་མཇལ།
   ཨ་ཕའི་དཀའ་ངལ་ལ་གསན་རྗེས། སློབ་དཔོན་ཆེན་མོ་མོ་སུན་པུ་ལོ་མའོ་ཡིས་ཚིག་གཅིག་གིས་དཀའ་བའི་འགག་འཕྲང་གཏོར། གལ་ཏེ་བྱིས་པར་རྩིས་རིག་སློབ་པའི་སྤྲོ་སེམས་མེད་ན། དེ་ནི་ཕྱོགས་མཐའ་ཅན་གྱི་འཕེལ་རྒྱས་གཏན་ནས་མིན་པར་དེ་ལས་ཁྱོད་ཀྱི་ཁྲིད་ཐབས་ནོར་བ་རེད། རྒྱུ་མཚན་ནི་ཁྱོད་ཀྱིས་སྤྲོ་སྣང་ལྡན་པའི་ངང་ཁོ་ལ་རྩིས་རིག་བསླབ་མ་ཐུབ་པས་ཁོས་ཀྱང་སྤྲོ་བ་མེད་པའི་ངང་སྦྱངས་པ་རེད། ཁྱོད་རང་ཉིད་སྐད་བརྡ་རིག་པ་དང། རོལ་དབྱངས། རྩོམ་རིག ལོ་རྒྱུས་བཅས་ལ་དུངས་པས་སྤྲོ་སྣང་ལྡན་པའི་ངང་ཤེས་བྱ་འདི་དག་ཁྲིད་ཐུབ། རི་དྭགས་རིག་པ་དང། སྐྱེ་དངོས་རིག་པ། ས་ཁམས་རིག་པ་བཅས་ཁྲིད་པར་ཡང་བྱེད་ཐབས་ཤིག་ཡོད། ཁྱོད་ཀྱི་བྱིས་པས་ཀྱང་ལེགས་པོ་སློབ་ཐུབ། ཡིན་ནའང་རྩིས་རིག་ནི་ཁྱོད་རང་ཉིད་དེ་ལ་དགའ་བ་མེད་པས་རོ་བྲོ་ལྡན་པའི་ངང་ཁྲིད་མི་ཐུབ་ཕྱིར་བྱིས་པའང་རྩིས་རིག་སློབ་པར་སུན་སྣང་སྐྱེ་ཡོད་ཅེས་བརྗོད། དེར་མཐུད་ནས་ཕུལ་དུ་བྱུང་བའི་མཁས་པ་འདིས་ལྷག་བསམ་ཁོལ་བའི་ངང་ཨ་ཕར་རྩིས་རིག་ཁྲིད་པའི་བྱེད་ཐབས་འགའ་བསླབས། ཁོས་ཐབས་ལམ་འདི་དག་སྤྱད་དེ་བདག་ལ་རྩིས་རིག་ཁྲིད་རྗེས་གྲུབ་འབྲས་ནི་དངོས་གནས་མི་དམན་པ་ཞིག་རེད།
   སྐབས་ཐོག་དེར་སློབ་དཔོན་ཆེན་མོ་ལོ་སུན་པུ་ལོ་མའོ་ཡིས་བདག་གི་ཨ་ཕར་བསམ་འཆར་འདི་ལྟར་བཏོན། ཐོག་མར་བྱིས་པ་རྩིས་རིག་ལ་སྤྲོ་སྣང་སྐྱེ་རུ་འཇུག་དགོས། དཔེར་ན། སྲན་རྡོག་དང་སྒྲོག་གུ་ཤོག་ཐུམ་དུ་བཅུག་སྟེ་ཕ་བུ་གཉིས་ཀྱིས་རེ་རེ་བཞིན་བླངས་ཏེ་སུར་མང་ལ་བལྟ་དགོས། ཡང་ན་རྒུན་འབྲུམ་སོགས་ཤིང་ཏོག་ཟ་དུས་དེ་དག་འབྲུ་གུའི་གྲངས་ལེན་པའམ། ཡང་ན་གཡོག་མོར་རོགས་རམ་བྱས་ཏེ་སྲན་མ་འཐུ་དུས་ཕྱོགས་གཅིག་ནས་འཐུ་བ་དང་ཕྱོགས་གཞན་ནས་རྣམ་པ་མི་འདྲ་བའི་སྲན་མའི་གང་བུ་རེ་རེའི་ནང་སྲན་རིལ་ཅི་ཙམ་ཡོད་མེད་བརྩི་དགོས།
   དེ་མིན་བྱིས་པ་དང་མཉམ་དུ་ཤོ་རྡེའུ་གཡུག་པའི་རྩེད་མོ་རྩེ་ཆོག་སྟེ། ཐོག་མར་ཤོ་རྡེའུ་གཉིས་ཀྱིས་རྩེ་བ་དང། རྩེད་ཐབས་ནི་ཤོ་རྡེའུ་གཉིས་མཉམ་གཅིག་ཏུ་གཡུག་རྒྱུ་དེ་རེད། གལ་ཏེ་གསུམ་དང་བཞི་བྱུང་ཚེ། དེ་གཉིས་བསྡོམས་ན་སྐར་མ་བདུན་ཐོབ་པ་དང། གལ་ཏེ་གཉིས་དང་བཞིའམ། གསུམ་དང་གསུམ་འོང་ན། སྐར་མ་དྲུག་ཐོབ། སྐར་གྲངས་འདི་དག་རེ་རེ་བཞིན་ཤོག་བུར་ཟིན་ཐོར་འགོད་དགོས་ལ་རྩེད་ཐེངས་གསུམ་མམ་ལྔའི་རྗེས་སུ་སྡོམ་རྩིས་བྱས་ཏེ་རྒྱལ་ཕམ་གྱི་དབྱེ་བ་འབྱེད་དགོས།
   དེ་དུས་ང་རང་རྩེད་མོ་འདིའི་རིགས་ལ་ཧ་ཅང་དགའ། སྨྲ་མི་དགོས་པ་ཞིག་ལ། ང་རང་རྩེད་མོ་འདི་འདྲའི་རྩེད་དགའི་ཀློང་ལ་ཞུགས་རྗེས་ཕ་རྒན་གྱིས་སྔར་བཞིན་སློབ་དཔོན་ཆེན་མོ་ལོ་སུན་པུ་ལོ་མའོ་ཡི་བསམ་འཆར་ལྟར་ཐེངས་རེའི་རྩེད་མོ་དེ་སྐར་མ་གཅིག་ལས་བརྒལ་དུ་མི་འཇུག རྒྱུ་མཚན་ནི་རྩིས་རིག་གི་རྩེད་མོ་མཐའ་དག་གིས་ཀླད་ཤུགས་ཆེས་ཆེར་ཟ་བས་རྩེད་ཐེངས་གཅིག་སྐར་མ་གཅིག་ལས་བརྒལ་ན་ངལ་ཞིང་དུབ་ངེས། རྩེད་མོ་འདི་བདུན་ཕྲག་གསུམ་ལྷག་ལ་རྩེས་རྗེས་ང་ཚོས་ཤོ་རྡེའུ་གསུམ་མམ་བཞི། ཆེས་མང་དུས་དྲུག་ཏུ་བསྒྱུར་བ་ཡིན།
དེ་དང་ཆབས་ཅིག་ང་ཚོས་སྲན་རྡོག་དང་། སྒྲོག་གུ་རྣམས་ཚོགས་གཉིས་རུ་གཅིག་ཅན་གྱི་ཁག་གཉིས་སམ་གསུམ་དུ་བགོ་བའམ། ཚོགས་གསུམ་རུ་གཅིག་ཅན་གྱི་ཁག་གསུམ་མམ་བཞི་བཅས་སུ་བགོས་ཏེ་དེ་དག་གོ་རིམ་བཞིན་བསྒྲིགས་ཏེ་ཁག་རེ་རེའི་མང་ཉུང་བརྩིས་ནས་མཇུག་འབྲས་ཤོག་བུའི་སྟེང་བཀོད་ལ། ཕྱིས་སུ་གྲུབ་འབྲས་འདི་དག་སྒྱུར་ཐབས་མན་ངག་ཏུ་བཀོད་དེ་རྩིག་གྱང་སྟེང་བཀལ། འདི་ལྟར་འོང་ཚེ་གཉིས་གཉིས་བཞིའམ་གསུམ་གསུམ་དགུ་ཡི་གནས་ལུགས་བག་ཕེབས་ངང་ཤེས་ཐུབ་པར་མ་ཟད། དགའ་སྤྲོའང་ཧ་ཅང་ཆེ། དེ་ལས་རྙོག་ཟིང་ཆེ་བའི་རྩེད་མོ་འདི་རིགས་བསྒྲེས་ནས་མུ་མཐུད་དེ་རྩེད་ཆོག
   ངས་མ་འོངས་པར་རྩིས་རིག་ཤེས་བྱ་དངོས་ཡོད་འཚོ་བའི་ཁྲོད་བེད་སྤྱོད་གཏོང་ཕྱིར་ཨ་ཕས་དུས་རྒྱུན་ང་དང་ལྷན་དུ་ཚོང་ཁང་ནང་ཉོ་ཚོང་བྱེད་པའི་ཚུལ་གྱི་རྩེད་མོ་རྩེ། བཙོང་དགོས་པའི་ཚོང་ཟོང་རྣམས་རིང་ཐུང་ལྟར་བརྩི་དགོས་ལ་མང་ཉུང་ལྟར་ཡང་བརྩི་དགོས་པར་མ་ཟད། ཚད་གཞི་ལྟར་ཡང་བརྩི་དགོས། རིན་གོང་ནི་དངོས་ཡོད་ཀྱི་རིན་གོང་ཡིན་ལ་དངུལ་ཡང་ཤོག་དངུལ་ངོ་མ་རེད། ཁོང་དང་ཨ་མ་གཉིས་དུས་རྟག་ཏུ་ངས་ཕྱེས་པའི་ཚོང་ཁང་དུ་འོང་སྟེ་དངོས་ཟོག་འདྲ་མིན་ཉོ་བ་དང། དངུལ་ལོ་གཏོང་སྤྲོད་བྱེད། ངས་ཀྱང་རིན་གོང་ལྟར་རྩིས་བརྒྱབ་སྟེ་ཁོ་ཚོར་དངུལ་སིལ་མའང་སློག་གིན་ཡོད།
   ཨ་ཕས་འདི་ལྟར་སློབ་དཔོན་ཆེན་མོ་ལོ་སུན་པུ་ལོ་མའོ་ཡི་ཐབས་ལམ་གྱིས་བདག་ལ་བསླབས་ཏེ་ཅང་མ་འགོར་བར་ང་རང་རྩིས་རིག་ལ་སྤྲོ་སྣང་ཟབ་མོ་ཞིག་འཕེལ་བྱུང། ང་རང་རྩིས་རིག་ལ་སྤྲོ་སྣང་འཕེལ་ཟིན་པའི་རྐྱེན་གྱིས་ཕྱིས་ཀྱི་རྩིས་རིག་སློབ་སྦྱོང་དེ་ཆུ་བོའི་འགྲོས་དང་འདྲ་བར་ཚབ་རྩིས་དང་དབྱིབས་རྩིས་གཉིས་ཐོག་མཐའ་གཉིས་ལ་ཐོགས་རྡུགས་མེད་པར་བསླབས། ཕྱིས་སུ་ང་རང་ལ་སྤྲོ་སྣང་ལྡན་པས་མི་ཚད། ཐ་ན་རྩིས་རིག་རིག་ཚན་འདིར་སེམས་གཏིང་ནས་སྤྲོ་སྣང་བྱུང།

རྩོམ་ཡིག་འདི་ནི་<<ཁ་ཨར་ཝ་ཐིའི་སློབ་གསོ>>་ཞེས་པའི་རྒྱ་འགྱུར་མའི་དེབ་ལས་བདམས་ཏེ་བསྒྱུར།

 གཅན་མུ་ཏིག་ནི་བོད་ཀྱི་དཔེ་མཛོད་ཁང་གི་ལས་བྱེད་ཡིན།

ཨ་ཕས་གནང་བའི་སློབ་སྦྱོང་གི་ཐབས་ལམ། ༢

༣། སྐད་རིགས་མི་འདྲ་བའི་ལམ་ནས་སྒྲུང་གཅིག་ཀློག་པ།

མི་རྣམས་ལ་འདི་ལྟ་བུའི་གོམས་གཤིས་ཤིག་མཆིས་ཏེ་ཀློག་ཟིན་པའི་སྒྲུང་གཏམ་དེར་བསྐྱར་ལྟ་བྱ་མི་འདོད་པ་དེ་རེད། འོན་ཀྱང་བདག་ནི་གཅིག་མཐུན་དུ་གྱུར་བའི་སྒྲུང་གཏམ་དེར་ཡང་ནས་བསྐྱར་དུ་ཉན་རྒྱུར་དགའ། དེ་དུས་ཨ་ཕས་བདག་གི་ཁྱད་ཆོས་འདི་དམ་དུ་བཟུང་ནས་ང་ལ་གཞན་སྐད་ཁྲིད་དུས་སྐད་ཡིག་མི་འདྲ་བའི་ལམ་ནས་སྒྲུང་གཅིག་ཀློག་ཏུ་བཅུག དཔེར་ན་ཨན་ཊི་སིན་གྱི་བྱིས་སྒྲུང་ཀློག་དུས་ཐོག་མར་འཇར་མན་དང། དེ་ནས་ཧྥ་རན་སི། ཨི་ཊ་ལི། ལ་ཊིན། དབྱིན་ཇི། གྷི་རིགས་བཅས་སྐད་རིགས་རྣམས་གོ་རིམ་བཞིན་ཀློག་ཏུ་བཅུག ཐབས་ལམ་འདི་ནི་དངོས་ནས་ཕན་འབྲས་ཅན་ཞིག་སྟེ་ང་རང་སྐད་རིགས་འདྲ་མིན་ལ་བྱང་ཆུབ་པར་མ་ཟད། སློབ་སྦྱོང་ཡང་སྟབས་བདེ་ལ་ལྷོད་བག་ལྡན་པ་ཞིག་རེད།

༤། ཚིག་གི་འཕེལ་རིམ་གསལ་བོར་རྟོགས་དགོས།

གཞན་སྐད་ལེགས་པོ་སློབ་པར་ཚིག་གི་འཕེལ་རིམ་ཤེས་པ་ནི་དགེ་མཚན་ལྡན་པ་ཞིག་རེད། འདི་ལྟར་བྱས་ཚེ་མདའ་མོ་གཅིག་གིས་བྱ་གསུམ་གསོད་དགོས་པར་མ་ཟད། ད་དུང་ཕན་ཚུན་རིགས་འགྲེ་ཡང་བྱ་ཐུབ། དེའི་ཕྱིར་ཨ་ཕས་ང་རང་ལ་ཆུང་དུས་ནས་འདི་ལྟར་བསྒྲུབ་ཏུ་འཇུག་པ་ལས་གཞན་ཟིན་ཐོ་ཡང་མི་ཉུང་བ་ཞིག་བཟོས་ཡོད། དཔེར་ན་ལ་ཊིན་གྱི་ཚིག་གསར་ཞིག་བདག་གི་ཡིད་ལ་བརྟན་པོར་འཛིན་པའི་ཕྱིར་དུས་རྟག་ཏུ་ཚིག་འདི་ལས་འཕེལ་བའི་དེང་དུས་ཀྱི་མིང་ཚིག་རྣམས་བཙལ་ཏེ་མཇུག་འབྲས་དེ་འབྲི་དེབ་སྟེང་ཟིན་ཐོར་འགོད་དུ་བཅུག འདི་ལྟར་ལ་ཊིན་གྱི་ཚིག་གསར་བློ་རུ་བཅུག་པར་མ་ཟད། འདི་ལས་འཕེལ་བའི་དེང་རབས་ཀྱི་ཚིག་གསར་རྣམས་ཀྱང་སེམས་ལ་ངེས་སུ་བཅུག སྐད་ཡིག་འཕེལ་འགྱུར་གྱི་སྒྲིག་སྲོལ་ལའང་དྲང་ཐད་ཀྱི་ངེས་ཤེས་ཤིག་སྐྱེས་སུ་བཅུག་པས་མདའ་གཅིག་ལ་བྱ་གཉིས་རེད་ཅེས་བརྗོད་ཆོག

༥། རྩེད་མོའི་ལམ་ནས་སློབ་སྦྱོང་བྱེད་ཐབས་བཀོལ་བ།

ངས་འདིར་བསྐྱར་དུ་ཕ་མ་རྣམས་ལ་གསལ་འདེབས་བྱ་རྒྱུ་ཞིག་ལ་བྱིས་པའི་སྐད་ཡིག་སློབ་པའི་ནུས་པ་དེ་དཔོག་དཀའ་བ་ཞིག་ཡིན་ལ་གལ་གནད་ཆེ་ས་ནི་ཆེས་བྱེད་ནུས་ལྡན་པའི་སློབ་གསོའི་ཐབས་ལམ་སྤྱོད་མིན་ལ་རག་ལས་ཡོད། བདག་གི་བསམ་པར་ཆེས་བྱེད་ནུས་ཅན་གྱི་ཐབས་ལམ་ནི་སློབ་སྦྱོང་གི་གོ་རིམ་ཁྲོད་བྱིས་པ་དང་མཉམ་དུ་རྩེད་མོ་འདྲ་མིན་རྩེ་རྒྱུ་དེ་རེད་སྙམ་ལ་འདི་ནི་ང་ལ་ཨ་ཕས་བསླབས་པའི་ཐབས་རེད།
ངས་དབྱིན་སྐད་ཤེས་མ་ཐག་པའི་སྐབས་སུ་ཁོས་ཞོགས་པ་བདེ་ལེགས་ཞེས་པ་འདི་སྐད་རིགས་བཅུ་གསུམ་གྱི་ལམ་ནས་བདག་ལ་ཁྲིད་ཅིང་དེ་དག་མགྱོགས་མྱུར་ངང་བློ་ངོར་བཅུག་པར་མ་ཟད། སློབ་སྦྱོང་གི་ཐབས་ལམ་ཡང་སྤྲོ་སྣང་ཅན་ཞིག་རེད། ནངས་རེའི་བཞིན་ཡར་ལངས་ཚེ་ཨ་ཕས་བདག་ལ་རྒྱལ་ཁབ་བཅུ་གསུམ་མཚོན་བྱེད་ཀྱི་རྩེད་ཆས་བཅུ་གསུམ་ལ་རྒྱལ་ཁབ་རེ་རེའི་སྐད་ཐོག་ནས་འཚམས་འདྲི་བྱེད་དུ་བཅུག བྱིས་པ་རྩེ་ལ་དགའ་ཞིང་འགུལ་ལ་སྤྲོ་བའི་ཁྱད་ཆོས་གཞིར་བྱས་ཏེ་ཁོས་སྐད་རིགས་འདྲ་མིན་སྤྱད་དེ་བདག་དང་རྩེད་མོ་རྩེ། དཔེར་ན་སྒྲུང་བཤད་པ། གཏམ་དང་ཁེད་བཤད་པ། ཚིག་གྲོགས་བསྒྲིགས་ཏེ་ཚིག་གྲུབ་བཟོ་བ། རྣམ་འགྱུར་སྟོན་བཞིན་ཁ་དཔེ་བཤད་པ། སྒྲུང་བཟོ་བ་སོགས་ཀྱི་འགྲན་སྡུར་བྱེད། འདི་ལྟ་བུའི་གསོན་ཉམས་ལྡན་ཞིང་སྤྲོ་སྣང་ལྡན་པའི་སློབ་སྦྱོང་གིས་ངའི་གཞན་སྐད་ཀྱི་འཕེལ་རྒྱས་ཡར་ངོའི་ཟླ་ལྟར་འཕེལ་དུ་བཅུག

གཉིས། ཉིན་རེར་ཆུ་ཚོད་གཉིས་རིང་སློབ་སྦྱོང་བྱེད་པ་རྒྱུན་འཁྱོངས་བྱེད་དགོས།

  ཐེངས་ཤིག་ངས་ཁང་བའི་ནང་ནས་འཆར་གཞི་ལྟར་སློབ་སྦྱོང་བྱེད་བཞིན་པའི་སྐབས། ཨ་ཕའི་གྲོགས་པོ་སྐུ་ཞབས་ཧེ་ཏིག་ལི་ཆི་ཁུ་ཨིན་འབྱོར་སོང། ཁོང་ནི་སློབ་གསོ་མཁས་ཅན་ཞིག་ཡིན་ལ་སྔོན་ཆད་སློབ་འབྲིང་གི་སློབ་གཙོའི་འགན་ཁུར་ཞིང་ད་ལྟ་པོ་ལིན་བྱིས་པའི་སློབ་གསོ་མཐུན་ཚོགས་ཀྱི་འགན་འཛིན་ཡིན་པ་དང། ཁོང་ནི་ཤེས་ཡོན་དང་སློབ་གསོའི་ཐད་ནས་ཕུན་སུམ་ཚོགས་པའི་ཉམས་མྱོང་ཅན་ཞིག་རེད། ཁོས་ངས་སློབ་སྦྱོང་བྱེད་ཀྱིན་པ་ཐོས་རྗེས་ཨ་ཕ་དང་མཉམ་དུ་སློབ་གསོའི་གནད་དོན་སྐོར་གླེང་མགོ་ཚུགས།
སྐུ་ཞབས་ཁུ་ཨིན་གྱིས་“ ཝི་ཋེ་ལགས། ཐེངས་འདིར་ང་གཙོ་བོ་ཁྱོད་ཀྱི་ཕྲུ་གུར་བལྟ་རུ་ཡོང་བ་ཡིན། གོ་ཐོས་ལ་ཁོ་ནི་བསམ་བརྗོད་ལས་འདས་པའི་བྱིས་པ་རིག་རྒོད་ཅིག་རེད་ཟེར” ཨ་ཕས་“ཁུ་ཨིན་ལགས། འུ་གཉིས་ནི་ཡུན་རིང་གི་གྲོགས་པོ་རེད། དོན་དམ་པས་བཤད་ཚེ་ཁྱོད་དངོས་ནས་ལྷན་སྐྱེས་ཀྱི་བློ་རིག་རྣོ་བའི་བྱིས་པ་ཁྱད་པར་ཅན་ཡོད་པར་ཡིད་ཆེས་ཡོད་དམ་” ཞེས་བརྗོད། དེ་ནས་ཁུ་ཨིན་གྱིས་ “ངོ་མ་བཤད་ན་ང་ཡང་ཁྱོད་ཀྱི་ལྟ་ཚུལ་དེར་མོས་མཐུན་ཡོད་དེ།  མིའི་ལྷན་སྐྱེས་ཀྱི་ནུས་པ་དེ་མིས་གསོ་སྐྱོང་བྱས་ཏེ་བྱུང་བ་རེད། མི་ཚང་མས་ཁ་ཨར་ཁྱད་དུ་འཕགས་པ་ཞིག་ཏུ་བརྩིས་པས་ངས་ཀྱང་ཁོ་ཚོ་ལྟར་བོས་པ་ཡིན།”ཞེས་བཤད། “ཁ་ཨར་ལ་གཞན་དང་མི་མཚུངས་པའི་འོས་འཚམ་གྱི་སློབ་གསོ་ཞིག་ཐོབ་པ་མ་གཏོགས་ཁྱད་འཕགས་ཀྱི་བྱིས་པ་ཞིག་དངོས་ནས་མ་རེད་”ཅེས་ཨ་ཕས་སྨྲས་བྱུང། ཁུ་ཨིན་གྱིས་“ཁ་ཨར་གྱིས་དེ་འདྲའི་ཡོན་ཏན་མང་པོ་ཞིག་བློ་རུ་བཅུག་པས་ཁོས་རྒྱུན་པར་སློབ་སྦྱོང་ལ་ཧུར་ཐག་བྱེད་ཀྱིན་ཡོད་དམ་”ཞེས་དྲིས་པས་ཨ་ཕས་“རེད་ལགས། ཁོས་འབད་བརྩོན་ཤིན་ཏུ་ཆེན་པོ་བྱེད་”ཅེས་བརྗོད།
ཁུ་ཨིན་གྱིས་“བདག་ལ་སློབ་ཕྲུག་ལེགས་པོ་འགའ་མཆིས་ལ་འབད་བརྩོན་ཡང་ཤིན་ཏུ་ཆེ། ཁོ་ཚོའི་ཉིན་རེའི་སློབ་སྦྱོང་གི་དུས་ཡུན་དེ་ཆུ་ཚོད་དྲུག་ནས་བདུན་ཡིན་པས་དངོས་ནས་ཡི་རང་བྱ་འོས་པ་ཞིག་རེད། གནམ་འོག་གི་བྱིས་པ་མཐའ་དག་གིས་ལས་དོན་ལེགས་པོར་བསྒྲུབ་དགོས་ཚེ་དཀའ་སྤྱད་བརྩོན་འགྲུས་དང་འབྲལ་ཐབས་མེད་པ་ཞིག་མ་རེད་དམ་”ཞེས་བརྗོད། ཨ་ཕས་མི་འདོད་པའི་རྣམ་འགྱུར་གྱིས་“ཕལ་ཆེར་ཡིན་རྒྱུ་རེད་”ཅེས་ལན་བཏབ། ཁུ་ཨིན་གྱིས་ཨ་ཕའི་གདོང་གི་རྒྱུན་ལྡན་མིན་པའི་རྣམ་འགྱུར་དེ་མཐོང་བས། “འོ་ན། ཁྱོད་ཀྱི་བྱིས་པས་ཆུ་ ཚོད་ཅི་ཙམ་ལ་སློབ་སྦྱོང་བྱེད་ཀྱིན་ཡོད་དམ་”ཞེས་དྲིས། ཨ་ཕས་“སྤྱིར་ཆུ་ཚོད་གཉིས། ཆེས་རིང་ཡང་ཆུ་ཚོད་གསུམ་ལས་བརྒལ་གྱིན་མེད་”ཅེས་སྦ་གསང་མེད་པར་བཤད། དེ་ནས་སྐུ་ཞབས་ཁུ་ཨིན་ཤིན་ཏུ་ཡ་མཚན་པའི་ངང་“ཅི་ཟེར། ཆུ་ཚོད་གསུམ་ལས་བརྒལ་གྱི་མེད། ཁོས་ལོ་རྒྱུས་དང་ས་རྒྱུས། སྐྱེ་དངོས། རྩིས་རིག་བཅས་ཚང་མ་དེ་འདྲའི་གཏིང་ཟབ་ཅིག་བསླབས་པར་མ་ཟད། ད་དུང་སྐད་རིགས་མི་འདྲ་བ་དྲུག་ཤེས་ཐུབ་བམ། ཉིན་རེར་ཆུ་ཚོད་གསུམ་ཁོ་ནར་སློབ་སྦྱོང་བྱེད་དུས། ཁོར་ཆུ་ཚོད་ཀྱིས་འདང་གི་རེད་དམ་”ཞེས་དྲིས། སྐབས་འདིར་ཨ་ཕ་ངའི་དཔེ་ཁང་མདུན་དུ་འོང་སྟེ་སྒོ་ཕྱེས་ནས་བདག་ལ་“ཁ་ཨར། སློབ་སྦྱོང་གི་དུས་ཚོད་གསུམ་པོ་ཚང་སོང། ངལ་གསོ་བྱ་རན་སོང་”ཞེས་གསུངས་བྱུང།
   ངས་ཁང་བའི་སྦུག་ནས་“ཨ་ཕ། ད་དུང་སྐར་མ་ལྔ་འདུག ཏོག་ཙམ་གྱི་རྗེས་ནས་ངལ་གསོ་བྱ་རྒྱུ་ཡིན”་ཞེས་བཤད། ཏག་ཏག་སྐར་མ་ལྔའི་རྗེས་སུ་ང་རང་དཔེ་མཛོད་ལས་ཕྱིར་ཐོན་ཏེ་སྐུ་ཞབས་ཁུ་ཨིན་ལ་འཚམས་འདྲི་བྱས་པ་ཡིན། སྐུ་ཞབས་ཁུ་ཨིན་གྱིས་ང་མཐོང་མ་ཐག་ངའི་ལག་ཟུང་ལ་འཐམ་སྟེ་“ཁ་ཨར། ཁྱོད་ཀྱི་ཉིན་རེའི་སློབ་སྦྱོང་གི་དུས་ཡུན་དེ་དངོས་ནས་ཆུ་ཚོད་གསུམ་ལས་བརྒལ་མེད་དམ་”ཞེས་དྲིས་བྱུང། ངས་ཁོང་ལ་“ནམ་རྒྱུན་ཆུ་ཚོད་གཉིས་རེད། དེ་རིང་ཆུ་ཚོད་གཅིག་གིས་ཇེ་མང་དུ་ཕྱིན་པས་ཆུ་ཚོད་གསུམ་ཏག་ཏག་རེད་”ཅེས་བརྗོད་པ་ཡིན། སྐུ་ཞབས་ཁུ་ཨིན་གྱིས་“ཁྱོད་ཀྱིས་ད་དུང་དུས་ཡུན་རིང་ཙམ་ལ་སློབ་སྦྱོང་བྱ་མི་ཐུབ་བམ་”ཞེས་དྲིས་བྱུང། ངས་ང་རང་གིས་“ད་དུང་སློབ་སྦྱོང་བྱ་ཐུབ་མོད། ཨ་ཕས་དེ་ལྟར་བྱེད་དུ་བཅུག་མེད་”ཅེས་སྨྲས། དེ་ནས་སྐུ་ཞབས་ཁུ་ཨིན་ཨ་ཕའི་ཕྱོགས་སུ་འཁོར་ཏེ་“བྱིས་པར་དེ་ལས་ཀྱང་སྦྱོང་འདོད་ཀྱི་མོས་པ་ཡོད་ན། དོན་དག་ཡག་པོ་ཞིག་རེད། ཁྱོད་ཀྱིས་ཅིའི་ཕྱིར་ཁོ་ལ་དེ་ལྟར་བྱེད་དུ་བཅུག་མེད་”ཅེས་དྲིས། ཨ་ཕས་“དུས་ཚོད་གཉིས་ཀྱི་སློབ་སྦྱོང་ནི་ཁ་ཨར་ལྟ་བུའི་ཕྲུ་གུའི་ན་ཚོད་ལ་བལྟས་ནས་བཤད་ན་འདང་ངེས་རེད་ལ། དེ་ལས་ཀྱང་མང་པོའི་བྱ་དངོས་རྣམས་ལ་ཁོ་རང་ཉིད་སློབ་སྦྱོང་བྱ་བར་འགྲོ་འོས། དཔེ་ཆར་དགའ་ཞིང་བརྩོན་པ་ཆེ་བ་ནི་ལེགས་པའི་དོན་ཞིག་ཡིན་ཡང། ཉིན་ཧྲིལ་པོར་དཔེ་མཛོད་དུ་འཇུག་དགོས་དོན་མེད།” ཅེས་བརྗོད་བྱུང། སྐུ་ཞབས་ཁུ་ཨིན་ཡ་མཚན་པའི་ངང་ཨ་ཕར་ལྟ་བཞིན་“ངར་བ་རེད། ངར་བ་རེད་”ཅེས་བརྗོད་བྱུང། ངས་ཨ་ཕར་ད་དུང་སྐུ་ཞབས་ཁུ་ཨིན་དང་ལྷན་དུ་སློབ་གསོ་དང་འབྲེལ་བའི་གནད་དོན་འགར་གླེང་མོལ་བྱ་དགོས་པ་རྟོགས་པས་གྲོགས་པོ་ཆུང་ཆུང་བཙལ་ནས་རྩེད་མོ་རྩེ་རུ་ཕྱིན་པ་ཡིན།
   ནུབ་ཟས་ཀྱི་སྔོན་ལ་ང་རང་ཁྱིམ་དུ་ལོག་པ་དང། སྐུ་ཞབས་ཁུ་ཨིན་གྱིས་ང་རང་རྐུབ་སྟེགས་ལས་ཡར་ལངས་པ་མཐོང་སྟེ་ངའི་ལག་པ་ནས་བཟུང་སྟེ་“དངོས་ནས་བྱིས་པ་ཡག་པོ་ཞིག་རེད། བདག་གི་རྗེས་ཕྱོགས་ཀྱི་སློབ་གསོ་ཁྲོད་དུའང་ཐབས་ལམ་འདི་ངེས་པར་དུ་ལག་བསྟར་བྱ་རྒྱུ་ཡིན་ལ། འདི་ལྟ་བུའི་ཕུལ་བྱུང་གི་ཐབས་ལམ་འདི་ངས་ཕ་མ་གཞན་རྣམས་ལའང་ངོ་སྤྲོད་བྱ་རྒྱུ་ཡིན་”ཞེས་བདག་ལ་བསྟོད་བསྔགས་མཛད།
སྐུ་ཞབས་ཁུ་ཨིན་གྱི་བསམ་བློའི་ངོས་ཐད་ནས་བལྟས་ཚེ། ཁོས་ཨ་ཕའི་ལྟ་བ་ངོས་ལེན་བྱས་ཟིན་པ་ཤེས་སོང། ཁོ་རང་ཕྱིན་རྗེས་ངས་ཨ་ཕར་“ཁྱོད་ཀྱིས་ཇི་ལྟར་སྐུ་ཞབས་ཁུ་ཨིན་ལ་ཁྱོད་ཀྱི་ཐབས་ལམ་དེ་དང་ལེན་བྱེད་དུ་བཅུག་པ་ཡིན་ནམ་”ཞེས་དྲིས། ཨ་ཕས་“སྐུ་ཞབས་ཁུ་ཨིན་ནི་རྣམ་རིག་རྒོད་ལ་ཤེས་ཡོན་ལྡན་པའི་སློབ་གསོ་མཁས་ཅན་ཞིག་ཡིན་པར་མ་ཟད། ཁོ་ནི་ད་དུང་གནས་ལུགས་རྟོགས་པའི་མི་ཞིག་རེད། གལ་ཏེ་སློབ་གསོའི་ཐབས་ལམ་ལེགས་པོ་ཡིན་ན། ཁོས་མགྱོགས་མྱུར་ངང་དང་ལེན་ལོས་བྱེད་”ཅེས་གསུངས་བྱུང།
   ད་ལྟ་ང་རང་ལོ་ན་སུམ་ཅུ་ལ་སོན་པར་མ་ཟད། རང་ཉིད་ལ་བུ་ཕྲུག་ཀྱང་ཡོད། འོན་ཏེ་མི་མང་བོ་ཞིག་གིས་ད་དུང་ངའི་ཆུང་དུས་ཀྱི་སློབ་སྦྱོང་གི་གནས་ཚུལ་དང། ཉིན་རེའི་སློབ་སྦྱོང་བྱེད་པའི་ཆུ་ཚོད་བཀོད་སྒྲིག་གི་སྐོར་འདྲི། ངས་རྒྱུན་དུ་ཁོ་ཚོ་ལ་ཉིན་རེར་ཆུ་ཚོད་གཉིས་ལ་སློབ་སྦྱོང་བྱེད་པའི་ཐབས་ལམ་དེ་བཤད་པ་ཡིན།
ཨ་ཕའི་བསམ་པར་ལོ་ན་ཕྲ་བའི་བྱིས་པར་མཚོན་ན་ཆུ་ཚོད་གཉིས་ནི་ཆེས་རིང་བའི་དུས་ཡུན་ཞིག་རེད། ན་ཆུང་བྱིས་པའི་རྣམ་རིག་དེ་ཆུ་ཚོད་གཉིས་ཁོ་ནར་མ་གཏོགས་སྒྲིམ་མི་ཐུབ། དེ་བས་ཆུ་ཚོད་གཉིས་ལས་བརྒལ་བའི་སློབ་སྦྱོང་ནི་ཆུ་ཚོད་སྟོང་ཟད་དུ་བཏང་བ་རེད། འོན་ཀྱང་དེང་སང་བྱིས་པའི་སློབ་གསོ་སྒྲུབ་བཞིན་པའི་མི་མི་ཉུང་བ་ཞིག་གིས་སྐྱེས་སྟོབས་ཀྱི་ཤེས་རབ་ཅན་གྱི་བྱིས་པ་གཉོར་བའི་ཐབས་ལམ་ནི་བྱིས་པའི་སློབ་སྦྱོང་གི་དུས་ཡུན་ཚོད་མེད་དུ་བསྒྱངས་པའམ། སློབ་སྦྱོང་གི་དུས་ཡུན་ཇི་ལྟར་རིང་ན་དེ་ལྟར་བཟང་བའི་ནོར་འཁྲུལ་གྱི་ལྟ་ཚུལ་འཛིན།
  བརྗོད་མ་དགོས་པ་ཞིག་ལ། ན་ཚོད་ཅུང་ཆེ་བའི་བྱིས་པ་དང་དར་མ་རྣམས་ལ་མཚོན་ན་ཁོང་ཚོའི་རང་གཅུན་གྱི་ནུས་པ་ཅུང་རྒོད་པས་རྣམ་རིག་སྒྲིམ་པའི་དུས་ཡུན་དེ་ན་ཆུང་བྱིས་པ་ལས་ཅུང་རིང་ཕྱིན་ཡུན་རིང་གི་སློབ་སྦྱོང་ལ་གྲུབ་འབྲས་མི་དམན་པ་རེ་འབྱུང་སྲིད། འོན་ཀྱང་འདི་ནི་བྱིས་པ་རྣམས་ལ་གཏན་ནས་མི་འཚམས།
ཕན་འབྲས་དམན་པའི་སློབ་སྦྱོང་གི་ཐབས་ལམ་སྤྱོད་པ་ནི་ཆུ་ཚོད་ཟད་གྲོན་ཞིག་སྟེ། གལ་ཏེ་ཆུ་ཚོད་གང་ལེགས་ངང་སྤྱོད་མ་ཐུབ་ཚེ། ཚུ་ཚོད་དེ་ལས་མང་བོ་སྤྱད་དེ་སློབ་སྦྱོང་བྱས་རུང་ངལ་བ་འབྲས་མེད་རེད། མདོར་ན་ཕན་འབྲས་ཨང་དང་བོ་དང། ཆུ་ཚོད་ཨང་གཉིས་པ་སྟེ་གལ་ཏེ་ཆུ་ཚོད་གང་ལེགས་ངང་སྤྱོད་ཐུབ་ཚེ། སློབ་སྦྱོང་དང་བྱ་བ་གང་ཡིན་རུང་ཆུ་ཚོད་ཉུང་ངུའི་ནང་འབྲས་བུ་ལྗིད་ཏིག་ཏིག་ཅིག་ལེན་ཐུབ།
  འཚོ་བའི་ཁྲོད་ང་ཚོས་ཀྱང་རྟག་ཏུ་འདི་ལྟ་བུའི་གནས་ཚུལ་མཐོང་ཐུབ། བྱིས་པ་ལ་ལ་ཞིག་ཡ་རབས་ཚུལ་མཐུན་ངང་སྒྲོག་ཙེ་མདུན་དུ་ལངས་ནའང་ཁོ་ཚོའི་ཀླད་པ་དེ་གཏན་ནས་འཁོར་སྐྱོད་མི་བྱེད་པར་ཧད་ནས་བསྡད་པས་བསམ་བློའི་འདུ་ཤེས་དེ་དཔེ་ཆ་དང་ཁ་ཐག་རིང། འདི་ལྟ་བུའི་སློབ་སྦྱོང་ལ་གྲུབ་འབྲས་ཅི་འདྲ་ཞིག་མཆིས་སམ། འདི་ནི་ཆུ་ཚོད་སྟོང་ཟད་ཁོ་ན་རེད། དོན་དངོས་སུ་དགའ་སྤྲོ་ལྡན་པའི་བྱིས་པ་རིག་རྒོད་འབྱུང་བ་ཤིན་ཏུ་སླ་མོ་རེད། གལ་ཏེ་སློབ་སྦྱོང་གི་སྐབས་སུ་ཆུ་ཚོད་འཐུས་ཤོར་སྤུ་ཉག་ཙམ་ཡང་མེད་པར་གང་ལེགས་ཀྱིས་བེད་སྤྱོད། སློབ་སྦྱོང་བྱ་རན་དུས་བློ་སེམས་གཅིག་སྒྲིལ་ངང་འབད་འབུངས་དང་། རྩེད་འཇོར་རོལ་དུས་ས་ལྡིང་གནམ་ལྡིང་བྱེད་བཞིན་རྩེད་མོ་རྩེ་དགོས། གལ་ཏེ་བྱིས་པ་ཡོད་དོ་ཅོག་གིས་འདི་ལྟར་སྒྲུབ་ཚེ་གོ་ལའི་སྟེང་བྱིས་པ་རིག་རྒོད་མང་བོ་འབྱུང་བ་གདོན་མི་ཟ།

ཨ་ཕས་གནང་བའི་སློབ་སྦྱོང་གི་ཐབས་ལམ། ༡

Karl Witte

ཁ་ཨར་ཝི་ཋེ། 

 སྒྱུར་བ་བོ།  གཅན་མུ་ཏིག

གཅིག། ཨ་ཕས་བདག་ལ་གཞན་གྱི་སྐད་ཡིག་ཁྲིད།

བདག་གིས་སྐད་ངོ་ཡིག་ངོ་ཆོད་པའི་སློབ་གསོ་ལ་གྲུབ་འབྲས་ལེགས་པོ་ཐོབ་པས་ཨ་ཕའི་བློ་ཁ་གང་བར་གྱུར། འོན་ཀྱང་། ཁོང་དེ་ལ་ཡིད་ཚིམས་ནས་མ་བསྡད་པར་བདག་ལ་སྔ་མོ་ནས་རང་གི་སྐད་ཡིག་ལ་ཐོགས་རྡུགས་མེད་པ། ད་དུང་གང་ནུས་ཅི་ལྕོགས་ཀྱིས་གཞན་གྱི་སྐད་ཡིག་གཙོ་བོ་རྣམས་ལ་རྨང་གཞི་བརྟན་པོ་འཛུགས་པའི་ཕུགས་ཀྱི་ཐབས་བཀོད་བཤམས། ཁོང་གི་ཐུགས་ལ་བྱིས་པར་སྐད་རིགས་མང་བོ་ཁྲིད་པ་དེས་བྱིས་པས་ཡང་དག་པའི་ཚིག་དོན་ལ་གོ་བ་ལེན་པ་དང་བསམ་གཞིགས་བྱ་བར་ཕན་ཐོགས་པར་དགོངས། དེའི་ཕྱིར་ཁོང་གིས་སྔོན་སླ་རྗེས་དཀའ་ཡི་རྩ་དོན་དམ་དུ་བཟུང་ནས་ཕ་སྐད་ཀློག་འདོན་ཐོགས་མེད་དུ་གྱུར་པའི་རྨང་གཞིའི་སྟེང་གཞན་གྱི་སྐད་ཡིག་ཀྱང་སློབ་ཏུ་བཅུག  བདག་ལོ་ན་བཅུ་དྲུག་གི་སྐབས་སུ་འཇར་མན་གྱི་སྐད་ཡིག་ལ་ཐོགས་རྡུགས་མེད་པར་གྱུར། ཨ་ཕས་དེ་མ་ཐག་ང་ལ་ཧྥ་རན་སིའི་སྐད་ཡིག་ཁྲིད་མགོ་ཚུགས། འོས་འཚམ་གྱི་ཐབས་ལམ་སྤྱད་པས་ལོ་ངོ་གཅིག་གི་ནང་ཧྥ་རན་སིའི་སྐད་ཡིག་ཀློག་འདོན་ལ་ཐོགས་རྡུགས་མེད་པར་གྱུར། བདག་གི་སློབ་སྦྱོང་བྱ་འཕུར་བ་ལྟར་མགྱོགས་པ་ནི་ཐོག་མའི་ཕུན་སུམ་ཚོགས་པའི་འཇར་མན་གྱི་ཤེས་བྱ་དང་འབྲེལ་བ་ཡོད་པ་སྨོས་ཅི་དགོས།
ཧྥ་རན་སིའི་སྐད་ཡིག་སྦྱངས་ཚར་རྗེས་ངས་སླར་ཡང་མགྱོགས་མྱུར་ངང་ཨི་ཊ་ལིའི་སྐད་ཡིག་སློབ་པའི་མགོ་བཙུགས་ཤིང་ཟླ་དྲུག་ལས་མ་འགོར་བར་བྱང་ཆུབ། འདིའི་སྐབས་སུ་ཨ་ཕས་བདག་ལ་ལ་ཊིན་གྱི་སྐད་ཡིག་ཁྲིད་ན་འོས་འཚམ་ཡིན་པར་དགོངས་ཀྱི་ཡོད།
སྤྱིར་སློབ་གྲྭའི་ནང་གཞན་གྱི་སྐད་ཡིག་སློབ་ཚེ་ཐོག་མར་ངེས་པར་དུ་ལ་ཊིན་གྱི་སྐད་སློབ་དགོས་པ་གཏན་འབེབས་ཡིན། འོན་ཀྱང། བདག་གི་བསམ་པར་འདི་ལྟར་བསྒྲུབས་པ་ནི་ཐལ་དྲགས་པའི་ཨུ་ཚུགས་རེད། འཇར་མན་གྱི་སྐད་དང་ཆེས་ཉེ་བའི་ཧྥ་རན་སིའི་སྐད་ཡིག་ནས་མགོ་བརྩམས་ཚེ་དེ་ནི་ད་གཟོད་རིགས་ལམ་དང་མཐུན་པ་ཞིག་རེད། དེ་བས་སྔོན་སླ་རྗེས་དཀའ་ཡི་གོ་རིམ་ཡང་མ་འཕྱུགས་པར་བསྒྲུབས་ཡོད། ལ་ཊིན་གྱི་སྐད་ཡིག་སློབ་པ་ནི་ལོ་ན་བཅུ་ཙམ་གྱི་བྱིས་པར་མཚོན་ནའང་དཀའ་ཁག་ཆེན་པོ་ཡིན་པས་དེ་ལ་མགོ་ན་བའི་སྐད་ཡིག་ཅེས་ངོས་འཛིན་བྱེད། དེ་བས་ཨ་ཕས་གྲ་སྒྲིག་འདང་ངེས་ཤིག་བྱས་རྗེས་བདག་ལ་ལ་ཊིན་གྱི་སྐད་ཡིག་འཁྲིད་མགོ་བཙུགས། བདག་གི་སྤྲོ་སེམས་མཐོར་འདེགས་བྱ་ཆེད་ལ་ཊིན་གྱི་སྐད་ཡིག་མ་འཁྲིད་སྔོན་ལ་ཁོས་ཝེ་ཅཱིས་ཨེར་གྱི་ཨན་ལཱི་ཅི་སི་ཡིའི་སྒྲུང་གི་རྣམ་པ། ཁྱད་དུ་འཕགས་པའི་བསམ་བློ། སྙན་འཇེབས་ཀྱི་ཚིག་སྦྱོར་སོགས་བཤད་དེ་ཉན་དུ་བཅུག དེ་མིན་ད་དུང་ང་ལ་གལ་ཏེ་ཁྱོད་རང་ཕུལ་བྱུང་གི་མཁས་པ་ཞིག་ཏུ་འགྱུར་འདོད་ན་ལ་ཊིན་གྱི་སྐད་ཡིག་ངེས་པར་དུ་ལེགས་པོ་ཞིག་ཤེས་དགོས་པར་གདམས་པས་བདག་གི་སྤྲོ་སེམས་ཀྱི་མེ་ལྕེ་དྲག་ཏུ་འབར།
   བདག་གི་ཨ་ཕས་སློབ་གསོའི་མ་ལག་ཁྲོད་རོལ་དབྱངས་ནི་མི་རྣམས་ཀྱི་རིག་སྒོ་འབྱེད་པའི་ལྡེ་མིག་ལྟ་བུ་ཞིག་ཏུ་བརྩིས་པས་ང་རང་ལོ་ན་བདུན་ལ་སོན་དུས་ཁོས་རྟག་ཏུ་ང་ཁྲིད་དེ་ལཱེ་ཕེ་ཚི་རོལ་དབྱངས་སྤྲོ་ཚོགས་སུ་ཞུགས་བཞིན་ཡོད། ཐེངས་ཤིག ཉིན་གུང་གི་ངལ་གསོ་མཚམས་སུ་ངས་རོལ་དབྱངས་ཁང་གི་གཞས་ཚིག་བཀོད་པའི་ཤོག་ལྷེ་ཞིག་ལ་ལྟ་བཞིན་ཁོང་ལ། ཨ་ཕ། འདི་ནི་ཧྥ་རན་སིའི་སྐད་མིན་ལ་ཨི་ཊ་ལིའང་མིན་པས་འདི་ལ་ཊིན་རེད་ཅེས་བརྗོད་དུས། ཨ་ཕས་ནོར་མི་འདུག དེས་ན་ཁྱོད་ཀྱིས་བསམ་བློ་ཞིག་ཐོངས་དང། དེའི་ནང་དོན་ཅི་ཞིག་རེད་ཅེས་སྐབས་དང་བསྟུན་ཏེ་བདག་གི་བློ་སྒོ་ཕྱེས། ངས་ཧྥ་རན་སི་དང་ཨི་ཊ་ལིའི་སྐད་གཉིས་གཞིར་བྱས་ཏེ་རིགས་བསྒྲེས་པས་རྩ་བའི་ཆ་ནས་གོ་བ་རོབ་ཙམ་ལོན་སོང། དེ་བས་ངས་དགའ་སྤྲོའི་ངང་ཨ་ཕ་ལགས། གལ་སྲིད་ལ་ཊིན་གྱི་སྐད་དེ་འདི་འདྲའི་སླ་མོ་ཞིག་ཡིན་ན་ངས་མྱུར་དུ་སྦྱང་ན་འདོད་ཅེས་བརྗོད་པ་ཡིན།
   སྐབས་དེར་བདག་ལ་ཊིན་གྱི་སྐད་ཡིག་སློབ་པའི་སྤྲོ་སེམས་ཀྱིས་མྱོས་པས། བྱང་ཆུབ་པའི་ད་ལྟའི་ཧྥ་རན་སི་དང་ཨི་ཊ་ལིའི་སྐད་ཡིག་གཉིས་གཞིར་བཞག་སྟེ་བལྟས་ན། ལ་ཊིན་གྱི་སྐད་ཡིག་སློབ་རྒྱུ་དེ་དཀའ་ཚེགས་ཅན་ཞིག་མིན་པ་འདྲ། དེ་བས་བདག་གི་རེ་སྐུལ་འོག་ཨ་ཕས་ལ་ཊིན་གྱི་སྐད་ཡིག་འཆད་ཁྲིད་བྱེད་པའི་མགོ་བཙུགས། ནམ་ཞིག་ཐབས་ལམ་དེ་ངེས་ཚེ་རིག་པ་དེ་སྤུ་གྲི་ལྟར་རྣོ་ངར་ལྡན་པས་ཟླ་བ་དགུ་ལས་མ་འགོར་བར་ལ་ཊིན་གྱི་སྐད་དེ་ཤེས་བྱུང། དེའི་རྗེས་ཡང་ངས་དབྱིན་ཡིག་སྦྱོང་བའི་མགོ་ཚུགས་ཤིང་དབྱིན་ཡིག་སྦྱངས་ཚར་རྗེས་གྷི་རིགས་སྐད་སྦྱངས་པས་སྔ་མར་ཟླ་གསུམ་དང་ཕྱི་མར་ཟླ་བ་དྲུག་སྤྱད།
   གོང་གསལ་གྱི་སྐད་ཡིག་འདི་དག་ལ་སྲ་བརྟན་གྱི་རྨང་གཞི་བཙུགས་པས་གྷི་རིགས་སྐད་ཡིག་སློབ་དུས་ངས་དཀའ་ངལ་ཏིལ་ཙམ་ཡང་མ་མྱངས། བརྒྱུད་རིམ་འདི་དག་རྩ་བའི་ཆ་ནས་བརྩམས་ཆོས་ཆེན་མོ་ཀློག་འདོན་བྱེད་པའི་བརྒྱུད་རིམ་ཞིག་རེད། བདག་གིས་གྷི་རིགས་སྐད་ཡིག་སྦྱོང་དུས་རྒྱུན་སྤྱོད་ཀྱི་ཚིག་གསར་བློ་འཛིན་བྱས་ཏེ་སྦྱངས་པ་ཡིན། ཨ་ཕས་བདག་ལ་གྷི་རིགས་དང་འཇར་འགྱུར་གྱི་ཤོག་བྱང་བཟོས་ཤིང་རྒྱུན་སྤྱོད་ཀྱི་ཚིག་གསར་རྣམས་ངས་ཐོག་མར་ཤོག་བྱང་འདི་དག་ལས་རྟོགས་པ་རེད།
   ཚིག་གསར་དུ་མ་བློར་ངེས་རྗེས་ངས་དེ་མ་ཐག་སྒྱུར་རྩོམ་ཀློག་པའི་མགོ་བརྩམས། ཆེས་ཐོག་མར་བདག་གིས་ཡི་སཱོའི་གཏམ་རྒྱུད་དང་དེར་མཐུད་ནས་ཡང་སི་ནི་ཧྥིན་གྱིས་བརྩམས་པའི་དམག་ཞུགས་ཟིན་ཐོ་བཀླགས། ཨ་ཕས་སྐད་རིགས་དུ་མ་མཉམ་དུ་འཆད་ཁྲིད་བྱས་པ་བཞིན་བརྡ་སྤྲོད་དེ་གོ་རིམ་ལྡན་པའི་ངང་མ་ཁྲིད་ཅིང་དགོས་མཁོ་དང་འཚམ་པའི་སློབ་ཚན་དུས་ངེས་མེད་དུ་འཁྲིད་ཀྱིན་ཡོད།
  ཨ་ཕས་བྱ་བ་སྒྲུབ་དུས་ང་རང་སྒྲོག་ཙེའི་འཁྲིས་སུ་བསྡད་དེ་སློབ་སྦྱོང་བྱེད་དུ་བཅུག། སྐབས་ཐོག་དེར་འཇར་མན་དུ་གྷི་རིགས་དང་ལ་ཊིན་ཤན་སྦྱར་གྱི་ཚིག་མཛོད་ལས་གྷི་འཇར་ཚིག་མཛོད་མེད་པས་བདག་གིས་གྷི་རིགས་སྐད་ཡིག་སྦྱོང་དུས་ཡིག་རྡོག་རེ་རེ་བཞིན་ཨ་ཕར་མི་འདྲི་ཀ་མེད་བྱུང། དེ་ལྟར་ལས་ཀའི་བྲེལ་འཚུབ་ཇི་ལྟར་ཆེ་ཡང་ཁོང་ཐུགས་བརྒྱལ་མི་བཞེངས་པར་བདག་གིས་བཏོན་པའི་དྲི་བར་ཕྱོགས་གཅིག་ནས་ངང་རིང་གཟབ་ནན་གྱིས་ལན་འདེབས་དང་། ཕྱོགས་གཞན་ནས་ཁོང་རང་ཉིད་ཀྱི་ལས་དོན་སྒྲུབ་བཞིན་ཡོད།
   འདི་ལྟར་ཐོས་བསམ་བྱས་ཏེ་འོང་བས་བདག་གིས་ཞི་ལོ་ཏོ་ཏུག་གི་ལོ་རྒྱུས་རིག་པའི་བརྩམས་ཆོས་དང། སིག་ནའོ་ཧྥུན་གྱི་རིག་མཛོད་དང། སོག་རེ་ཊིའི་གསུང་ཟིན། ཐེ་འོ་ཆི་ནི་སིས་དང་ལེར་ཨར་ཆིག་སི་གཉིས་ཀྱི་མཚན་ཉིད་མཁས་པའི་རང་རྣམ་ཆེད་བསྒྲིགས། ད་དུང་ལོ་ཞའི་ཨང་གི་བརྩམས་ཆོས་བཅས་ཀྱང་བཀླགས་པ་ཡིན།
སྐད་རིགས་འདི་དག་སྦྱངས་ཚར་རྗེས་ང་རང་ལོ་དགུ་ལ་སོན་མ་ཐག་ཡིན་ཞིང་དེ་དུས་ངས་ཧོ་མེར་དང་། པོ་ལོ་ཐ་ཧག་ཝེ་ཅི་ཨར། ཞི་སེ་ལོ། འོ་ཞ། ཧྥུ་ལོ་ལེ་ཨང། ཧྥེ་སི་ཐན་ལོ་ཆེ། ཞི་ལེ་སོགས་འཇར་མན་དང། ཧྥ་རན་སི། ཨི་ཊ་ལི། གྷི་རིགས་སོགས་རྒྱལ་ཁབ་རྣམས་ཀྱི་རྩོམ་རིག་པའི་བརྩམས་ཆོས་ཀློག་ཐུབ་ཡོད།
སྤྱིར་མི་རྣམས་གཞན་སྐད་སློབ་པར་སྙིང་སྟོབས་དང་ངར་ཤུགས་མེད་པས་རྒྱལ་ཁབ་དྲུག་གི་སྐད་རིགས་ལ་ཐོགས་རྡུགས་བྲལ་བ་ཞིག་བྱ་རྒྱུ་ནི་ཁོ་ཚོར་མཚོན་ན་མི་ཚེ་ཧྲིལ་བོའི་དཀའ་སྤྱད་ཀྱིས་ད་གཟོད་ལེགས་འགྲུབ་འབྱུང་བའི་གྲུབ་འབྲས་ཤིག་རེད། ཡིན་ནའང་བདག་ནི་ཨ་ཕའི་ཡང་དག་གི་ལམ་སྟོན་འོག་ལོ་ན་དགུར་སོན་དུས་རྒྱལ་ཁབ་དྲུག་གི་སྐད་ཡིག་ལ་ཐོགས་རྡུགས་མེད་པར་གྱུར་པས་འདི་ཉིད་རྫུ་འཕྲུལ་ཞིག་ཏུའང་བརྩིས་ཆོག འོན་ཏེ་རྫུ་འཕྲུལ་འདིའི་འབྱུང་རྐྱེན་ནི་བྱེད་ནུས་ལྡན་ལ་ཚན་རིག་དང་མཐུན་པའི་ཐབས་ལམ་དེ་རེད། ཨ་ཕས་བདག་ལ་གཞན་སྐད་ཁྲིད་པའི་གོ་རིམ་ཁྲོད་གཤམ་གསལ་གྱི་ཉམས་མྱོང་དུ་མ་ཕྱོགས་སྡོམ་བྱས།

༡། ཉན་པ་ནི་གཞན་སྐད་སློབ་པའི་ཆ་རྐྱེན་གལ་ཆེན་ཞིག་ཡིན།

ད་ལྟའི་ལ་ཊིན་གྱི་སྐད་ལ་ཆ་བཞག་ཚེ་དེ་ནི་སློབ་ཕྲུག་རྣམས་ཀྱི་རྨང་གཞིའི་ནུས་རྩལ་ཡིན་པ་དང། རིག་པའི་གནས་ལ་ཞིབ་འཇུག་བྱ་འདོད་ཚེ་དེ་དང་ཁ་བྲལ་ཐབས་གཏན་ནས་མེད། ནམ་ཞིག་ལ་ཊིན་གྱི་ཡི་གེ་ཤེས་ན་ཧྥ་རན་སི་དང། ཨི་ཊ་ལི། སི་ཕན་བཅས་ཀྱི་སྐད་ཡིག་སློབ་རྒྱུ་ཧ་ཅང་སླ་པོ་རེད། འོན་ཀྱང་སློབ་ཕྲུག་རྣམས་ལ་ཊིན་གྱི་སྐད་ལ་ཧ་ལམ་སུན་སྣང་སྐྱེས་འདུག འདི་ལྟ་བུའི་གནས་ཚུལ་བྱུང་བའི་རྒྱུ་རྐྱེན་ནི་ཨ་ཕས་ཁོ་ཚོས་ལ་ཊིན་གྱི་སྐད་ཡིག་སློབ་པའི་རྨང་གཞི་བརྟན་པོ་ཞིག་བཙུགས་མེད་པར་སྙམ་ཞིང་གནས་ཚུལ་འདིར་བརྟེན་ནས་ཨ་ཕས་བདག་ལ་ལ་ཊིན་གྱི་སྐད་ཡིག་སློབ་པའི་རྨང་གཞི་འཛུགས་པར་གྲ་སྒྲིག་ཆ་ཚང་ཞིག་བྱས། དེ་བས་ང་རང་འགུལ་སླེ་ནང་དུ་སྡོད་པའི་དུས་ནས་བཟུང་ཨ་ཕས་བདག་ལ་ལ་ཊིན་གྱི་སྐད་ཡིག་བསླབ་པའི་མགོ་ཚུགས།
རྣམ་པ་ཚོས་བདག་གི་ཨ་ཕའི་སྒྲུབ་སྟངས་དེ་སྔ་ཕྱི་འགལ་ཟླ་རེད་སྙམ་པའི་མོད་ལ་ཡ་མཚན་པའི་ངང་འགུལ་སླེ་ནང་བསྙལ་ཞིང་ཟ་ཉལ་ལས་ཅི་ཡང་མི་ཤེས་པའི་བདག་ལ་ཇི་ལྟར་ཁྲིད་པ་ཡིན་ནམ་སྙམ་ངེས། དོན་དངོས་སུ་ཤིན་ཏུ་སྟབས་བདེ་སྟེ་ཁོས་ང་རང་ལ་ཉན་དུ་བཅུག་པ་རེད། རྒྱུ་མཚན་ནི་ཁྱེའུ་རྣམས་མིག་གིས་ལྟ་བ་ལས་རྣ་བས་ཉན་པར་མཁས་ཕྱིར་ཁོས་ཉན་པ་དང་ཐོས་པའི་ཐབས་ཤེས་ལ་བརྟེན་ནས་བདག་ལ་ལ་ཊིན་གྱི་སྐད་ཁྲིད། ཨ་ཕས་སྔོན་ཆད་བདག་ལ་འདི་ལྟར་བརྗོད་མྱོང་སྟེ་ནམ་རྒྱུན་ང་རང་གཉིད་ལས་སད་དེ་སེམས་ཁམས་ཅུང་ཙམ་སྐྱིད་ལ་བབས་པའི་སྐབས་སུ་ཁོའི་དྭངས་ཤིང་གསལ་ལ་འཇམ་ཞིང་མཉེན་པའི་སྐད་གདངས་ཀྱིས་བེ་ཅི་ཨར་གྱི་<<ཨན་ལིས་ཆིས་སིས་>>བདག་ལ་གྱེར་འདོན་བྱས་ཤིང་འདི་ནི་ཕུལ་དུ་བྱུང་བའི་དོན་བརྗོད་སྙན་ངག་ཅིག་ཡིན་པར་མ་ཟད། ཡིད་དུ་འོང་བའི་གཉིད་འགུག་གི་རོལ་དབྱངས་ཤིག་ཀྱང་རེད། དེ་དུས་བདག་རོལ་དབྱངས་དེར་ཤིན་ཏུ་དགའ་བས་དུས་རྒྱུན་ཉན་གྱིན་ཉན་གྱིན་རྨི་ལམ་གྱི་ཞིང་ཁམས་སུ་ལོག་འགྲོ། འདི་ལྟར་རྨང་གཞི་ལེགས་པོ་ཞིག་ལྡན་པས་བདག་གིས་ལ་ཊིན་གྱི་སྐད་ཡིག་སློབ་དུས་ལྷོད་བག་ལྡན་པའི་ཁར་<<ཨར་ལིས་ཆིས་སིས་>>ཀྱང་མགྱོགས་མྱུར་ངང་བློ་འཛིན་ཐུབ་སོང།
སློབ་ཕྲུག་རྣམས་ལ་ཊིན་གྱི་སྐད་ཡིག་ལ་སུན་སྣང་སྐྱེ་བའི་རྒྱུ་ནི་སློབ་གྲྭའི་ནང་པར་རིས་དང་གཏན་འབེབས་ཀྱི་སྒྲིག་སྲོལ་སྤྱད་དེ་ལ་ཊིན་གྱི་སྐད་ཡིག་ཁྲིད་པའི་ཐབས་ལམ་དེའི་རྐྱེན་འབའ་ཞིག་ཡིན་པས་འདི་ལྟ་བུའི་ཆིག་རྐྱང་གི་ཐབས་ལམ་ལ་སྐྱོན་བརྗོད་བྱ་འོས། ང་རང་ལོ་བརྒྱད་ཀྱི་སྐབས་སུ། ཐེངས་ཤིག་ངས་ལ་ཊིན་གྱི་སྐད་ཡིག་གི་དགེ་རྒན་ཞིག་ལ་ལབ་གླེང་བྱས་མོད་དགེ་རྒན་འདིས་ཅི་ཡང་གོ་མ་ཐུབ། འདིའི་རྒྱུ་མཚན་ཅིའི་ཕྱིར་ཞེ་ན། དེ་ནི་ཁོས་ཉན་ཐོས་ཀྱི་ནུས་པར་སྣང་འཇོག་མ་བྱས་པའི་རྐྱེན་རེད། སློབ་གྲྭར་ལ་ཊིན་གྱི་སྐད་ཡིག་ཁྲིད་པའི་ཉེས་སྐྱོན་ཞིག་ནི་ལ་ཊིན་གྱི་སྐད་ཡིག་སྦྱངས་མྱོང་བའི་མི་ཡིས་དཔེ་ཆ་ཁོ་ནར་ལྟ་བ་ལས་སྨྲ་མི་ནུས།

༢། བློ་འཛིན་དགོས་པར་མ་ཟད་ལྷག་པར་དུ་སྦྱོང་བརྡར་མང་བོ་བྱ་དགོས།

གཞན་སྐད་སློབ་པར་མིང་ཚིག་འགའ་བློ་རུ་ངེས་པར་བྱ་དགོས་ལ་དེ་ལས་ཀྱང་གལ་ཆེ་བ་ནི་སྦྱོང་བརྡར་བྱ་རྒྱུ་དེ་རེད། སྦྱོང་བརྡར་གྱི་ཁྲོད་ནས་བྱེད་ནུས་ལྡན་པའི་ངང་སློབ་སྦྱོང་བྱ་ཐུབ། བདག་གི་ཨ་ཕས་བརྡ་སྤྲོད་རིག་པ་དེ་གོ་རིམ་ལྡན་པའི་ངང་མི་ཁྲིད་ཅིང་ཁོའི་བསམ་པར་གལ་ཏེ་ཁོང་གིས་ཁྲིད་ནའང་བདག་གིས་ཧ་མི་གོ་བར་སྙམ། དྲང་མོར་བརྗོད་ཚེ་དར་མ་རྣམས་ཀྱིས་གཞན་སྐད་སློབ་སྐབས་བརྡ་སྤྲོད་དེ་མ་རྩ་བྱས་ན་ཕན་འབྲས་ལྡན་མོད་བྱིས་པ་ཚོར་དེའི་ལྡོག་ཕྱོགས་ཀྱི་ཐབས་ལམ་སྤྱོད་དགོས། ཅིའི་ཕྱིར་ཞེ་ན། བྱིས་པ་སུ་དང་གང་ཡིན་རུང་སོ་སོའི་ཕ་སྐད་དེ་འདི་ལྟ་བུའི་ཐབས་ལམ་སྤྱད་དེ་སྦྱངས་པ་ཡིན།
   སྐད་ཡིག་སློབ་དུས་གོ་བདེ་ལ་ཁ་གསལ་བའི་སྙན་རྩོམ་དེ་བློ་རུ་ཆེས་ངེས་སླ་བས་ཨ་ཕས་ནམ་རྒྱུན་བདག་ལ་སྙན་ངག་རེ་འགའ་ཁྲིད་དེ་སྐད་ཡིག་འདི་ལྟ་བུར་རྒྱུས་མངའ་ཡོད་པའི་ཚོར་སྣང་ཞིག་འཇོག་གིན་ཡོད། དེ་ལྟར་རྩ་བའི་ཤེས་བྱ་དུ་མ་ཁོང་དུ་ཆུད་ཚེ་བདག་ལ་དེ་དག་ཉིན་རྒྱུན་འཚོ་བའི་ནང་བེད་སྤྱོད་བྱེད་པའི་རེ་སྐུལ་བྱེད། ནམ་ཞིག་ཡབ་ཆེན་གྱིས་བདག་ལ་སྐད་ཡིག་དེ་འདྲ་ཁྲིད་ཚེ་ཁོང་གིས་རྟག་ཏུ་སྐད་ཡིག་དེས་བདག་ལ་གླེང་མོལ་བྱེད་ལ་གལ་ཏེ་ངས་བཤད་མ་ཤེས་པའི་གནས་ཚུལ་དང་འཕྲད་དེ་ཁོང་ལ་འཇར་མན་གྱི་སྐད་བཤད་པ་ན་ཁོས་ཡ་མེད་ངང་ངས་བརྗོད་འདོད་པའི་སྐད་ཆ་དེ་རང་ནུས་རྩལ་སྤྲུགས་ཀྱིས་བཤད་དུ་འཇུག དེ་དང་ལྷན་དུ་ད་དུང་སྐད་ཡིག་དེའི་དཔེ་དེབ་རྣམས་བལྟ་རུ་འཇུག རྒྱུ་མཚན་ནི་སྐད་རིགས་ཤིག་སྤུས་དག་ངང་སྦྱོང་བའི་ཆེས་མཆོག་གྱུར་གྱི་ཐབས་ལམ་ནི་སྐད་ཡིག་དེའི་ནང་གི་དཔེ་ཆ་གོ་བ་ལེན་ཐུབ་པ་བྱ་རྒྱུ་དེ་ཡིན་ལ་སྐད་ཡིག་གང་ཡིན་རུང་དེའི་ཉིང་ཁུ་དེ་དཔེ་ཆའི་ནང་ན་ཡོད། རྒྱུས་མེད་པའི་ཚིག་གསར་ལ་ཐུག་དུས་ཁོས་ང་རང་ལ་ཚིག་མཛོད་བསྔོག་ཏུ་འཇུག དེ་ལྟར་ཐོག་མར་རྒྱུན་སྤྱོད་ཀྱི་ཚིག་གསར་འགའ་ཤེས་པས་ཡང་དང་བསྐྱར་དུ་ཚིག་མཛོད་བསྔོག་ཅིང་ཕྱིས་སུ་སྐད་ཡིག་དེར་བྱང་ཆ་ཐོན་པས་ཚིག་མཛོད་སྔོག་ཐེངས་ཀྱང་ཇེ་ཉུང་དུ་ཕྱིན།
   འདི་ལས་གཞན་ཨ་ཕས་བདག་ལ་ཕྱི་གླིང་བའི་བྱིས་པར་ཡིག་འབྲེལ་བྱེད་དུ་བཅུག ཐོག་མར་ཕྱི་གླིང་གི་གྲོགས་པོ་འགའི་བྱིས་པ་དང་རྗེས་སུ་དེ་ལས་ཀྱང་མང་བར་གྱུར། དེ་ལྟར་ངས་གྷི་རིགས་ཀྱི་སྐད་ཡིག་སློབ་དུས་གྷི་རིགས་ཀྱི་བྱིས་པ་ཞིག་ལ་འཕྲིན་ཡིག་འབྲི་བའི་མགོ་བཙུགས་ཤིང་ཅང་མ་འགོར་བར་གྷི་རིགས་ནས་ཡིག་ལན་འབྱོར་བས་ང་རང་དགའ་སྤྲོ་ཚད་མེད་ཅིག་སྐྱེས་སོང། འདི་ནས་བཟུང་ང་རང་གྷི་རིགས་ལ་སྤྲོ་སེམས་འཕེལ་བས་གྷི་རིགས་དང་འབྲེལ་ཡོད་ཀྱི་དཔེ་དེབ་མང་བོ་ཞིག་བཀླགས་པ་ཡིན། དེར་མཐུད་ནས་ངས་ཨི་ཊ་ལི་དང་ཨིན་ཇུའི་བྱིས་པར་ཡང་ཡིག་འབྲེལ་བཙུགས་པས་རྒྱལ་ཁབ་འདི་དག་ལའང་སྤྲོ་སྣང་བྱུང་བས་དགའ་དགའ་སྤྲོ་སྤྲོའི་ངང་ཁོ་ཚོའི་ས་ཁམས་དང་ཡུལ་སྲོལ་གོམས་གཤིས་ལ་ཞིབ་འཇུག་བྱས་ལ་ཡིག་འབྲེལ་གྱི་བརྒྱུད་རིམ་ཁྲོད་བདག་གི་གཞན་སྐད་ཀྱི་ཆུ་ཚད་ཀྱང་ཚད་ངེས་ཅན་ལ་བསླེབས།

གླིང་བཞིའི་ཚད་དེང་རབས་ལུགས་སུ་བཤད་པ།

            
འཇིག་རྟེན་ཕན་ཞུགས་སྲུང་བ་གཅིག་ཉིད་ཉག་གཅིག་དཔའ་བ་ཁྱེད་ཉིད་དེ།།
གཉིས་པ་མེད་ཅིང་གཉིས་སུ་མི་གསུང་ཞི་གནས་ལྷག་མཐོང་གིས་བཞུགས་པ།།
རིག་གསུམ་གསལ་ཞིང་བསླབ་གསུམ་ལེགས་བསླབས་དུལ་གནས་གསུམ་གྱི་གཞི་ལ་མཁས།།
ཆུ་བོ་གཞི་བརྒལ་རྫུ་འཕྲུལ་རྐང་བཞིའི་གཞིར་གནས་བསྡུ་དངོས་བཞི་ལ་སྦྱངས།།
ཡན་ལག་ལྔ་སྤངས་འགྲོ་ལྔ་ལས་འདས་ཕུང་ལྔ་བདག་མེད་ཉིད་སྟོན་ཞིང་།།
བྱང་ཆུབ་ཡན་ལག་བདུན་གྱི་མེ་ཏོག་བསྣམས་ཤིང་འཕགས་པའི་ནོར་བདུན་སྟོན།།
འཇིག་རྟེན་ཆོས་བརྒྱད་དྲི་ཙམ་མ་གོས་ལམ་གྱི་ཡན་ལག་བརྒྱད་སྟོན་མཁན།།
སྙོམས་འཇུག་གསུམ་གསུམ་དགུ་ལ་མཁས་ཤིང་མནར་སེམས་དངོས་དགུ་ལ་བྱང་བ།།
སྟོགས་བཅུ་མངའ་ཞེས་སྙན་པའི་གྲགས་པ་ཕྱོགས་བཅུར་རྒྱས་པ་དེ་ལ་འདུད།།
ཞེས་མཆོད་པར་བརྗོད་པའི་མེ་ཏོག་སྔོན་དུ་གཏོར་ཏེ།  དེ་ཡང་སྐབས་སུ་བབ་པའི་གླིང་བཞི་བཤད་པ་ལ།    
རྩ་བར་ཇི་ལྟར་བསྟན་ཚུལ་བཀོད་པ་དང་།  དེ་དག་གི་ཚད་དེང་སང་གི་སྤྱི་ལེ་(ཀིལོམིཊར)ལྟར་ན་ཅི་ཙམ་ཡིན་ཚུལ་བཤད་པ་གཉིས་ལས།དང་བོ་དེ་ཡང་མཛོད་རྩ་བར།  ཉི་ཤུ་གཉིས་སོ་དེ་ལ་ནི།།  འཛམ་བུའི་གླིང་སྟེ་ངོས་གསུམ་ལ།།  སྟོང་ཕྲག་གཉིས་སོ་ཤིང་རྟའི་དབྱིབས།།  གཅིག་ལ་དཔག་ཚད་ཕྱེད་དང་བཞི།།  ཤར་གྱི་ལུས་འཕགས་ཟླ་གམ་འདྲ།། ངོས་གསུམ་འདི་དང་འདྲ་གཅིག་ལ།།  དཔག་ཚད་སུམ་བརྒྱ་ལྔ་བཅུའོ།།  བ་ལང་སྤྱོད་གླིང་ཟླུམ་པོ་སྟེ།། སྟོང་ཕྲག་ཕྱེད་དང་བརྒྱད་ཡིན་ནོ།། དེའི་དབུས་སྟོང་ཕྲག་ཕྱེད་དང་གསུམ།། སྒྲ་མི་སྙན་བརྒྱད་གྲུ་བཞིར་མཉམ།། དེ་ཡི་བར་གྱི་གླིང་བརྒྱད་ནི།།  ལུས་དང་ལུས་འཕགས་སྒྲ་མི་སྙན།།  སྒྲ་མི་སྙན་གྱི་ཟླ་དང་ནི།།  རྔ་ཡབ་དང་ནི་རྔ་ཡབ་གཞན།། གཡོ་ལྡན་དང་ནི་ལམ་མཆོག་འགྲོ།།  ཞེས་པ་ལས་གཙོ་བོར་མངོན་པ་མཛོད་ལུགས་ཀྱི་གླིང་བཞི་དང་སྒོས་སུ་གླིང་ཕྲན་བརྒྱད་གསལ་བོར་བསྟན་ཅིང་།
དེ་ཡང་གཉིས་པར་གླིང་ཆེན་པོ་བཞི་དང་དེའི་རྒྱ་ཁྱོན་དང་མཐའ་སྐོར་རིང་ཚད་སོགས་དེང་སང་གི་ལུགས་སུ་དབབ་པར་བྱའོ།།
དེ་ཡང་། 
༡༽ལྷོ་འཛམ་བུ་གླིང་།  (གླིང་འདི་དབྱིབས་ཇི་ལྟ་བུ་ཞེ་ན།  དེ་ནི་ཤིང་རྟའི་དབྱིབས་སོ།།)
དེའི་དབྱིབས་ནི་ཤིང་རྟའི་དབྱིབས་སོ་ཞེས་པ་ལྟར།  ཟུར་གསུམ་དབྱིབས་ཀྱི་ཤིང་རྟའི་འདྲ་བ་ཞིག་ཡོད་པར་གསུངས་ཤིང་། ངོས་གསུམ་གའི་རིང་ཚད་ནི་དཔག་ཚད་ཉིས་སྟོང་རེ་ཡོད་པ་དང་།  ངོས་གཅིག་ལ་དཔག་ཚད་གསུམ་དང་ཕྱེད་ཀ་ཡོད་པར་བཤད།
དེ་ཡང་དཔག་ཚད་ཉིས་སྟོང་དེ་དེང་སང་གི་སྤྱི་ལེ་དུ་ཙམ་ཞིག་ཡོད་ཅེ་ན།  རྩི་བར་བྱ་སྟེ།  དེ་ཡང་། མཛོད་དུ་དཔག་ཚད་ཀྱི་ཚད་ནི་འདི་ལྟར་གསུངས་པ་སྟེ།  སོར་མོ་ཉི་ཤུ་བཞི་ལ་ཁྲུ།། ཁྲུ་བཞི་ལ་ནི་གཞུ་གང་ངོ་།།  དེ་དག་ལྔ་བརྒྱ་རྣམས་ལ་ནི།།  རྒྱང་གྲགས་དེ་ལ་དགོན་པར་འདོད།།  དེ་བརྒྱད་དཔག་ཚད་ཅེས་བྱའོ།། ཞེས་པ་དང་ཡང་།  ཨ་ལགས་ཚེ་ཏན་ཞབས་དྲུང་ཚང་གིས་ཇི་སྐད་དུ། སོར་མོ་ཉེར་བཞི་ཁྲུ་གང་ལ།།  ཁྲུ་བཞི་གཞུ་འདོམ་གང་ཞེས་བྱ།།  གཞུ་འདོམ་ལྔ་བརྒྱ་རྒྱང་གྲགས་ཏེ།།  རྒྱང་གྲགས་བརྒྱད་ལ་དཔག་ཚད་གཅིག།  ཅེས་པ་གཞིར་བཞག་ན་ནི།  འདི་ལྟར། 
དཔག་ཚད ༡=རྒྱང་གྲགས་༨
དཔག་ཚད༡=གཞུ་འདོམ༤༠༠༠(གཞུ་འདོམ་༥༠༠་xརྒྱང་གྲགས༨)
དཔག་ཚད༡=ཁྲུ་༡༦༠༠༠(ཁྲུ་༤xགཞུ་འདོམ་༥༠༠xརྒྱང་གྲགས༨)
དཔག་ཚད༡=སོར་མོ་༣༨༤༠༠༠(སོར་མོ་༢༤x ཁྲུ་༤་xགཞུ་འདོམ་༥༠༠་xརྒྱང་གྲགས་༨)
གོང་གི་རྩིས་འདི་དག་བརྒྱབས་པ་ལས་དཔག་ཚད་གཅིག་ལ་སོར་མོ་༣༨༤༠༠༠ཡོད་པ་ཤེས་ཐུབ་པ་དང་།   དེ་ནས་སོར་མོ་༣༨༤༠༠༠དེ་ཁྲི་ཙེར་ཕབ་པར་ཐོག་མར་ཚུན་ལ་ཕབ་དགོས་པས།  དེ་ཕབ་ན་འདི་ལྟར་ཏེ།  
སོར་མོ་༣༨༤༠༠༠=ཚུན་༡༩༢༠༠༠
ཚུན་༡༩༢༠༠༠=ཁྲི་ཙེ༡༩༢༠༠
ཁྲི་ཙེ་༡༩༢༠༠=རྨིས་༦༤༠༠
རྨིས་༦༤༠༠=སྤྱི་ལེ༦,༤
དེ་བས་དཔག་ཚད་གཅིག་ལ་དེང་སང་གི་རྨིས་༦༤༠༠་དང་སྤྱི་ལེ་༦,༤་ཡོད་པ་རྟོགས་སླ་བའོ།།
 
དེ་ནས་འཛམ་བུ་གླིང་གི་ངོས་གསུམ་ལ་དཔག་ཚད་སྟོང་ཕྲག་གཉིས་རེ་ཡོད་པ་ངོས་རེ་རེར་སྤྱི་ལེ་དུ་ཙམ་ཡོད་དམ་སྙམ་ན།  འདི་ལྟར་ཏེ།  དཔག་ཚད་༢༠༠༠xསྤྱི་ལེ་༦,༤=སྤྱི་ལེ་༡༢༨༠༠ཡིན་པས།  འཛམ་བུ་གླིང་གི་ངོས་གསུམ་གྱི་རིང་ཚད་ལ་དེང་སང་གི་སྤྱི་ལེ་ཆིག་ཁྲི་ཉིས་སྟོང་བརྒྱད་བརྒྱ་(༡༢༨༠༠)རེ་ཡོད་པ་ཡིན་ནོ།།  ངོས་གཅིག་ལ་དཔག་ཚད་གསུམ་དང་ཕྱེད་ཀ་ཡོད་པས། དེ་ལ་སྤྱི་ལེ་དུ་ཙམ་ཡོད་སྙམ་ན། འདི་ལྟ་སྟེ།  དཔག་ཚད་༣,༥xསྤྱི་ལེ༦,༤=༢༢.༤ །    དེ་བས་དེ་ལ་སྤྱི་ལེ་༢༢,༤ཙམ་ཡོད་པའོ།།
དེ་བས་འཛམ་བུ་གླིང་གི་ངོས་གསུམ་ལ་སྤྱི་ལེ་སོ་སོར་༡༢༨༠༠རེ་ཡོད་པ་དང་།  ངོས་གཅིག་ལ་སྤྱི་ལེ་༢༢,༤་ཡོད་པའོ།།
༢༽ ཤར་ལུས་འཕགས་གླིང་།  (གླིང་འདི་དབྱིབས་ཇི་ལྟ་བུ་ཞེ་ན། ཟླ་གམ་ལྟ་བུའོ།)།
ཤར་ལུས་འཕགས་གླིང་གི་ངོས་གསུམ་འཛམ་བུ་གླིང་དང་འདྲ་བར་བཤད་པས།  གོང་དང་མཚུངས་པ་སྟེ།  ངོས་རེ་རེར་སྤྱི་ལེ་༡༢༨༠༠རེ་ཡོད་ཅིང་།  ངོས་གཅིག་ལ་དཔག་ཚད་སུམ་བརྒྱ་ལྔ་བཅུ་ཡོད་པར་བཤད་པ་དེ་སྤྱི་ལེ་དུ་ཙམ་ཡོད་དམ་སྙམ་ན།  འདི་ལྟ་སྟེ།  དཔག་ཚད་༣༥༠་xསྤྱི་ལེ་༦,༤=༢༢༤༠་སྟེ།  ལུས་འཕགས་གླིང་གི་ངོས་མཐའ་མ་དེ་ལ་སྤྱི་ལེ་༢༢༤༠་ཡོད་པའོ།།
དེ་བས་ཤར་ལུས་འཕགས་གླིང་གི་ངོས་གསུམ་སོ་སོར་སྤྱི་ལེ་༡༢༨༠༠་རེ་ཡོད་ཅིང་།  ངོས་གཅིག་ལ་སྤྱི་ལེ་༢༢༤༠་ཡོད་དོ།།
༣༽ནུབ་བ་གླང་སྤྱོད།   (གླིང་འདི་དབྱིབས་ཇི་ལྟ་བུ་ཞེ་ན། དེ་ནི་ཟླུམ་པོའོ།།)
དེའི་མཐའ་སྐོར་རིང་ཚད་ལ་དཔག་ཚད་བདུན་སྟོང་དང་ལྔ་བརྒྱ་ཡོད་ཅིང་།  འོ་ན་དེ་སྤྱི་ལེ་རུ་ཕབ་ན་དུ་ཡིན་སྙམ་ན་འདི་ལྟ་སྟེ། དཔག་ཚད་༧༥༠༠xསྤྱི་ལེ་༦,༤=༤༨༠༠༠   དེ་བས་མཐའ་སྐོར་རིང་ཚད་ལ་སྤྱི་ལེ་༤༨༠༠༠ཡོད་པ་ཤེས་ཐུབ་ཅིང་།  དབུས་ཀྱི་ཚངས་ཐིག་ལ་དཔག་ཚད་ཉིས་སྟོང་དང་ལྔ་བརྒྱ་ཡོད་པར་བཤད་པས།  སྤྱི་ལེར་ཕབ་ན་འདི་ལྟ་སྟེ།   དཔག་ཚད་༢༥༠༠xསྤྱི་ལེ་༦,༤=༡༦༢༥༠ཡོད་པའོ།།
དེ་བས་བ་གླང་སྤྱོད་ཀྱི་མཐའ་སྐོར་རིང་ཚད་ལ་སྤྱི་ལེ་༤༨༠༠༠་ཡོད་པ་དང་།  ཚངས་ཐིག་ལ་སྤྱི་ལེ་༡༦༢༥༠་ཡོད་པ་རྟོགས་སླའོ།།
༤༽བྱང་སྒྲ་མི་སྙན།  (གླིང་འདི་དབྱིབས་ཇི་ལྟ་བུ་ཞེ་ན།  དེ་ནི་གྲུ་བཞིར་མཉམ་པའོ།།)
གླིང་འདི་གྲུ་བཞི་ཡིན་ཞིང་།  ངོས་རེརེ་དཔག་ཚད་ཉིས་སྟོང་རེ་དང་།  མཐའ་སྐོར་ཀུན་ཏུ་དཔག་ཚད་བརྒྱད་སྟོང་ཡོད་པར་བཤད་པས།  དེ་སྤྱི་ལེ་དུ་ཕབ་ན་ཅི་ཙམ་ཡིན་སྙམ་ན། འདི་ལྟ་སྟེ། 
དཔག་ཚད་༢༠༠༠xསྤྱི་ལེ་༦,༤=༡༢༨༠༠  དེ་བས་ངོས་རེར་སྤྱི་ལེ་༡༢༨༠༠ཡོད་པ་དང་།  མཐའ་སྐོར་རིང་ཚད་ལ་དཔག་ཚད་བརྒྱད་སྟོང་ཡོད་པས།    དཔག་ཚད་༨༠༠༠xསྤྱི་ལེ་༦,༤=༥༡༢༠༠  ཡིན་པས།  བྱང་སྒྲ་མི་སྙན་གྱི་མཐའ་སྐོར་རིང་ཚད་སྤྱི་ལེ་༥༡༢༠༠ཡོད་པའོ།།
དེ་བས་བྱང་སྒྲ་མི་སྙན་གྱི་ངོས་རེ་རེར་སྤྱི་ལེ་༡༢༨༠༠་རེ་ཡོད་པ་དང་།   མཐའ་སྐོར་རིང་ཚད་ལ་སྤྱི་ལེ་༥༡༢༠༠ཡོད་པའོ།། 


རེ་ཞིག་རྫོགས་སོ།།